1-2. Bici mwene wirhu muguma aciyigirizize okubiyerekire okuhâna ihano?

OMU myaka egezire, bagula babirhi balambagirira mwali wirhu walikola agwerhe nsiku nyinji arhali aja oku ntimanano. Omugula waliyimangire enganîro aganirira amandiko gayerekire okuja oku ntimanano. Arhanya mpu nkaba ezo nganîro zagezire bwinja, cikone erhi ye n’owabo bali boshi bakola bagenda, mwali wirhu aderha ntya: “Bene wirhu murhamanyiri akanga ndi nageramo.” Abo bene wirhu bahanûlaga oyo mwali wirhu, barhalimanyire akanga n’amazibu ali ageramo. N’oko kwarhuma oyo mwali wirhu abona oku er’ihano ntaco limurhabireko.

² Omu kukengera ebyagezire, oyo mugula waliyimangire ezo nganîro, adesire ntya: “Ago mango narhanya mpu oyo mwali wirhu arhali wa bukenge. Cikone erhi ntanya kuli oko, nahikira aha nabona oku nayerekine amandiko gashinganine cikone ntadosagya amadoso gashinganine, kwa lwiganyo: ‘Mazibu gahi gali gakuhikira omu kalamo?’ ‘Gurhi nakakurhabalamwo?’” Oyo mugula aciyigirizize isomo ly’obulagirire kugerera ebyo byamuhikiraga. Ene akola aba mugula wakuyumviza abandi obwonjo na lungere mwinja.

3. Omu cigamba, bandi bakahâna ihano?

 ³ Nka balungere, abagula bagwerhe omukolo gw’okuhâna ihano amango hali obulagirire bw’okujira ntyo. Cikoki, mango maguma na maguma abandi bene wirhu b’omu cigamba nabo banahâna ihano. Kwa lwiganyo, mwene wirhu erhi mwali wirhu anaha omwîra wage ihano liyimangire oku Bibliya. (Enna. 141:5; Mig. 25:12) Na kandi, mwali wirhu okola mugikulu ‘anahanûla abakazi baciri bahya’ okubiyerekire ebintu biganirirwe omu lwandiko lwa Tito 2:3-5, NWT. Kanji-kanji, ababusi baba bashinganine bahe abana babo ihano n’obuhane. Ciru akaba  eci cigabi caganirira omu njira yago-yago abagula, cikone rhweshi rhwanayunguka omu kucibibona omu njira nci rhwakahâna ihano lishinganine, ly’okushumya na lya ‘kusîmîsa omuntu.’​—Mig. 27:9, Mashi Bible.

4. Bici rhwaganirira mw’eci cigabi?

⁴ Mw’eci cigabi, rhwaganirira madoso ani gayerekire okuhâna ihano: (1) Bici bishinganine okushumya omuntu wahâna ihano? (2) K’er’ihano liri lya bulagirire? (3) Ndi oshinganine ahâne ihano? (4) Gurhi wakahânamwo ihano linja?

5. Gurhi okuba n’ecirhumire cinja c’okuhâna ihano kwakashumya omugula aj’ihâna ihano omu njira nyinja? (1 Abakorinti 13:4, 7)

⁵ Abagula baba bazigire bene wabo na bali babo. Hali amango bayerekana obo buzigire omu kugend’ihanûla muntu mulebe walikola ali hofi aje omu njira mbi. (Gl. 6:1) Embere omugula aj’ihanûla muntu mulebe, ashinganine arhanye oku bintu biguma na biguma Paolo adesire okubiyerekire obuzigire. Paolo aderha ntya: “Obuzigire buba bwa kulembera na bwinja. . . . Bunabwikire ebintu byoshi, bunayemere ebintu byoshi, bunalangalire ebintu byoshi, bunalembere ebintu byoshi.” (Osome 1 Abakorinti 13:4, 7, NWT.) Okurhanya kuli eyo milongo erimw’olo lwandiko kwanarhabala omugula ahugûkwe bici bimushumize ly’ajihâna ihano n’okugend’ibona mwene wirhu erhi anagwerhe entanya nyinja. Erhi oyo wahâbagwa ihano akabona oku omugula amushibirire, anaba mubidu okuliyemera.​—Rm. 12:10.

6. Lwiganyo luhi lwinja Paolo arhulekire?

⁶ Paolo arhulekire olwiganyo lwinja nka mugula. Kwa lwiganyo, erhi bene wabo b’e Tesalonika bali omu bulagirire bw’okuhâbwa ihano, Paolo arharhindiraga okubahalyo. Cikone, omu maruba gage, burhangiriza Paolo arhang’ibavuga omunkwa oku mukolo gwabo gw’obwishwekerezi, obuzigire bwabo, n’okulembera kwabo. Na kandi ahugûkwa akanga balimo, abona oku akalamo bali balama karhali kalembu n’oku bakag’ilembera okulibuzibwa. (1 Ts. 1:3; 2 Ts. 1:4) Ciru ahikira aha abwira abo bene wabo oku bali lwiganyo oku bandi Bakristu. (1 Ts. 1:8, 9) Bashagaluka bwenene okuyumva ezo nderho za Paolo z’okubavuga omunkwa! Buzira karhinda, oko kuyerekine oku Paolo alizigire bene wabo bwenene. Oko ko kwarhumaga aba n’obulyo bw’okuhâna amahano minja omu maruba abirhi ayandikiraga Abatesalonika.​—1 Ts. 4:1, 3-5, 11; 2 Ts. 3:11, 12.

7. Bulya gurhi bantu baguma na baguma balahira ihano bahâbagwa?

⁷ Gurhi byakaba erhi rhwakabula buhâna ihano omu njira nyinja? Mugula muguma ogwerhe obulenga adesire ntya: “Bantu baguma na baguma banalahire ihano, arhali mpu bulya lirimo akantu kabi, cikone bulya lyahânyirwe omu njira erhali ya buzigire.” Bici oko kwakarhuyigiriza? Kwanaba kulembu okuyemera ihano erhi lyakahânwa n’obuzigire ci arhali kulihâna onagayire.

8. Bici omugula ashinganine arhang’icidosa embere ahige oku aj’ihanûla muntu mulebe?

⁸ Abagula barhashinganini bakahamira erhi kulibirhira okugend’ihâna ihano. Embere omugula ajihâna ihano, ashinganine arhangicidosa ntya: ‘Ka kobinali nshinganine nderhe kantu kalebe? Ka manyire n’obwalagale oku ebi oyo muntu ali ajira biri bibi? Ka hali irhegeko ly’Ebibliya anavunyire? Erhi nkaba hali okurhayumvikana omu ntanya kone?’ Abagula benge banayake ‘okuhamira oku  binwa.’ (Mig. 29:20) Erhi omugula akaba arhamanyiri n’obwalagale erhi muntu mulebe alagirire okw’ihano, anagend’idosa owabo mugula n’okuganirira ako kanga haguma lyo balola erhi hali akanuni k’Ebibliya oyo muntu anavunyire.​—2 Tm. 3:16, 17.

9. Bici rhuciyigirizize kugerera ihano Paolo ahânaga lugenda okuyambala n’okuciyinjihya? (1 Timoteyo 2:9, 10)

⁹ Rhuganirire olu lwiganyo. Mugula mulebe ali arhanya okubiyerekire ebi owabo mwemezi acishoga lugenda okuyambala n’okuciyinjihya. Oyo mugula ashinganine acidose ntya: ‘Ka hali ecirhumire c’Ebibliya cinshumize ngend’iganiza oyo muntu?’ Bulya oyo mugula arhalonzizi okuhâna entanya zage, ashinganine ajidosa owundi mugula erhi wundi Mukristu okuzire kiroho entanya zage. Bombi haguma banacib’ilola amahano Paolo ahânyire lugenda okuyambala n’okuciyinjihya. (Osome 1 Timoteyo 2:9, 10.) Paolo asegize amakanuni Omukristu akwanine arhanyeko lugenda emyambalo eshinganine, ya lugero, n’ekwanine. Cikone Paolo arhahiragaho eliste y’emyambalo omuntu akayambala n’eyi arhakayambala. Al’ihugûsirwe oku Omukristu agwerhe oluhûma lw’okucishoga gurhi ayambala kushimbana n’ebi Amandiko gadesire. Co cirhumire, embere abagula bahige oku baj’ihanûla muntu mulebe, bashinganine barhangilola erhi ebi oyo muntu anacishozire biri bya lugero binakwanine.

10. Bici rhushinganine rhukakengera okubiyerekire ebi abandi bacishozire?

¹⁰ Rhwanajira bwinja okukakengera oku Bakristu babirhi bakuzire kiroho banacishoga bintu bibirhi biri lubero, cikone erhi byombi binali binja. Rhushinganine rhuyake okuhiriraho abirhu bemezi amarhegeko girhu rhwenene okubiyerekire ebinja n’ebibi.​—Rm. 14:10.

11-12. Erhi akaba hali obulagirire bw’okuhâna ihano, madoso gahi omugula ashinganine acidose, na bulya gurhi?

¹¹ Erhi wakabona oku hali obulagirire bw’okuhâna ihano lilebe, wanacidosagya eri lindi idoso: Ndi oshinganine ahâne ihano? Embere omugula ahige oku aj’ihanûla mwali wirhu oherusire erhi omwana w’omushuko, ashinganine arhagigend’idosa nnawabo w’ogo mulala, bulya hali amango oyo nnawabo akabona oku yene ashibirira ako kanga. * Erhi nnawabo w’omulala anahiga okuyishibaho amango omugula aba ali ahâna er’ihano. Na kandi, nk’oku rhwaganiriraga omu  cifungo ca 3, hali akasanzi kwakaba kwinja mwali wirhu oli mugikulu agend’ihanûla mwali wirhu ociri musole erhi muhya.

¹² Hali akandi kantu rhwakarhanyako. Nkaba omugula anacidosa ntya: ‘Ka nie nshinganine  okuhâna er’ihano, ka lyanayemerwa erhi owundi muntu akalihâna?’ Kwa lwiganyo, omuntu oli walwisa entanya z’okuciyumva wa busha, anaba mubidu okuyumvirhiza omugula wakag’ilwisa entanya za ntyo, kulusha orhasagiciyumva ntyo. Omugula walwisize entanya za ntyo anaba na bwonjo bunji n’ebi aderhaga byanayemerwa kulusha. Cikone, abagula boshi bagwerhe omukolo gw’okushumya n’okuha bene wirhu na bali birhu omurhima bajire empindûlo Amandiko gabahûnyire oku bakwanine bajire. Co cirhumire omugula anahâna ihano erhi akaba abwine obulagirire bw’okulihâna, ciru ankaba arhasagigera muli ebyo bintu.

13-14. Bulya gurhi kuli kwa bulagirire omugula abe wakuyumvirhiza?

¹³Obe mubidu okuyumvirhiza. Amango omugula ali arheganya ihano ajihâna, anarhangic’idosa ntya: ‘Bici manyire okubiyerekire akanga mwene wirhu alimo? Bici byamuhikire omu kalamo? Ka hali amazibu ali alwisa ntanagamanyiri? Bici alagirireko bwenene muli gano mango?’

¹⁴ Abahâna ihano banakakulikira aka kanuni kali mu lwandiko lwa Yakobo 1:19. Yakobo ayandika ntya: “Ngasi muntu akabangaduka omu kuyumvirhiza, ci arhabaga wakuderha duba, arhanabaga wa kukunira duba.” Hali amango omugula akarhanya mpu amanyire ebintu byoshi okubiyerekire ako kanga, cikone ka kobinali akamanyirire bwinja? Olwandiko lw’Emigani 18:13 lurhukengezize ntya: “Oshuza arhanaciyûmva, kuyerekana ayerekana obuhwinja bwamubonesa nshonyi.” Kuli kwinja okubwira oyo muntu yene akuganirire ako kanga. Oko kuhiziremo okuyumvirhiza embere rhuderhe. Okengere isomo rhwaciyigirizize kugerera olya mugula rhwaganiriraga oku murhondero gw’eci cigabi. Ayishihugûkwa oku ahali h’okurhondeza enganîro kugerera emyanzi arheganyagya, kwali kwa bulagirire adose mwali wirhu amadoso gali nk’aga: “Bici biri byakuhikira omu kalamo kawe?” “Gurhi nakakurhabalamwo?” Erhi abagula bakaciha akasanzi k’okurhang’imanyirira emyanzi, kwanaba kulembu kulibo okurhabala n’okuha omurhima bene wabo na bali babo.

15. Gurhi abagula bakakolesamwo akanuni kali omu lwandiko lw’Emigani 27:23?

¹⁵Ocihangane okumanyirira obuso. Nk’oku rhwaganiriraga embere, ihano linja lihiziremo binji kulusha okusoma mandiko malebe erhi kubwira omuntu ebi ashinganine ajire byone. Bene wirhu na bali birhu baba omu bulagirire bw’okuyeresibwa oku rhubashibirire, rhubahugûsirwe rhunalonzize okubarhabala. (Osome Emigani 27:23.) Abagula bashinganine bajire okwabo koshi lyo bajira obwîra haguma na bene wirhu na bali birhu.

16. Bici byakarhabala abagula bakahâna ihano linja?

¹⁶ Abagula barhaba balonzize bene wirhu na bali birhu bakarhanya oku amango bali bahanûla erhi amango bajijire amagosa gone  bashinganine babaganize. Lubero n’oko, enganîro za ngasi mango abagula bajira haguma na bene wirhu na bali birhu, zinabayerese oku babashibirire ciru akaba bali balwisa amazibu. Mugula muguma ogwerhe obulenga, adesire ntya: “Erhi wakakajira ntyo, wanaba n’obwîra bwa hofi-hofi haguma nabo. Na buzinda erhi hakaba obulagirire bw’okuhâna ihano wanabona oku kuli kulembu okulihâna.” N’ohâbirwe er’ihano anabona oku kuli kulembu okuliyemera.

17. Kasanzi kahi kago-kago omugula ashinganine abe wa kulembera na mwinja?

¹⁷Obe wa kulembera na mwinja. Okulembera n’obwinja gaba morhere ga bulagirire amango muntu mulebe amalahira ihano liyimangire oku Bibliya. Omugula ashinganine ayake oborhere bw’okugaya duba-duba erhi akaba ihano ahânaga lirhayemirwi erhi kukolesibwa ho n’aho. Obulebi bwal’ilebire lugenda Yezu ntya: “Arhakahumanula olusheke luvunisire, arhakazimya ecirere [lutambi] cidwirhe catumbûka.” (Mt. 12:20) Co cirhumire omugula anashenga Yehova agishe olya olagirire okw’ihano anamurhabale abone ecirhumire c’er’ihano n’okulikolesa. Mwene wirhu wahanûlagwa anaba n’obulagirire bw’akasanzi k’okurhanya lugenda ebi bamubwiraga. Erhi omugula akaba wa kulembera na mwinja, kwanaba kulembu kuli mwene wirhu wahâbagwa ihano aliyumvirhize n’okulikolesa. Ensiku zoshi, ihano rhwahâna lishinganine likayimangira oku Kanwa ka Nnâmahanga.

18. (a) Bici rhushinganine rhukakengera okubiyerekire okuhâna ihano? (b) Nk’oku biyerekinwe omu cisanduku, bici ababusi bashinganine barhanyeko?

¹⁸Ociyigirize kugerera amagosa gawe. Bulya rhurhali bimana, rhukakengera oku hali amango rhwakayabirwa okukolesa bwinja-bwinja amahano gaganirirwe mw’eci cigabi. (Yk. 3:2) Rhwanajira amagosa, cikone erhi rhwakagajira, rhwanalonza rhuciyigirize kugererago. Erhi bene wirhu na bali birhu bakakabona oku rhubazigire, kwanaba kulembu kulibo okurhubabalira amango rhwabagokize omu bijiro n’omu nderho.​—Olole ecisanduku cidesire “ Amahano oku Babusi.”

19. Gurhi rhwakasîmisamwo bene wirhu na bali birhu?

¹⁹ Nk’oku rhwanabwine, kurhaba kulembu okuhâna ihano linja. Rhurhaba bimana, n’aba rhuhânula barhaba bimana. Obikirire omu bukengere bwawe amakanuni rhwaganirire mw’eci cigabi. Omanyirire n’obwalagale erhi ogwerhe ebirhumire binja bikushumize okuj’ihanûla muntu mulebe. Na kandi, omanyirire erhi kobinali er’ihano liri lya bulagirire n’erhi we oshinganine okulihâna. Embere ohâne amahano, odose amadoso n’okuyumvirhiza bwinja ly’ohugûkwa amazibu oyo muntu ali alwisa. Olonze gurhi yene akakubwiramwo entanya zage. Obe mushagalusi, ojire obwîra haguma na bene wirhu na bali birhu. Okakengera ogu muhigo: Rhurhaba rhulonzize ihano rhwahânaga libe linja kone ci na kandi ‘lisîmîse omuntu.’​—Mig. 27:9, Mashi Bible.