1. Iroho linja lya gurhi rhubona egarhi k’abakozi ba Yehova?

HAMAGERA myaka minji Ebibliya elebire oku abakozi ba Nnâmahanga ‘banacihâne n’obulonza’ omu mukolo gwage idako ly’obulongozi bw’Omugala. (Enna. 110:3, NWT) Obo bulebi buli bwahikirira ene. Ngasi mwaka, abakozi ba Yehova bali bayerekana obushiru omu kugeza amagana g’emiliyoni y’ensa omu mukolo gw’amahubiri. Banajire ntyo n’obulonza buzira kulipwa kantu koshi-koshi. Na kandi banacihe akasanzi k’okuha ababo bemezi oburhabale bw’omubiri, bw’ekandalala, n’obw’ekiroho. Bene wirhu bahizirweho banageze nsa nyinji bali barheganya entimanano n’okujira omukolo gw’okulambagirira ebibuzi. Bici bibashumya bajire eyo mikolo yoshi? Buba buzigire: buzigire bajira kuli Yehova na kuli omulungu.​—Mt. 22:37-39.

2. Nk’oku biyerekinwe omu Abaroma 15:1-3, lwiganyo luhi Yezu arhulekire?

² Yezu arhulekire olwiganyo lw’okuhira amalagirire g’abandi oku nafasi ntanzi kulusha agage. Rhunajire okwirhu koshi lyo rhulonza okukulikira enshando zage. (Osome Abaroma 15:1-3.) Abayiga olwiganyo lwage banabe na bunguke bunji. Yezu aderha ntya: “Haba obushagaluke bunji omu kuhâna kulusha omu kuhâbwa.”​—Ebj. 20:35, NWT.

3. Bici rhwaganirira mw’eci cigabi?

³ Mw’eci cigabi, rhwaganirira bintu biguma na biguma Yezu ajijire ly’acihâna omu kukolera abandi na kandi rhwayishiganirira gurhi rhwakayiga olwiganyo lwage. N’okubundi rhwayishiganirira gurhi rhwakazibuhyamwo irala lirhu ly’okurhabala abandi.

4. Gurhi Yezu ahiziremwo amalagirire g’abandi oku nafasi ntanzi kulusha agage?

⁴Yezu akagicihâna ciru n’omu kasanzi akagiba arhamire. Orhanye gurhi Yezu ajijire erhi ehitû hy’abantu hilonza okurhimanana naye oku ntondo, nkaba hali hofi n’e Kapernaumu. Yezu ali amayusa obudufu boshi ali ashenga. Byanahashikana abe alirhamire bwenene, cikone erhi abona ehyo hitû hy’abantu, ayumviza abakenyi n’abalwala balimo obwonjo. Arhali kufumya kone abafumize cikone abajirira ehotuba y’okushumya bwenene yamakajirwa kulusha ezindi zoshi, k’okuderha, Amahubiri g’oku Ntondo.​—Lk. 6:12-20.

5. Gurhi ba nnawabo b’emilala bayigamwo olwiganyo lwa Yezu lw’okucihâna omu mango barhamire?

⁵Oku ba nnawabo b’emilala bayigamwo olwiganyo lwa Yezu. Orhanye kuli aka kanga: Okubuzinda bw’omulegerege, nnawabo w’omulala ahike aha mwage anakola arhamire enyanya z’emikolo. Ciru akaba ali aciyumva oku ahire Enterekêro y’Omulala oku lundi lusiku, ashenge Yehova oku amuhe emisi y’okuyilongoza. Yehova anashuza er’isala lyage, n’eyo nterekêro ejirwe kushimbana n’enkomêdu yabo. Abana banaciyigiriza isomo ly’obulagirire muli ebyo bijingo, isomo liyerekine oku ebintu by’ekiroho byo birhôla enafasi ntanzi omu kalamo k’ababusi babo.

6. Ohâne olwiganyo luyerekine gurhi Yezu ahânyire akasanzi kage ly’arhabala abandi.

⁶Yezu ahânyire akasanzi kage ly’arhabala abandi. K’orhanyize gurhi Yezu aciyumvirhe erhi ayumva oku omwîra wage Yowane Mubatiza bamutwire irhwe? Kobinali Yezu aciyumvirhe kubi bwenene. Ebibliya edesire ntya: “Erhi Yezu ayumva eyo myanzi, [eyerekire okuyirhwa kwa Yowane], arhenga eyo munda, aja omu bwarho mpu aje hâge hâge yene.” (Mt. 14:10-13, Mashi Bible) Rhwanahugûkwa bulya gurhi alonzagya okuba yene. Bantu banji ba muli rhwe basima nka bali omu ciriyo baje ahantu harhali bantu. Cikone birhahashikanaga Yezu abe n’obulyo bw’okuba yene. Ehitû hy’abantu hyahika aho embere ahikeho. Gurhi Yezu ajijire? Arhanya okubiyerekire amalagirire g’abo bantu n’“obwonjo bwabo bwamugwarha.” Yezu ahugûkwa oku bali omu bulagirire bw’okurhulirizibwa kiroho, na ho n’aho arhondera okuhikiriza ago malagirire. Na ntyo, “arhondera okubayigiriza  [arhali bintu bisungunu, cikone] binji.”​—Mk. 6:31-34; Lk. 9:10, 11.

7-8. Ohâne olwiganyo luyerekine gurhi abagula bayiga olwiganyo lwa Yezu amango hali obulagirire.

⁷Oku abagula bw’obuzigire bakayigamwo olwiganyo lwa Yezu. Rhunashagalukire bwenene omukolo gw’okucihâna abagula birhu barhujirira! Bene wirhu na bali birhu banji barhamanya emikolo minji ejirwa n’abagula. Kwa lwiganyo, erhi akaba hali akanga k’ecinganga, abagula baba omu Komite Ejira Olushangi Haguma n’Ehopitali banagende duba-duba lyo barhabala ababo bemezi. Kanji-kanji, akanga ka ntyo kanakalugiba omu garhi k’obudufu! Cikone bulya abo bagula n’emilala yabo bajira obwonjo kuyerekera bene wabo na bali babo bali omu kanga kazibu, banahire amalagirire ga bene wabo oku nafasi ntanzi kulusha agabo.

⁸ Na kandi abagula banarhabale oku mukolo gw’okuyubaka Enyumpa z’Entimanano, oku bundi bubasi, n’okuhâna oburhabale amango g’obuhanya. Na kandi rhwanaderha binji erhi rhwakarhanya oku nsa abagula b’omu cigamba cirhu bageza omu kuyigiriza, okuhâna omurhima, n’okurhurhabala. Abo bene wirhu boshi n’emilala yabo bali bakuvugwa omunkwa. Mâshi Yehova ye kasinga agishe er’iroho bali bayerekana! Kobinali, aka ngasi muntu, abagula bashinganine babe n’olugero. Barhashinganini bakageza kasanzi kanji omu mikolo y’Ecikristu yone na ntyo babule akasanzi k’okugeza haguma n’emilala yabo.

9. Nk’oku biyerekinwe omu Abafilipi 2:4, 5, iroho erhi ntanya zihi Abakristu boshi bashinganine babe nazo?

⁹ Osome Abafilipi 2:4, 5. Kobinali, rhweshi rhurhaba bagula, cikone rhweshi rhwanayiga olwiganyo lwa Yezu lw’okuba n’iroho ly’okucihâna.  Ebibliya edesire oku “ayanka [arhôla] obworhere bw’omuja.” (Fl. 2:7) Orhanye ebi oko kuhugwîre. Omuja mwinja erhi mukozi mwinja, anakalonza obulyo bw’okushagalusa nnawabo. Nka muja wa Yehova na mukozi wa bene winyu na bali binyu, buzira karhinda ojira irala ly’okuhikira aha wakolesibwa bwenene na Yehova na bene winyu. Wanajira ntyo omu kurhanya kuli aga mahano gakulikire.

10. Madoso gahi rhwakacidosa rhwenene?

¹⁰Olabirize entanya zawe. Ocidose amadoso gali nk’aga: ‘Ka mba mubidu okucihâna lyo ntabala abandi? Kwa lwiganyo, gurhi njira erhi bakambwira oku njirhangula mwene wirhu okola mushosi erhi kugend’ihêka mwali wirhu okola mugikulu oku ntimanano? Kamba mubidu okuhâna obwani burhabale amango hali obulagirire bw’abantu bw’okugendicesa ahantu h’okujirira entimanano nkulu erhi aha Nyumpa y’Entimanano?’ Erhi rhucihâna emwa Yehova rhwamulaganya oku rhwakolesa ngasi ebi rhugwerhe lyo rhumukolera. Anashagaluke bwenene erhi rhukolesa akasanzi kirhu n’ebirugu birhu by’omubiri lyo rhurhabala abandi. Bici rhwakajira erhi rhwakabona oku hali ebintu rhushinganine rhujiremo empindûlo?

11. Gurhi isala lyakarhurhabala lyo rhuba n’iroho ly’okucihâna?

¹¹Oshenge Yehova kurhenga oku murhima. Kwa lwiganyo, nkaba ohikire aha wabona oku oshinganine ocihâne kulusha ly’okarhabala abandi, cikone orhamanyiri gurhi wajira ntyo. Muli ako kanga, wanashenga Yehova kurhenga oku murhima, omubwire ngasi kantu. Omubwire oku oli waciyumva koshi onamuhûne akuhe “irala n’obuhashe bw’okujira.”​—Fl. 2:13, NWT.

12. Gurhi mwene wirhu oli musole mubatize akarhabala bene wirhu na bali birhu?

¹² Erhi akaba oli mwene wirhu mubatize, onaciri musole, wanashenga Yehova akurhabale obe n’irala ly’okujira binji omu mukolo gw’ecigamba. Omu bihugo biguma na biguma, abagula bo baba banji kulusha abarhabazi b’abagula, na barhabazi banji b’abagula banabe bakola bakuzire erhi bashosi. Okubona ikubuliro lya Yehova ligendekire lyayushuka, rhulagirire oku bene wirhu baciri misole lyo bashibirira bene wirhu na bali birhu. Wanaba n’obushagaluke erhi akaba oli mubidu okukola omu ngasi mukolo onalagirirwemo. Bulya gurhi? Bulya wanashagalusa Yehova, wanaderhwa bwinja, na kandi waba n’entanya z’okurhimukwa omuntu ayumva enyanya z’okurhabala abandi.

13-14. Gurhi rhwakajira lyo rhurhabala bene wirhu na bali birhu? (Olole enfoto eri oku cijalada c’eyi gazeti.)

¹³Okahugûkwa amalagirire g’abandi. Entumwa Paolo yahanûla Abahabraniya ntya: “Okujira aminja nakwo n’okushangîra ebintu n’abandi, murhakuyibagiraga; entûlo za bene ezo zo Nyamuzinda asîma.” (Hb. 13:16) Elyo lyali ihano linja bwenene! Hisanzi hisungunu enyuma z’okuhâbwa ago maruba, Abakristu b’e Yudea bali erhi barhenzire emwababwe, baleka oburhimbuzi bwabo, baleka na bene wabo b’omulala barhali bemezi ‘bayakira oku ntondo.’ (Mt. 24:16) Buzira karhinda, muli ako kasanzi kwali kwa bulagirire okurhabalana bone na nnene. Erhi akaba embere z’aho bali bamakolesa er’ihano lya Paolo ly’okushangira ebi bagwerhe haguma n’abandi, bakabwine oku kuli kulembu okucikomereza ako kalamo kabo kahyahya.

¹⁴ Hali amango bene wirhu na bali birhu barharhubwira ebi balagirireko. Kwa lwiganyo, orhanye kuli mwene wirhu muguma wafîrirwe na mukage. K’oyo mwene wirhu agwerhe obulagirire bw’ebiryo, bw’etransporo, erhi muntu w’okumurhabala oku mikolo y’omu nyumpa? Hali amango akayabirwa okuderha oku rhumujirire kantu kalebe enyanya z’okuyoboha  oku rhwabona nk’ali arhusêza oku rhumukolere. Cikoki anashagaluka bwenene erhi rhwakarhôla omuhigo gw’okugend’imuha oburhabale arhanacirhubwira oku rhumurhabale. Rhurhakahash’iderha oku omu njira ndebe erhi omu yindi ngasi kantu kajirwa erhi rhuderhe mpu oli omu bulagirire arhubwira omu njira nci rhwamurhabalamwo. Wanacidosa ntya: ‘Erhi akaba nie nali muli ako kanga, burhabale bwa gurhi nakashagalukire okuhâbwa?’

15. Bici rhuhûnyirwe okujira lyo rhuba n’iroho ly’okucihâna?

¹⁵Obe wakuyegerwa n’abandi. Buzira karhinda, oba omanyire bene winyu na bali binyu b’omu cigamba cinyu baba babidu okurhabala abandi ngasi mango. Nta mango basagirhujira rhuciyumve nka rhuli rhwabaseza oku barhurhabale. Rhumanyire oku rhwanabalangalira, oku banarhurhabala amango rhuli omu bulagirire bw’okurhabalwa, na nirhu rhwanasîma rhube akabo! Mugula muguma ohamagalwa Alan, ogwerhe myaka 40 na kulusha, aba alonzize abandi bakamuyegera. Omu kurhanya oku lwiganyo lwa Yezu, Alan adesire ntya: “Yezu agwerhe binji byakujira, cikone abantu ba ngasi myaka bakagimuyegera banakagishagalukira okumuhûna oburhabale. Bakagimubona oku ali muntu wakag’ibashibirira. Mba ndonzize okuba n’obo borhere buli nk’obwa Yezu, n’okumanyikana oku mba muntu oyegerwa n’abandi, mushagalusi, na wakushibirira abandi.”

16. Gurhi okukolesa olwandiko lw’Ennanga 119:59, 60, kwakarhurhabala okukulikira olwiganyo lwa Yezu n’obwishwekerezi?

¹⁶ Rhurhashinganini okuvunika omurhima erhi rhwakayabirwa okuyiga olwiganyo lwa Yezu n’obwimana. (Yk. 3:2) Omuntu ociri wayiga oku babinja arhakahash’ibinja bwinja-bwinja aka mwalimu wage. Cikone erhi akagendekera aciyigiriza kugerera amagosa gage  n’okuciseza okuyiga olwiganyo lwa mwalimu wage, anagendekera akubûla omukolo gwage. Ko n’oko, erhi rhwakakola kushimbana n’ebi rhuyiga omw’ifunzo lirhu rhwenene ly’Ebibliya, rhukanajira okwirhu koshi lyo rhukubûla amagosa rhwakaba rhugwerhe, rhwanahash’ikulikira olwiganyo Yezu arhusigiraga.​—Osome Ennanga 119:59, 60.

17-18. Bunguke buhi rhwakaba nabo erhi rhwakayiga oborhere bwa Yezu bw’okucihâna?

¹⁷ Okucihâna kwirhu kwanashumya abandi nabo babe bakucihâna. Mugula muguma ohamagalwa Tim adesire ntya: “Rhujira bene wirhu baciri misole bajijire amajambere banahikire aha bahirwaho nka barhabazi b’abagula, baguma na baguma ba mulibo baciba misole bwenene, bahikire aho bulya babwine gurhi abandi baba babidu okurhabala abandi, nabo balonza okubayiga. Obushiru bwabo bw’okucihâna bunarhabale ecigamba cirhu, bananalunge abagula okuboko bwenene.”

¹⁸ Rhulamire omw’igulu liyunjwiremo iroho ly’okucikaliza. Cikone abakozi ba Yehova bohe baba lubero n’oko. Iroho ly’okucihâna lya Yezu lyarhuhumire oku murhima, rhunahizire okukulikira olwiganyo lwage. Rhurhakakulikira enshando zage n’obwinama, cikone ‘rhwanashimba enshando zage’ n’obwishwekerezi. (1 Pt. 2:21) Erhi rhwakajira okwirhu koshi lyo rhuyiga oborhere bwa Yezu bw’okucihâna, rhwanaba n’omwishingo gw’okuyemerwa na Yehova.