IRHEGEKO lya Musa, lyal’iyemire oku engûku n’enjiwa byanahânwa nterekêro emwa Yehova. Orho rhunyunyi rhombi rhwakag’iganirirwa caligumiza omu marhegeko gayerekire okuhâna enterekêro, na ngasi kaguma kakag’ikolesibwa nk’akabo karhabonekine. (Lev. 1:14; 12:8; 14:30) Bulya gurhi hâli obunguke bw’okujira ntyo? Burhangiriza, bulya engûku erhakagilug’ibonekana ngasi mango. Bulya gurhi?

Engûku rhuba rhunyunyi rhukabunga rhulama ngasi hoshi omu Israheli omu kasanzi k’emyezi y’ecidurhu. Ngasi Mwezi gw’Ikumi, orho rhunyunyi rhunabungire e mukondwe (sud) y’olunda lw’ebihugo birimo ecidurhu bwenene, buzinda rhunagaluke omu Israheli amango g’enkuba nzinda. (Lwi. 2:11, 12; Yer. 8:7) K’okuderha oku omu Israheli ya mîra, kwali kuzibu okuhâna engûku nterekêro amango g’emboho.

Cikoki, enjiwa zohe zirhalugibunga, kwali kulembu okuzibona omu Israheli omwaka goshi. Na kandi, bakag’ishweka enjiwa. (Oshushanye na Yowane 2:14, 16, Mashi Bible.) Citabu ciguma cihamagalwa Bible Plants and Animals, cidesire oku “abantu bali bashwesire enjiwa omu ngasi vile n’omu ngasi lugo lw’e Palestina. Ngasi cikala agwerhe ehyage hiyumpa hy’enjiwa erhi murhule omu lukumba, aha orhunyunyi rhwakalamire.”​—Oshushanye na Izaya 60:8.

Muli oko, Yehova ayerekana oku ali wa buzigire na wa lugero omu kuyemerera aba Israheli bakahâna enterekêro z’orhunyunyi rhwakagilug’ibonekana emwabo ngasi mwaka.