GURHI ociyumva erhi bakakuhâ amaruba gw’okushagalusa garhenga emw’omwîra wawe? Timoteyo naye bamuhâ amaruba garhengaga emw’omwîra wage Paolo, nirhu rhugamanyire: co citabu ca 2 Timoteyo. Buzira karhinda Timoteyo alonza ahantu hali akahwenyenye ly’asomolola bwinja ago maruba omwîra wage Paolo amurhumiraga. Nkaba Timoteyo akacidosize ntya: ‘Gurhi Paolo ayosire wani? Ka hali amahano ampa lugenda okumpikiriza emikolo bampa? K’aga maruba gantabala ngendekere najira bwinja omukolo gw’amahubiri n’okugendekera kwarhabala abandi?’ Nk’oku rhwayish’ibona, ago maruba galishuzize kw’ago madoso n’agandi madoso Timoteyo akacidosize. Cikone mw’ogu mwanzi, rhwasegeza bintu biguma na biguma bya bulagirire biri mw’ago maruba.

Erhi Timoteyo asoma emistari mirhanzi y’ago maruba, ahugûkwa ho n’aho kunganaci omwîra wage Paolo aba amushibirire. N’obushagaluke boshi Paolo amuhamagala “mugala wani muzigirwa.” (2 Tm. 1:2) Ciru ankaba byanahashikana omu mwaka gwa 65 muli Kano Kasanzi Kirhu (K.K.K.), Timoteyo alikola agwerhe myaka elushire 30 erhi Paolo amuyandikira ago maruba, alikola âli mugula ogwerhe obulenga omu cigamba c’Ecikristu. Âli amakakola na Paolo kasanzi ka myaka elushire ikumi, n’oko kwakarhumire aciyigiriza bintu binji kugerera Paolo.

Timoteyo ahâbwa omurhima omu kuyumva oku Paolo agendekire alembera amazibu alimo n’okuba mwishwekerezi. Paolo ali omu mpamikwa e Roma, banalikola hofi bamunige. (2 Tm. 1:15, 16; 4:6-8) Timoteyo abwîne gurhi Paolo agendekire okuba n’oburhwali boshi, erhi asoma ebi binwa byage: “Co cinarhumire nalembera ngasi kantu.” (2 Tm. 2:8-13, Mashi Bible) Aka Timoteyo, nirhu olo lwiganyo lwinja lwa Paolo lw’okulembera lwanarhuzibuhya.

Paolo ayinginga Timoteyo oku agendekere abona omukolo Nnamahanga amuhâga oku guli gwa ngulo ndarhi. Paolo al’ilonzize Timoteyo ‘azuse [oyasè nka muliro, NWT] engalo Nyamuzinda amushobozagya’ yâli muli ye. (2 Tm. 1:6) Paolo akolesîze oluderho khaʹri·sma erhi aganirira “engalo.” Olo luderho lw’Ecigiriki luganirire engalo bakahâ omuntu orhanal’iyishinganine, kantu orhahânaga kwo nsaranga. Timoteyo ahâbagwa  eyo ngalo amango bacishogaga ye oku aje omu mukolo gwago-gwago guyerekire ecigamba.​—1 Tm. 4:14.

Gurhi Paolo abwîzire Timoteyo ajira n’eyo ngalo? Erhi Timoteyo asoma oluderho “ozuse” erhi kuyasa nka muliro, nkaba arhanya oku oluvu luyocha enyumpa lunakabonekana nka nkunya-kunye kone. Cikone omuntu anacib’iyasa ezo nkunya-kunye zibe ngulumira ya muliro. Dictionnaire nguma edesire oku oluderho lw’Ecigiriki (a·na·zo·py·reʹo) Paolo akolesagya luhugwîre “okusimbûla, kuyasa, kugulumiza,” n’omu njira y’olwiganyo kuli “kushagalukira mukolo mulebe n’okugujira n’obushiru.” Kwo kuli nka Paolo ahanula Timoteyo ntya: ‘Ocihâne n’omurhima goshi omu mukolo gwawe!’ Nkaba ohugûsirwe oku nirhu ene nalyo rhushinganine rhujire ntyo: Rhukwanine rhucihâne n’obushiru boshi omu mukolo gwirhu.

Timoteyo agendekera asoma amaruba omwîra wage amurhumirâga, buzinda ahika oku luderho lwakamurhabire akole bwinja omukolo gwage. Paolo amuyandikira ntya: “Olange omuhako mwinja wabisibagwa” kugerera iroho litagatifu liba muli rhwe. (2 Tm. 1:14) Ogo muhako gwo guhi? Bici babisagya Timoteyo? Omu mulongo guli embere z’aho, Paolo aganirire “ebinwa nkana,” kw’okuderha okuli kubakuyerekinwe omu Mandiko. (2 Tm. 1:13) Timoteyo nka mwigiriza Mukristu alishinganine ayigirize okuli omu cigamba n’oku bantu barhali omu cigamba. (2 Tm. 4:1-5) Na kandi, Timoteyo ahirwaho nka mugula ly’ayabula obuso bwa Nnamahanga. (1 Pt. 5:2) Lyo Timoteyo alanga ebyo bamubisagya, kw’okuderha okuli, alishinganine ayigirize abandi, aligwasirwe alangalire Akanwa ka Yehova n’iroho lyage litagatifu.​—2 Tm. 3:14-17.

Ene nalyo, nirhu barhubisize okuli rhuganirira abandi omu mahubiri. (Mt. 28:19, 20) Rhwanahikira aha rhwaseza buzibu-zibu ogo muhako gw’obulagirire barhubisagya erhi rhwakagendekera rhwasalira n’okuba n’enkomêdu y’okusoma Akanwa ka Nnamahanga ngasi mango. (Rm. 12:11, 12; 1 Tm. 4:13, 15, 16) Na kandi, nkaba rhwanayemererwa okukola nka bagula omu cigamba erhi kuja omu mukolo gw’akasanzi koshi. Okuhirwa omu mukolo gwa ntyo kushinganine kurhujire rhube birhohye n’okurhurhabala rhulangalire Nnamahanga lyo rhuguhikiriza. Na ntyo, rhwanalanga ogo muhako erhi rhwakaguzigira bwenene n’okulangalira oburhabale bwarhenga emwa Yehova.

Arhali Timoteyo yene wâl’ishinganine ajire ogo mukolo, alikwanine akomereze abandi nabo lyo bagujira. Co carhumaga Paolo abwîra Timoteyo ntya: “Birya wayumvagya nakuyigiriza . . ., obibise abantu bakwanine okucikubagirwa, abankahasha nabo okubibwiriza abandi.” (2 Tm. 2:2) Neci, Timoteyo alishinganine ayigirize abandi ebi ayigirizibagwa kurhenga emwa bene wabo Bakristu. Kuli kwa bulagirire ene nalyo ngasi mugula oli omu cigamba ayige olo lwiganyo. Omugula mwinja arhacishwekera yene oku bintu amanyire lugenda mukolo mulebe. Lubero n’oko, anayigirize abandi lyo nabo bahash’ijira ogo mukolo. Arhayoboha mpu bakaba bo bagujira bwinja mpu erhi bakamulya eciraga cage. Co cirhumire, omugula arhakomereza omuntu omu bintu birhangiriza by’akantu byone, cikone analonze okurhabala abantu ali akomereza bahugûkwe ebintu n’okuba n’obuhashe bw’okurhôla emihigo minja, kw’okuderha babe Bakristu bakuzîre kiroho. Omu kujira ntyo, “abantu bakwanine okucikubagirwa” akomerezagya banaba babulagirire bwenene omu cigamba.

Buzira karhinda, Timoteyo ashagalusire bwenene erhi asoma amaruba garhenga emw’omwîra wage Paolo. Rhwanarhanya kunganaci asomire n’okurhanya kw’ago mahano kanji-kanji ly’amanya gurhi agakolesa omu mukolo gwage.

Nirhu ene rhushinganine rhukolese ago mahano. Omu njira nci rhwakajira ntyo? Rhushinganine rhuyase nka muliro ogo muhako rhugwerhe, rhugulange n’okuyereka abandi oku bulenga n’obumanye bwirhu. Nk’oku Paolo abwîraga Timoteyo erhi rhwakajira ntyo, ‘rhwanajira omukolo gwirhu [bwinja].​—2 Tm. 4:5.