Ka wasomire bwinja-bwinja enimero z’Ilabiro ly’Akalalizi z’ogu mwaka? Ololage erhi wanashuzagya kw’aga madoso:

Lwiganyo luhi Yehova arhuhirireho lugenda oku rhushinganine rhujirire abakazi?

Anabajirire omu njira erhali ya kabôlo, arhanajirira abalume bwinja kulusha abakazi. Mungu anayumvirhize abakazi, anashibirire oku abakazi baciyumva n’amazibu bajira. Ananabalangalire omu kubona oku banahikiriza omukolo gwage.​—w24.01, buk. 15-16.

Gurhi rhwakakolesa olwandiko lw’Abefezi 5:7, Mashi Bible, ludesire ntya: “Murhashangîraga akantu mweshi n’abo bantu”?

Entumwa Paolo yakag’irhurhonda rhurhakag’icilunga haguma n’abantu bakarhuma kwaba kuzibu kuli rhwe okucishwekera oku makanuni ga Yehova. Okucilunga haguma n’abantu kwa ntyo kurhashinganini, kuyerekire abantu rhugeza akasanzi haguma nabo busu oku busu n’aba rhugeza akasanzi haguma nabo oku site z’e Enternete z’okuganira n’abantu banji.​—w24.03, buk. 22-23.

Myanzi ehi y’obunywesi rhushinganine rhucilangeko?

Rhushinganine rhube masu lugenda emyanzi barharhôzire akasanzi k’okulabiriza erhenga oku bîra barhagwerhi ntanya mbi, emesaje rhurhalonzizi zirhenga oku bantu rhurhamanyiri, n’abantu bacijira nka basimisibwe n’okuli n’obo bali bagoma.​—w24.04, buk. 12.

Bici rhumanyire na bici rhurhamanyiri lugenda oku Yehova ayish’itwira Mwami Solomoni olubanja n’abandi bafâga amango g’okusherezibwa kw’evile y’e Sodoma n’ey’e Gomora n’amango g’Enkuba y’Ecihonzi?

Rhurhamanyiri n’obwalagale erhi Yehova abatwirire olubanja lw’okuhererekezibwa ensiku n’amango. Cikone, rhumanyire oku amanyire byoshi anaba wa bwonjo bunji bwenene.​—w24.05, buk. 3-4.

Mungu ahamagirwe “ibuye,” bici oko kukuyemezize n’obwalagale? (Lush. 32:4)

Yehova aba lwakiro lwirhu. Aba wa kulangalirwa, ensiku zoshi anahikirize ebiragane byage. Na kandi arhashanja, nta mango akashanja amorhere gage, n’omuhigo gwage.​—w24.06, buk. 26-28.

Bici byakakurhabala okukomera omu cigamba cihyahya?

Oyegemere Yehova, akurhabala nk’oku arhabalaga abakozi bage b’omu mango ga mîra. Oyake okugerera ecigamba cawe cihyahya oku ca mîra. Ocihâne bwenene omu mikolo y’ecigamba cawe cihyahya, onacihangane okucijirira abîra bahyahya.​—w24.07, buk. 26-28.

Masomo gahi rhwakaciyigiriza kugerera enyiganyo ziri omu Mateyo cigabi ca 25?

Olwiganyo lw’ebibuzi n’empene lusegize okuba bishwekerezi na bikubagirwa. Olwiganyo lw’ababikira b’obwenge n’ebingolongolo luyerekine obulagirire bw’okuba rhucirheganyize n’okuba masu. N’olwiganyo lw’amagerha lusegize obulagirire bw’okukola bwenene n’okuba ba bushiru.​—w24.09, buk. 20-24.

Buli bunganaci ec’oluso c’ehekalu ya Solomoni cal’igwerhe?

Omu 2 Enganîro 3:4, mandishi maguma na maguma ga mîra gadesire “makano 120 ga ngafula,” kwanaba kuderha oku gwali munara gwa metre 53. Cikone agandi mandishi g’okulangalirwa gadesire “makano 20 ga ngafula,” kwanaba kuderha buli bwa metre 9. Eco cipimo cizinda canaba co cipatine n’obunene bw’ebibambazi by’ehekalu.​—w24.10, buk. 31.

Bici okuba “mulume wa mukazi muguma yene” kuhugwîre oku murhabazi w’abagula? (1 Tm. 3:12)

Oko kuhugwîre oku ashinganine abe iba wa mukazi muguma yene, arhanashinganini ajire ciru n’ehitya eby’enshonyi. Na kandi, arhashinganini ciru n’ehitya abe n’entanya z’okulonza okulehya abandi bakazi.​—w24.11, buk. 19.

Bulya gurhi rhwanaderha oku enderho ziri omu Yowane 6:53 zirhahugwîri ebyakabire okw’Ishega ly’Ebijingo lya Nnawirhu?

Olwandiko lwa Yowane 6:53 luganirire obulagirire bw’okulya omubiri gwa Yezu n’okunywa omuko gwawe. Abayahudi bacir’ilagirire oku kuba n’obuyemere muli Yezu, bo abwiraga ezo nderho e Galilaya omu mwaka gwa 32 Kano Kasanzi Kirhu (K.K.K.). Cikone, Ishega ly’Ebijingo lya Nnawirhu lyarhondezibwe mwaka muguma enyuma z’aho e Yeruzalemu. Eyo munda, Yezu akag’iganiza balya akarhegesire haguma nabo empingu.​—w24.12, buk. 10-11.