Bantu baguma na baguma basoma ogo mwanzi duba-duba, banacidose ntyo. Cikone, ogo mwanzi guganirire balume babirhi bakag’ihamagalwa okw’izino lya Mefibosheti, rhwananaciyigiriza kantu kalebe omukuganirira ebyabire.

Mwami Saulu w’e Israheli agwerhe bagala nda na bali babirhi. Yonatani ye wali nfula ya Saulu. Buzinda, mwami aburha owundi mwana wakag’ihamagalwa Mefibosheti, waburhagwa na Rispa, ciherula cage. Yonatani naye agwerhe omugala wakag’ihamagalwa Mefibosheti. K’okuderha oku, Mwami Saulu agwerhe omugala wakag’ihamagalwa Mefibosheti n’omwinjukulu wakag’ihamagalwa kw’er’izino.

Erhi hagera nsiku, Mwami Saulu arhondera okushomba Abagabaoni bal’ilamire haguma n’Abaisraheli, ananalonza okubahererekeza. Bibonekine oku anizire banji ba mulibo. Kobinali, oko kwali kubi bwenene. Bulya gurhi? Bulya amango Yozwe acikag’ilongoza Abaisraheli, abakulu b’Abaisraheli bajira endagano y’omurhula haguma n’Abagabaoni.​—Yoz. 9:3-27.

Eyo ndagano yacikag’ikola omu mango ga Mwami Saulu. Lubero n’oku eyo ndagano yal’iyerekine, mwami alonza okuhererekeza Abagabaoni. Oko kwarhuma ‘omuko gwaba kuli Saulu n’omulala gwage.’ (2 Sam. 21:1) Buzinda, Daudi aba mwami w’e Israheli. Abagabaoni basigalaga, bamuganirira okubiyerekire ago mabi Saulu ajiraga. Daudi abadosa bici abahongerage lyo bakûla er’ihanja Saulu abadwirhire n’okulonza gurhi Yehova akagisha ecihugo. Ahali h’okuhûna ensaranga, Abagabaoni bahûna oku babalerhere bagala nda b’oyo mulume ‘walonzagya okubahererekeza’ na buzinda babanige. (Mib. 35:30, 31) Daudi ajira nk’oku banamuhûnaga.​—2 Sam. 21:2-6.

Ago mango, Saulu na Yonatani bali erhi bafîrire omw’ivita, cikone, mwene Yonatani wakag’ihamagalwa Mefibosheti, yehe acirizine. Alemalaga erhi anaciri murho enyanya z’e aksida, arhacilunganga omu komplo ya shakulwe wage y’okugend’ihererekeza Abagabaoni. Daudi ali amajira endagano y’obwîra haguma na Yonatani. Eyo ndagano yakalerhire iburha lya Yonatani obunguke, ciru na Mefibosheti. (1 Sam. 18:1; 20:42) Ogo mwanzi gudesire oku ‘mwami [Daudi] abêra Mefibosheti obwonjo, mwene Yonatani mugala wa Saulu, enyanya z’okucigasha kwajiragwa embere za Yehova.’​—2 Sam. 21:7, NWT.

Ciru akaba ntyo, Daudi ajira nk’oku Abagabaoni bamuhûnaga. Abalerhera bagala babirhi ba Saulu, balimo muguma wakagihamagalwa Mefibosheti, na binjukulu barhanu ba Saulu. (2 Sam. 21:8, 9) Eco cijiro Daudi ajiraga, cayusa okutumula omuko kwali kwamaja omu cihugo.

Ogo mwanzi lurhali lulibi kone. Irhegeko lya Nnâmahanga lyali lidesire n’obwalagale ntya: “Abana barhayirhwe erhi bishe barhuma.” (Lush. 24:16) Yehova arhakayemire oku abo bene Saulu babirhi n’abo binjukulu barhanu banigwe erhi akaba nt’igosa bagwerhe. Er’irhegeko lyal’iyushwire ntya: “Ngasi muguma ayirhirwa obubi bwage yene.” Byanahashikana abo bagala nda ba Saulu bacilunzire haguma naye omu komplo y’okuhererekeza Abagabaoni. N’oko kwarhuma abo bana nda balyula ebijiro byabo bibi bajiraga.

Ogu mwanzi guyerekine oku erhi omuntu akajira ebibi, arhakacihalira omukurhanya erhi omukuderha mpu anajijire ntyo ly’arhumikira obulongozi anahâbagwa. Hali mugani muguma gw’obwenge gudesire ntya: “Okaz’iyumanyanya emikâba wagera-mwo, n’enjira zawe zoshi zikazibâ zikomîre.”​—Mig. 4:24-27; Ef. 5:15.