1-2. Gurhi olwiganyo lwa Paolo lwakarhabalamwo abagula ene?

 ENTUMWA Paolo yal’izigire bene wabo. Akozire buzira kurhama ly’abashibirira. (Ebj. 20:31) N’ababo bemezi, bal’imuzigire bwenene. Mango maguma, abagula b’e Efezi “balaka” erhi bamanya oku barhakacimubona. (Ebj. 20:37, Mashi Bible) Abagula birhu nabo baba bazigire bene wabo na bali babo bwenene, n’oko kunarhume bajira okwabo koshi lyo babarhabala amango hali obulagirire bw’okujira ntyo. (Fl. 2:16, 17) Cikone, hali amango abagula balwisa amazibu. Bici byakabarhabala bagahime?

² Abagula birhu bajira omukolo muzibu banayiga olwiganyo lwa Paolo. (1 Kr. 11:1) Arhagwerhe obuhashe buli nk’obwa bamalahika. Bulya Paolo arhali mwimana, hali amango akag’iyabirwa okujira ebintu binja. (Rm. 7:18-20) Ananakag’ilwisa mazibu manji. Cikone, Paolo arharhamaga arhanahezagya omwishingo gwage. Erhi abagula bakayiga olwiganyo lwa Paolo, banahima amazibu bali balwisa, n’okugendekera baba n’omwishingo omu mukolo gwa Yehova. Rhulole gurhi bakajiramwo ntyo.

3. Bici rhwaganirira mw’eci cigabi, na bici carhurhabala rhujire?

³ Mw’eci cigabi, rhwaganirira mazibu ani abagula balug’ilwisa: (1) okurhaleka emikolo yago-yago erhume bayibagira omukolo gw’amahubiri, (2) okushibirira ebibuzi, (3) okulwisa obuzamba bwabo, (4) n’okulembera obuzamba bw’abandi. Rhwayiga gurhi Paolo ahimire ngasi maguma ga mw’ago mazibu na gurhi abagula bakayigamwo olwiganyo lwage.

4. Bulya gurhi mango maguma na maguma abagula bakabona oku kuli kuzibu okuba lwiganyo lwinja omu mukolo gw’amahubiri?

⁴ Bulya gurhi okujira ntyo kwanaba kuzibu? Ahanyuma n’okuba lwiganyo okubiyerekire omukolo gw’amahubiri, abagula bajira  eyindi mikolo minji yago-yago. Kwa lwiganyo, banji banayimangire entimanano y’omu kagarhi k’omugobe n’okulongoza Ifunzo ly’Ebibliya ly’Ecigamba. Bananajire ebindi bigabi by’okuyigiriza kw’eyo ntimanano. Banajire binji omu kukomereza abarhabazi b’abagula n’okugendekera baha bene wirhu na bali birhu omurhima. (1 Pt. 5:2) Bagula baguma na baguma banarhabale oku mukolo gw’okuyubaka n’okushibirira Enyumpa z’Entimanano n’ezindi nyumpa z’eciteokrasi. Cikone, ak’abahubiri boshi b’omu cigamba, omukolo murhanzi na gwa bulagirire bwenene abagula bashinganine bajire, kuli kuyaliza omwanzi mwinja.​—Mt. 28:19, 20.

5. Lwiganyo luhi Paolo ayerekine okubiyerekire omukolo gw’amahubiri?

⁵ Olwiganyo lwa Paolo. Ebyarhabire Paolo abe n’amalehe minja omu mukolo gw’amahubiri, biganirirwe omu Abafilipi 1:10, NWT. Arhubwizire ntya: “Mumanyirire ebintu by’obulagirire bwenene.” Paolo akulikire er’ihano ahânaga. Al’ihâbirwe omukolo gw’amahubiri, n’omu myaka minji, agendekire agubona oku kali kantu kaguma k’omu bintu byali bya bulagirire omu kalamo kage. Akag’ihubiri “embere z’abantu banji na nyumpa oku yindi.” (Ebj. 20:20, NWT) Arhakag’ihubiri kasanzi kaguma kone omu lusiku, erhi lusiku luguma lone omu mugobe. Akag’ikolesa ngasi bulyo boshi agwerhe ly’ahubiri! Kwa lwiganyo, amango akag’ilindira ababo banyakazi e Atene, ahubiri ecigusho c’abantu balengerire, na baguma ba mulibo bayumvirhiza. (Ebj. 17:16, 17, 34) Ciru n’amango Paolo ali omu “mugozi,” akag’ihubiri abakag’imulambagirira.​—Fl. 1:13, 14, Mashi Bible; Ebj. 28:16-24.

6. Gurhi Paolo akomerezizemwo abandi?

⁶ Paolo akolesize bwinja akasanzi kage. Akag’ilalika abandi bagende haguma naye omu mahubiri. Kwa lwiganyo, omu mubalamo gwage murhanzi gw’obumisiyonere, agenda na Yowane wakag’ihamagalwa Marko; n’omu mubalamo gwa kabirhi, agenda na Timoteyo. (Ebj. 12:25; 16:1-4) Buzira karhinda, Paolo ajijire okwage koshi ly’ayigiriza abo balume gurhi bapanga ecigamba, gurhi bajira omukolo gw’okulambagirira ebibuzi, na gurhi bakabamwo balimu binja.​—1 Kr. 4:17.

7. Gurhi abagula bakakulikiramwo ihano lya Paolo liri omu Abefezi 6:14, 15?

⁷ Isomo lici rhukuzire aho? Abagula banayiga olwiganyo lwa Paolo arhali omukuhubiri kone nyumpa oku yindi, ci n’omukuba babidu okuhâna obuhamirizi ngasi mango. (Osome Abefezi 6:14, 15.) Kwa lwiganyo, banahâna obuhamirizi amango bali bagula ebintu, erhi amango bali omu kazi. N’amango bali barhabala oku mukolo gw’obubasi bw’enyumpa z’eciteokrasi, banahubiri abalungu n’ababaguliza ebintu. Aka Paolo, abagula banakolesa akasanzi  bageza omu mukolo gw’amahubiri lyo bakomereza abandi kuhiramo n’abarhabazi b’abagula.

8. Bici omugula akajira mango maguma na maguma?

⁸ Abagula barhashinganini bayibagire omukolo gw’amahubiri mpu bulya bagwerhe mikolo minji omu cigamba n’omu muzunguko. Banalahira mikolo miguma na miguma lyo bagendekera baba ba lugero. Enyuma z’okurhanya kugerera isala, hali amango bakabona oku erhi bakayemera mukolo mulebe, barhacihashe okuhikiriza ebintu by’obulagirire. Ebyo bintu bihiziremo okulongoza enterekêro y’omulala ngasi mugobe, okucihâna omu mukolo gw’amahubiri, n’okukomereza abana babo muli ogo mukolo. Bagula baguma na baguma banabona oku kuli kuzibu okulahira mukolo mulebe, cikone bashinganine bayemere n’obwalagale oku Yehova aba ahugûsirwe obulonza bwabo bw’okuba ba lugero omu bintu byoshi.

9. Bulya abagula bagwerhe mikolo minji, bici byakaba bizibu kulibo okujira?

⁹ Bulya gurhi okujira ntyo kwanaba kuzibu? Abakozi ba Yehova bagwerhe mazibu manji. Muli zino nsiku nzinda, rhweshi rhulagirire oku kuhâbwa omurhima, okurhabalwa, n’okurhulirizibwa. Hali n’amango baguma na baguma ba muli rhwe baba balagirire oku burhabale lyo bayaka olugenzi lubi. (1 Ts. 5:14) Kobinali, abagula barhakayusa amazibu goshi abakozi ba Yehova bali balwisa. Ciru akaba ntyo, Yehova alonzize abagula bajire okubakanahasha lyo baha ebibuzi omurhima n’okubilanga. Gurhi abagula bajira mikolo minji bakabonamwo akasanzi k’okuha abandi oburhabale balagirireko?

10. Kushimbana na 1 Abatesalonika 2:7, gurhi Paolo ashibiriremwo abakozi ba Yehova?

¹⁰ Olwiganyo lwa Paolo. Paolo akag’ilonza obulyo bw’okuvuga bene wabo omunkwa n’okubaha omurhima. Kwanaba kwinja erhi abagula bakayiga olwiganyo lwa Paolo omukujirira abakozi ba Yehova n’obuzigire bunji. (Osome 1 Abatesalonika 2:7.) Paolo akag’ibwira ababo bemezi n’obwalagale oku abazigire n’oku Yehova naye abazigire. (2 Kr. 2:4; Ef. 2:4, 5) Paolo akag’ijirira bene wabo na bali babo b’omu cigamba nka bîra anakag’igeza akasanzi haguma nabo. Ayerekana oku al’ibalangalire omukubaganirira okubiyerekire ebi al’iyobohire n’obuzamba bwage. (2 Kr. 7:5; 1 Tm. 1:15) Cikone, Paolo arhakag’isegeza obwenge oku mazibu gage. Lubero n’oko, al’ilonzize okurhabala bene wabo na bali babo.

11. Bulya gurhi Paolo akag’ihanûla bene wabo na bali babo?

¹¹ Hali amango byakag’ihûna Paolo ahanûle bene wabo na bali babo. Cikone, arhakag’ijira ntyo mpu bulya bamugayisize. Akag’ibahanûla bulya al’ibashibirire, ananal’ilonzize abalange oku mazibu maguma na maguma. Akag’ijira okwage koshi ly’amahano gage gaba malembu okuhugûkwa ananal’ilonzize abandi bagayemere. Kwa lwiganyo, omu maruba Paolo ayandikiraga Abakorinti, abahanûla kwa buzibu-zibu.  Enyuma z’okuyandika ago maruba, abarhumira Tito. Paolo agwerhe irala ly’okumanya gurhi bayankirire amaruba gage. Ashagaluka bwenene erhi ayumva oku bayemire amahano gage banagakolesize!​—2 Kr. 7:6, 7.

12. Gurhi abagula bakahâmwo ababo bemezi omurhima?

¹² Isomo lici rhukuzire aho? Abagula banayiga olwiganyo lwa Paolo omukukageza akasanzi haguma n’ababo bemezi. Njira nguma bakajiramwo ntyo, kuli kukahika oku ntimanano embere z’akasanzi lyo bajira enganîro z’okuha abandi omurhima. Kanji-kanji, biba bihûnyire kasanzi kasungunu kone ly’omuntu aha mwene wabo erhi mwali wabo omurhima. (Rm. 1:12; Ef. 5:16) Kandi, omugula oyizire olwiganyo lwa Paolo, anazibuhya ababo bemezi omukukolesa Akanwa ka Nnâmahanga ly’abaha omurhima n’okubayemeza n’obwalagale oku Yehova aba abazigire. Na kandi anayerese ababo bemezi oku abazigire. Anabaganize ngasi mango n’okulonza obulyo bw’okubavuga omunkwa. Amango omugula ahâna ihano, lishinganine liyimangire oku Kanwa ka Nnâmahanga. Anahâne ihano liyumvikine na linja bulya alonzize ababo bemezi balikolese.​—Gl. 6:1.

13. Gurhi omugula akaciyumva enyanya z’obuzamba bwage?

¹³ Bulya gurhi okujira ntyo kwanaba kuzibu? Abagula barhaba bimana. Nabo banajire amagosa aka ngasi muntu. (Rm. 3:23) Hali amango kwakaba kuzibu kulibo okuba n’entanya nyinja okubiyerekire obuzamba bwabo. Nkaba bagula baguma na baguma banasegeza obwenge oku buzamba bwabo n’oko kwanabavuna omurhima. Abandi banaba babidu okuhalira obuzamba bwabo, n’oko kwanarhuma barhacijira empindûlo bal’ishinganine bajire.

14. Nk’oku biyerekinwe omu Abafilipi 4:13, gurhi obwirhohye bwarhabiremwo Paolo alwise obuzamba bwage?

¹⁴ Olwiganyo lwa Paolo. Bulya Paolo ali mwirhohye, ayemera oku arhakahash’ilwisa obuzamba bwage oku buhashe bwage yene. Al’ilagirire oku misi ya Nnâmahanga. Embere Paolo akag’ilibuza Abakristu bwenene. Enyuma z’aho, ahugûkwa oku ebi akag’ijira byali bibi, ananaba mubidu okujira empindûlo omu ntanya zage n’omu bumuntu bwage. (1 Tm. 1:12-16) Kugerera oburhabale bwa Yehova, Paolo ahikira aha aba lungere wa buzigire, wa bwonjo, na mwirhohye. Ciru akaba obuzamba bwage bwakag’irhuma aciyumva kubi, cikone alangalira oku Yehova amubabalira ahali h’okusegeza obwenge oku magosa gage. (Rm. 7:21-25) Arhakag’icilongezako obwimana. Lubero n’oko, ajira okwage koshi ly’akubûla obumuntu bwage bw’Ecikristu analangalira n’obwirhohye oburhabale bwa Yehova ly’ahikiriza omukolo gwage.​—1 Kr. 9:27; osome Abafilipi 4:13.

15. Ntanya zihi nyinja abagula bashinganine babe nazo okubiyerekire obuzamba bwabo?

 ¹⁵ Isomo lici rhukuzire aho? Abagula barhahirwaho mpu bulya bali bimana. Ciru akaba ntyo, Yehova aba alonzize bakayemera obuzamba bwabo, n’okukubûla obumuntu bwabo bw’Ecikristu. (Ef. 4:23, 24) Omugula ashinganine akacilabiriza kugerera Akanwa ka Nnâmahanga n’okujira empindûlo zishinganine. Erhi akajira ntyo, Yehova anamurhabala abe n’omwishingo anabe mugula mwinja.​—Yk. 1:25.

16. Gurhi byakaba erhi omugula akakasegeza obwenge bwage oku buzamba bw’abandi?

¹⁶ Bulya gurhi okujira ntyo kwanaba kuzibu? Abagula banamanya obuzamba bwa bene wabo na bali babo enyanya z’okugeza kasanzi kanji haguma nabo. Cikone, erhi abagula bakabula buba masu, banahikira aha bavunika omurhima, aha baba bakali, na bakuderha-derha abandi kubi. Paolo arhonda Abakristu oku Shetani akalonzize bajire ntyo.​—2 Kr. 2:10, 11.

17. Gurhi Paolo akag’ibona bene wabo na bali babo?

¹⁷ Olwiganyo lwa Paolo. Paolo agendekire aba n’entanya nyinja okubiyerekire bene wabo na bali babo. Al’imanyire bwinja obuzamba bwabo bulya hali amango ebijiro byabo byakag’imugayisa. Cikone, ciru akaba bagwerhe obuzamba, Paolo arhabonaga oku bali bantu babi. Al’izigire bene wabo na bali babo anakag’isegeza obwenge bwage oku morhere gabo minja. Bulya bakag’ijira okwabo koshi lyo bajira ebintu binja, arhagwerhe akarhinda okubiyerekire ebyakag’ibashumya anabona oku balagirire oku burhabale.

18. Bici ociyigirizize kugerera oku Paolo ajijire lugenda akanga ka Evodiya na Sintiki? (Abafilipi 4:1-3)

¹⁸ Kwa lwiganyo, rhulole gurhi Paolo ajirire bali babo babirhi b’omu cigamba c’e Filipi. (Osome Abafilipi 4:1-3.) Bibonekine oku Evodiya na Sintiki bali bamaleka okurhayumvikana kulerhe akashababe egarhi kabo. Paolo arhabakalihiraga erhi kubaderha-derha kubi, cikone asegeza obwenge bwage oku morhere gabo minja. Abo bakazi bali bamajira myaka minji bali bakolera Yehova n’obwishwekerezi. Paolo al’imanyire oku Yehova al’ibazigire. Entanya nyinja Paolo agwerhe okubiyerekire abo bakazi zamushumya abahanûle bayuse oko kurhayumvikana kwali egarhi kabo. Na kandi, ezo ntanya za Paolo zamurhabala agendekera aba n’omwishingo, anagendekera aba n’obwîra busêzire haguma na bene wabo na bali babo ba mw’eco cigamba c’e Filipi.

19. (a) Gurhi abagula bakagendekera baba n’entanya nyinja okubiyerekire ababo bemezi? (b) Bici wakaciyigiriza kugerera enfoto y’omugula oli wacesa enyumpa y’entimanano?

¹⁹ Isomo lici rhukuzire aho? Mwe bagula, mukasegeza obwenge bwinyu oku morhere minja ga bene winyu na bali binyu. Ngasi muguma mulibo arhaba mwimana; cikone, ajira amorhere minja rhwakashagalukira. (Fl. 2:3) Kobinali, mango oku gandi byanahûna abagula bahanûle mwene wirhu erhi mwali wirhu. Cikone  aka Paolo, abagula barhashinganini bakasegeza obwenge bwabo oku nderho erhi oku bijiro by’okugayisa by’oyo muntu bahanûlaga. Lubero n’oko, kwanaba kwinja erhi bakakasegeza obwenge bwabo oku buzigire oyo muntu ajira kuli Yehova, oku bulembêdu bwage omu mukolo gwa Nnâmahanga, n’oku bintu binja akahash’ijira omu mango gayisha. Abagula basegeza obwenge bwabo oku morhere minja g’abandi, banarhabale bene wabo na bali babo baciyumve bazigirwe na ngasi muntu omu cigamba.

20. Gurhi abagula bakagendekera bayunguka n’olwiganyo lwa Paolo?

²⁰ Mwe bagula, mwanabona oku kuli kwinja mugendekere mwayiga olwiganyo lwa Paolo. Kwa lwiganyo, omu citabu Index des publications des Témoins de Jéhovah, wanaja oku cirhwe cidesire “Paul” na buzinda wanaja oku cirhwe cisungunu cidesire “exemple pour les anciens.” Amango oli wasoma myanzi miguma na miguma eyerekinwe aho, wanacidosa ntya: ‘Gurhi olwiganyo lwa Paolo lwakantabala lyo ngendekera naba n’omwishingo amango ndi nahikiriza omukolo gwani gw’obugula?’

21. Bici abagula bakayemera n’obwalagale?

²¹ Mwe bagula, mukakengera oku Yehova arhaba amuhûnyire mube bimana, aba amuhûnyire mube bishwekerezi. (1 Kr. 4:2) Yehova al’ishagalukire omukolo muzibu gwa Paolo n’obwishwekerezi bwage. Mwanayemera n’obwalagale oku ninyu, Nnâmahanga anashagalukire ebi mujira omu mukolo gwage. Yehova ‘arhakayibagira ebijiro binyu n’obuzigire mwàyerekîne oku izino lyage, bulya mwàkolire abatagatifu, munacidwirhe mwakujira.’​—Hb. 6:10.