1-2. Gurhi byakahashikana kuli rhwe okushimba enshando za Yezu? Ohâne olwiganyo.

ORHANYE oli omu cigusho c’abantu bali balambagira omw’irungu lirimw’omurhego liyunjwiremw’omucanga. Oli wamuyereka enjira ayimanyirire bwinja-bwinja. Ngasi hoshi ali alabarha, enshando zage ziri zacicapaho. Buzinda muhikire aha murhacibona oyo muntu! Ciru akaba ntyo murhayobohe. Lubero n’oko, mwajira okwinyu koshi lyo mukulikira bwinja-bwinja enshando z’oyo oli wamuyereka enjira!

² Ko n’oko nirhu rhwe Bakristu b’okuli, rhuli rhwalambagira omw’irungu lirim’omurhego, kw’okuderha er’igulu libi. Akantu k’okushagalula kuli kubona oku Yehova arhuhîre Ecirongozi cishinganine rhwakakulikira n’obwishwekerezi enshando zage: kw’okuderha Omugala, Yezu Kristu. (1 Pt. 2:21) Citabu ciguma cihugûla Ebibliya cidesire oku mw’ezi nderho Petro ashushanyize Yezu n’ecirongozi. Nka kula enshando z’oli wayereka abandi enjira zicicapa aha analabarhaga, Yezu naye arhulekire enshando rhwakakulikira. Rhukolaga rhwaganirira aga madoso asharhu: Okushimba enshando za Yezu kw’okuderha gurhi? Bulya gurhi kuli kwa bulagirire okushimba enshando za Yezu? Gurhi rhwakakulikiramwo enshando za Yezu?

3. Okushimba enshando za muntu mulebe kw’okuderha gurhi?

³ Okushimba enshando za muntu mulebe kw’okuderha gurhi? Omu Bibiliya, enderho “kulambagira” na “magulu” hali amango zihugûla oku muntu mulebe âl’ilamire. (Murh. 6:9; Mig. 4:26, NWT) Olwiganyo muntu mulebe ahânyire hali amango lushushanyizibwa n’enshando alesire amango ali alambagira. Co cirhumire, okushimba enshando za muntu mulebe, kuli kushimba olwiganyo lwage erhi kumuyiga.

4. Okushimba enshando za Yezu kw’okuderha gurhi?

 ⁴ Okushimba enshando za Yezu kw’okuderha gurhi? Omu kutwa bofofi, kuli kuyiga olwiganyo lwage. Omu lwandiko lw’omusingi lw’eci cigabi, Petro aganirire olwiganyo lwinja Yezu ayerekine lw’okulembera amalibuko; cikone hali ezindi njira nyinji rhwakayigamwo olwiganyo lwage. (1 Pt. 2:18-25) Kobinali, akalamo ka Yesu koshi, kw’okuderha, ngasi kantu adesire na ngasi kantu ajijire, luli lwiganyo arhulekire oku rhushimbe.

5. Ka byanahashikana omuntu orhali mwimana ashimbe kobinali olwiganyo lwa Yezu? Ohugûle?

⁵ Ka byanahashikana kobinali rhuli bene bantu barhali bimana, rhushimbe olwiganyo lwa Yezu? Neci, byanahashikana. Okengere oku Petro arhubwizire oku ‘rhushimbe enshando [za Yezu]’​—cikone arhadesire oku rhujire ntyo n’obwimana. Erhi rhwakajira okwirhu koshi lyo rhushimba enshando za Yezu ciru akaba rhurhali bimana, rhwanahikiriza ezi nderho entumwa Yowane yaderhaga: ‘Mube n’olugendo luli nk’olugendo [Yezu] âli agwerhe.’​—1 Yn. 2:6.

6-7. Bulya gurhi rhwakaderha oku okushimba enshando za Yezu kwanarhurhabala rhuyegere Yehova?

⁶ Okushimba enshando za Yezu kwanarhurhabala rhuyegere Yehova. Bici birhumire rhwaderha ntyo? Burhangiriza, Yezu ahânyire olwiganyo lwinja bwenene lw’oku omuntu akalama akalamo kashagalwire Nnamahanga. (Yn. 8:29) Co cirhumire, erhi rhwakakulikira enshando za Yezu rhwanashagalusa Yehova. Na kandi, rhwanayemera n’obwalagale oku Larha wirhu w’omu mpingu anayegere balya boshi bajira okwabo koshi lyo babà bîra bage.​—Yk. 4:8.

⁷ Bwakabirhi, Yezu ayizire Ishe bwinja-bwinja. Oko ko kwarhumaga Yezu aderha erhi: “Ombwine erhi abwine na Larha.” (Yn. 14:9) Erhi rhuyiga amorhere ga Yezu n’oku akagijirira abandi, rhunabe erhi rhuyizire olwiganyo lwa Yehova. Orhanye oku bonjo afaga olya mushomyo, okucihira aha nafasi y’olya mukazi wali lwazire omududu n’obonjo akagiyumviza abafîrirwe. (Mk. 1:40, 41; 5:25-34;  Yn. 11:33-35) Omu kugendekera kwayiga amorhere ga Yehova, ko rhwakanagendekera rhwamuyegera.

8. Ohugûle bulya gurhi okushimba enshando za Yezu kwanarhurhabala ‘rhuhime’ igulu.

⁸ Okushimba enshando za Yezu kunarhurhabale lyo er’igulu libi lirharhumaga rhwabula kuba masu. Omu budufu buzinda bw’akalamo ka Yezu hanw’igulu, agwerhe oburhwali b’okuderha ntya: “Nahimire igulu.” (Yn. 16:33) Alonzagya okuderha oku arhayemeraga ashumikwa n’entanya z’abantu b’igulu, emihigo yabo, n’ebijiro byabo. Yezu arhalekaga akantu koshi-koshi karhume abula busegeza obwenge bwage oku mukolo gwarhumaga arhenga empingu: okuhalira Ishe Yehova. Bici oko kurhuyigirizize? Mw’er’igulu, muli bintu binji byakarhuma rhwabula kuba masu. Cikone, aka Yezu, erhi nirhu rhwakagendekera rhwasegeza obwenge bwirhu oku kujira obulonza bwa Yehova, ‘rhwanayishihima’ igulu.​—1 Yn. 5:5.

9. Bici rhushinganine rhujire lyo rhubêra omu njira ehêsire ebwa buzine bw’ensiku n’amango?

⁹ Okushimba enshando za Yezu kunarhulongoze ebwa buzine bw’ensiku n’amango. Erhi omusole muguma wâli gwerhe birugu binji adosa ebi ashinganine ajire ly’ayishiba n’obuzine bw’ensiku n’amango, Yezu amubwira erhi: “oyishe, onkulikire.” (Mt. 19:16-21) Yezu abwira Abayahudi barhal’iyemire oku ye Kristu ntya: “Ebibuzi byani . . . binankulikire. Mbiha obuzine by’ensiku n’amango.” (Yn. 10:24-29) Yezu abwira Nicodemu, mulume muguma w’omu Sanhedrini walisimisibwe n’enyigirizo zage, oku ngasi yeshi “wamuyemera” anabone “obuzine bw’ensiku n’amango.” (Yn. 3:16) Rhunayerekane oku rhugwerhe obwemere muli Kristu omu kujira ebi aderhaga n’omu kuyiga ebi akagijira. Erhi rhwakajira ntyo, rhwanabera omu njira ehêsire ebwa buzine bw’ensiku n’amango.​—Mt. 7:14.

10. Bici rhushinganine okujira lyo ‘rhuhikira okumanya’ Yezu bwinja-bwinja? (Yn. 17:3)

¹⁰ Kuli lwa bulagirire rhurhang’imanya Yezu embere rhurhondere okushimba enshando zage. (Osome Yowane 17:3, NWT.) ‘Okuhikira okumanya’ Yezu kali kantu rhushinganine okukajira ngasi mango. Erhi rhwakayiga amorherhe gage, entanya zage, n’amarhegeko gage, rhwanahikira aha rhwamumanya bwinja-bwinja. Ciru akaba rhukola rhugwerhe myaka minji omu okuli, rhushinganine rhugenderere rhwacihangana lyo rhuhikira aha rhwamanya Yehova n’Omugala bwinja.

11. Myanzi ehi eba omu Injili ini?

¹¹ Obuzigire bwa Yehova kuli rhwê, bwamushumya ayandikise Injili ini omu Bibliya lyo rhuhikira aha rhwamanya Omugala bwinja. E Injili ziba ziganirire akalamo ka Yezu n’omukolo gwage. Emyanzi eri omo enarhuganirire ebi Yezu akagiderha, ebi ajijire, na kandi erhuhugûlire gurhi akagiciyumva. Ebyo bitabu bini binarhurhabale ‘okukengêra’ olwiganyo lwa Yezu.  (Hb. 12:3) Rhwanaderha oku ebyo bitabu bibamo enshando Yezu arhulekire oku rhukulikire. Co cirhumire erhi rhwakagendekera rhwayiga ebitabu by’e Injili, rhwanahikira aha rhwamanya Yezu bwinja. Okujira ntyo kwanarhurhabala rhushimbe enshando zage.

12. Gurhi rhwakajira lyo rhuyunguka n’ebitabu by’e Injili?

¹² Lyo rhuyunguka n’ebiri mw’ezo Injili, rhushinganine rhujire bintu binji kulusha okuzisoma kone. Rhushinganine rhukaciha akasanzi kw’okukaziyiga bwinja-bwinja n’okukazirhanyako bwenene. (Oshushanye na Yozwe 1:8.) Rhukolaga rhwaganirira bintu bibirhi byakarhurhabala rhukarhanya n’okukolesa ebi rhuli rhwasoma omu bitabu by’e Injili.

13. Gurhi wakajira ly’oba nk’oli aha ebiganirirwe mw’ogo mwanzi gw’e Injili biri byajirikana?

¹³ Burhangiriza, obe nk’oli aha ebiganirirwe mw’ogo mwanzi gw’e Injili biri byajirikana. Okolese obuhashe bwawe bw’okubona ebintu omu bwenge ly’obona, n’okuyumva ebiri byajirikana, n’okuciyumva nk’oku omuntu oganirirwe mw’ogo mwanzi akagiciyumva. Ly’ohikira okujira ntyo, wanajira obusagasi omu bitabu ikubuliro lya Yehova lyarheganyize byakarhurhabala rhuyige bwinja. Olabe emyanzi eri embere n’eri enyuma z’aho. Olonze eyindi myanzi ehugwîre binji lugenda ebiganirirwe n’abantu baganirirwe omu mwanzi oli wasoma. Oshushanye ogo mwanzi oli wayiga n’ogundi guli omu yindi Injili. Hali amango mwandisi mulebe w’e Injili aganirira akantu k’obulagirire owabo arhaganiriraga.

14-15. Gurhi rhwakajira lyo rhukolesa omu kalamo kirhu omwanzi guli omu Injili?

¹⁴ Bwakabirhi, okolese omu kalamo kawe omwanzi guli mw’eyo injili. (Yn. 13:17) Enyuma z’okuciyigiriza bwinja-bwinja mwanzi mulebe guli omu Injili, wanacidosa ntya: ‘Ka hali isomo nkuzire mw’ogu mwanzi nakakolesa omu kalamo kani? Gurhi nakakolesa ogu mwanzi lyo ntabala owundi muntu?’ Wanarhanya kuli muntu mulebe ogo mwanzi gwakarhabala, na buzinda wanamuganira omu njira y’obuzigire na buzira kumuvuna omurhima oku biyerekire isomo wakuziremw’ogo mwanzi.

¹⁵ Rhushambalire olwiganyo lwakarhurhabala rhubone gurhi rhwakakolesa ago mahano  abirhi. Rhwaganirira omwanzi g’olya mukana muguma wa buligo Yezu abonaga omu hekalu.

16. Oganirire omwanzi guli omu Marko 12:41.

¹⁶ Burhangiriza, obe nk’oli aha ebiganirirwe mw’ogo mwanzi biri byajirikana. (Osome Marko 12:41.) Obe nk’oli wabona omu bwenge bwawe ebiri byajirikana. Zâli nsiku 11 z’omwezi gwa Nisani, mwaka gwa 33 muli Kano Kasanzi Kirhu (K.K.K.), nsiku nsungunu embere Yezu afê. Yezu ajira hofi omulegerege goshi ali ayigiriza omu hekalu. Abakulu b’amadîni bamuhagalika bwenene. Embere z’aho, baguma ba mulibo babà n’akarhinda kuyerekera obukulu bwage. Abandi balonza okumudosa amadoso g’okulonza bamugwarhe cinwa. (Mk. 11:27-33; 12:13-34) Mw’ako kasanzi Yezu akolaga àli elundi lunda lw’e hekalu, nkaba aha bakagihamagala Olunda lw’Abakazi. Okubona ali olwo lunda akabwine ebibikiro (bibweta) bakagirhuliramo. Atamala arhondera alaba gurhi abantu bali bahira oburhabale bwabo mw’ebyo bibikiro. Abona abagale bakayishihira ensaranga zirhali nyi mw’ebyo bibikiro. Nkaba ali aha burhambi bw’ebyo bibikiro, akayumva gurhi ensaranga z’abo bagale ziri zarhogera mw’ebyo bibikiro.

17. Bici omukana w’obuligo oganirirwe omu Marko 12:42 ajijire?

¹⁷ Osome Marko 12:42. Enyuma z’aho, Yezu abona mukazi muguma. Oyo mukazi ali, ‘mukana wa buligo.’ (Lk. 21:2) Akalamo kali kazibu kuli ye; arhagwerhe obuhashe bw’okubona ebintu by’obulagirire omu kalamo. Ciru akaba ntyo, aja ebwa cibikiro ciguma arhogezamo bicere bibirhi bisungunu, nkaba ciru byohe birhajegeraga omu kurhogera omu cibikiro. Yezu alimanyire ebi oyo mukana orhogezagyamwo: bicere bibirhi, rhusaranga rhusungunu-ngunu rhwamw’ago mango. Ciru orho rhusaranga rhurhakaguzire akafunzi omuntu alya, n’obu ko kali kanyunyi k’ibeyi lisungunu bwenene.

18. Nk’oku biyerekinwe omu lwandiko lwa Marko 12:43, 44, bici Yezu adesire lugenda oburhabale omukazi w’omukana ahânaga?

¹⁸ Osome Marko 12:43, 44. Yezu asomerwa bwenene n’oyo mukana. Akema abanafunzi bage, n’okubayeresa oyo mukana. Aderha ntya: “Oyu mukana mukenyi ahânyire kulusha boshi.” Buzinda ahugûla erhi: “Boshi [bwenene abagale] bahiziremwo oku bisigala oku bunguke bw’ebirugu byabu; ci yehe omu bukenyi bwage ahiziremwo ehi anali agwerhe hyoshi, ehyankamubisire hyoshi.” Erhi oyu mukana mwishwekerezi ahira omu cibikiro ensaranga agwerhe zoshi ly’alama olo lusiku, ayerekana oku acikubagîre oku Yehova amushibirira.​—Enna. 26:3.

19. Isomo lihi ly’obulagirire rhwakaciyigiriza okubiyerekire enderho za Yezu lugenda omukazi w’omukana?

¹⁹ Okolese ogo mwanzi omu kalamo kawe. Ocidose ntya: ‘Bici enderho za Yezu okubiyerekire omukana w’obuligo zakanyigiriza?’ Orhanye okubiyerekire oyo mukana. Buzira karhinda oyo mukana alilonzize naye ahe Yehova binji kulusha. Cikone, ajira okwage koshi; aha Yehova ebintu binja bwenene agwerhe. Na Yezu alimanyire oku oburhabale b’oyo mukana bwali bwa bulagirire omu masu g’Ishe. Isomo ly’obulagirire kuli rhwê liri ly’eri: Yehova anashagaluke erhi rhumuha ebintu binja bwenene rhugwerhe, kw’okuderha, omukolo rhumujirira n’omurhima goshi n’obugumaguma bwirhu boshi. (Mt. 22:37; Kl. 3:23) Yehova anashagaluke bwenene erhi abona rhuli rhwajira okwirhu koshi lyo mukolera! Ako kanuni kayerekire akasanzi n’imisi rhukolesa omu nterekêro rhuha Yehova, kw’okuderha omu mukolo gw’amahubiri n’omu ntimanano zirhu.

20. Gurhi wakakolesa isomo rhukuzire omu mwanzi g’oyo mukana? Ohâne olwiganyo.

²⁰ Gurhi wakakolesa isomo rhukuzire omu  mwanzi g’oyo mukana? Orhanye oku bantu omanyire balagirire okubwirwa oku obushiru bajira omu mukolo gwa Yehova bunamushagaluse. Kwa lwiganyo, ka hali mwali wirhu mugikulu omanyire oli waciyumva kubi erhi kucibona wa busha busha bulya arhacigwerhi misi y’okugeza kasanzi kanji omu mukolo gw’amahubiri nk’oku akagijira embere? Ka hali mwene wirhu omanyire orhacihika oku ntimanano zoshi zijirwa aha Nyumpa y’Entimanano enyanya z’obulwala buzibu? Wanarhabala abantu ba ntyo kugerera “ebinwa binja.” (Ef. 4:29) Obaganirire isomo wakuzire omu mwanzi g’omukana w’obuligo lyakuhumire oku murhima. Enderho zawe z’okuhâna omurhima zanabayemeza n’obwalagale oku Yehova anashagaluke erhi rhumuha ebintu binja bwenene rhugwerhe. (Mig. 15:23; 1 Ts. 5:11) Erhi ovuga abandi omunkwa bulya bali baha Yehova ebintu byabo binja bwenene ciru byakabonekana nka biri bisungunu, onabe erhi oli washimba enshando za Yezu.

21. Bici ohizire okujira?

²¹ Rhuvuzire omunkwa bwenene okubona oku emyanzi eri omu Injili enarhuhugûlire bwinja akalamo ka Yezu, bulya oko kunarhurhabale rhuyige olwiganyo lwage, kw’okuderha okushimba enshando zage! Mwanaciyigiriza ebitabu by’e Injili omu Nterekêro yinyu y’Omulala erhi omw’ifunzo lyawe ly’Ebibliya. Rhukengere oku ly’ifunzo lirhulerhera obunguke, rhushinganine rhukaba nk’abali aha ebiganirirwe mw’ogo mwanzi biri byajirikana n’okugukolesa omu kalamo kirhu. Rhushinganine okuyiga ebi Yezu ajijire n’okuyumva ebi adesire. Omu cigabi cikulikire, rhwabona ebi rhwakayiga kugerera enderho nzinda Yezu aderhaga embere afê.