1-2. Bici byakarhuma Yehova ayemera enterekêro yirhu?

 BICI orhanyako erhi oyumva oluderho “nterekêro”? Nkaba onabone omu bukengere bwawe mwene wirhu mwirhohye ofukamire aha burhambi bw’encingo yage, anali abwira Yehova ebimuli omu murhima. Erhi nkaba onarhanye okubiyerekire abantu b’omu mulala bali bashagalukira okuyiga Ebibliya haguma.

² Abo bantu baganirirwe mw’ako kanga kombi, bali bajira enterekêro. Ka Yehova ayemera enterekêro yabo? Anayiyemera erhi akaba epatine n’omuhigo gwage banali bayihâna omu njira y’obuzigire na ya bukenge. Rhuba rhuzigire Yehova bwenene. Rhuba rhumanyire oku ashinganine okuhâbwa enterekêro, rhunalonzize enterekêro yirhu ebe nyinja bwenene.

3. Bici rhwaganirira mw’eci cigabi?

³ Mw’eci cigabi, rhwaganirira enterekêro Yehova akag’iyemera mango mîra. Na kandi rhwaganirira bigabi munani by’enterekêro ayemera ene. Okujira ntyo, kwarhurhabala rhubone gurhi rhwakakubûlamwo enterekêro yirhu. Na buzinda rhwabona bulya gurhi enterekêro y’okuli erhulerhera omwishingo.

4. Gurhi abakozi ba Yehova b’embere Yezu ayishe hanw’igulu bayerekinemwo oku bal’ikenzire Yehova banal’imuzigire?

⁴ Embere Yezu ayishe hanw’igulu, balume baguma na baguma bishwekerezi nka Abeli, Nuhu, Abrahamu, na Ayubu bayerekine oku bal’ikenzire Yehova banal’imuzigire. Gurhi bayerekinemwo ntyo? Kugerera oku kurhumikira kwabo, obuyemere bwabo,  n’enterekêro zabo zʼensimba. Ebibliya erhayerekini ngasi kantu okubiyerekire enterekêro bakagiha Yehova. Cikone, bajijire okwabo koshi lyo baha Yehova obukuze ananayemera enterekêro yabo. Buzinda, Yehova aha iburha lya Abrahamu Irhegeko lya Musa. Er’Irhegeko lya Musa lyalimo marhegeko manji galihânyire amahano gaganirire kwa bulîri enterekêro Yehova akag’iyemera.

5. Mpindûlo ehi yahizirweho okubiyerekire enterekêro y’okuli enyuma z’okufâ n’okufûka kwa Yezu?

⁵ Enyuma z’okufâ n’okufûka kwa Yezu, Yehova arhacigendekeraga ahûna abantu oku barhumikire Irhegeko lya Musa. (Rm. 10:4) Abakristu balishinganine barhondere okurhumikira irhegeko lihyahya, k’okuderha, “irhegeko lya Kristu.” (Gl. 6:2) Bakarhumikire er’“irhegeko,” arhali omu kulibikirira omu bukengere erhi omu kucishwekera oku liste y’ebyakajirwa n’ebirhakajirwa, ci omu kuyiga olwiganyo lwa Yezu n’okukulikira enyigirizo zage. Ene nalyo, Abakristu bali bajira okwabo koshi lyo bakulikira Kristu, omu kujira ntyo bali banashagalusa Yehova n’‘okubona irhamuko.’​—Mt. 11:29.

6. Gurhi rhwakayungukamwo n’eci cigabi?

⁶ Hano rhuja rhwaganirira ngasi cigabi c’enterekêro yirhu, ocidose ntya: ‘Majambere gahi namakajira okubiyerekire eci cigabi?’ Na kandi wanacidosa ntya: ‘Ka nanakubûla enterekêro yani?’ Wanashagalukira amajambere wamakajira, cikone olonze gurhi wakarhanya kugerera isala okubiyerekire ngasi mpindûlo oshinganine ocib’ijira.

7. Gurhi Yehova abona amasala girhu garhenzire oku murhima?

⁷ Rhunahe Yehova enterekêro erhi rhumushenga. Amandiko gashushanyize amasala girhu n’obukû burheganye bwinja-bwinja bwakag’ihânwa omw’ihema ly’entimanano na buzinda omu hekalu. (Enna. 141:2) Obo bukû bwakagirhengako akîsûnunu kinja kakagishagalusa Nnâmahanga. Ko n’oko, amasala girhu garhenzire oku murhima ‘kushagaluka agashagalukira,’ ciru akaba rhukolesize enderho nembu. (Mig. 15:8, Mashi Bible; Lush. 33:10) Rhugwerhe ecirhumire c’okuyemera oku Yehova anashagalukire okuyumva enderho zirhu ziyerekine oku rhumuzigire rhunamuvuzire omunkwa. Aba alonzize rhumuganirire okubiyerekire ebirhulibuzize, obulangalire bwirhu, n’irala lirhu. Embere oshenge Yehova, wanarhag’irhanya kw’ebi waderha. Erhi wakajira ntyo, wanaha Sho w’omu mpingu isala linja liri nka bukû.

8. Bulyo buhi bwinja rhugwerhe bw’okukuza Nnâmahanga?

⁸ Rhunahe Yehova enterekêro erhi rhumukuza. (Enna. 34:1) Rhunakuze Yehova erhi rhuganirira abandi okubiyerekire amorhere gage minja n’emikolo yage. Erhi rhwakaba ba kuvuga omunkwa, rhwanaba na bintu binji rhwakaderha okubiyerekire Yehova. Rhwanakaha Yehova irenge erhi rhwakakaciha akasanzi k’okurhanya oku bwinja bwage n’ebi arhujirire. Omukolo gw’amahubiri gunarhuhe obulyo bw’‘okurhûla Nyamuzinda enterekêro y’obukuze ngasi mango, kwo kuderha emburho y’orhunwa’ rhwirhu. (Hb. 13:15) Nka kula rhurhangirhanya kw’ebi rhwabwira Yehova omw’isala, ko rhunashinganine rhurhang’ikarhanya kw’ebi rhwabwira abantu rhwarhimanana nabo omu mukolo gw’amahubiri. Rhuba rhulonzize “enterekêro [yirhu] y’obukuze” ebe nyinja bwenene. Co cirhuma rhuderha n’obushagaluke amango rhuli rhwahubiri abandi.

9. Ak’Abaisraheli ba mîra, bunguke buhi rhuba nabo erhi rhuja oku ntimanano? Ohâne olwiganyo lw’obunguke wacibwinîre.

⁹ Rhunahe Yehova enterekêro erhi rhuja oku ntimanano. Abaisraheli ba mîra bal’ibwizirwe ntya: “Kasharhu omu mwaka, ngasi bûko  mulume onali emwawe, ayishiciyerekana omu masu ga Nyamubaho, Nyamuzinda wawe, halya hantu Nyakasane [Yehova, NWT] anacishozire.” (Lush. 16:16) Bakag’isiga enyumpa zabo n’amashwa gabo buzira muntu w’okubilanga. Cikone Yehova al’ibalaganyize ntya: “Ntaye ciru n’omuguma waderhe mpu ayagalwa n’ecihugo cawe amango warherema, ogendilola obusu bwa Nyakasane [Yehova, NWT], Nyamuzinda wawe.” (Lub. 34:24) Bulya Abaisraheli bal’ilangalire Yehova loshi-loshi, bakagija kw’ago madinye ga ngasi mwaka. Oko kwakagibalerhera bunguke bunji, kwa lwiganyo, bakag’ihugûkwa bwinja Irhegeko lya Nnâmahanga, bakag’irhanya oku bwinja bwage, n’okushagalukira okuba haguma n’ababo bemezi. (Lush. 16:15) Na nirhu rhunabe n’obunguke bwa ntyo erhi rhuleka bintu bilebe lyo rhuja oku ntimanano z’Ecikristu. Orhanye gurhi Yehova ashagaluka erhi rhuja oku ntimanano rhwanarheganyize amashuzo mofofi na ga kuyubaka.

10. Bulya gurhi okuyimba ciba cigabi c’obulagirire c’enterekêro yirhu?

¹⁰ Rhunahe Yehova enterekêro erhi rhuyimba haguma n’abandi. (Enna. 28:7) Abaisraheli bakag’ibona okuyimba oku cali cigabi c’obulagirire c’enterekêro yabo. Mwami Daudi ahiraho Bene-Levi 288 oku babe bimbiza omu hekalu. (1 Nga. 25:1, 6-8) Ene, rhwanayereka Nnâmahanga oku rhumuzigire omu kumuyimbira enyimbo z’obukuze. Arhali okw’izu lirhu liyorha ko kaba kantu k’obulagirire bwenene. Orhanye k’olu lwiganyo: Erhi rhuganira, “rhweshi rhweshi rhunahabuke kanji,” cikone oko kurharhuhanza okuganira omu cigamba n’omu mukolo gw’amahubiri. (Yk. 3:2) Ko n’oko, rhurhashinganini rhuleke okuyimbira Yehova irenge mpu bulya izu lirhu lirhaba linja.

11. Nk’oku biyerekinwe omu Ennanga 48:13, bulya gurhi rhushinganine rhucihirireho akasanzi k’okuyiga Ebibliya omu mulala?

¹¹ Rhunahe Yehova enterekêro erhi rhuciyigiriza Akanwa kage n’okuyigiriza abana birhu okubimuyerekire. Esabato yakagiha Abaisraheli obulyo bw’okuleka emikolo yabo ya ngasi lusiku lyo bazibuhya obwîra bwabo haguma na Yehova. (Lub. 31:16, 17) Abaisraheli bishwekerezi bakagiyigiriza abana babo okubiyerekire Yehova n’obwinja bwage. Na nirhu rhushinganine rhukacihiriraho akasanzi k’okusoma n’okuciyigiriza Akanwa ka Nnâmahanga. Eco ciba cigabi c’enterekêro rhuha Yehova cinanarhurhabale okumuyegera. (Enna. 73:28) Erhi rhuyiga Ebibliya haguma omu mulala rhunarhabale abana birhu bacijirire obwîra bwa hofi-hofi haguma na Larha wirhu w’obuzigire w’omu mpingu.​—Osome Ennanga 48:13.

12. Bici rhuciyigirizize kugerera oku Yehova akag’ibona omukolo gw’abantu bajiraga ebirugu by’omw’ihema ly’entimanano?

¹² Rhunahe Yehova enterekêro erhi rhuyubaka n’okushibirira aha rhujirira entimanano. Ebibliya edesire oku okujira ihema ly’entimanano n’ebirugu byalimo gwali “mukolo mutagatifu.” (Lub. 36:1, 4, NWT) Ene nalyo, Yehova anabone omukolo gw’okuyubaka Enyumpa z’Entimanano n’ezindi nyumpa z’eciteokrasi oku guli mukolo mutagatifu. Bene wirhu na bali birhu baguma na baguma banageze kasanzi kanji mw’eyo mikolo. Kobinali rhunashagalukire oburhabale bahâna omu mukolo gw’Obwami. Banajire n’omukolo gw’amahubiri. Ciru baguma na baguma ba mulibo banalonze okuba bapainiya. Abagula b’ecigamba banayerekana oku balunzire okuboko eyo mikolo y’obubasi omu kurharhindira okuyemerera abo bene wirhu na bali birhu b’obushiru okuba bapainiya amango bamahikiriza ebihûnyirwe. Rhube rhujira obulenga omu  mukolo gw’obubasi erhi nanga, ngasi muguma wirhu anajira okwage koshi ly’arhabala oku mukolo gw’okucesa n’okushibirira ezo nyumpa.

13. Gurhi rhushinganine rhukabona oburhabale rhuhâna lyo rhulunga okuboko omukolo gw’Obwami?

¹³ Rhunahe Yehova enterekêro erhi rhulunga okuboko omukolo gw’Obwami omu kuhâna oburhabale. Abaisraheli barhal’ishinganine baje embere za Yehova maboko mûmu. (Lush. 16:16) Bakag’ilerhera Yehova engalo z’ebirugu kushimbana n’obuhashe bwabo. Omu kujira ntyo, bakag’iyerekana oku bashagalukire emipango yoshi yal’irhôzirwe lyo bayunguka kiroho. Gurhi rhwakayerekanamwo oku rhuzigire Yehova n’oku rhushagalukire ngasi kantu ali arhuha? Enjira nguma rhwakajiramwo ntyo kuli kuhâna oburhabale bw’ensaranga kushimbana n’obuhashe bwirhu lyo rhulunga okuboko ecigamba cirhu n’omukolo gw’Obwami omw’igulu lyoshi. Kushimbana n’oko entumwa Paolo yaderha ntya: “Obulonza bukabiduha, eci omuntu agwerhe co cinarhuma asimwa, ci arhankadôsibwa eci arhagwerhi.” (2 Kr. 8:4, 12) Yehova anashagalukire ngasi burhabale rhuhâna kurhenga oku murhima ciru akaba buli busungunu.​—Mk. 12:42-44; 2 Kr. 9:7.

14. Nk’oku biyerekinwe omu Emigani 19:17, gurhi Yehova abona oburhabale rhuha bene wirhu bali omu bulagirire?

¹⁴ Rhunahe Yehova enterekêro erhi rhurhabala abirhu Bakristu bali omu bulagirire. Yehova al’ilaganyize oku akahembire Abaisraheli bakag’iyereka abakenyi olukogo. (Lush. 15:7, 10) Kobinali, ngasi mango erhi rhurhabala owirhu mwemezi oli omu bulagirire, Yehova anabone nka ngalo rhumuhire. (Osome Emigani 19:17.) Kwa lwiganyo, erhi Abakristu b’e Filipi barhumira Paolo engalo erhi ali omu mpamikwa, aderha oku eri “nterekero Nnâmahanga ayankirira anasimiswa nayo.” (Fl. 4:18) Orhanye oku bantu b’omu cigamba cinyu onacidose ntya: ‘Ka muli muntu mulebe nakarhabala?’ Yehova anashagaluke erhi abona rhwakolesa akasanzi kirhu, emisi yirhu, obuhashe bwirhu, n’ebirugu birhu lyo rhurhabala abali omu bulagirire. Yehova anabone ebyo oku ciri cigabi c’enterekêro yirhu.​—Yk. 1:27.

15. Enterekêro y’okuli enahûne akasanzi n’obushiru, cikone bulya gurhi gurhaba muzigo muzirho?

¹⁵ Enterekêro y’okuli eba ehûnyire akasanzi n’obushiru. Cikone gurhaba muzigo muzirho. (1 Yn. 5:3) Bulya gurhi? Bulya obuzigire rhujirako Yehova bo burhushumya rhumuharamye. Orhanye okubiyerekire mwana mulebe olonzize okuha ishe kantu kalebe. Anayusa nsa nyinji ali acapa enfoto amuha. Oyo mwana arhakaciyunjuza enyanya z’akasanzi anagezagya ali acapa eyo nfoto. Bulya azigire ishe, ashagalukire okumuha eyo ngalo. Ko n’oko, bulya rhuba rhuzigire Yehova rhunashagalukire okuhâna akasanzi n’obushiru bwirhu omu nterekêro y’okuli.

16. Nk’oku biyerekinwe omu Abahabraniya 6:10, gurhi Yehova abona obushiru rhujira lyo rhumushagalusa?

¹⁶ Ababusi b’obuzigire barhalangalira oku ngasi mwana wabo abaha engalo eri nk’eyo wabo. Baba bahugûsirwe oku ngasi mwana aba lubero n’owundi n’oku ngasi muguma ajira obwage buhashe. Ko n’oko, Larha wirhu w’omu mpingu aba ahugûsirwe obuhashe bwa ngasi muguma wirhu. Nkaba wanajira binji kulusha bantu banji oba amanyire onazigire. Erhi nkaba orhakahash’ijira binji nk’oku abandi bali bajira, erhi myaka yawe erhuma, amagala gawe, erhi emikolo ojira omu mulala. Orhavunikaga omurhima. (Gl. 6:4) Yehova arhakayibagira omukolo gwawe. Agendekera ashagaluka erhi wakagendekera wajira ebi wakanahasha onagwerhe  ebikushumize binja. (Osome Abahabraniya 6:10.) Yehova anabone ciru n’ebi olonzize okujira. Aba alonzize okashagalukira n’okurhimukwa n’enterekêro wakahash’imuha.

17. (a) Mihigo ehi rhwakarhôla erhi rhwakabona oku bigabi bilebe by’enterekêro yirhu biri bizibu? (b) Gurhi warhabirwe kugerera cigabi cilebe ciyerekinwe omu cisanduku cidesire “ Oyushule Omwishingo Gwawe”?

¹⁷ Gurhi rhwakajira erhi rhwakakabona oku kuli kuzibu okujira bigabi bilebe by’enterekêro yirhu, kwa lwiganyo, okujira ifunzo lirhu ly’Ebibliya erhi okuhubiri ahantu hali bantu banji? Rhwanabona oku, okurhwagendekera rhwacihâna mw’eyo mikolo ko rhwanagendekera rhwayishagalukira n’okuyunguka nayo. Rhwanashushanya enterekêro yirhu na mikolo miguma na miguma, kwa lwiganyo, okujira esporo erhi kuciyigiriza okukolesa combo cilebe c’omuziki. Rhurhakajira amajambere muli oko erhi rhwakabula kukacikomereza ngasi mango. Cikone orhanye gurhi byakaba erhi rhwakahiga okukajira ntyo ngasi lusiku. Nkaba oku murhondero rhwanajira kasanzi kasungunu kone rhuli rhwajira ntyo. Cikoki erhi rhwakagendekera rhwajira ntyo, rhwanahikira aha rhwarhondera okugezamo kasanzi kanji. Erhi rhwakabona obunguke bwinja bw’obushiru bwirhu, rhwanakacifinja ako kasanzi kahike n’okukashagalukira. K’obwine gurhi wakakolesa olo lwiganyo okubiyerekire enterekêro yirhu?

18. Gurhi rhuhikirizamwo omuhigo gw’okubaho kwirhu, na bunguke buhi oko kulerha?

¹⁸ Rhunahikirize omuhigo gw’okubaho kwirhu, erhi rhuharamya Yehova n’omurhima gwirhu goshi. Oko kunarhume rhwaba n’omwishingo, akalamo kinja kagwerhe omuhigo, n’obulangalire bw’okuyish’iharamya Yehova ensiku n’amango. (Mig. 10:22) Rhukola rhujira omurhula gw’ekandalala bulya rhuba rhumanyire oku Yehova anarhabale abakozi bage amango bali omu mazibu. (Iz. 41:9, 10) Kobinali, rhugwerhe ebirhumire binja by’okuba n’omwishingo amango rhuli rhwaha Larha wirhu w’obuzigire enterekêro bulya ashinganine ‘ahâbwe irenge, n’obukuze’ kurhenga emw’ebiremwa byage byoshi!​—Maf. 4:11.