K’omanyire?
Bici byahikire Ninive enyuma z’ensiku za Yona?
OMU myaka ya 670 E.K.K.K., Asuru aba burhegesi bukulu bw’igulu. Esite y’e Enternete y’e British Museum edesire oku Asuru “ahika e Kipro omu eneo y’ebuzikiro bw’izuba n’omu Iran ebushoshokero bw’izuba, ciru hali amango aligwerhe n’ecihugo c’e Misri.” Ninive ko kali kapitale kage, yali vile nkulu bwenene omw’igulu lyoshi. Mw’eyo vile mwali amamonima, ejarde nyinjinja, enyumpa nyinjinja bwenene z’akalibwami n’amabikiro manenene g’ebitabu. Amandiko ga mîra galimayandike oku nkuta z’e Ninive gayerekine oku Mwami Ashurbanipal, n’ak’abandi bami b’e Asuru akagicihamagala “mwami w’igulu.” Muli ago mango, Asuru na Ninive byakagibonekana nka birhakahimwa.
Ecihugo c’e Syrie bo bwali burhegesi bukulu bw’omw’igulu lyoshi muli ago mango
Ciru akaba ntyo, erhi Asuru aba n’obuhashe bunene bwenene, omulebi Sofoniya aleba ntya: “[Yehova, NWT] . . . aherêrekeza Asuru, ashâbûla Ninive yeshi ahinduke irungu lyûmu-lyûmu.” Omu kuyushula owundi mulebi wa Yehova wakagihamagalwa Nahumu aleba ntya: “Muhagule enfaranga! Muhagule ennoro! . . . Olugo lurhacirimo kantu, lwasizirwe bwamwa, lwasherezibwe! . . . Ngasi bankakubona boshi banakûle omulindi baja baderha, mpu: ‘Ninive ashâbusire!’” (Sof. 2:13; Nah. 2:9, 10, NWT; 3:7) Omu kuyumva obo bulebi, nkaba abantu bakajire bacidosa erhi: ‘Ka kobinali oko kwanahikirira? Ka Asuru anahimwa wani?’ Oko kwakabonekana nka kurhakahashikana.
Obudaka bw’e Ninive burhacihingagwa!
Ciru ankaba ntyo, oko bakagibona nka kurhakahashikana kwayish’ihashikana! Okubuzinda bw’emyaka ya 600 E.K.K.K., Asuru ahimwa n’aba Babiloni n’aba Medi. Buzinda bw’aho, Ninive aba biguka arhanacikengerwa! Citabu ciguma cayandikagwa n’ecigusho cihamagalwa Metropolitan Museum of Art in New York cidesire oku “Kurhangira omu mwaka gwa 500 kuhika omu mwaka gwa 1500, eyo vile yoshi yali biguka na ntabo baciyikengire, ebi Ebibliya edesire byone bikola birhuma bakengera Ninive.” Ibikiro liguma ly’ebitabu ly’oku Enternete lihamagalwa société dʼarchéologie biblique liyerekine oku, oku murhondero gw’emyaka ya 1800, “nta muntu walimanyire erhi evile nkulu y’e Asuru yabireho kobinali.” Cikone omu mwaka gwa 1845, muvumbuzi muguma wakag’ihamagalwa Austen Henry Layard arhondera okujira obusagasi lugenda ebiguka bw’e Ninive. Ebiguka byavumbulagwa e Ninive biyerekine n’obwalagale irenge olo lugo lwagwerhe.
Okuhikirira kw’obulebi buganirire Ninive kuzibuhize obulangalire bwirhu bw’oku obulebi Ebibliya elebire lugenda okuhwa kw’amarhegesi ga buno nabo bwanahikirire.—Dan. 2:44; Maf. 19:15, 19-21.
