1. Kunganaci omugati gwali gwa bulagirire oku bantu baganirirwe omu Bibliya?

 OMUGATI kali kaguma k’omu biryo by’obulagirire abantu baganirirwe omu Bibliya bakag’ilya. (Murh. 14:18; Lk. 4:4) Kobinali gwali gwa bulagirire bwenene, co cirhumire hali amango oluderho lwahindwirwe “akalyo” omu Bibliya luba luhugwîre luderho oku lundi omugati. (Mt. 6:11; Ebj. 20:7) Kandi, omugati cali cigabi c’obulagirire omu bisomerine bibirhi bya Yezu bimanyikine bwenene. (Mt. 16:9, 10) Rhwanasoma cisomerine ciguma muli byo omu Yowane cigabi ca 6. Amango rhuli rhwaganirira ogo mwanzi, rhwalonzamwo amasomo rhwakakolesa ene.

2. Kanga kahi karhumaga haba obulagirire bw’ebiryo?

² Enyuma z’abanafunzi ba Yezu okurhenga omu mubalamo gw’amahubiri, Yezu abahêka omu bwarho bayikira Enyanja y’e Galilaya lyo baj’irhamuka. (Mk. 6:7, 30-32; Lk. 9:10) Bahika ahantu h’akahwenyenye omu eneo y’e Betsaida. Buzira kulegama, ebihumbi by’abantu byahika aho byanabazunguluka. Yezu arhajiraga nk’orhababwini. Omu njira y’olukogo aciha akasanzi ly’abayigiriza lugenda Obwami anafumya abalwala. Bulya bwal’ikola buli bwayira, abanafunzi bacidosa gurhi abo bantu boshi bapatamwo ebi balya. Nkaba baguma na baguma muli bo bal’igwerhe biryo bisungunu, cikone banji bal’ilagirire oku kuja omu bishagala n’okugula ebiryo. (Mt. 14:15; Yn. 6:4, 5) Bici Yezu ajijire?

ECISOMERINE C’OKULUZA EMIGATI

3. Bici Yezu abwizire entumwa zage zijirire ehitu hy’abantu? (Olole n’enfoto.)

³ Yezu abwira entumwa zage ntya: “Nta bulagirire bagwerhe bw’okugenda; mubahe eci balya mwenene.” (Mt. 14:16)  Oko kwabonekine nka kurhankahashikine bulya aho hali balume hofi 5 000. Na kuhiramwo abakazi n’abana, nkaba hakabire bantu 15 000 b’okulisa. (Mt. 14:21) Andreya aderha ntya: “Hano hali omwanarhabana ogwerhe migati irhanu y’iporoji na nfi ibiri. Cikwone birigi bici ebyo kuli ogu mwandu gw’abantu?” (Yn. 6:9, Mashi Bible) Emigati y’iporoji yakag’ilibwa bwenene n’abakenyi n’abandi bantu. N’orhusamaki rhutyu-rhutyu, bakag’irhuhiramwo omunyu n’okurhuyumya. Cikone omubalè oyo mwana-rhabana agwerhe gurhankayenire abo bantu boshi.

4. Bici rhwakaciyigiriza kugerera Yowane 6:11-13? (Olole n’enfoto.)

⁴ Omu kulonza okuyeresa abantu olukogo, Yezu abarhegeka batamale bigusho-bigusho oku lubala. (Mk. 6:39, 40; osome Yowane 6:11-13, Mashi Bible.) Ebibliya edesire oku Yezu avuga Ishe omunkwa enyanya z’eyo migati n’ensamaki. Okuvuga Mungu omunkwa kwal’ishinganine bulya kobinali ye wali nshôko y’ebyo biryo. Kuli kwinja bwenene kuli rhwe okukulikira olwiganyo lwa Yezu omu kukashenga embere rhulye, rhube rhuli rhwene erhi rhuli haguma n’abandi. Enyuma z’aho Yezu ahâna ebyo biryo lyo bigabirwa abantu, n’abo bantu balya banayigurha bwenene. Haba ciru n’ebisigaliza, Yezu arhalonzagya bikabulirwe. Muli ntyo arhegeka oku birhôlogolwe, nkaba lyo biyish’ikolesibwa agandi mango. Yezu arhusigire olwiganyo lugenda oku rhwakakolesa n’obwenge ebintu birhu by’omubiri. Erhi akaba oli mubusi, wanayiga ogu mwanzi haguma n’abana bawe n’okuganirira amasomo mwakaciyigiriza lugenda isala, okuba ba kuyegereza ebigolo, n’okuba bahânyi.

5. Gurhi abantu bajijire lugenda ebi Yezu abajiriraga olo lusiku, na gurhi Yezu ajijire?

 ⁵ Abantu bashagalukira bwenene enjira ya Yezu y’okuyigiriza n’ebisomerine byage. Bulya bal’imanyire oku Musa alaganyize oku Mungu akabahîre omulebi wago-wago, nkaba barhanyize oku Yezu ye wali oyo mulebi. (Lush. 18:15-18) Akaba ntyo, byakabonekine oku akabire murhegesi oshinganine, nkaba wakabire n’obuhashe bw’okuha ishanja lyoshi ebiryo. Enyanya z’oko, ehyo hitu hy’abantu hyalonza ‘okugwarha Yezu mpu bamujire mwami.’ (Yn. 6:14, 15) Yezu aciyemerage oko kube, akacihizire omu by’epolitike y’Abayahudi bali idako ly’oburhegesi bw’Abaroma. K’ayemire? Nanga. Ebibliya edesire oku Yezu ‘acigendera, acifulika oku ntondo.’ Ciru akaba akag’isezibwa n’abandi, arhalonzagya okucihira omu by’epolitike. Eryo liri isomo lya bulagirire bwenene kuli rhwe!

6. Gurhi rhwakayerekanamwo oku rhulonzize okushimba olwiganyo lwa Yezu? (Olole n’enfoto.)

⁶ Kobinali, abandi barharhuhûne rhuluze emigati erhi rhufumye abalwala omu njira y’ecisomerine, barhanalonze okurhujira bami erhi barhegesi b’ishanja. Cikone banarhuyinginga rhucihire omu by’epolitike omu kujira obulondozi (vote) erhi omu kulunga okuboko muntu mulebe bali barhanya oku alerha empindûlo. Cikoki olwiganyo lwa Yezu luli lwa bwalagale. Alahire okucihira omu by’epolitike, ciru anaderha ntya enyuma z’aho: “Obwami  bwani burhali bw’en’igulu.” (Yn. 17:14; 18:36) Ene, Abakristu banajire bwinja omu okuyiga entanya za Yezu n’okukulikira olwiganyo lwage. Rhunalunge okuboko obo Bwami, rhunahâne obuhamirizi, n’okushenga lugenda bo. (Mt. 6:10) Leki rhushub’iganirira omwanzi lugenda Yezu gw’okuhâna emigati omu njira y’ecisomerine n’okubona bindi bici rhwakaciyigiriza.

‘OKUYUMVA BWINJA OGW’ERYA MIGATI’

7. Bici Yezu n’entumwa zage bajijire? (Yowane 6:16-20, Mashi Bible)

⁷ Enyuma za Yezu okulisa ehitu hy’abantu, abwira entumwa zage zirhenge mw’eyo eneo zigaluke e Kapernaumu omu bwarho, anagenda acifulika oku ntondo ly’ayaka ehitu hy’abantu balonzagya okumujira mwami. (Osome Yowane 6:16-20, Mashi Bible.) Erhi entumwa ziri zavugama, omulaba gwazuka, gwanalerha empusi ndarhi n’emivumba minene. Enyuma z’aho, Yezu ayisha emunda bali aja alambagira oku mishi. Anabwira entumwa Petro nayo elambagire oku mishi. (Mt. 14:22-31) Erhi Yezu aja omu bwarho, empusi yarhulirira. Abanafunzi basomerwa banaderha ntya: “Okuli, ocibêrire Mwene Nyamuzinda!” a (Mt. 14:33) Ciru akaba ntyo, barhal’icihugûkwa olushangi egarhi k’eco cisomerine n’ebyabaga embere z’aho erhi alisa ehitu hy’abantu. Marko ayushwire aga mahugûlo: “Abaganda basômerwa bwenene, bulya barhâli bayumvîrhe bwinja ecirhangaza c’ogw’erya migati: obwenge bwabo burhahashaga okumanya kurhi ebyo bidesire.” (Mk. 6:50-52, Mashi Bible) Kobinali, barhahashaga okuhugûkwa buhashe bunganaci Yehova ahîre Yezu ly’ajira ebisomerine. Kasanzi kasungunu enyuma z’aho, Yezu yene aganirira ecisomerine c’emigati anarhuyigiriza erindi isomo.

8-9. Bulya gurhi ehitu hy’abantu hyakag’ilonza Yezu? (Yowane 6:26, 27)

⁸ Ehitu hy’abantu Yezu alisagya, bakag’isegeza obwenge bwabo oku kuhikiriza amalagirire gabo g’omubiri n’amarala gabo. Gurhi bayerekinemwo ntyo? Olusiku lwakulikiraga, babona oku Yezu n’entumwa zage bagenzire. Muli ntyo bashonera omu marho malebe gahikaga kurhenga e Tiberiya, ganabahêka e Kapernaumu lyo baj’ilonza Yezu. (Yn. 6:22-24) Ka bajijire ntyo bulya bal’ilonzize okuyumva binji lugenda Obwami? Nanga. Burhangiriza, bakag’irhanya lugenda amalagirire gabo g’omubiri g’opata emigati. Gurhi rhumanyiremwo ntyo?

⁹ Olole ebyabire erhi ehitu hy’abantu hibona Yezu hofi n’e Kapernaumu. Yezu aderha n’obwalagale oku ebi bakag’ilongereza bwenene kwali kuhikiriza amalagirire gabo g’omubiri ga kasanzi kalebe. Yezu al’ihugûsirwe oku ‘balîre emigati bayigurha’ kugerera “orhulyolyo rhuhwa.” Yezu ababwira bakakolera ahali h’oko “ebiryo biyorha ensiku n’amango.” (Osome Yowane 6:26, 27.) Yezu adesire oku Ishe akahânyire ebiryo bya ntyo. Entanya z’okuderha oku ebiryo byakalongozize ebwa buzine bw’ensiku n’amango zigwasirwe zibe zasomezize abantu! Biryo bihi byakahashisize oko, na gurhi abumvirhiza ba Yezu bakabipasiremwo?

10. Bici abantu bal’ishinganine bajire lyo ‘babona obuzine bw’ensiku n’amango’?

¹⁰ Bibonekine oku abo Bayahudi baciyumvirhe oku byal’ihûnyire bajire bintu bilebe erhi mikolo milebe lyo bashinganana okuhâbwa ebyo biryo. Nkaba barhanyize oku “mikolo” yal’ihûnyirwe n’Irhegeko lya Musa. Cikone, Yezu ababwira ntya: “Omukolo gwa Nnâmahanga kwo kuyemera oyu arhumaga.” (Yn. 6:28, 29) Okuba n’obuyemere muli oyu Nnâmahanga arhumaga kali kantu omuntu al’ilagirireko ly’‘abona obuzine bw’ensiku n’amango.’ Kobinali, embere z’aho Yezu ali amaganira  lugenda oko. (Yn. 3:16-18, 36) N’enyuma z’aho, akabire na binji bya kuganirira lugenda oku rhwakabamwo n’obuzine bw’ensiku n’amango.​—Yn. 17:3.

11. Gurhi Abayahudi bayerekinemwo oku bacir’isegize obwenge oku kuhâbwa ebiryo by’omubiri? (Ennanga 78:24, 25)

¹¹ Abo Bayahudi barhayemeraga enyigirizo za Yezu lugenda “omukolo gwa Nnâmahanga” gwali muhyahya. Badosa Yezu ntya: “Cimanyiso cici warhuyerekaga lyo rhukuyemera?” (Yn. 6:30) Baderha oku bashakuluza babo b’omu mango ga Musa bahâbirwe amana, gakashushanyizibwe n’emigati. (Neh. 9:15; osome Ennanga 78:24, 25, Mashi Bible.) Bibonekine n’obwalagale oku obukengere bwabo bwacikag’isegeza okurhimukwa n’omugati kone. Ciru banayabirwa okubwira Yezu abahugûlire eby’aderhaga enyuma z’aho erhi aganira lugenda “omugati gw’okuli kurhenga empingu,” gwakahânyire obuzine bw’ensiku n’amango, kantu amana garhankajijire. (Yn. 6:32, Mashi Bible) Bal’isegize obwenge bwabo oku malagirire gabo g’omubiri na ntyo barhashibiriraga enyigirizo z’okuli z’ekiroho Yezu akag’ilonza okubayigiriza. Bici rhwakaciyigiriza kugerera ogo mwanzi?

EBISHINGANINE BIBE BYA BULAGIRIRE BWENENE KULI RHWE

12. Gurhi Yezu ayerekinemwo akantu kaba k’obulagirire bwenene?

¹² Omu Yowane cigabi ca 6 muli isomo ly’obulagirire bwenene kuli rhwe. Okurhumikira Mungu n’okuba n’obwîra bwinja haguma naye, kashinganine kabe ko kantu k’obulagirire bwenene kuli rhwe. Okengere oku Yezu aganirire oko erhi ahagalika irhangulo lya Shetani. (Mt. 4:3, 4) N’omu Mahubiri g’oku Ntondo, asegize lugenda omuntu okuhugûkwa amalagirire gage g’ekiroho. (Mt. 5:3) Muli ntyo, rhwanacidosa ntya: ‘K’oku ndama kunayerekane oku nansegeze bwenene obwenge oku kuhikiriza amalagirire gani g’ekiroho kulusha okuhikiriza amalagirire gani g’omubiri?’

13. (a) Bulya gurhi kurhali kubi okushagalukira ebiryo? (b) Burhonde buhi rhushinganine rhusegezeko obwenge? (1 Abakorinti 10:6, 7, 11)

¹³ Kurhaba kubi okushenga enyanya z’ebintu rhulagirireko n’okubishagalukira. (Lk. 11:3) Omukolo muzibu gurhuhashisa ‘okulya n’okunywa’ gunalerhe omwishingo n’“omu nfune za Nyamuzinda birhenga.” (Muh. 2:24; 8:15; Yk. 1:17) Cikone, rhushinganine rhube masu ly’ebintu by’omubiri birhabaga byo by’obulagirire bwenene omu kalamo kirhu. Entumwa Paolo yasegize oko erhi ayandikira Abakristu bal’iyegerire obuzinda bw’amango g’Abayahudi. Aganirire olwiganyo lubi lw’Abaisraheli amango bali omw’irungu, kuhiramwo n’ebi bajiraga erhi bali hofi n’Entondo Sinayi. Arhonda Abakristu lyo ‘balekibâ n’enyifinjo mbî [z’ebintu bibi, NWT]’ aka Abaisraheli. (Osome 1 Abakorinti 10:6, 7, 11.) Abaisraheli baleka okulalikira kwabo bwenene ebiryo kurhume babona nk’ebiryo Yehova akag’ibaha omu njira y’ecisomerine byali ‘bintu bibi.’ (Mib. 11:4-6, 31-34) Erhi baharamya akanina k’enoro, Abaisraheli bayerekana oku bal’ishibirire bwenene okulya, okunywa, n’okucishagalusa kulusha okurhumikira Yehova. (Lub. 32:4-6) Paolo aganirire ebyo byabahikiraga nka burhonde oku Bakristu bal’ilamire embere z’obuzinda bw’amango g’Abayahudi bwabaga omu mwaka gwa 70 Kano Kasanzi Kirhu (K.K.K.). Muli gano mango rhuyegerire obuzinda bw’er’igulu, co cirhumire rhushinganine rhurhôle kwa buzibu-zibu ery’ihano lya Paolo.

14. Okubiyerekire ebiryo, bici rhwakalangalira byaba omw’igulu lihyahya?

¹⁴ Erhi Yezu arhubwira rhukahûna “akalyo kirhu ka ngasi lusiku,” kandi arhuyigiriza rhukasalira obulonza bwa Nnâmahanga bujirikane  “en’igulu nk’empingu.” (Mt. 6:9-11) K’obwine omu bukengere bwawe gurhi igulu lyayish’iyorha mw’ago mango? Ebibliya eyerekine oku obulonza bwa Nnâmahanga lugenda igulu buhiziremwo ebiryo binja. Nk’oku biyerekinwe omu Izaya 25:6-8, omu Bwami bwa Yehova mwayish’iba biryo binji bwenene binja by’omubiri abantu bayish’ikashagalukira. Olwandiko lw’Ennanga 72:16 ludesire ntya: “Idaho lyàyêra engano; emburho yage yasogorokera oku busongerwe bw’entondo.” K’oli walinguza akasanzi wayish’iyenda ebiryo osima bwenene erhi ebi orhasag’iyenda? Haguma n’oko, wanalinguza okurhwera eyawe mizabibu n’okuyish’ishagalukira amalehe gayo. (Iz. 65:21, 22) Arhanali wene wayish’ishagalukira ebyo.

15. Programe ehi y’enyigirizo yayish’ibaho amango g’obufûke? (Yowane 6:35)

¹⁵ Osome Yowane 6:35. Oshub’irhanya lugenda abantu balyaga emigati n’ensamaki Yezu ahânaga? Amango g’obufûke, nkaba wayish’irhimanana na baguma ba muli bo. Ciru akaba omu mango ga mîra barhayerekanaga obuyemere, nkaba banayish’ifûka. (Yn. 5:28, 29) Abo bantu bagwasirwe bayish’iyiga ebi ezi nderho za Yezu zihugwîre: “Nie mugati gw’obuzine; ojîre emunda ndi arhankacishalika.” Bayish’iba balagirire oku kuba n’obuyemere omu nterekêro y’engombôlo ya Yezu, kuba n’obuyemere oku ahânyire obuzine bwage oku bunguke bwabo. Ago mango, hanabe eprograme y’okuyigiriza abantu bayish’ifûka n’abana bayish’ikaburhwa lugenda Yehova n’omuhigo gwage. Gwayish’iba mwishingo munji bwenene okushangira mw’eyo programe y’okuyigiriza! Okujira kwawe ntyo kwayish’ikushagalusa bwenene kulusha okulya ebiryo by’okunali. Kobinali ebintu by’ekiroho byo byayish’iba bya bulagirire bwenene.

16. Bici rhwayiga omu cigabi cikulikire?

¹⁶ Rhwaganirire cigabi cilebe c’omwanzi guganirirwe omu Yowane cigabi ca 6, cikone Yezu agwerhe binji bya kuyigiriza lugenda “obuzine bw’ensiku n’amango.” Abayahudi bal’ishinganine babisegezeko obwenge, na nirhu ko n’oko ene. Omu cigabi cikulikire, rhwagendekera rhwayiga omwanzi guli omu Yowane cigabi ca 6.