1. Bici bilug’ishumya obumuntu bwirhu?

 RHUBE rhukola rhugwerhe myaka minji erhi nsiku nsungunu rhubatizibwe, rhweshi rhulonzize rhube n’obumuntu Yehova azigira. Lyo rhujira ntyo, rhushinganine rhulange entanya zirhu. Bulya gurhi? Bulya kanji-kanji, entanya zirhu zo zishumya obumuntu bwirhu. Rhwanakaderha n’okujira ebintu bibi erhi rhwakakarhanya kanji-kanji oku rhwakahikirizamwo irala lirhu ly’omubiri. (Ef. 4:17-19) Lubero n’oko, erhi rhwakayunjuza entanya nyinja omu bukengere bwirhu, rhwanakaderha n’okujira ebintu omu njira yakashagalusa Larha wirhu Yehova.​—Gl. 5:16.

2. Madoso gahi rhwaganirira mw’eci cigabi?

² Nk’oku rhwaganiriraga omu cigabi c’embere, rhurhakahash’ihanza entanya mbi zoshi oku zirhajaga omu bukengere bwirhu. Cikone, rhwanacishoga okurhaleka ezo ntanya zishumye ebijiro birhu. Embere rhubatizibwe, rhushinganine rhuleke okuderha n’okujira ebintu omu njira Yehova ashomba. Eyo yo njira ntanzi na ya bulagirire y’okuhogola obumuntu bwa mîra. Cikone, lyo rhushagalusa Yehova bwenene, rhushinganine rhurhumikire n’er’irhegeko lidesire ntya: “Muyambale obumuntu buhyahya.” (Kl. 3:10, NWT) Mw’eci cigabi, rhwashuza kw’aga madoso: “Obumuntu buhyahya” byo bici? Gurhi rhwakayambalamwo obumuntu buhyahya n’okurhacibuhogola?

3. “Obumuntu buhyahya” byo bici, na gurhi omuntu abuyambalamwo? (Abagalasiya 5:22, 23)

³ “Obumuntu buhyahya” eri njira y’okurhanya n’okujira ebintu eyerekana amorhere ga Yehova. Omuntu anayambale obumuntu buhyahya omu kuyerekana ilehe ly’iroho litagatifu lya Nnâmahanga, k’okuderha, okulileka lishumye entanya zage, oku aciyumva ekandalala, n’ebijiro byage. (Osome Abagalasiya  5:22, 23.) Kwa lwiganyo, aba azigire Yehova n’abakozi bage. (Mt. 22:36-39) Omuntu wa ntyo anagendekere aba n’omwishingo ciru akaba ali alwisa amazibu. (Yk. 1:2-4) Aba wa kujira omurhula. (Mt. 5:9) Analembere abandi n’okubayeresa olukogo. (Kl. 3:13) Aba azigire aminja ananagajire. (Lk. 6:35) Anayerekane kugerera ebijiro byage oku agwerhe obuyemere busêzire muli Ishe w’omu mpingu. (Yk. 2:18) Anagendekere aba mutûdu amango bamamusholoshonza ananacihashe amango ali omu mashumi.​—1 Kr. 9:25, 27; Tt. 3:2.

4. Lyo rhuyambala obumuntu buhyahya, ka rhwanaba n’amorhere goshi gaganirirwe omu Abagalasiya 5:22, 23 caligumiza? Ohugûle.

⁴ Lyo rhuyambala obumuntu buhyahya, rhushinganine rhube n’amorhere goshi gaganirirwe omu Abagalasiya 5:22, 23 n’omu gandi mandiko g’Ebibliya. * Ago morhere garhaba nka mishangi yoshi omuntu ayambala caligumiza. Morhere manji egarhi k’ago morhere ganaba omu gandi. Kwa lwiganyo, erhi akaba ozigire omulungu wawe, wanamulembera n’okumuyeresa olukogo. Na kandi, ly’oba mwinja, oshinganine obe mutûdu na wa kucihasha.

5. ‘Okuba n’obukengere bwa Kristu,’ k’okuderha gurhi, na bulya gurhi rhushinganine rhuyige akalamo kage? (1 Abakorinti 2:16)

⁵ Osome 1 Abakorinti 2:16, NWT. Lyo rhuyambala obumuntu buhyahya, rhushinganine ‘rhube n’obukengere bwa Kristu.’ K’okuderha oku, rhushinganine rhuyige oku Yezu arhanya n’okukarhanya akage. Yezu ayerekine ilehe ly’iroho litagatifu lya Nnâmahanga n’obwimana. Ak’eciyo ciyerekana ebintu bwinja, Yezu ayerekîne amorhere ga Yehova nk’oku ganaba. (Hb. 1:3) Oku rhwagendekera rhwarhanya aka Yezu, ko rhwanagendekera rhwajira ebintu akage, ko rhwanagendekera rhwahasha okuyerekana obumuntu bwage.​—Fl. 2:5.

6. Bici rhushinganine rhukakengera amango rhuli rhwajira okwirhu koshi lyo rhuyambala obumuntu buhyahya?

⁶ Ka kobinali byanahashikana okukulikira olwiganyo lwa Yezu? Nkaba rhwanarhanya ntya: ‘Yezu aba mwimana. Nta lusiku nakaba akage!’ Erhi akaba ntyo k’orhanya, okengere ebi bintu. Burhangiriza, walemirwe n’obuhashe bw’okuyerekana amorhere ga Yehova n’aga Yezu. Co cirhumire wanacishoga okubayiga, na kandi, wanahasha okujira ntyo kwa lugero. (Murh. 1:26) Bwakabirhi, iroho litagatifu lya Nnâmahanga yo misi ejira obuhashe kulusha eyindi misi yoshi. Kugerera oburhabale  bwalyo, wanajira ebintu orhakahash’irijira oku bushashe bwawe wene. Bwakasharhu, ene, Yehova arharhuhûnyiri mpu rhuyerekane ilehe ly’iroho litagatifu n’obwimana. Larha wirhu w’obuzigire arheganyîze abajira obulangalire bw’okuy’ishilama hanw’igulu myaka 1 000 lyo bayish’ihikira aha baba bimana. (Maf. 20:1-3) Ebi Yehova arhuhûnyire ene, kuli kujira okwirhu koshi lyo rhuyerekana ilehe ly’iroho litagatifu n’okulangalira oburhabale bwage.

7. Bici rhukolaga rhwaganirira?

⁷ Gurhi rhwakayigamw’olwiganyo lwa Yezu? Rhwaganirira kwa bofofi morhere ani g’ilehe ly’iroho litagatifu lya Nnâmahanga. Omu ngasi kanga, rhwabona ebi rhwakaciyigiriza kugerera oku Yezu ayerekine ago morhere. Omu kujira ntyo, rhway’ishibona madoso maguma na maguma gakarhurhabala rhumanye amajambere rhwamakajira omu kuyambala obumuntu buhyahya.

8. Gurhi Yezu ayerekinemwo obuzigire?

⁸ Bulya Yezu al’izigire Yehova bwenene, oko kwamushumya acihâna ly’ajira obulonza bwage ananacihâna erhi rhwe rhurhuma. (Yn. 14:31; 15:13) Akalamo ka Yezu ka hanw’igulu kayerekine oku al’izigire abantu bwenene. Ngasi lusiku, akag’iyerekana obuzigire n’obwonjo, ciru n’amango bantu baguma na baguma bakag’imuhagalika. Enjira y’obulagirire Yezu ayeresiremwo abantu obuzigire, kwali kubayigiriza okubiyerekire Obwami bwa Nnâmahanga. (Lk. 4:43, 44) Na kandi, Yezu ayerekine obuzigire bw’okucihâna kuli Nnâmahanga na kuli bene bantu omu kuyemera alibuke bwenene n’okunigwa n’abanya-byaha. Omu kujira ntyo, aha ngasi muguma wirhu obulyo bw’okuyish’ilama ensiku n’amango.

9. Gurhi rhwakayigamwo olwiganyo lwa Yezu omu kuyerekana obuzigire?

⁹ Rhwacihânyire emwa Yehova n’okubatizibwa bulya rhuba rhumuzigire bwenene. Co cirhumire, aka Yezu, rhushinganine rhuyerekane obuzigire kuli Yehova kugerera oku rhujirira abantu. Entumwa Yowane yayandika ntya: “Orhazigira mwene wabo adwirhe abona, ntakwo ankazigira Nyamuzinda arhabona.” (1 Yn. 4:20) Rhwanacidosa ntya: ‘Ka nkola nzigira abantu bwenene? Ka nanyerese abandi obwonjo ciru bakambulira obukenge? K’obuzigire bunanshumye nkolese akasanzi kani n’ebirugu byani lyo ntabala abandi baciyigirize binji okubiyerekire Yehova? Ka nambe mubidu okujira ntyo ciru n’amango bantu banji barhashagalukiri obushiru bwani, erhi amango bali bampagalika? Ka nanalonza gurhi nakakagezamwo kasanzi kanji omu mukolo gw’okujira abanafunzi?’​—Ef. 5:15, 16.

10. Bici biyerekine oku Yezu ali muntu wa kujira omurhula?

¹⁰ Yezu ali muntu wa kujira omurhula. Amango abantu bakag’imujirira kubi, arhakag’igalula obubi oku bundi, cikone ajira binji kulusha oko. Akag’ilonza obulyo bw’okujira omurhula ananaha abandi omurhima oku bakayumvikana. Kwa lwiganyo, abayigiriza oku bakajira omurhula haguma na mwene wabo erhi akaba bal’ilonzize Yehova ayemere enterekêro yabo. (Mt. 5:9, 23, 24) Na kanji-kanji arhabîre entumwa zage oku zileke akadali zagwerhe okubiyerekire ndi wali mukulu mulibo.​—Lk. 9:46-48; 22:24-27.

11. Gurhi rhwakabamwo bantu ba kujira omurhula?

¹¹ Lyo rhuba bantu ba kujira omurhula, rhushinganine rhujire binji ahanyuma n’okuyaka kone ebintu byakarhuma rhurhayumvikana n’abandi. Rhushinganine rhukalonza obulyo bw’okujira omurhula haguma n’abandi n’okuha bene wirhu na bali birhu omurhima bakayusa okurhayumvikana kwakaba egarhi kabo. (Fl. 4:2, 3; Yk. 3:17, 18) Rhwanacidosa aga madoso: ‘Bintu bihi mba mubidu okuleka lyo njira omurhula haguma n’abandi? Erhi mwene wirhu  erhi mwali wirhu akansarhaza, ka nambîke akarhinda? Ka naninde oku oyo muntu ayish’ijira omurhula haguma na nani, erhi nambe murhanzi okugend’ijira ntyo, ciru akaba oyo muntu ali abonekana oku ye wadwirhe ago mazibu? Amango bihûnyire okujira ntyo, ka nampe abandi omurhima okugend’ijira omurhula haguma n’abantu barhayumvikini nabo?’

12. Gurhi Yezu ayerekinemwo olukogo?

¹² Yezu ali wa lukogo. (Mt. 11:28-30) Ayerekine olukogo omu kujirira abandi aminja n’okuba wa lugero, ciru n’amango kurhali kulembu okujira ntyo. Kwa lwiganyo, erhi mukazi muguma Mufoinike amuyinginga oku afumye omwana wage, Yezu arhang’ilahira oku arhafumye oyo mwana, cikone erhi oyo mukazi ayerekana obuyemere bunji, olukogo lwashumya Yezu okufumya oyo mwana. (Mt. 15:22-28) Ciru akaba Yezu ali wa lukogo, arhakag’ileka okuhâna ihano. Mango maguma na maguma akag’iyerekana olukogo omu kuhanûla kwa buzibu-zibu aba al’izigire. Kwa lwiganyo, erhi Petro alonza okuvuna Yezu omurhima ly’arhag’ijira obulonza bwa Yehova, Yezu amuhanûla embere z’abandi banafunzi. (Mk. 8:32, 33) Yezu arhajiraga ntyo mpu ly’abonesa Petro nshonyi, cikone alonzagya amukomereze n’okurhonda ezindi ntumwa zirhakag’ihalanjika. Buzira karhinda, Petro ayumvirhe enshonyi, cikone ayungusire n’obo buhane ahâbagwa.

13. Gurhi rhwakayerekanamwo olukogo lw’okunali?

¹³ Ly’oyereka abantu ozigire olukogo lw’okunali, hali amango byakahûna obahanûle n’obwalagale. Amango oli wajira ntyo, oyige olwiganyo lwa Yezu omu kuhâna amahano gayimangire oku makanuni gali omu Kanwa ka Nnâmahanga. Okajirira abandi aminja. Oyemere oku balonzize okujira aminja, onalangalire oku abazigira Yehova banakuzigire, bayemera ihano lyawe liyerekine oku obashibirire. Ocidose ntya: ‘Ka nanyerekane oburhwali omu kugend’ihanûla muntu mulebe nzigire erhi akaba ali ajira akantu kabi? Erhi byakahûna oku ngend’ihanûla muntu mulebe, ka nanderhe n’olukogo, erhi nanderhe n’obukali? Bici binshumya ngend’ihâna ihano? Ka nanjire ntyo bulya oyo muntu anangayisize, erhi nanjire ntyo bulya ndonzize okumurhabala?’

14. Gurhi Yezu ayerekinemwo obwinja?

¹⁴ Yezu arhal’imanyire kone ebintu binja, cikone anakag’ibijira. Yezu aba azigire Ishe, co cirhuma ensiku zoshi anakajira ebintu binja erhi anagwerhe ecirhumire cinja cimushumize okubijira. Obwinja bunabonekane kugerera oku rhujirira abandi. Rhunayerekane obo borhere omu kurhabala abandi. Birhaba bihûnyire okumanya kone akantu kinja rhwakajira; rhushinganine rhujire akantu kinja erhi rhunagwerhe ecirhumire cinja cirhushumize. Hali omuntu wakadosa ntya: ‘Ka byanahashikana okujira akantu kinja erhi nangwerhe ecirhumire cibi cinshumize?’ Neci, byanahashikana. Kwa lwiganyo, Yezu aganirire abakag’iha abakenyi oburhabale cikone bakajira okwabo koshi lyo baciyerekana oku babuhânyire. Ciru akaba bakag’ijira ebyo bijiro binja byoshi, Yehova arhakag’ibishagalukira.​—Mt. 6:1-4.

15. Gurhi rhwakayerekanamwo obwinja bw’okunali?

¹⁵ Okujira akantu kinja buzira kulonza obunguke bwirhu rhwenene yone njira rhwakayerekanamwo obwinja bw’okunali. Co cirhumire wanacidosa ntya: ‘Ka namanye kone oku kantu kalebe kali kinja erhi nancihangane n’okukajira? Bici binshumya njire ebintu binja?’

16. Bici rhushinganine rhukajira ngasi lusiku, na bulya gurhi?

¹⁶ Rhurhashinganini rhurhanye mpu enyuma z’okubatizibwa rhurhakacigendekera rhwayambala obumuntu buhyahya. Obumuntu buhyahya bushushine n’omushangi muhyahya rhukwanine  rhulange. Enjira nguma rhwakajiramwo ntyo kuli kulola gurhi rhwakakayerekana ilehe ly’iroho litagatifu lya Nnâmahanga ngasi lusiku. Bulya gurhi? Bulya Yehova aba Nnâmahanga wa bijiro, n’iroho lyage kukola likola. (Murh. 1:2) Co cirhumire, ngasi cigabi c’ilehe ly’iroho litagatifu cijira obuhashe bw’okurhushumya rhujire bijiro bilebe cinashinganine cirhushumye. Kwa lwiganyo, entumwa Yakobo yayandika ntya: “Obuyemere burhagwerhi bijiro buba cifu.” (Yk. 2:26) Ntyo kobinali okubiyerekire ebindi bigabi byoshi by’ilehe ly’iroho litagatifu lya Nnâmahanga. Ngasi mango erhi rhubiyerekana, rhunayerekane oku er’iroho liri lyakola kuli rhwe.

17. Gurhi rhushinganine rhujire amango rhwamayabirwa okuyerekana ilehe ly’iroho litagatifu?

¹⁷ Ciru n’Abakristu bakola bagwerhe myaka minji babatizibwe, hali amango bayabirwa okuyerekana ilehe ly’iroho litagatifu. Cikone akantu k’obulagirire kuli kucihangana rhugendekere rhwayerekana ago morhere. Orhanye k’olu lwiganyo. Erhi omushangi osima gwakabereka, ka wanagukabulira ho n’aho? Nanga. Wanaguhanga nka bihashikine. N’enyuma z’aho, wanarhonderaga okugulanga bwinja lyo gurhagicib’ibereka. Ko n’oko, erhi mango maguma wakayabirwa okuyeresa muntu mulebe olukogo, okumulembera, n’okumuzigira, orhavunikaga omurhima. Okumuhûna obwonjo n’omurhima goshi kwanakubûla ebyasherire, na ntyo wanacib’igalula obwîra bwinja haguma naye. Ohige okurhacib’ijira er’igosa agandi mango.

18. Bici wakayemera n’obwalagale?

¹⁸ Rhuvuzire omunkwa bwenene okubona Yezu arhulekire olwiganyo lwinja! Oku rhwagendekera rhwayiga entanya zage, ko byanagendekera byaba bilembu okujira akage. Oku rhwagendekera rhwajira aka Yezu, ko rhwanagendekera rhwahasha okuyambala obumuntu buhyahya. Mw’eci cigabi, rhwaganirire bigabi bini byone by’ilehe ly’iroho litagatifu lya Nnâmahanga. Ocihe akasanzi k’okuyiga agandi morhere g’ilehe ly’iroho litagatifu okanarhanya gurhi wakagayerekanamwo bwinja. Wanabona emyanzi eganirire ilehe ly’iroho litagatifu omu citabu Musaada wa Kutafuta Habari kwa Ajili ya Mashahidi wa Yehova idako ly’ecirhwe cidesire “Maisha ya Kikristo,” buzinda wanaja aha bayandisire “Tunda la Roho.” Wanayemera n’obwalagale oku, erhi wakajira oku wakanahasha, Yehova anakurhabala oyambale obumuntu buhyahya n’okurhacibuhogola.