1. Idoso lihi rhwakacidosa rhwenene?

KA HALI amango ociyumva kubi erhi orhanya lugenda ebintu byajirikana biri embere zirhu, kwa lwiganyo nk’okusherezibwa kw’idîni ly’obunywesi, Gogi w’omu cihugo ca Magogi okurhera abakozi ba Nnâmahanga n’ivita lya Armagedoni? K’onahikire aha wacidosa ntya: ‘Amango ebintu by’okuyobohya byanahike, ka nanabe n’obuhashe bw’okubigeramwo n’obwishwekerezi?’ Erhi akaba ojira entanya za ntyo, enderho Yezu aderha ziyerekinwe omu lwandiko lwirhu lw’omusingi, zanakurhabala bwenene. Yezu abwira abanafunzi bage ntya: “Mumanye murhahangalalaga emirhima. Muyemere Nnâmahanga.” (Yn. 14:1, Mashi Bible) Obuyemere busêzire bwayishikurhabala okulembera ebyo byayisha.

2. Gurhi rhwakasezamw’obuyemere bwirhu, na bici rhwaganirira mw’eci cigabi?

² Rhwanaseza obuyemere bwirhu buhashilembera amazibu gayisha omu kulola gurhi rhulwisa amarhungulo rhurhimanana nago muli gano mango. Erhi rhurhanya gurhi rhujira erhi rhurhimanana n’amarhangulo ga muli gano mango, rhwanaciyigiriza omu njira zihi rhushinganine rhuseze obuyemere bwirhu. Ngasi mango erhi rhulembera amarhangulo, obuyemere bwirhu bunasêre. Oko kwanarhurhabala rhulembere amarhangulo g’amango gayisha. Mw’eci cigabi, rhwaganirira hali ini abanafunzi ba Yezu barhimanine nazo ziyerekine oku bali omu bulagirire bw’okuba n’obuyemere bunji. Na buzinda rhwabona gurhi nirhu rhwakalwisa amazibu gashushine nago ene na gurhi oko kwakarhurheganya oku mazibu g’amango gayisha.

3. Nk’oku biyerekinwe omu Mateyo 6:30, 33, kantu kahi Yezu ayerekine n’obwalagale lugenda obuyemere?

³ Biba biyumvikine kuli nnawabo w’omulala okulonza okuha abantu b’omu mulala gwage ebiryo, emishangi, n’enyumpa. Cikone  okujira ntyo kurhali kulembu muli kano kasanzi kazibu. Muli kanga kaguma kaguma, bene wirhu bakuzirwe oku kazi, na ciru ankaba bali bajira okwabo koshi bayabirwe okubona akandi kazi. Abandi balahire okukola akazi Abakristu barhashinganini okujira. Muli ako kanga koshi, rhulagirire oku buyemere busêzire lyo rhuyemera oku omu njira nguma erhi omu yindi Yehova anarhuha ebi omulala gwirhu gulagirireko. Omu Mahubiri gage g’oku Ntondo Yezu abwizire abanafunzi bage ntyo n’obwalagale. (Osome Mateyo 6:30, 33.) Erhi rhuyemera n’obwalagale oku Yehova arhakarhulekerera, rhunabe n’obuhashe bw’okuhira Obwami bwa Nnâmahanga oku nafasi ntazi omu kalamo kirhu. Erhi rhubona gurhi Yehova arhurhabire omu kurhuha amalagirire g’omubiri, rhunabone oku kobinali hwaba n’obuyemere bwirhu bunasêre bwenene.

4-5. Bici byarhabire mulala muguma gulwise amalibuko lugenda amalagirire gabo g’omubiri?

⁴ Rhulole gurhi mulala muguma gulama e Vénézuela gwacibwinire oburhabale bwa Yehova amango gwarhimananaga n’amazibu gayerekire amalagirire gw’omubiri. Mango maguma, omulala gwabo Castro gwalilamire akalamo kal’igwerhe olugero bulya bakagikola omu ferme yabo. Buzinda, ababisha bayisha bahêka ebirugu byabo byoshi banalibirhak’ogo mulala oku gurhenge eyo munda. Miguel ishe w’ogo mulala, adesire ntya: “Kuhika buno ebiryo rhukola rhulamako binakarhenga omu hishwa hisungunu hy’ebwasa. Nkola nkashenga Yehova arhuhe ebintu rhulagirireko omu lusiku.” Akalamo k’ogo mulala kali kazibu, cikone enyanya z’obuyemere bunji muli Larha wirhu w’obuzigire n’obuhashe bwage bw’okushibirira amalagirire gabo g’omubiri ga ngasi lusiku, omulala gwabo Castro gunaje oku ntimanano y’ecigamba ngasi mango n’okuja omu mukolo gw’amahubiri. Banahire Obwami bwa Nnâmahanga oku nafasi ntanzi omu kalamo kabo, na Yehova anabahe amalagirire gabo.

⁵ Muli ago mazibu gabo goshi, Miguel na mukage Yurai, bagendekire basegeza obwenge bwabo oku kushibirira Yehova abashibirira ngasi mango. Hali amango, Yehova akolesize abandi bene wirhu lyobaha ogo mulala oburhabale bw’olugero balagirireko erhi barhabale Miguel abone ehy’eciraga akola. Omu gandi mango, Yehova anahikirize amalagirire gabo kugerera oburhabale burhenga oku biro byʼetawi. Yehova arhabalekereraga. N’omu ntyo bacibwinire gurhi obuyemere bw’omulala gwabo bwasêzire. Enyuma z’okuganira n’obwalagale kanga kaguma kago-kago Yehova abarhabalagamwo, omwali mukulu, Yoselin, adesire ntya: “Rhuhirwe murhima okucibonera n’obwalagale gurhi Yehova arhurhabire. Nkola nka mubona nka mwîra wani wakantabala ngasi mango.” Ayushwire ntya: “Amarhangulo omulala gwirhu gwageziremo garhurheganyize oku marhangulo madarhi g’amango gayisha.”

6. Gurhi rhwakaseza obuyemere bwirhu erhi akaba rhuli rhwalwisa obukenyi?

⁶ K’oli walwisa amazibu g’obukenyi? Akaba ntyo kobiri, ako kali kasanzi kazibu kuli we. Ciru akaba ntyo, wanakolesa ako kasanzi ly’oseza obuyemere bwawe. Oshenge bwenene, osome n’okurhanya oku nderho Yezu  aderhaga ziri omu Mateyo 6:25-34. Olole enyiganyo za muli gano mango ziyerekine oku Yehova anakashibirira abacihâna omu mikolo y’Ecikristu. (1 Kr. 15:58) Okujira ntyo kwanakuyemeza n’obwalagale oku nk’oku Sho w’omu mpingu arhabalaga abandi bali omu kanga kashushine n’akawe, ko nawe akurhabala. Amanyire ebi olagirireko, anayishi gurhi akakuhikirigizabyo. Erhi wakacibonera gurhi Yehova akurhabire omu kalamo kawe, obuyemere bwawe bwanasêra ly’ohasha okulembera amarhangulo madarhi g’amango gayisha.​—Hab. 3:17, 18.

7. Nk’oku biyerekinwe omu Mateyo 8:23-26, gurhi “omulaba mudarhi bwenene” gwahizire obuyemere bw’abanafunzi omu marhangulo?

⁷ Erhi Yezu n’abanafunzi bage barhimanana n’omulaba omu nyanja, Yezu akolesa ako kasanzi ly’arhabala abanafunzi bage babone omu kanga kahi bal’ilagirire oku buyemere bunji. (Osome Mateyo 8:23-26, Mashi Bible.) Erhi omulaba mudarhi bwenene guli gwagera n’obwarho buli bwahêkwa eyi n’eyi ako kasanzi Yezu ali omw’îro ly’akadodo. Erhi abanafunzi bage bayoboha bwenene bamutula banamubwira oku abacize, Nnawabo abashuza ntya: “Bici birhumire mwayoboha ntya, aba b’obwemere busungunu?” Abo banafunzi boba bakarhanyize oku Yehova agwerhe obuhashe bw’okulanga Yezu n’aba bali boshi lyo barhagizika. Isomo lici rhukuzire aho? Obuyemere busêzire bwanarhurhabala rhulembere “omulaba mudarhi bwenene,” gube mulaba gw’okunali erhi gwa lwiganyo.

8-9. Gurhi obuyemere bwa Anel bwajiremo omu marhangulo, na bici byamurhabire?

⁸ Rhulole gurhi mwali wirhu Anel ociri mulamba, olama e Porto Rico, ageraga omu marhangulo madarhi kugerera obuyemere busêzire. Amarhangulo gage gwali nka “mulaba mudarhi bwenene” gwʼokunali. Ago marhangulo garhonderaga omu mwaka gwa 2017 erhi Kalemera mudarhi ohamagalwa Maria ashabula enyumpa yage. N’oko kwarhuma aheza akazi kage. Anel adesire ntya: “Muli ezo nsiku nzibu, nalibuka bwenene. Cikone naciyigiriza okulangalira Yehova kugerera isala ntanalekega ago malibuko garhume ntacijira ebi nakajijire.”

⁹ Anel aganirire akandi kantu kamurhabire alwise ago marhangulo: okurhumikira. Adesire ntya: “Okurhumikira obulongozi bw’ikubuliro lya Yehova kwantabire ncibiba n’omurhula. Nabwine gurhi Yehova akagintabala kugerera oburhabale bw’ekiroho n’obw’omubiri bene wirhu na bali birhu bakagimpa.” Ayushwire ntya: “Yehova akampa binji kulusha ebi namuhunaga, n’obuyemere bwani bwasêra bwenene.”

10. Gurhi wakajira erhi akaba oli walwisa “omulaba mudarhi bwenene”?

¹⁰ K’oli walwisa “omulaba mudarhi bwenene” omu kalamo kawe? Nkaba ago mazibu gahiziremo okuhikirwa n’obuhanya. Erhi nkaba gwanaba mulaba gwa lwiganyo, nk’obulwala budarhi bukola burhuma waciyumva kubi orhanaciyishi bici wankacijira. Byanahashikana olibuke mango maguma na maguma, cikone orhalekaga oko kulibuka kwarhuma orhalangalira Yehova.  Omuyegerere kugerera isala ly’obwalagale. Oseze obuyemere bwawe omu kurhanya lugenda akasanzi Yehova akurhabalagamo omu mango gageraga. (Enna. 77:11, 12) Wanayemera n’obwalagale oku arhakakulekerera buno ciru n’omu mango gayisha.

11. Bulya gurhi rhushinganine rhuhige okurhumikira bala barhulongoza omw’ikubuliro lya Yehova?

¹¹ Bindi bici byakakurhabala olembere amarhangulo? Nk’oku Anel anasegize, okurhumikira ko kwakarhurhabala. Ociyigirize okulangalira bala Yehova na Yezu baba balangalire. Hali amango abali balongoza bahâna obulongozi rhurhahugûsirwi bwinja. Cikone, anagishe bala barhumikira. Kugerera Akanwa kage na kugerera ebi abakozi ba Yehova bishwekerezi bacibwinire, rhumanyire oku okurhumikira kunacungule akalamo. (Lub. 14:1-4; 2 Nga. 20:17) Orhanye kuli ezo nyiganyo. Okujira ntyo kwanazibuhya omuhigo gwawe gw’okurhumikira obulongozi bw’ikubuliro lya Yehova buno n’omu mango gayisha. (Hb. 13:17) Co cirhumire orhagwerhi ecirhumire coshi-coshi c’okuyoboha omulaba mudarhi bwenene gwayisha hano hofi-hofi.​—Mig. 3:25.

12. Lushangi luhi olwandiko lwa Luka 18:1-8 luhizireho egarhi k’okuba n’obuyemere n’okulembera obubule bw’obushinganyanya?

¹² Yezu alimanyire oku abanafunzi bage balagirire oku buyemere lyo balwisa amazibu g’obubule bw’obushinganyanya. Ly’abarhabala bwalwise oko, abaha olwiganyo luli omu citabu ca Luka. Yezu aganirira olwiganyo lwa mukana muguma walonzagya ahabwe obushinganyanya agendikalakira burhahusa muzuzi muguma orhali mushinganyanya. Aliyemire n’obwalagale oku okujikalakira oyo muzuzi burhahusa kwamulerhera obunguke. Buzinda bw’aho, oyo muzuzi amujirira nk’oku anakagimuhûna. Isomo lici rhukuzire aho? Yehova arhaba mubule w’obushinganyanya. Co carhumaga Yezu aderha ntya: “Ka Nnâmahanga abishogwe bage bamubirikira buca-buyira arhabatwira olubanja?” (Osome Luka 18:1-8.) Buzinda Yezu ayushula nya: “K’amango Mwene-omuntu ayisha anashimane obuyemere en’igulu?” Amango rhuli rhwalwisa obubule bw’obushinganyanya, rhushinganine rhuyerekane kugerera okulembera oku rhugwerhe obuyemere busêzire buli ak’ob’oyo mukana. Omu kuba n’obuyemere bwa ntyo, rhwanayemera n’obwalagale oku Yehova agendekera arhurhabala. Na kandi rhushinganine rhuyemere obuhashe bw’isala. Hali amango amasala girhu gashuzibwa omu njira rhurhal’ilangalire.

13. Gurhi isala lyarhabiremwo mulala muguma gwakoleragwa obubule bw’obushinganyanya?

¹³ Rhulole ebyabwinwe na mwali wirhu muguma ohamagalwa Vero, olama omu République Démocratique du Congo. Vero, iba orhaba Muhamirizi, n’omwali agwerhe myaka 15 erhi bihûna oku bayake omu lugo bal’ilamiremo erhi ababisha babarhera. Erhi bali omu njira, barhogera oku mukange gw’abo babisha babayimanza banalonza okubaniga. Erhi Vero arhondera okulaka, omwali alonza okumuhulisa omu kusalira n’izu linene n’okukolesa izino lya Yehova kanji-kanji mw’er’isala. Erhi ayusa ashenga,  komanda w’abo babisha adosa ntya: “We munyere, indi wakuyigirizagya okusalira?” Ashuza erhi: “Nyama wanyigirizagya, omu kuyiga olwiganyo lw’isala liri omu Mateyo 6:9-13.” Oyo komanda aderha ntya: “We munyere, ogende n’omurhula haguma n’ababusi bawe, na Yehova Nnâmahanga winyu amulange!”

14. Bici byakahira obuyemere bwirhu omu marhangulo, na bici byakarhurhabala lyo rhulembera?

¹⁴ Ebyo byabwinwe bya ntyo birhuyigirizize oku rhurhakagibona nk’isala lirhali lya bulagirire. Cikone gurhi wakajira erhi akaba amasala gawe garhashuzibwi duba-duba erhi omu njira y’ecisomerine? Ak’omukana Yezu aganiriraga omu lwiganyo ahânaga, ogendekere washenga, n’okulangalira oku Nnâmahanga arhakakulekerera n’oku omu kasanzi kalebe n’omu njira ndebe ashuza isala lyawe. Ogendekere washenga Nnâmahanga iroho lyage litagatifu. (Fl. 4:13) Okengere oku hano hofi-hofi akugisha bwenene na ntyo wayishiyibagira amalibuko wageziremo. Omu kulembera amarhangulo n’obwishwekerezi kugerera oburhabale bwa Yehova, wanayishihima amarhangulo gali embere zirhu.​—1 Pt. 1:6, 7.

15. Nk’oku biyerekinwe omu lwandiko lwa Mateyo 17:19, 20, mazibu maci abanafunzi barhimanine nago?

¹⁵ Yezu ayigirizize abanafunzi bage oku obuyemere bwanabarhabala bagendekere bakolera Yehova ciru akaba bali omu mazibu. (Osome Mateyo 17:19, 20.) Omu mango maguma bayabirwa okuhulusa omuzimu, ciru akaba agandi mango bahashaga okujira ntyo. Amazibu gali gahi? Yezu ahugûla oku balilagirire oku buyemere bunji. Ababwira oku kugerera obuyemere bunji, bayishiba n’obuhashe bw’okugendekera kwakolera Yehova ciru akaba bali barhimanana n’amazibu manene gali nka ntondo! Ene nalyo, rhunarhimanane n’amazibu gabonekana nka birhakacihashikana rhugendekere rhwakolera Yehova.

16. Gurhi obuyemere bwarhabire Geydi alembere ebyamuhikiraga n’okuciyumva kubi?

¹⁶ Orhanye lugenda ebyahikiraga Geydi, mwali wirhu muguma olama e Guatemala. Iba wakagihamagalwa Edi, bamulasha erhi bakola bagaluka emwabo enyuma z’okurhenga oku ntimanano y’ecigamba. Gurhi obuyemere bwarhabire Geydi ly’alembera ago mazibu gamuhikiraga? Adesire ntya: “Isala linantabale ntule Yehova omuzigo gwani, n’oko kwo kurhuma naciyumva ndi omu murhula. Nambone kunganaci Yehova anshibirira kugerera bene wirhu b’omu mulala n’abîra bani b’omu cigamba. Okuba na binji by’okujira omu mukolo gwa Yehova kunantabale ntaciyumvagya amalumwa manji na kandi kunantabale ntakagicilibuza lugenda irhondo. Kugerera ebyo byoshi byampikiraga, naciyigirizize oku ciru nakacirhimananaga na marhangulo gahi omu mango gayisha, nayishigahima kugerera oburhabale bwa Yehova, Yezu n’ikubuliro lya Yehova.”

17. Bici rhwakajira erhi rhwakarhimanana n’amazibu gali madarhi nka ntondo?

¹⁷ K’oli walaka enyanya z’okufirwa n’omuzigirwa wawe? Olonze akasanzi k’okuseza obuyemere bwawe omu bulangalire bw’obufûke omu  kusoma emyanzi eri omu Bibliya eganirire abantu bafûzirwe. K’oli walaka enyanya z’okubona hali omuntu w’omu mulala gwawe watenzirwe? Osome ly’obona ebikuyemezize oku ensiku zoshi enjira Nnâmahanga ahânamw’obuhane eba nyinja. Ciru wakarhimanana na mazibu gahi, okolese ako kasanzi omu kuseza obuyemere bwawe. Obwire Yehova oku oli waciyimva koshi. Orhakagiciyegula n’abandi, lubero n’oko ogendekere wayegera bene winyu na bali binyu. (Mig. 18:1) Ojire oku mikolo yakakurhabala olembere, ciru ankaba oli wayijira onali walaka erhi omu mirhenge. (Enna. 126:5, 6) Ogendekeze eprograme yawe y’okusoma Ebibliya, okuja oku ntimanano n’okuja omu mahubiri. Ogendekere warhanya oku migisho minji Yehova akurheganyize. Omu kubona kunganaci Yehova ali akurhabala, obuyemere bwawe bwanagendekera bwasêra.

18. Bici wakajira erhi wakabona oku obuyemere bwawe bwajiremo obuzamba?

¹⁸ Erhi akaba amarhangulo oli wageramo buno erhi aga wageragamo mîra garhumire obuyemere bwawe bwazambanya, oko kurhakuvunaga omurhima. Obone ako kanga nka kasanzi kakuseza obuyemere bwawe. Oshenge nk’oku entumwa za Yezu zashengaga erhi ziderha ntya: “Orhuyushulire obuyemere.” (Lk. 17:5) Na kandi, okarhanya oku nyiganyo rhuganirire mw’eci cigabi. Aka Miguel na Yurai, okengere amango goshi Yehova amakakuha oburhabale. Aka mwali wa Vero na Anel, okashenga Yehova burhahusa, ci bwenene amango orhimanine n’amazibu. N’aka Geydi, akengere oku Yehova anakuha oburhabale kugerera abantu b’omu mulala gwawe erhi abîra. Erhi wakaleka Yehova okurhabale ly’ohashigera omu marhangulo ga muli gano mango, wanayishiyemera n’obwalagale oku ayishikurhabala olembere amarhangulo goshi wakayish’irhimanana nago omu mango gayisha.

19. Bici Yezu aliyemire n’obwalagale, na bici nawe wakayemera n’obwalagale?

¹⁹ Yezu ayerekine kanga kahi na kahi abanafunzi bage bali omu bulagirire bw’okuba n’obuyemere bunji, cikone nta mango abire n’akarhinda oku barhakalembera amarhangulo bakageziremwo omu mango gayisha kugerera oburhabale bwa Yehova. (Yn. 14:1; 16:33) Aliyemire n’obwalagale oku obuyemere busêzire bwayishihashisa ehitû hy’abantu bacunguke amalibuko madarhi gayisha hano hofi-hofi. (Maf. 7:9, 14) Ka wayishiba egarhi k’abo bantu? Kugerera olukogo lwa Yehova lurhashinganinwi, wayishiba mulibo erhi muli gano mango wakakolesa ngasi bulyo ogwerhe ly’oseza obuyemere bwawe!​—Hb. 10:39.