1. Gurhi bantu baguma na baguma bakarhanya lugenda okulama ensiku n’amango?

 BANTU banji banakacihangana okulya bwinja n’okujira esporo, lyo baba n’amagala minja. Ciru akaba ntyo, barhalangalira okulama ensiku n’amango. Okuba n’obulangalire bwa ntyo, kwanabonekana nka bilorho na nka kurhashinganini, enyanya z’amazibu galerhwa n’obushosi. Ciru akaba ntyo, Yezu aganirire omu njira nyinja “obuzine bw’ensiku n’amango,” nk’oku biyerekinwe omu Yowane 3:16 na Yowane 5:24.

2. Bici ecitabu ca Yowane cigabi ca 6 cidesire lugenda obuzine bw’ensiku n’amango? (Yowane 6:39, 40)

² Lusiku luguma, omu njira y’ecisomerine, Yezu alisa ehitu hy’ebihumbi by’abantu kugerera emigati n’ensamaki. a Ebyo byali bya kusomeza, cikone ebi aderhaga olusiku lwakulikiraga byali bya kusomeza ciru bwenene. Ehitu hy’abantu hyal’imukulikire e Kapernaumu, hofi n’oku burhambi bw’Enyanja y’e Galilaya, eyo munda ababwira oku abantu bakafûsire n’okushagalukira obuzine bw’ensiku n’amango. (Osome Yowane 6:39, 40.) Lugenda oko, orhanye oku bîra bawe n’abazigirwa bawe bafîre. Enderho za Yezu ziyerekine oku bantu banji bafîre banafûka na we haguma n’abazigirwa bawe, mwanashagalukira obuzine bw’ensiku n’amango. Cikone, banji barhahugûkagwa ezindi nderho za Yezu ziri omu Yowane cigabi ca 6. Leki rhulole ebi Yezu adesire.

3. Kushimbana na Yowane 6:51, bici Yezu afulwîre okubimuyerekire?

³ Ehitu hy’abantu omu Kapernaumu hyabona olushangi egarhi k’emigati Yezu aciyusagya abaha n’amana Yehova  ahâga bashakulûza babo. Kobinali Amandiko gahamagire ago mana ‘mugati gw’empingu.’ (Enna. 105:40; Yn. 6:31) Mw’ako kasanzi Yezu aganirira bintu belebe ehitu hy’abantu hyal’imanyire lugenda amana, ly’abayigiriza enyigirizo z’obulagirire bwenene. Ciru akaba Mungu ye wahânaga amana omu njira y’ecisomerine, abagalyaga bayishir’ifâ. (Yn. 6:49) Lubero n’oko, Yezu acihamagire, ‘mugati gw’okuli kurhenga empingu,’ ‘mugati Nnâmahanga ahâna,’ na “mugati gw’obuzine.” (Yn. 6:32, 33, 35, Mashi Bible) Yezu aganirire olubero lw’obulagirire lwali egarhi kage n’amana. Adesire ntya: “Nie mugati guzine gwahonaga empingu; owalya kuli ogwo mugati alama ensiku zoshi.” (Osome Yowane 6:51.) Abo Bayahudi baba burhe. Gurhi Yezu akadesiremwo oku arhenzire empingu nka “mugati” gulushire amana Mungu ahâga bashakulûza babo omu njira y’ecisomerine? Ly’abarhabala bahugûkwe, Yezu aderha ezi nderho: “Omugati nahâna, gwo mubiri gwani.” Bici al’ilonzize okuganirira? Kuli kwa bulagirire kuli rhwe okuhugûkwa ebi al’ilonzize okuderha, bulya ishuzo liyerekine gurhi obuzine bw’ensiku n’amango bwayish’ihashikana kuli rhwe n’oku bazigirwa birhu. Leki rhulole ebi Yezu alonzagya okuganirira.

OMUGATI GW’OBUZINE N’OMUBIRI GWAGE

4. Bici byarhumaga bantu baguma na baguma bagaya enyanya z’ebi Yezu aderhaga?

⁴ Bantu baguma na baguma b’omu bumvirhiza ba Yezu, bagaya erhi bayumva aderha oku ahâna ‘omubiri gwage gwalerhera igulu obuzine.’ Ka barhanyize oku akabahîre omubiri gwage gw’enyama lyo bagulya, na ntyo kube kulya omuntu? (Yn. 6:52) Olole aga mahugûlo gw’obulagirire Yezu ayushwire: “Akabâ murhaliri omubiri gwa Mwene omuntu murhananywiri omuko gwage, nta buzine bwabâ muli mwe.”​—Yn. 6:53.

5. Bulya gurhi rhwanayemera n’obwalagale oku Yezu arhal’ilonzize okuderha oku abantu bakanywire omuko gwage gw’okunali?

⁵ Kurhenga omu mango ga Nuhu, Mungu ahanza bene bantu okulya omuko. (Murh. 9:3, 4) Enyuma z’aho, Mungu agalukira oko ahanzagya omu Marhegeko ahâga Abaisraheli. Ngasi muntu wakalire omuko al’igwasirwe “akagwe,” erhi kunigwa. (Lev. 7:27) Yezu ayigirizize Abayahudi okurhumikira amarhegeko ga Nnâmahanga goshi. (Mt. 5:17-19) Co cirhumire birhapatini n’obwenge oku akabwizire Abayahudi balye omubiri gwage gw’enyama n’okunywa omuko gwage. Cikone, omu kukolesa ezo nderho abantu barhakag’ilugiyumva, Yezu al’ilonzize okuyigiriza abantu gurhi bakapatamwo obuzine, ko kuderha “obuzine bw’ensiku n’amango.”​—Yn. 6:54.

6. Gurhi rhushinganine rhuhugûkwe enderho za Yezu lugenda okulya omubiri gwage n’okunywa omuko gwage?

⁶ Bici Yezu alonzagya okuyigiriza? Bibonekine n’obwalagale oku Yezu akag’iderha omu njira y’olwiganyo, nk’oku anajiraga embere erhi abwira omukazi Musamariya ntya: “Owanywe oku mishi namuha, arhakayumva nyorha ciru n’eliguma; bulya amishi namuha gamuhindukamwo iriba lyakahululamwo amishi g’obuzine bw’ensiku n’amango.” (Yn. 4:7, 14) b Yezu arhakag’iderha oku omukazi Musamariya akabire n’obuzine bw’ensiku n’amango omu kunywa kone mishi malebe g’okunali. Ko n’oko, arhabwiraga ehitu hy’abantu aganizagya e Kapernaumu oku bakabire n’obuzine bw’ensiku n’amango erhi bakalire omubiri gwage gw’enyama n’okunywa omuko gwage.

 AKANDI KANGA YEZU ADERHAGAMWO ENDERHO ZA MENE ZO

7. Bici bantu baguma na baguma baderha lugenda enderho za Yezu ziri omu Yowane 6:53?

⁷ Bantu baguma na baguma b’amadîni banaderhe oku enderho za Yezu ziri omu Yowane 6:53, lugenda okulya omubiri gwage n’okunywa omuko gwage, luli lwiganyo lugenda Ishega ly’Ebijingo lya Nnawirhu, bulya enyuma z’aho mw’ako kanga, Yezu akolesize enderho za mene zo. (Mt. 26:26-28) Banaderhe oku ngasi muntu wahisire okw’Ishega ly’Ebijingo lya Nnawirhu, ashinganine alye omugati n’okunywa idivayi bigezibwa egarhi k’abantu bayishire. Ka kobinali ntyo? Kuli kwa bulagirire rhumanye erhi kobinali ntyo, bulya ngasi mwaka emiliyoni y’abantu omw’igulu lyoshi enacilunge haguma na nirhu kw’ery’Ishega. Rhwabona embero ziri egarhi k’ebi Yezu aderhaga omu Yowane 6:53 n’ebi aderhaga okw’Ishega ly’Ebijingo lya Nnawirhu.

8. Mbero ndebe zihi ziri egarhi k’akanga Yezu aderhagamwo enderho zage e Yeruzalemu n’ak’aziderhagamwo e Galilaya? (Olole n’enfoto.)

⁸ Leki rhubone embero ibirhi ziri egarhi k’ako kanga kombi. Burhangiriza, mangaci na ngahi Yezu aderheraga enderho ziri omu Yowane 6:53-56? Azibwiraga ehitu hy’Abayahudi e Galiliya omu mwaka gwa 32 Kano Kasanzi Kirhu (K.K.K.). Gwali mwaka muguma embere arhondeze Ishega ly’Ebijingo lya Nnawirhu e Yeruzalemu. Bwa kabirhi, bandi abwiraga enderho zage? Banji omu bumvirhiza bage  e Galiliya, bal’ishibirire bwenene okuhikiriza amalagirire gabo g’omubiri ga kasanzi kalebe kulusha okuhikiriza amalagirire gabo g’ekiroho. (Yn. 6:26) Kobinali, erhi Yezu aderha kantu kalebe bayumvagya kali kazibu okuhugûkwa, baheza duba-duba obuyemere muli ye. Ciru na banafunzi bage balebe, baleka okumukulikira. (Yn. 6:14, 36, 42, 60, 64, 66) Abo bantu bali lubero n’entumwa nyishwekerezi 11 za Yezu zali ho omu mwaka gwa 33 Kano Kasanzi Kirhu (K.K.K.) erhi arhondeza Ishega ly’Ebijingo lya Nnawirhu. Ago mango entumwa zage 11 nyishwekerezi zali haguma naye ciru akaba arhali ebi akag’iyigiriza byoshi zahugûsirwe bwinja-bwinja. Lubero na bantu banji ayigirizagya e Galiliya, entumwa zage nyishwekerezi zal’iyemire n’obwalagale oku Yezu ye wali Mugala wa Nnâmahanga wayishaga kurhenga empingu. (Mt. 16:16) Abavuzire omunkwa omu kuderha ntya: “Mwe mwabêzire haguma na nani omu malibuko gani.” (Lk. 22:28) Ezo mbero ibirhi zone ziyerekine oku omu Yowane 6:53, Yezu arhakag’ilonza okuhugûla ebyakabire okw’Ishega ly’Ebijingo lya Nnawirhu. Hali n’ebindi biyerekine ntyo n’obwalagale.

EBI ENDERHO ZA YEZU ZIHUGWÎRE KULI WE

9. Enderho Yezu aderhaga amango g’Ishega ly’Ebijingo lya Nnawirhu, cigusho cihi ziyerekire?

⁹ Omu mango g’Ishega ly’Ebijingo lya Nnawirhu, Yezu ahîre entumwa zage omugati gurhalimwo lwango, anababwira oku gwal’ishushanyize omubiri gwage. Enyuma z’aho abaha idivayi, anababwira oku lyal’ishushanyize ‘omuko gw’endagano.’ (Mk. 14:22-25, Mashi Bible; Lk. 22:20; 1 Kr. 11:24) Ebi Yezu aderhaga lugenda endagano biri bya bulagirire bwenene. Endagano mpyahya ejijirwe n’“Enyumpa y’Israheli [w’ekiroho],” wayish’iba omu “Bwami bwa Nnâmahanga,” c’arhali bene bantu boshi. (Hb. 8:6, 10; 9:15) Entumwa zirhahugûkagwa ebyo mw’ako kasanzi, cikone kasanzi kasungunu enyuma z’aho, zakashîzirwe amavurha kugerera iroho litagatifu n’okuhirwa omu ndagano mpyahya lyo ziba n’enafasi haguma na Yezu omu mpingu.​—Yn. 14:2, 3.

10. Lundi lubero luhi luli egarhi k’ebi Yezu aderhaga amango g’Ishega ly’Ebijingo lya Nnawirhu n’ebi aderhaga e Galiliya? (Olole n’enfoto.)

¹⁰ Ohugûkwe oku ebi Yezu aderhaga amango g’Ishega ly’Ebijingo lya Nnawirhu, byal’iyerekire ‘obuso busungunu.’ Entumwa zage nyishwekerezi zali haguma naye mw’eyo nyumpa ako kasanzi, zo zali ntanzi okuba cigabi c’eco cigusho cisungunu. (Lk. 12:32) Ezo ntumwa n’abandi bantu bakabire mw’eco cigusho enyuma z’aho, bo bal’ishinganine bakalya omugati n’okunywa idivayi. Bo bantu bayish’iba empingu haguma na Yezu. Olo luli lundi lubero egarhi k’ebi Yezu abwiraga entumwa zage amango g’Ishega ly’Ebijingo lya Nnawirhu n’ebi aderhaga embere z’aho e Galilaya. Ebi Yezu aderhaga amango g’Ishega ly’Ebijingo lya Nnawirhu biyerekire ecigusho cisungunu c’abantu cone. Cikone ebi aderhaga e Galilaya biyerekire omubalè munji bwenene gw’abantu.

11. Bici Yezu adesire e Galilaya biyerekine oku arhakag’iganirira ecigusho cisungunu c’abantu?

¹¹ Erhi Yezu ali e Galilaya omu mwaka gwa 32 Kano Kasanzi Kirhu (K.K.K.), bantu banji mw’aba Yezu aganizagya bal’ilonzize abahe ebiryo. Cikone, ababwira bakasegeza obwenge oku kantu kalebe kali ka bunguke bunji bwenene kulusha ebiryo by’omubiri. Aganirira ebiryo byakabahashisize okuba n’obuzine bw’ensiku n’amango. Na Yezu aderha oku, abantu bafîre bakafûsire omu lusiku  luzinda n’okulama ensiku n’amango. Arhakag’iganirira omubalè musungunu gw’abantu bacishozirwe nk’oku ajiraga enyuma z’aho amango g’Ishega ly’Ebijingo lya Nnawirhu. Lubero n’oko, e Galilaya asegize omugisho abantu boshi bakabire nago. Muli ntyo, aderha ntya: “Owalya kuli ogwo mugati alama ensiku zoshi . . . Omugati nahâna, gwo mubiri gwani gwalerhera igulu obuzine.”​—Yn. 6:51. c

12. Bici rhulagirireko lyo rhuba n’obuzine bw’ensiku n’amango?

¹² Yezu arhabwiraga Abayahudi e Galiliya oku ogo mugisho gwakahikire ngasi muntu wal’ilamire erhi ngasi muntu wakacibusirwe. Balya bone ‘balya kuli ogo mugati,’ ko kuderha balya bagwerhe obuyemere muli Yezu, bo bayunguka. Bantu banji ene bahamagalwa mpu Bakristu banaderhe oku bayish’icunguka erhi ‘bakayemera kone [Yezu Kristu]’ n’okumubona nka mucunguzi wabo. (Yn. 6:29) Ciru akaba ntyo, bantu balebe mw’ehyo higusho hy’abantu bal’iyemire Yezu embere bamuyaka. Bici byarhumire bajira ntyo?

13. Bici bihûnyirwe ly’omuntu aba mwanafunzi w’okuli wa Yezu?

¹³ Banji ba mw’eco cigusho Yezu alisagya, bal’igendekire bashagalukira okumukulikira amango goshi akag’ibaha ebi bal’ilonzize. Bal’ishagalukire okubukwa omu njira y’ecisomerine, okuhâbwa ebiryo by’obusha, erhi enyigirizo zal’ipatine n’ebi bakag’ilonza bayumve. Cikone, Yezu ayerekana oku hali ebindi byal’ihûnyirwe ly’abantu baba banafunzi bage b’okunali. Arhayishaga kone hanw’igulu  ly’ahikirigiza abantu amarala gabo g’omubiri. Bal’igwasirwe bayemere omulali gwage gw’“okuja emunda” ali omu kuyemera okurhumikira ngasi kantu ayigirizize.​—Yn. 5:40; 6:44.

14. Bici rhushinganine rhujire lyo rhuyunguka n’omubiri n’omuko gwa Yezu?

¹⁴ Yezu asegize oku eco cigusho cal’ilagirire oku kuba n’obuyemere. Omu bici? Omu buhashe bw’okugombôla bw’omubiri n’omuko gwage akahânyire nterekêro omu mango gashinganine. Obuyemere bwa ntyo, bwali bwa bulagirire kuli abo Bayahudi, bunaciri bwa bulagirire ene. (Yn. 6:40) Kobinali lyo rhuyunguka n’omubiri n’omuko gwa Yezu, nk’oku biganirirwe omu Yowane 6:53, rhushinganine rhube n’obuyemere omu ngombôlo. Obo bulyo buhâbirwe omubalè munji bwenene gw’abantu.​—Ef. 1:7.

15-16. Bintu bihi by’obulagirire rhwayizire omu Yowane cigabi ca 6?

¹⁵ Omwanzi gw’Ebibliya guli omu Yowane cigabi ca 6, guli gwa bulagirire bwenene kuli rhwe n’oku bazigirwa birhu. Guyerekine n’obwalagale oku Yezu anashibirire abantu bwenene. Erhi ali e Galilaya, afumize abalwala, ayigiriza lugenda Obwami, anahikirigiza abantu amalagirire gabo g’okupata ebiryo amango balib’ilagirireko. (Lk. 9:11; Yn. 6:2, 11, 12) N’akantu k’obulagirire bwenene, ayigiriza oku ye “mugati gw’obuzine.”​—Yn. 6:35, 48, Mashi Bible.

¹⁶ Abantu ahamagire “bindi bibuzi” barhalya omugati barhananywa idivayi okw’Ishega ly’Ebijingo lya Nnawirhu lya ngasi mwaka, barhanashinganini bajire ntyo. (Yn. 10:16) Ciru kaba ntyo, banalye omugati gw’obuzine omu njira y’olwiganyo. Banajire ntyo omu kuba n’obuyemere omw’ibeyi ly’enterekêro y’engombôlo. (Yn. 6:53) Lubero n’oko, balya bashinganine okulya omugati n’okunywa idivayi banayerekane oku bajire omu ndagano mpyahya nka bantu bayish’iyima omu Bwami bw’empingu. Co cirhumire, rhube rhuli bashîge amavurha erhi b’omu bindi bibuzi, omwanzi guli omu Yowane cagabi ca 6 guli gwa bulagirire bwenene kuli rhwe. Gusegize obulagirire bw’okuba n’obuyemere lyo rhuyish’iba n’obuzine bw’ensiku n’amango.