OMU mango Ebibliya yayandikagwa, engulo y’obuhya yakagihâbwa omulala gwabo omunyere erhi emilala yombi yakayemire oku barhôlerana. Eyo ngulo yalihiziremo okuhâna ebirugu by’engulo ndarhi, ebishwekwa, erhi nsaranga. Hali amango yakag’ilipwa omu kujira omukolo muzibu, kwa lwiganyo, Yakobo ayemire okukolera ishe wa Raheli myaka nda ly’ayemera okumurhôla. (Murh. 29:17, 18, 20) Bulya gurhi bagwerhe eyo nkomêdu ya ntyo?

Muntu muguma ohugûla eby’Ebibliya ohamagalwa Carol Meyers, adesire ntya: “Engulo yakag’ihânwa yakag’iba nk’ebwikire emikolo omunyere waherukaga akag’ijira, n’eyo ngulo yali ya bulagirire bwenene omu milala bakag’ijiramo [omukolo gw’obuhinzi].” Nkaba kandi eyo ngulo yakag’irhabala okuzibuhya obwîra egarhi k’eyo milala ibirhi erhôlerine. Obo bwîra busêzire yakabire njira y’okurhabalana omu kasanzi k’amazibu. Na kandi, eyo ngulo yakag’iyerekana oku oyo mukazi akola ali muka bene n’oku arhaciri idako ly’obulanzi n’okushibirirwa n’ishe, cikone iba ye wakahikiriza ebyo boshi.

Okuhâna engulo kurhali kuderha oku omukazi kali kantu ka kugula erhi ka kuguzibwa. Citabu ciguma cihamagalwa Les institutions de l’Ancien Testament, cidesire ntya: “Er’irhegeko ly’okuha omulala gwabo omunyere nsaranga ndebe erhi akantu kayumanine nazo, lyakag’irhuma aba Israheli babona nka kugula baguzire omukazi. Cikone, [eyo ngulo] erhakag’ibonekana nka zo nsaranga bakaguziremwo omukazi, cikoki yakag’iba nka kantu kakubwikira emikolo oyo mukazi waheruka akag’ijira omu mulala gwage.”

Ene, omu bihugo biguma na biguma, abantu bacigendekire bashimba enkomêdu y’okuhâna engulo emwabo omuhya mukazi. Amango ababusi Bakristu bahûna engulo, banaleke ‘oborhere bwabo bw’okuba ba lugero bumanyikane oku bantu boshi,’ omu kurhahûna ebintu birhalusire olugero. (Fl. 4:5, NWT; 1 Kr. 10:32, 33) Muli eyo njira, banayerekane oku ‘barhasîmiri enfaranga,’ erhi kuba n’irala ly’okuba na bintu binji. (2 Tm. 3:2, Mashi Bible) Na kandi, amango ababusi Bakristu barhahûnyiri engulo nnene bwenene, omuhya mulume arhakashanja olusiku lw’obuhya mpu ly’ayeneza engulo bamuhûnyire. Erhi kandi owaja omu buhya arhashiganini aciyumve oku bihûnyire aleke omukolo gwage gw’obupainiya mpu ly’akola bwenene na ntyo abone ensaranga zishinganine ly’ahâna engulo elengerire bwenene.

Omu bindi bihugo, leta y’ehâna irhegeko ly’engulo bakagula omukazi. Erhi akaba ntyo ko biyorha emwinyu, ababusi Bakristu bashinganine bakenge er’irhegeko. Bulya gurhi? Akanwa ka Nnâmahanga kahûnyire ngasi Mukristu oku “akayumva abarhegesi bamukulire” n’okurhumikira amarhegeko garhapingini n’amarhegeko ga Nnâmahanga.​—Rm. 13:1; Ebj. 5:29.