Ebiskwi Bahâga Orhubwa Rhwani
NICK olama e Oregon, omu États-Unis, ayandika ntya: “Omu kasanzi k’enkuba nzindikiriza y’omu mwaka gwa 2014, narhondera okulambagiza rhubwa rhwani rhubirhi rhusungunu omu santre vile. Kanji-kanji Abahamirizi ba Yehova bakag’iba bali omu santre vile bayimanzire aha burhambi bw’amaprezantware. Bakag’iba bayambirhe bwinja, banakag’ilamusa ngasi muntu wagezire banali bamwemwerhwa.
“Arhali bantu bone Abahamirizi ba Yehova bakag’ijirira aminja, cikone bakag’igajirira n’orhubwa rhwani. Lusiku luguma, Elaine, wal’iyimanzire aha burhambi bw’eprezantware aha orhubwa rhwani rhubirhi ebiskwi. Ngasi mango erhi rhwakagezire aha burhambi bw’eprezantware, orhubwa rhwani rhwakag’ilonza okuja emunda Abahamirizi ba Yehova bali lyo bacib’irhuha ebindi biskwi.
“Myezi milebe yagera. Orhubwa rhwakashagalukira ebiskwi, na nani nakashagalukira enganiro nyofofi nakag’ijira haguma n’Abahamirizi ba Yehova. Cikone, ntakag’ilonza okuganira nabo bwenene. Nagwerhe myaka 70 na kulusha, nanagwerhe akarhinda okubiyerekire obuyemere bw’Abahamirizi ba Yehova. Bulya nali navunisire omurhima enyanya z’amadîni g’Eciporo, nakarhanya oku kwanaba kwinja bwenene erhi nakakaciyigiriza Ebibliya nienene.
“Muli ako kasanzi, nakabona abandi Bahamirizi ba Yehova, omu zindi nafasi z’evile bayimanzire aha burhambi bw’eprezantware zabo. Nabo banali bashagalusi. Barhondera okushuza amadoso gani omukukolesa Ebibliya, nanarhondera okucikubagirabo bwenene.
“Lusiku luguma, Elaine andosa ntya: ‘K’oba oyemire oku ensimba ziba ngalo erhenga emwa Nnâmahanga?’ Namushuza erhi: ‘Neci, neci mba nyemire ntyo!’ Buzinda, Elaine ansomera olwandiko lwa Izaya 11:6-9. Kurhondera ago mango, nalonza okuyiga binji okubiyerekire Ebibliya, cikone nacikag’irhindira okurhôla ebitabu by’Abahamirizi ba Yehova.
“Omu nsiku zakulikiraga, nashagalukira enganiro nyofofi, cikone za bulagirire bwenene najiraga haguma na Elaine n’iba, Brent. Bambwira oku nsome ecitabu ca Mateyo kuhika oku Ebijiro by’Entumwa lyo mpugûkwa ebi okuba Mukristu kuba kuhiziremo. Nanajira ntyo. Hisanzi hisungunu enyuma z’aho, nayemera okuyiga Ebibliya haguma na Brent na mukage Elaine. Gali mango g’ecidurhu g’omwaka gwa 2016.
“Nakag’ilindirira olusiku lwani lw’okuyiga Ebibliya, n’olusiku lw’entimanano zakag’ijirwa omu Nyumpa y’Entimanano. Nakayumva nshagalusire bwenene okuyiga ebi Ebibliya eba edesire. Hofi mwaka muguma enyuma z’aho, nabatizibwa. Buno, nkola ngwerhe myaka 79, namanyire oku nkola mba omu njira y’okuli. Yehova angishire omu kumpira omu mulala gw’abakozi bage bacihanyîre emwage.”
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
