Amadoso g’Abantu Basoma Ebitabu Birhu
Erhi Omukristu akazaza obuhya na mukage buzira cirhumire ciyerekinwe omu Mandiko, buzinda acibija omu buhya, gurhi ecigamba cishinganine cikabona obo buhya burhanzi n’obuhyahya?
Omu kanga ka ntyo, ecigamba cishinganinine cikabona obo buhya burhanzi oku bwahwire amango oyo mulume ashubig’ija omu buhya, cinashinganine cikabona obo buhya buhyahya oku bo buyemerirwe. Lyo rhuhugûkwa ebirhumire rhwaderha ntyo, rhuganirire ebi Yezu aderhaga okubiyerekire okuzaza obuhya n’okucib’ija omu buhya.
Omu Mateyo 19:9, NWT, Yezu ayerekine kantu kaguma kone kayerekinwe omu Mandiko kakarhuma obuhya bwahwa. Aderha ntya: “Ngasi muntu wazaze obuhya na mukage, nk’arhali by’enshonyi birhumire akanarhôla owundi mukazi, erhi kuhusha ahushire.” Enderho za Yezu ziyerekine oku (1) okujira eby’enshonyi kone kantu kayerekinwe omu Mandiko kakarhuma obuhya bwazazibwa, n’oku (2) omulume wazaza obuhya na mukage buzira cirhumire ciyerekinwe omu Mandiko, akanarhôla owundi mukazi erhi kuhusha ahushire. *
K’enderho za Yezu ziyerekine oku omulume wajijire eby’enshonyi, akanazaza obuhya na mukage, Amandiko gamuhîre oluhuma lw’okucib’ija omu buhya? Nanga. Erhi omulume akajira obuhushi, omukazi balenganyagya anahiga erhi amubabalira erhi arhamubabalire. Erhi akalahira oku arhamubabalire, akanazaza obuhya kushimbana n’irhegeko, ngasi muguma wa muli bo anaba akola agwerhe oluhuma lw’okucib’ija omu buhya haguma n’owundi muntu alonzize, enyuma z’okuyusa byoshi bihûnyirwe lyo bazaza obuhya.
Omu yindi njira, omukazi balenganyagya analonza okulanga obuhya bwage, na ntyo anayerekana oku alonzize okubabalira iba. Cikone, gurhi byakaba erhi omukazi balenganyagya akalonza okubabalira iba, cikone iba alahire, ananajire okwage koshi ly’azaza obuhya bwabo na mukage arhalonzizi? Bulya oyo mukazi alonzize okumubabalira n’okugendekeza obuhya bwabo, Amandiko garhayemiri oku oyo mulume anacib’ija omu buhya. Erhi akahiga okucib’irhôla owundi mukazi ciru akaba Amandiko garhamuhîri oluhuma lw’okujira ntyo, aho erhi amacib’ijira obuhushi. Abagula b’ecigamba banacib’ijira ekomite y’obuhane, lyo bashibirira ebyo bintu bibi anajijire.—1 Kr. 5:1, 2; 6:9, 10.
Erhi omulume akacib’irhôla owundi mukazi ciru akaba Amandiko garhamuyemeriri okujira ntyo, gurhi ecigamba cishinganine cikabona obo buhya burhanzi n’obo buhyahya? K’Amandiko gaciyemire obo buhya burhanzi? K’oyo mukazi balenganyagya anacihiga okubabalira oyo wali iba erhi nanga? K’ecigamba cishinganine cikabona obo buhya buhyahya nka buhushi?
Embere, ecigamba cakag’ibona obo buhya buhyahya oku buli buhushi, amango omukazi balenganyagya acizine, arhacibir’ija omu buhya, arhanajijiri eby’enshonyi. Cikone, rhukengere oku erhi Yezu ali aganirira okubiyerekire okuzaza obuhya n’okucib’ija omu buhya, arhaganiriraga oyu balenganyagya. Lubero n’oko, ahugwîre oku omulume wazaza obuhya na mukage buzira cirhumire ciri omu Mandiko, akanacib’irhôla owundi mukazi, erhi kuhusha ahushire. Omu kanga ka ntyo, Yezu adesire oku okuzaza obuhya n’okucib’irhôla owundi mukazi, buli buhushi n’okujira ntyo kuli kuyusa obuhya burhanzi.
“Ngasi muntu wazaze obuhya na mukage, nk’arhali by’enshonyi birhumire akanarhôla owundi mukazi, erhi kuhusha ahushire.”—Mt. 19:9, NWT
Erhi omulume akazaza obuhya na mukage akanacib’irhôla owundi mukazi, birhakacihashikana oyo mukazi balenganyagya okubabalira iba erhi nanga. K’okuderha oku arhakacicilibuza omukucidosa erhi ababalira oyo wali iba erhi arhamubabalire. Kandi, omukazi balenganyagya abe erhi afîre, acibir’iheruka erhi kujira eby’enshonyi, oko kurhakashanja oku ecigamba cibona obo buhya buhyahya. *
Omu kanga rhwaganiriraga embere, omulume ajire obuhushi n’oko kurhume azaza obuhya. Cikone, gurhi byakaba erhi akaba omulume arhajijiri buhushi, cikone azaze obuhya n’okucib’irhôla owundi mukazi? Gurhigi erhi omulume akaba arhajijiri eby’enshonyi embere azaze obuhya, cikone abijire enyuma z’okubuzaza n’okucib’irhôla owundi mukazi ciru akaba mukage wa mîra alonzize okumubabalira? Mw’ezo nyiganyo zoshi, okuzaza obuhya n’okucib’irhôla owundi mukazi, kuli kujira obuhushi, n’okujira ntyo, kuli kuyusa obuhya bw’embere. Obo buhya buhyahya, bo bukola bumanyikine n’irhegeko. Nk’oku biyerekinwe omu Ilabiro ly’Akalalizi ly’omu nsiku 15/2/1980, bukurasa bwa 31-32 (omu Cifaransa), “oyo mulume akola ali omu buhya buhyahya, arhakanacibuyusa n’okugalukira mukage w’embere; bulya okuzaza obuhya, okujira obuhushi, n’okucib’irhôla owundi mukazi, kwayusize obo buhya bw’embere.”
Aga mahugûlo mahyahya garhalonzizi okubwira Abakristu oku bakabona obuhya oku burhaciri butagatifu, n’oku obuhushi cirhaciri caha cizibu. Omulume wazaza obuhya na mukage buzira cirhumire ciyerekinwe omu Mandiko, akanacib’irhôla owundi mukazi, n’Amandiko garhamuyemeriri okujira ntyo, ashinganine aje omu komite y’obuhane, bulya anajijire obuhushi. (Erhi akaba omukazi oyo mulume arhôzire naye ali Mukristu, naye ashinganine aje omu komite y’obuhane, bulya anajijire obuhushi.) Ciru akaba obo buhya buhyahya burhashinganini bukabonwa nka buhushi, hashinganine hagere myaka minji embere oyo mulume ahâbwe emikolo yago-yago omu cigamba. N’embere ayihâbwe, abantu barhacishinganini babe bagayire enyanya z’ebintu bibi ajiraga, banashinganine babe bakola bali bamukenga. Na kandi abagula bashinganine barhanye oku kanga k’oyo mukazi balenganyagya, n’akanga k’abana alekaga nkaba banaciri barho.—Mal. 2:14-16.
Bulya okuzaza obuhya buzira cirhumire ciyerekinwe omu Mandiko, n’okurhôla owundi mukazi kwanalerha mazibu manji, Abakristu bashinganine bakabona obuhya oku buli butagatifu nk’oku Yehova abubona.—Muh. 5:4, 5; Hb. 13:4.
^ kip. 2 Kwa bofofi, mw’eci cigabi, rhwaja rhwaganirira oku owajijire obuhushi ali mulume, n’owalenganyizibwe ali mukazi. Cikone, nk’oku biyerekinwe omu Marko 10:11, 12, Yezu ayerekine n’obwalagale oku ihano ahânaga okubiyerekire ako kanga, lyanakolesibwa oku balume n’oku bakazi.
^ kip. 1 Ezi ntanya zikubwîre oku rhwal’ihugûsirwe obuhya bwa ntyo. Rhwal’ibuhugûsirwe oku buli buhushi amango oyu balenganyagya acizine, arhazigicib’ija omu buhya, arhanazig’ijira eby’enshonyi.
