1-2. Kanga kahi kakarhuma rhwavugumula emirenge?

 HALI amango rhweshi rhukola rhuvugumwire emirenge. Amango rhuli omu kanga karhushagalusize bwenene, nkaba rhwanavugumula emirenge y’omwishingo. Nkaba walasire amango kantu kalebe k’obulagirire bwenene erhi kago-kago kakuhikiraga. Kwa lwiganyo, amango omwana wawe aburhagwa, amango wakengeraga kantu kalebe kinja bwenene, erhi amango wayegerezagya omwîra wawe wal’ikola ogwerhe myaka minji orhabona.

² Cikone, kanji-kanji emirenge yirhu enayerekane amalumwa rhuli rhwayumva omu murhima gwirhu. Kwa lwiganyo, nkaba rhwanalaka erhi muntu mulebe akarhuvuna omurhima bwenene. Nkaba rhwanalaka enyanya z’endwala egwerhe nsiku nyinji bwenene eri yarhulibuza erhi enyanya z’okufîrwa n’omuzigirwa wirhu. Omu kasanzi ka ntyo, nkaba rhwanaciyumva nk’oku omulebi Yeremiya aciyumvagya erhi Abababiloni bagwarha evile y’e Yeruzalemu. Aderha ntya: “Amasu gani gadwirhe gahona nshalalo ya mirenge . . . Amasu gani yabîre nshôko erhahuba, garhàgoheka.”​—End. 3:48, 49.

3. Gurhi Yehova aciyumva erhi abona abakozi bage bali balibûka? (Izaya 63:9, Mashi Bible)

³ Yehova amanyire mirenge minganaci rhwamakavugumula enyanya z’amababale. Ebibliya erhuyemezize n’obwalagale oku aba amanyire ngasi kanga abakozi bage bageramwo karhuma baba n’amalumwa, ananarhuyumve amango rhuli rhwamulakira arhurhabale. (Enna. 34:15) Cikone, Yehova anajire binji ahanyuma n’okurhulaba kone n’okurhuyumvirhiza. Ak’omubusi w’obuzigire, anaciyumve kubi bwenene erhi abona abana bage bali  balaka, ananabe mubidu okubarhabala.​—Osome Izaya 63:9, Mashi Bible.

4. Bici rhwayiga lugenda Yehova kugerera nyiganyo ndebe ziri omu Bibliya?

⁴ Omu Kanwa kage, Yehova ayerekine gurhi ajijire erhi abakozi bage bavugumula emirenge. Rhwanabona oko omu kuganirira olwiganyo lwa Ana, Daudi, na Mwami Hezekiya. Bici byarhumire bavugumula emirenge? Gurhi Yehova ajijire erhi bamulakira abarhabale? Gurhi olwiganyo lwabo lwakarhurhuliriza amango rhuli rhwavugumula emirenge elerhwa n’amababale, obulenzi, erhi okuheza obulangalire?

EMIRENGE ELERHWA N’AMABABALE

5. Gurhi akanga Ana alimwo kakag’irhuma aciyumva?

⁵ Ana alwisize mazibu manji garhumaga avugumula emirenge elerhwa n’amababale. Mazibu maguma muli go kuli kuba ali omu buhya bw’oluhali, na Penina muk’iba akag’imugayaguza. Arhanali ago gone mazibu agwerhe, Ana arhagwerhe mwana, Penina yehe agwerhe bana banji. (1 Sam. 1:1, 2) Penina akaha Ana ebinioko burhahusa enyanya z’obugumba bwage. Nka we wali mw’ako kanga, gurhi wakaciyumvirhe? Ana ahahala bwenene kuhika “akalaka n’okulakûla, aleka okulya,” anaba “n’omungo munene” emurhima.​—1 Sam. 1:6, 7, 10.

6. Gurhi Ana ajijire ly’arhulirizibwa?

⁶ Gurhi Ana ajijire ly’arhulirizibwa? Kantu kaguma ajijire kwali kuja ahantu enterekêro y’okuli yakag’ijirirwa, ko kuderha, ihema ly’entimanano. Eyo munda bihashikine oku erhi aba ali hofi n’omuhango gw’ihema ly’entimanano, “Ana akashenga Nyamubâho anavugumula emirenge.” Asemberera Yehova ntya: ‘Okalola omungo gwa mwambalikazi wawe, okanankengêra.’ (1 Sam. 1:10b, 11) Ana ayigulira Yehova omurhima gwage kugerera isala anamubwira oku akag’iciyumva. Yehova agwasirwe abe aciyumvirhe kubi bwenene okubona emirenge y’oyo mwali muzigirwa!

7. Burhulirize buhi Ana abire nabo erhi ayigulira Yehova omurhima gwage?

⁷ Gurhi Ana aciyumvirhe enyuma z’okuyigulira Yehova omurhima gwage kugerera isala, n’okuyemezibwa na Kuhani Mukulu Eli oku Yehova akamushuzize? Ebibliya edesire ntya: “Oyo mukazi agenda arhanaciri burhê ebusu, aj’ilya.” (1 Sam. 1:17, 18, Mashi Bible) Ciru akaba akanga kakag’imubabaza karhal’icishanja, Ana aciyumva bwinja. Ali amakwebako Yehova omuzigo muzirho al’ibarhwire omu kandalala. Yehova abwine amababale gage, ayumva emirenge yage, n’enyuma z’aho amugisha omu kumuhashisa abe izimi.​—1 Sam. 1:19, 20; 2:21.

8-9. Kushimbana n’Abahabraniya 10:24, 25, bulya gurhi rhushinganine rhukajira oku rhwakanahasha koshi lyo rhuja oku ntimanano z’Ecikristu? (Olole n’enfoto.)

⁸ Amasomo rhwakaciyigiriza. K’oli walwisa akanga kazibu kali karhuma wavugumula emirenge y’amababale? Nkaba oli waciyumva kubi bwenene bulya omuntu w’omu mulala gwawe erhi omwira wawe afîre. Omu kasanzi ka ntyo, biyumvikine oku wanalonza okuba wene. Cikone, nk’oku Ana anahâbagwa omurhima  n’oburhulirize omu kuja ebw’ihema ly’entimanano, wanarhulirizibwa omu kuja oku ntimanano z’Ecikristu ciru akaba orhali waciyumva bwinja. (Osome Abahabraniya 10:24, 25.) Omu kasanzi rhuli rhwayumvirhiza amandiko g’Ebibliya g’okurhuliriza amango g’entimanano, Yehova anarhurhabala okurhenza entanya mbi n’okuba n’entanya nyinja. Oko kwanarhurhabala rhuciyumve bwinja bwenene ciru akaba akanga kirhu karhashanjiri ho n’aho.

⁹ Oku ntimanano zirhu, kandi rhunashagalukire okuba omu cinyabuguma haguma n’abirhu bemezi, bacihira ahali hirhu, bakolesa enderho ziyerekine oku barhushibirire banarhuzigire, zirhuma rhwaciyumva bwinja bwenene. (1 Ts. 5:11, 14) Orhanye oku byahikiraga mwene wirhu muguma wali painiya wa pekee wafîsagya mukage. Adesire ntya: “Nancivugumule emirenge. Hali amango ntamala aharhali bantu, n’okulaka. Cikone entimanano zirhu, yabire nshôko y’okunali y’okumpa omurhima. Enderho nyinja za bene wirhu na bali birhu, kobinali zinantulirize. Embere nyishe oku ntimanano, ciru akaba nakag’iciyumva kubi bwenene, erhi nyobohîre bwenene, ensiku zoshi nanciyumve bwinja bwenene amango ndi oku ntimanano.” Amango rhuli oku ntimanano zirhu, Yehova anakolesa bene wirhu na bali birhu lyo barhurhabala.

10. Gurhi rhwakayigamwo olwiganyo lwa Ana amango rhuli rhwaciyumva kubi ekandalala?

¹⁰ Kandi Ana abîre n’oburhulirize omu kubwira Yehova n’obwalagale kugerera isala oku akag’iciyumva. Nawe ‘wanahira amalagirire gawe goshi omu maboko [ga Yehova],’ onalangalire oku akuyumvirhiza. (1 Pt. 5:7) Mwali wirhu muguma iba anigagwa n’ebishambo akengire ntya: “Nayumva nk’omurhima gwani gwasharhusire rhuhande-rhuhande n’oku nta mango gwakafumire. Cikone narhulirizibwa erhi nshenga Yehova, Larha w’obuzigire w’omu mpingu. Mango malebe ntakag’imanya oku nakahugûlamwo oku nakag’iciyumva, cikone akag’inyumva. Erhi nakaciyumvirhe kubi bwenene, nakag’isalira ampe omurhûla. Ho n’aho nakag’iciyumva bwinja nanakag’ihasha okujira ebi nal’ishinganine njire olo lusiku.” Erhi olakira Yehova n’okumubwira amababale gawe, Yehova naye anaciyumve kubi bwenene ananahugûkwe bwinja-bwinja oku oli waciyumva. Ciru akaba ebiri byakubabaza birhahwiri, Yehova anarhuliriza omurhima gwawe n’okukurhabala ociyumve bwinja. (Enna. 94:19; Fl. 4:6, 7) Anayish’ikuhemba enyanya z’okulembera kwawe n’obwishwekerezi.​—Hb. 11:6.

EMIRENGE ELERHWA N’OBULENZI

11. Gurhi Daudi aciyumvirhe enyanya z’ehali nzibu akag’igeramwo?

¹¹ Omu kalamo kage, Daudi al’igwasirwe alembere hali nyinji nzibu zarhumaga avugumula emirenge. Bantu banji bal’imushombire ciru n’aba al’ilangalire bamulenganya. (1 Sam. 19:10, 11; 2 Sam. 15:10-14, 30) Mango maguma erhi ali omu kanga kazibu bwenene, ayandika ntya: “Ndi burhenga mw’omûka, erhi kubwinja kurhuma, erhi buba budufu omulenge mpu gw’ogu bulinde buca.” Bulya gurhi Daudi akag’iciyumva ntyo? Ahugwîre oku akag’iciyumva ntyo “erhi bashombanyi barhuma.” (Enna. 6:6, 7, Mashi Bible) Ebijiro by’okuyagaza by’abandi byarhumire Daudi aba n’amalumwa gali nk’ago kuhika akalaka burhahusa.

12. Nk’oku biyerekinwe omu Ennanga 56:8, bici Daudi al’iyemire n’obwalagale?

¹² Ciru akaba Daudi akag’ilwisa mazibu manji, al’iyemire n’obwalagale oku Yehova al’imuzigire. Ayandisire ntya: “Nyamuzinda anayumvîrhe emirenge yani.” (Enna. 6:8, Mashi Bible) Agandi mango, Daudi ayandika enderho nyinja bwenene ziri omu Ennanga 56:8, Mashi Bible. (Osome.) Ezo nderho ziyerekine n’obwalagale oku Yehova aba arhuzigire bwenene ananashibirire oku rhuciyumva. Daudi aderha oku Yehova ali nk’owakag’igunja emirenge yage omw’icupa  erhi kuyiyandika omu citabu. Daudi al’imanyire n’obwalagale oku Yehova akag’ibona anakag’ikengera amalumwa gage. Daudi al’iyemire n’obwalagale oku Ishe w’obuzigire w’omu mpingu, arhal’imanyire kone ebi akag’igeramwo cikone kandi al’imanyire gurhi byakag’irhuma aciyumva.

13. Amango abandi bamarhuvuna omurhima, bici rhugwasirwe rhukengere? (Olole n’enfoto.)

¹³ Amasomo rhwakaciyigiriza. K’oli waciyumva kubi omu kandalala enyanya z’okuba muntu mulebe wal’ilangalire akuvunyire omurhima erhi akulenganyize? Nkaba oli waciyumva kubi bwenene enyanya z’okuba omuntu mwakag’ishebana naye akulesire, erhi balo erhi mukawe avunyire obuhya bwinyu buzira kulaliza, erhi nkaba muntu mulebe oba ozigire alesire okukolera Yehova. Mwene wirhu muguma mukage ajiraga obuhushi anamuleka, adesire ntya: “Ntahashaga okuyemera oku oko kwakampikire. Nakaciyumva kubi, nkunire, n’oku ndi wa busha.” Erhi akaba muntu mulebe akulenganyize erhi kukuvuna omurhima bwenene, wanarhulirizibwa omu kumanya oku Yehova arhankakuleka ciru n’ehitya. Oyo mwene wirhu adesire ntya: “Nahikire aha nahugûkwa oku amîra g’abantu ganahwa, cikone Yehova liba Ibuye lirhu. Ciru bici byakaba, ensiku zoshi anabe ali ho ly’arhurhabala. Arhakalikirira abikubagirwa bage.” (Enna. 37:28) Nawe okengere oku, obuzigire bwa Yehova bulushire obuzigire bwa ngasi mwene muntu. Ciru wakaba n’amalumwa manji enyanya z’okuba muntu mulebe akulenganyize, oko kurhakashanja ciru n’ehitya oku Yehova aciyumva okubikuyerekire, oba wa bulagirire bwenene kuli ye. (Rm. 8:38, 39) Akantu k’okukengera kali k’aka: Ciru omuntu akakujirira gurhi, Sho w’omu mpingu akuzigire.

14. Bici olwandiko lw’Ennanga 34:18, NWT, lurhuyemezize n’obwalagale?

¹⁴ Amango rhuli rhwalwisa amazibu galerhwa n’obulenzi, kandi rhwanarhulirizibwa kugerera enderho za Daudi z’okuhâna omurhima ziri omu Ennanga 34:18, NWT. (Osome.) Citabu ciguma cihugûla Ebibliya cidesire oku, enderho “abavunisire omurhima” zanaba zihugwîre “abantu bali baciyumva oku nta kantu koshi-koshi bacilangalire.” Gurhi Yehova ajirira balya baciyumva ntyo enyanya z’okuba bavunyirwe omurhima bwenene? Ak’omubusi w’obuzigire obagalira n’okurhuliriza omwana oli waciyumva kubi, Yehova aba “hofi na nirhu,” ko kuderha oku ensiku zoshi anacihire ahali hirhu n’okuba mubidu okurhurhabala erhi akaba rhuli rhwaciyumva rhuvunisire omurhima, enyanya z’okuba muntu mulebe arhulenganyize erhi kurhuleka. Ajira irala linji ly’okurhurhuliriza amango rhuvunisire omurhima n’amango rhuli rhwaciyumva nka rhuli ba busha. Ananarhuhe bintu binji byakarhurhabala lyo rhulembera amazibu girhu.​—Iz. 65:17.

 EMIRENGE ELERHWA N’OKUHEZA OBULANGALIRE

15. Kanga kahi Hezekiya ageziremwo karhumaga alaka bwenene?

¹⁵ Erhi Mwami Hezekiya w’e Yuda agwerhe myaka 39, alwala bwenene. Omulebi Izaya amanyisa Hezekiya omwanzi gwarhengaga emwa Yehova gwal’idesire oku eyo ndwala yakamuyisire. (2 Bam. 20:1) Byabonekana nka nta bulangalire Hezekiya acigwerhe. Enyanya z’okubabazibwa n’ogo mwanzi, Hezekiya alaka analakûla. Asemberera Yehova amurhabale.​—2 Bam. 20:2, 3.

16. Erhi Hezekiya alakira Yehova, gurhi Yehova amujirire?

¹⁶ Yehova ayumvirhiza isala lya Hezekiya anabona emirenge yage, omuyumviza obwonjo anaderha ntya: “Nayumvirhe omusengero gwawe, nabwine n’emirenge yawe; alaga oku nkolaga nakufumya.” Kugerera Izaya, Yehova amulaganya omu njira y’olukogo oku, ayushûla emyaka y’akalamo kage n’oku ayokola Yeruzalemu kurhenga omu maboko g’Abaasiriya.​—2 Bam. 20:4-6.

17. Gurhi Yehova arhurhabalamwo amango rhuli rhwalwisa amazibu madarhi g’amagala? (Ennanga 41:3, Mashi Bible) (Olole n’enfoto.)

¹⁷ Amasomo rhwakaciyigiriza. K’oli walwisa amazibu g’amagala gali garhuma wabona nka nta bulangalire bucihali? Osalire Yehova, ciru n’omu kuvugumula emirenge. Ebibliya erhuyemezize n’obwalagale oku “Larha w’obwonjo na Nyamuzinda wa ngasi burhulirize” arhurhuliriza omu mazibu girhu goshi. (2 Kr. 1:3, 4) Ene, rhurhankalangalira oku Yehova arhenza amazibu girhu goshi, cikone rhwanalangalira oku ensiku zoshi arhurhabala. (Osome Ennanga 41:3, Mashi Bible.) Kugerera iroho lyage litagatifu, Yehova anarhuhe emisi, obwenge, n’omurhûla gw’ekandalala lyo rhulembera. (Mig. 18:14; Fl. 4:13) Kandi, anarhurhabale kugerera obulangalire bwirhu buyimangire oku Bibliya bw’okuyish’ibona amango endwala zoshi zanahwe.​—Iz. 33:24.

18. Lwandiko luhi wabwine oku luli lwa kurhuliriza omu kanga kadarhi? (Olole ecisanduku cidesire “ Enderho z’Okurhuliriza z’Okukaza Emirenge Yirhu.”)

¹⁸ Hezekiya arhulirizibwe n’enderho za Yehova. Na nirhu rhwanarhulirizibwa kugerera Akanwa ka Mungu. Yehova abisiremwo enderho z’okurhuliriza zakarhuma rhwaciyumva bwinja amango rhuli rhwagera omu kanga kazibu. (Rm. 15:4) Erhi mwali wirhu muguma w’omu Afrique de l’Ouest avumbulwamwo akansere, akalaka kanji-kanji. Adesire ntya: “Nabwine oku olwandiko lwa Izaya 26:3, luli lwa kurhuliriza bwenene. Ciru akaba kanji-kanji rhurhakahash’ishanja akanga kirhu, olo lwandiko lunyemezize oku Yehova anarhuha omurhûla gw’ekandalala gurhurhabala rhurhulirire n’okulwisa amazibu.” Ka hali olwandiko wabwine oku luli lwa kurhuliriza bwenene erhi oli wagera omu kanga kadarhi, erhi nkaba kakag’ibonekana nka karhagwerhi bulangalire?

19. Mango gahi gayisha rhuli rhwalinguza?

¹⁹ Rhulamire oku kambekwe-mbekwe k’ensiku  nzinda, rhunamanyire oku ebintu by’okurhuma rhwavugumula emirenge byagendekera byayushûka. Cikone nk’oku rhwabwine kugerera olwiganyo lwa Ana, Daudi, na Mwami Hezekiya, Yehova anabone emirenge rhuvugumula ananaciyumve kubi bwenene lugenda oko. Aba arhuzigire enyanya z’okugendekera rhwabêra bishwekerezi kuli ye ciru rhwakaba n’amalumwa, arhanayibagira emirenge yirhu. Co cirhumire, amango rhuli rhwagera omu kanga k’okuvuna omurhima, kobinali rhunabe rhulonzize okuyigulira Yehova omurhima gwirhu kugerera isala. Rhurhaciyegula cirhu n’ehitya kuli bene wirhu na bali birhu b’omu cigamba baba barhuzigire. N’omu kusoma Ebibliya, rhwagendekera rhwahâbwa oburhulirize kurhenga emwa Yehova. Rhwanayemera n’obwalagale oku rhukagendekera rhwalembera n’obwishwekerezi, Yehova ayish’irhuhemba. Oko kuhiziremwo eciragane cinja bwenene oku omu mango gakwanine ayish’ihorhôla omu masu girhu ngasi mulenge gulerhwa n’amababale, obulenzi, n’okuheza obulangalire. (Maf. 21:4) Ago mango, rhwayish’ikavugumula emirenge y’omwishingo yone.