Embere Yezu afê, bici byarhumaga aderha enderho za Daudi ziri omu lwandiko lwa Ennanga 22:1?

Ekarhi k’enderho Yezu aderhaga embere afê, muli ezi ziri omu Mateyo 27:46, zidesire ntya: “Nyamuzinda wani, Nyamuzinda wani, carhumire ondeka?” Erhi Yezu aderha ntyo, ahikiriza enderho z’omwandisi w’ennanga Daudi ziri omu lwandiko lwa Ennanga 22:1. (Mk. 15:34) Gali magosa okurhanya mpu ezi nderho za Yezu ziyerekine oku mw’ako kasanzi alivunisire omurhima erhi mpu arhacigwerhe buyemere. Yezu alihugûsirwe bulya gurhi kwali kwa bulagirire anigwe, analicirheganyize bwinja kuli oko. (Mt. 16:21; 20:28) Anali manyire n’obwalagale oku Ishe arhaliyubasire “ecogo c’okumulanga” mpu ly’arhaginigwa. (Ayu. 1:10, NWT) Yehova aleka Yezu ayerekane oku ciru akagera omu kanga kahi embere afê abêra mwishwekerezi kuli Ye.​—Mk. 14:35, 36.

Bicigi byarhumaga Yezu aderha enderho z’oyo mwandisi w’ennanga? Ciru akaba rhurhamanyiri n’obwalagale, rhuganirire bintu biguma biguma nkaba byarhumaga aderha ezo nderho. *

Omu kuderha ezo nderho nkaba Yezu alonzagya okuyerekana oku Yehova arhakamulanzire lyo barhagimuniga. Yezu alishinganine alipe engombôlo buzira burhabale bwa Yehova. Ali mwene muntu, analishinganine anigwe lyo “afîra abantu boshi.”​—Hb. 2:9, Mashi Bible.

Erhi Yezu aderha enderho nsungunu zone za mw’olo lulanga, nkab’akagirhanya oku biri mw’olo lulanga loshi. Omu mango g’Abayahudi, abantu bakagibikirira nderho nyinji z’omu nnanga omu bwenge bwabo. Kanji-kanji, erhi bakakengire mulongo muguma gone gwa lulanga lulebe, bakagirhanya kw’olo lulanga loshi. Akaba ntyo ko Yezu alonzagya okujira, oko kuyerekine oku alonzagya arhabale Abayahudi bali bashimbulizi bage bakengere ngasi byoshi byalilebirwe lugenda olufû lwage. (Enna. 22:7, 8, 15, 16, 18, 24) N’oku buzinda bw’olo lulanga bayerekine oku obuhimi bw’akalibwami ka Yehova bwayishilumira okw’igulu lyoshi.​—Enna. 22:27-31.

Omu kuderha ezo nderho, nkaba Yezu alonzagya ayerekane oku ali mweru-kweru. Embere Yezu afê, bamushobeka eby’obunywesi, baderha mpu anajacire Nnamahanga. (Mt. 26:65, 66) Batwa olo lubanja budufu enyuma bwenene buzira kushimba oku amarhegeko g’ecihugo cabo galidesire. (Mt. 26:59; Mk. 14:56-59) Omu kugalukira ezo nderho omu njira y’idoso, nkaba Yezu ali lonzize okuyerekana oku nta kantu kabi ajijire kakarhumire anigwa.

Nkaba Yezu alonzagya akengeze abandi oku ciru akaba Daudi agezire omu malibuko manji, oko kurhaliyerekine oku arhaliyemerirwe na Yehova. Er’idoso lya Daudi lirhayerekanaga oku arhacigwerhe buyemere. Daudi enyuma z’okudosa er’idoso, ayerekana oku alangalire obuhashe bwa Yehova b’okucungula abakozi bage na Yehova agendekera amugisha. (Enna. 22:23, 24, 27) Ko n’oko, ciru akaba Yezu “Mwene Daudi” alibusire anamanikwa oku murhi, oko kurhayerekanaga oku arhali yemerirwe na Yehova.​—Mt. 21:9.

Kugerera ezo nderho, nkaba Yezu eyerekine oku aciyumvirhe kubi bwenene bulya Yehova arhamulangaga mpu ly’ayerekana obwishwekerezi kuhika aha kufâ. Aha murhondero Yehova arhagwerhe omuhigo gw’okulonza mpu Omugala ayishilibuka na buzinda afê. Cikone ayishihiga ntyo enyanya z’obugoma bwa Adamu na Eva. Yezu arhajiraga bubi boshi-boshi, cikone alibuzibwa anafâ ly’ashuza oku mashitaki ga Shetani n’okuhâna engombôlo ly’alyula ebi omuntu ahezagya. (Mk. 8:31; 1 Pt. 2:21-24) Yehova alikwanine aleke okulanga Yezu hisanzi hisungunu hyone omu kalamo kage koshi ly’ebyo byoshi bihikirira.

Nkaba Yezu alonzagya okurhabala abanafunzi bage basegeze omu bwenge bwabo ebirhumire Yehova amuleka afê mw’eyo njira. * Yezu alimanyire oku banji bagayisibwa n’okubona amafâ n’okumanikwa oku murhi nka mushumusi kone ntya. (1 Kr. 1:23) Okurhanya oku kantu karhumaga Yezu afâ, kwakarhabire abanafunzi bage bahugûkwe oku kwali kwa bulagirire afê. (Gl. 3:13, 14) Na ntyo oko kwakarhumire bamubona oku ali Mucunguzi ci arhali mushumusi.

Abe bici byarhumaga Yezu aderha ezo nderho, ali hugûsirwe oku omu kufâ oku murhi gw’amalibuko, akahikirizize obulonza bwa Yehova. Hisanzi hisungunu enyuma z’okuderha ezo nderho, aderha ntya: “Byamahikirira!” (Yn. 19:30, NWT; Lk. 22:37) Neci, okubona Yehova arhalangaga Yezu muli ako kasanzi kasungunu kwarhumire ahikiriza ebyarhumaga arhumwa hanw’igulu. Na kandi kwarhuma ahikiriza ebyayandikagwa enyanya zage omu “citabu ca Musa n’omu Balêbi n’omu Nnanga.”​—Lk. 24:44.