1. Nkaba bici byakusomire erhi orhondera waganirira abandi omwanzi guli omu Bibliya?

K’OCIKENGIRE amango wamanyaga okuli? Ngasi ebi wakagiyiga byoshi wakayumva biyumvikine, birhalimo mwizimya! Wakaciyumva oku ngasi muntu naye analonza amanye ebi wahikire aha wayemera. Wayemera n’obwalagale oku omwanzi guli omu Bibliya, gwanabarhabala babe n’akalamo kinja buno, n’obulangalire b’okunali bw’amango gayisha. (Enna. 119:105) Oko kwakushumya warhondera okuganirira abîra bawe n’abantu b’omu mulala gwawe okuli kw’Ebibliya. Gurhigi byabire? Nkaba wasomerwa bwenene erhi bantu banji bakalahira oku barhalonzizi ebi oli wababwira.

2-3. Gurhi bantu banji b’omu mango ga Yezu bamujirire?

² Ntaye muli rhwê wakasomerwa erhi abandi bakalahira omwanzi rhuyigiriza. Omu mango ga Yezu, bantu banji bakamulahira n’obu akagijira ebisomerine byaliyerekine oku ali abijira kugerera oburhabale bwa Nnamahanga. Kwa lwiganyo, Yezu afûla Lazaro n’abashombanyi bage barhakahakanyire eco cisomerine. Cikone eby’okusomeza kuli kubona oku abakulu b’Abayahudi barhayemeraga oku Yezu ye Masiya. Na ntyo, barhôla omuhigo gw’okuniga Yezu na Lazaro!​—Yn. 11:47, 48, 53; 12:9-11.

³ Yezu alimanyire oku bantu banji bànalahire oku arhali ye Masiya. (Yn. 5:39-44) Abwira ecigusho c’abanafunzi ba Yowane Mubatiza ntya: “Iragi lyage orhasarhiri erhi Nie ntuma.” (Mt. 11:2, 3, 6) Bici byarhumaga bantu banji balahira Yezu?

4. Bici rhwaganirira mw’eci cigabi?

⁴ Mw’eci cigabi, n’omu cigabi cikulikire, rhwabona birhumire birhali binyi byarhumaga bantu banji b’omu myaka igana mirhanzi babula buyemera Yezu. Na kandi rhwayishibona bulya gurhi bantu banji ene bacilekerera kuhika bahikire aha  basarhala. N’akantu k’obulagirire, rhwayishiyiga bulya gurhi kuli kwa bulagirire okuba n’obuyemere buzibu muli Yezu lyo rhurhagikasarhala.

5. Bulya gurhi bantu baguma na baguma barhakagiyemera oku Yezu ye Masiya walaganyizibagwa?

⁵ Aha Yezu akuliraga hasarhaza bantu banji. Baliyemire oku Yezu ali mwigiriza mukulu, n’oku akagijira ebisomerine. Cikone, bakamugayaguza mpu bulya ali mwene omubinji. Na kandi ali muburhwa w’e Nazareti, lugo abantu bakagibona mpu lusungunu bwenene na lwa busha-busha. Ciru na Natanaeli embere abe mwanafunzi wa Yezu, arhangiderha ntya: “K’e Nazareti yankarhenga akantu kinja?” (Yn. 1:46) Nkaba Natanaeli arhashagalukiraga olugo Yezu akuliragamo. Erhi nkaba akagirhanya oku bulebi buli omu lwandiko lwa Mikeyo 5:2, bwalidesire oku Masiya anaburhwe e Betelehemu ci arhali e Nazareti.

6. Bici byakarhabire abantu bw’omu mango ga Yezu bahugûkwe oku kobinali Yezu ye Masiya?

⁶ Bici Amandiko gadesire? Omulebi Izaya alêba oku abashombanyi ba Yezu barhakashibirira “emyanzi eyerekire iburha lya [Masiya].” (Iz. 53:8, NWT) Myanzi minji eyerekire Yezu yali erhi yalebirwe. Abo bantu bacicihâga akasanzi k’okulolereza emyanzi eyerekire Yezu, bakahugûsirwe oku akaburhirwe e Betelehemu n’oku akarhenzire omw’iburha lya Mwami Daudi. (Lk. 2:4-7) Na ntyo aha Yezu aburhiragwa halipatine n’aha obulebi buli omu Mikeyo 5:2 bwâlilebire. Amazibu abo bantu bagwerhe galigi gahi? Abo bantu bali babidu okulutwa. Barhalimanyire emyanzi yoshi eyerekire Yezu. N’oko kwakarhuma basarhala.

7. Bulya gurhi bantu banji ene balahira abantu ba Yehova?

⁷ Ka rhuli rhwabona amazibu gashushine n’ago ene? Neci. Banji b’omu Bahamirizi ba Yehova barhaba bagale erhi bantu ba bulagirire bwenene; na ntyo bantu banji banakababona oku bali bantu “kwône barhajiraga masomo.” (Ebj. 4:13) Bantu baguma na baguma banarhanye oku abakozi ba Nnamahanga barhakahashiyigiriza abandi Ebibliya mpu bulya barhajaga oku masomo g’eteoloji. Ciru n’abandi banaderhe n’obwalagale oku Abahamirizi ba Yehova liba “idîni ly’e Amerika,” n’obu Muhamirizi 1 oku Bahamirizi 7 yeba olamire e Amerika. Ciru n’abandi banakaderha mpu Abahamirizi ba Yehova barhaba bayemire Yezu. Hagezire myaka minji abantu bali bashobeka Abahamirizi ba Yehova mpu babà “bakoministi,” mpu ziba “ndolerezi za Amerika,” n’abandi mpu “bajira olwimango lukali.” Bantu banji erhi babwirwa eyo myanzi lugenda Abahamirizi ba Yehova banasarhale bulya banayiyemere buzira kulola okuli kwayo.

8. Nk’oku biyerekinwe omu Ebijiro by’Entumwa 17:11, bici abantu bankajira erhi akaba balonzize okuhugûkwa bandi bo bali bakozi ba Nnamahanga b’okuli ene?

⁸ Gurhi wakajira ly’orhagisarhala? Kuli kwa bulagirire abantu balonze emyanzi y’okunali. Ntyo ko Luka mwandisi w’e Injili ajiraga. Ajira okwage koshi ly’ahumbirira “eyo myanzi yoshi n’obushiru kurhenga aha murhondero gwayo.” Alilonzize abayishikasoma ‘bamanye bwinja’ oku ebinwa bayumvagya lugenda Yezu “binali by’okunali.” (Lk. 1:1-4) Abayahudi balilamire e Beroya baligwerhe oborhere buli nk’obo bwa Luka. Erhi bayumva oburhangiriza omwanzi mwinja guyerekire Yezu, bajilongereza omu Mandiko g’Ecihabraniya lyo babona erhi ebyo binali by’okunali. (Osome Ebijiro by’Entumwa 17:11.) Ko n’oko ene nalyo, kuli kwa bulagirire abantu bakalongereza emyanzi y’okunali. Bashinganine bakashushanya emyanzi olubaga lwa Nnamahanga lwayigirizagya n’ebi Amandiko gadesire. Na kandi bashinganine bakaciyigiriza emwanzi eganirire abakozi ba Yehova ba gano mango girhu. Erhi  bakakalongereza “emyanzi bwinja”, barhakayemera ngasi kalimi kabahusa amasu.

9. Gurhi byabire erhi Yezu alahira oku arhajira ecimanyiso kurhenga empingu?

⁹ Bantu baguma na baguma b’omu mango ga Yezu barhakagirhimukwa n’enyigirizo zage z’okusomeza. Balonza mpu babone binji kulusha ebyo. Bamuhûna mpu abayereke “ecimanyiso c’oku nkuba [erhi kurhenga empingu]” lyo bayemera oku kobinali ye Masiya. (Mt. 16:1) Nkaba bamubwiraga ntyo bulya barhalihugûsirwe bwinja olwandiko lwa Daniyeli 7:13, 14. Cikone, ako kasanzi arhali ko Yehova alirheganyize oku ahikiriza obo bulebi. Ebi Yezu akagiyigiriza byone byakabarhabire n’okubayemeza oku kobinali ye Masiya. Cikone, basarhala erhi Yezu alahira oku arhabajirira ecimanyiso.​—Mt. 16:4.

10. Gurhi Yezu ahikirizizemwo ebi Izaya ayandikaga okubiyerekire Masiya?

¹⁰ Bici Amandiko gadesire? Omulebi Izaya ayandika oku biyerekire Masiya ntya: “Arhakabanda kahababo, arhakanaja ahamagaza, izu lyage lirhakayumvikana oku irango.” (Iz. 42:1, 2) Yezu ahikirizize omukolo gwage gw’amahubiri omu kahwenyenye n’omu bwirhohye. Arhayubakaga amahekalu g’okulonza abantu bamumanye, arhanakagiyambala emishangi yago-yago abo bakulu b’amadîni bakagiyambala, arhanabwiraga abantu oku bakamuhamagala oku mazino g’obukulu. Amango bakagisambisa Yezu, alahira oku arhajirira Mwami Herodi ecisomerine c’okulonza aciyerekane. (Lk. 23:8-11) Hali bisomerine biguma na biguma Yezu ajijire, cikone omukolo gwage gw’obulagirire gwali gwakuyaliza omwanzi mwinja. Abwira abanafunzi bage, erhi “kwo kwarhumaga nyisha.”​—Mk. 1:38.

11. Ntanya zihi mbî bantu baguma na baguma bagwerhe ene?

¹¹ Ka rhuli rhwabona amazibu gashushine n’ago ene? Neci. Ene nalyo bantu banji bali bashagalusibwa n’omuyinjihirizo guli omu makanisa manenene, erhi n’amazino g’obukulu g’abakulu b’amadîni, erhi n’enkomêdu za mîra zakagijirwa n’abapagani. Cikone bici abaja  omu nyigirizo z’ago madîni bayiga lugenda Nnamahanga n’omuhigo gwage? Abaja oku ntimanano zirhu banayige ebi Yehova aba alonzize rhujire na gurhi rhwankalama nk’oku alonzize. Enyumpa zirhu z’entimanano ziba zicîre na za lugero, cikone zirhabamo emiyinjihirizo erhalusire olugero. Abali balongoza barhayambala emishangi y’okubaberula n’abandi na kandi barhaciha amazino g’obukulu. Enyigirizo zirhu n’obuyemere bwirhu biba biyimangire oku Kanwa ka Nnamahanga. Ciru akaba ntyo, bantu banji ba muli gano mango girhu bali basarhala mpu bulya oku rhujira enyigirizo zirhu kuba kwa ntya-ntya kone, mpu n’ebi rhuyigiriza arhali byo balonza bayumve.

12. Nk’oku olwandiko lwa Abahabraniya 11:1, 6 luhugwîre, bici obuyemere bwirhu bushinganine buyubakirweko?

¹² Gurhi rhwakajira lyo rhurhagi sarhala? Entumwa Paolo yabwira Abakristu balilamire e Roma ntya: “Obuyemere burhenga omu kuyumva emyanzi, n’eyo myanzi erhenga omu kubwirwa akanwa ka Kristu.” (Rm. 10:17, NWT) Co cirhuma rhunayubakire obuyemere bwirhu oku amandiko, ci arhali omu kujira amadinye g’amadîni garhapatini n’amandiko, ciru gakakabamw’omuyinjihirizo guyosire gurhi. Rhushinganine rhube n’obuyemere busêzire, buyimangire oku bumanye b’okunali bulya “nta muntu wakasîmîsa Nnâmahanga buzira bwemere.” (Osome Abahabraniya 11:1, 6, Mashi Bible.) Na ntyo, rhurhalagiriri oku cimanyiso cago-cago carhenga empingu lyo rhuyemera oku rhwabwine okuli. Okuyiga enyigirizo ziri omu Bibliya kunazibuhye obuyemere bwirhu n’okurhuyemeza n’obwalagale oku rhwabwine okuli, n’oko kunarhume rhurhacibe n’akarhinda.

13. Bici byakagirhuma bantu banji batumuza Yezu?

¹³ Omu mango ga Yezu, abanafunzi ba Yowane Mubatiza basomerwa okubona abanafunzi ba Yezu barhakagicishalisa. Yezu abahugûlira oku ntabyo byakarhuma bajira ntyo anaciri haguma nabo. (Mt. 9:14-17) Ciru akaba ntyo, Abafarizeyi n’abandi bashombanyi ba Yezu bakamutumuza mpu bulya gurhi arhashimba enkomêdu zabo. Bagaya bwenene  erhi akafûmya abalwala olusiku lw’e Sabato. (Mk. 3:1-6; Yn. 9:16) Bakagicikunga oku bakenzire Esabato, cikone barhakagibona nka kuli kubi okuguliza oburhunzi bwabo omu hekalu. Bagaya bwenene erhi Yezu atumuza eco cijiro bakagijirira omu hekalu. (Mt. 21:12, 13, 15) Na balya Yezu ayigirizagya omu sinagogi y’e Nazareti, bagaya bwenene erhi Yezu akolesa enyiganyo gurhenga omu ndibi z’aba Israheli ly’abayeresa n’obwalagale oku baligwerhe iroho ly’okucikaliza n’oku barhaligwerhe buyemere. (Lk. 4:16, 25-30) Olugenzi lwa Yezu abantu barhalicirheganyizeko lwarhuma basarhala.​—Mt. 11:16-19.

14. Bici byarhumaga Yezu atumuza enkomêdu zirhalipatine n’Amandiko?

¹⁴ Bici Amandiko gadesire? Kugerera omulebi Izaya, Yehova aderha ntya: “Olula lubaga ludwirhe lwanyegera omu nderho zône n’okunkuza n’akanwa kône, nobwo omurhima gwabo guli kuli nani, na kulya kuba obukenge bankenga liba irhegeko na nyigirizo zirhenga emw’abantu.” (Iz. 29:13) Yezu agwerhe ecirhumire c’okutumuza enkomêdu zirhalipatine n’Amandiko. Ngasi boshi balicihirireho amarhegeko n’enkomêdu zirhapatini n’Amandiko balahira Yehova n’oyu arhumaga nka Masiya.

15. Ene, bici birhuma bantu banji bagaya Abahamirizi ba Yehova?

¹⁵ Ka rhuli rhwabona amazibu gashushine n’ago ene? Neci. Bantu banji ene banagaye bwenene erhi Abahamirizi ba Yehova balahira okujira enkomêdu zirhapatine n’amandiko, nk’okujira idinye ly’okukengera olusiku lw’okuburhwa k’omuntu erhi lya Noweri. N’abandi banagaye bwenene erhi Abahamirizi ba Yehova balahira okujira haguma nabo ensiku nkulu zijirwa omu cihugo, erhi enkomêdu zijirwa aha ciriyo zirhapatini n’Akanwa ka Nnamahanga. Byanahashikana abasarhala enyanya z’oko banakaba bayemire oku bali baharhamya Nnamahanga omu njira ayemire. Cikone barhakamushagalusa erhi bakazigira enkomêdu z’igulu ahali h’enyigirizo z’obwalagale ziri omu Bibliya.​—Mk. 7:7-9.

16. Nk’oku biyerekinwe omu lwandiko lwa Ennanga 119:97, 113, 163-165, bici rhushinganine rhujire, na bici rhushinganine rhulahire?

¹⁶ Gurhi rhwakajira lyo rhurhagi sarhala? Kuli kwa bulagirire rhuzigire bwenene amarhegeko n’amakanuni ga Yehova. (Osome Ennanga 119:97, 113, 163-165.) Erhi rhuzigira Yehova, rhunalahire ngasi nkomêdu yoshi-yoshi emugayisa. Nta kantu koshi-koshi rhuyemera kaje aha nafasi y’obuzigire rhujirako Yehova.

17. Omu mango ga Yezu, bici bantu banji balilangalire oku Masiya anajire byarhumaga basarhala?

¹⁷ Bantu baguma na baguma balilonzize Yezu alerhe empindulo za ho n’aho omu bintu by’epolitike. Balilangalire oku Masiya ye wanabakule omu bujà bw’oburhegesi bw’Abaroma. Cikone erhi balonza okujira Yezu abe mwami wabo, acilahirira. (Yn. 6:14, 15) Ciru n’abandi, kuhiramo abakuhani, bakagiyoboha oku nkaba Yezu akola alerha empindulo mpyahya omu by’epolitike na ntyo zagayisa Abaroma n’obu balihire abo abakulu b’amadîni bukulu na buhashe bulebe. Ezo ntanya zoshi lugenda eby’epolitike zarhuma bantu banji basarhala.

18. Bulebi buhi na buhi b’omu Bibliya bwaliganirire Masiya bantu banji barhakagi segezak’obwenge?

¹⁸ Bici Amandiko gadesire? Ciru ankaba bulebi bunji bw’Ebibliya bwalidesire oku Masiya akabire Muhimi mukulu, obundi bulebi bwalidesire oku alishinganine afê erhi byaha birhu birhuma. (Iz. 53:9, 12) Bicigi byarhumaga abo bantu bagwerhe entanya mbî okubiyerekire Masiya? Bantu banji b’omu mango ga Yezu barhakagi segeza obwenge oku ngasi bulebi burhali laganyize oku Masiya anayuse amazibu gabo ho n’aho.​—Yn. 6:26, 27.

19. Bici bantu banji balonza rhujire birhuma basarhala ene?

 ¹⁹ Ka rhuli rhwabona amazibu gashushine n’ago ene? Neci. Olugenzi lwirhu l’okurhaja omu by’epolitike lunarhume bantu banji basarhala. Banabe bali balangalira oku nkaba amango g’obucaguzi nirhu rhwacagula muntu mulebe. Cikone, rhuba rhuhugûsirwe oku Yehova aba amanyire oku erhi rhwakacishoga muntu mulebe oku ye waba murhegesi wirhu, oko kwanayerekana oku rhulahire oku Arhacirhurhegekaga. (1 Sam. 8:4-7) Na kandi abantu banakarhanya oku rhwalishinganine rhukayubaka amasomo, amahopitali n’eyindi mikolo y’okuja kwarhabala abantu. Erhi babona rhusegize obwenge bwirhu oku mukolo gw’okuhubiri, ci arhali oku bintu byakayusa amazibu ga mw’er’igulu ho n’aho, oko kunarhume basarhala.

20. Nk’oku Yezu ayerekanaga n’obwalagale omu Mateyo 7:21-23, bici rhushinganine rhusegezek’obwenge?

²⁰ Gurhi rhwakajira lyo rhurhagi sarhala? (Osome Mateyo 7:21-23.) Rhushinganine rhusegeze obwenge oku omukolo Yezu arhurhegekaga oku rhujire. (Mt. 28:19, 20) Nta mango rhwanabule kuba masu enyanya z’eby’epolitike erhi omu kulonza mpu rhuyuse amazibu ga mw’er’igulu. Rhuba rhuzigire abantu na kandi rhunashibirire amalagirire gabo, cikone rhumanyire oku enjira nyinja y’okubarhabala kuli kubayigiriza lugenda Obwami bwa Nnamahanga n’okubarhabala bajire obwîra bwa hofi-hofi haguma na Yehova.

21. Bici rhweshi rhushinganine rhuhige okujira?

²¹ Mw’eci cigabi, rhwaganirire bintu bini byarhumaga bantu banji b’omu myaka igana mirhanzi basarhala n’oko kwarhuma babula buyemera Yezu na kandi binarhume bantu banji basarhala enyanya z’abanafunzi ba Yezu. K’ebyo bintu bini byone rhushinganine rhuyake? Nanga. Omu cigabi cikulikire, rhwaganirira bindi birhumire bini byakarhuma abantu basarhala. Rhuhige okuyaka ngasi kantu kakarhuma rhwasarhala na kandi rhugendekere rhwazibuhya obuyemere bwirhu!