1. Bulya gurhi rhweshi rhuba rhulagirire oku kuba n’obwenge bwarhenga emwa Nnâmahanga? (Emigani 4:7)

 ERHI akaba okola ohikire aha warhôla omuhigo gw’obulagirire, buzira karhinda washenzire Yehova obwenge bulya wal’ihugûsirwe oku obulagirireko. (Yk. 1:5) Mwami Solomoni ayandika ntya: “Obwenge ko kaba kantu ka bulagirire bwenene.” (Osome Emigani 4:7, NWT.) Kobinali arhali ngasi bwenge boshi Solomoni akag’iganirira. Akag’iganirira obwenge burhenga emwa Yehova Nnâmahanga. (Mig. 2:6) Cikone, k’obwenge burhenga emwa Nnâmahanga bwanarhurhabala rhulwise ngasi mazibu rhuli rhwageramo ene? Nk’oku rhwabona mw’eci cigabi, kobinali bwanarhurhabala.

2. Njira ehi nguma rhwakabamwo n’obwenge bw’okunali?

² Njira nguma rhwakabamwo n’obwenge, kuli kuyiga n’okukolesa enyigirizo za balume babirhi bakengagwa bwenene enyanya z’obwenge bunji bagwerhe. Burhangiriza, rhwaganirira okubiyerekire Solomoni. Ebibliya edesire ntya: “Nnâmahanga aha Sulumani obwenge, n’obumanye bunji bwenene.” (1 Bam. 4:29, Mashi Bible) Bwa kabirhi, rhwaganirira okubiyerekire Yezu wagwerhe bwenge bunji bwenene kulusha abantu boshi b’omu mango gage. (Mt. 12:42) Okubiyerekire Yezu, obulêbi bwal’idesire ntya: “Iroho lya Yehova lyamudekererako, iroho ly’obwenge n’obukengere.”​—Iz. 11:2, NWT.

3. Bici rhwaganirira mw’eci cigabi?

³ Omukukolesa obwenge bwarhenga emwa Nnâmahanga, Solomoni na Yezu bahânyire amahano minja okubiyerekire ebintu bilug’ijirwa omu kalamo kirhu rhweshi. Mw’eci cigabi, rhwaganirira mahano asharhu ga muli ago: Obulagirire bw’okuba n’entanya z’olugero okubiyerekire ensaranga, omukolo gw’omubiri, n’okubirhuyerekire rhwenene.

4. Lubero luhi lwahali egarhi ka Solomoni na Yezu okubiyerekire ebintu by’omubiri?

⁴ Solomoni ali mugale bwenene, ananagwerhe akalamo kinja bwenene. (1 Bam. 10:7, 14, 15) Lubero n’oko, Yezu yehe arhagwerhe bintu binji by’omubiri ciru arhanagwerhe ahamwage. (Mt. 8:20) Cikone abo balume bombi bagwerhe entanya z’olugero okubiyerekire ebintu by’omubiri, bulya Yehova ye wabahâga obo bwenge.

5. Ntanya zihi z’olugero Solomoni agwerhe okubiyerekire ensaranga?

⁵ Solomoni al’ihugûsirwe oku ensaranga ziba “lwakiro.” (Muh. 7:12) Kugerera ensaranga, rhwanagula ebintu rhulagirireko, na bintu bilebe rhulonzize. Kobinali, ciru akaba Solomoni ali mugale, al’ihugûsirwe oku hali ebindi bintu biba bya bulagirire bwenene kulusha ensaranga. Kwa lwiganyo, ayandika ntya: “Aha wankaluza ebirugu, wankajira izino nkana [erhi “kuba n’oborhere bwinja,” mahugûlo g’idako, NWT].” (Mig. 22:1) Kandi Solomoni adesire oku abantu bazigira ensaranga barhalug’ishagalukira ebi bagwerhe. (Muh. 5:10, 12) Na kandi arhurhonda oku rhurhakag’ihira obulangalire bwirhu boshi omu nsaranga, bulya omu hisanzi hisungunu ensaranga rhugwerhe zoshi zanahwa.​—Mig. 23:4, 5.

6. Ntanya zihi za lugero Yezu agwerhe okubiyerekire ebintu by’omubiri? (Mateyo 6:31-33)

⁶ Yezu agwerhe entanya z’olugero okubiyerekire ebintu by’omubiri. Akag’ilya ananakag’inywa. (Lk. 19:2, 6, 7) Mango maguma, Yezu ahindula amishi gaba idivayi linja bwenene, co cali cisomerine cirhanzi ajiraga. (Yn. 2:10, 11) N’amango afâga al’iyambirhe omushangi gw’engulo ndârhi. (Yn. 19:23, 24) Cikone arhalekaga ebintu by’omubiri birhôle enafasi ntanzi omu kalamo kage. Abwira abanafunzi bage ntya: “Ntaye wankakolera bami babiri: . . . Murhankahashikolera Nyamuzinda n’ebirugu.” (Mt. 6:24) Yezu ayigirizize oku erhi rhwakalonza burhanzi Obwami bwa Nnâmahanga omu kalamo kirhu, Yehova anarhuha ebi rhulagirireko.​—Osome Mateyo 6:31-33.

7. Gurhi mwene wirhu muguma ayungusiremwo omukuba n’entanya z’olugero okubiyerekire ensaranga?

⁷ Bene wirhu banji na bali birhu banji bayungusirwe omukukolesa amahano ga Yehova  okubiyerekire ensaranga. Rhuganirire olwiganyo lwa mwene wirhu muguma mulamba ohamagalwa Daniel. Adesire ntya: “Erhi nciri musole wa mushûko, nahiga okujira emikolo y’ekiroho ebe ya bulagirire omu kalamo kani.” Bulya Daniel ahizire okulama akalamo karhahûnyiri bintu binji, aba n’obuhashe bw’okukolesa akasanzi kage n’obulenga bwage omu mikolo minji y’eciteokrasi. Ayushwire ntya: “Okuderha okuli, ntazig’iciyunjuza ciru n’ehitya enyanya z’omuhigo narhôzire. Kobinali, nakapatire nsaranga nyinji ncicihânaga omu mukolo gw’okuzilonza. Cikone, ntakabire n’abîra bali nk’aba ngwerhe ene. Ncisegezagya obwenge bwani oku kulonza ensaranga, ntakabire n’omwishingo guli nk’ogu ngwerhe ene, bulya ndi nasegeza obwenge bwani oku mukolo gw’Obwami bwa Nnâmahanga. Nta kafuluba k’ensaranga kakayumanana n’emigisho ngwerhe kurhenga emwa Yehova.” Kobinali, rhunabe na bunguke bunji erhi rhusegeza obwenge bwirhu oku bintu by’ekiroho, ahali h’okubusegeza oku nsaranga.

8. Gurhi rhumanyiremwo oku Solomoni agwerhe entanya z’olugero okubiyerekire omukolo gw’omubiri? (Omuhanûzi 5:18, 19)

⁸ Solomoni adesire oku omwishingo rhwakakûla omu mukolo gwirhu muzibu eba “ngalo ya Nyamuzinda.” (Osome Omuhanûzi 5:18, 19.) Ayandika ntya: “Ngasi mukolo gujira obûnguke.” (Mig. 14:23) Solomoni al’imanyire oku ezo nderho ziri z’okuli. Ali mukozi! Ayubasire enyumpa, arhwera amashwa g’emizabibu, ajira amabustani, asîka n’ebisima by’amishi. Ayubasire ciru n’amavile. (1 Bam. 9:19; Muh. 2:4-6) Ogo gwali mukolo muzibu, na buzira karhinda, gwarhumire arhimukwa omu njira ndebe. Cikone Solomoni arhal’ilangalire oku eyo mikolo yone yanamuha omwishingo. Anajirire Yehova bintu binji. Kwa lwiganyo, ayusize myaka nda ali alongoza omukolo gw’okuyubakira Yehova ehekalu nyinja bwenene! (1 Bam. 6:38; 9:1) Enyuma z’okujira emikolo y’omubiri n’ey’ekiroho, Solomoni ahugûkwa oku emikolo y’ekiroho yo y’obulagirire bwenene kulusha ey’omubiri. Ayandika ntya: “Okushwinja emyanzi: byoshi biyumvikine. Orhinye Nyamuzinda onashimbe amarhegeko gage.”​—Muh. 12:13.

9. Gurhi Yezu ahiziremwo omukolo gw’omubiri oku nafasi yago?

⁹ Yezu ali mukozi wa bushiru. Erhi ali musole, akag’ijira omukolo gw’okubinja. (Mk. 6:3) Buzira karhinda ababusi bage bashagalukire oburhabale akag’ihâna bulya bakag’icihangana okukola lyo bahikiriza amalagirire g’omubiri g’omulala gwabo gwalimo bantu banji. Yezu ali mwimana anakag’ijira omukolo gwage bwinja. Co cirhumire nkaba bantu banji bakag’ishagalukira ebintu akag’itula! Kobinali, Yezu akag’ishagalukira omukolo gwage. Ciru akaba Yezu ali mukozi wa bushiru, ngasi mango akag’icihiriraho akasanzi k’okujira ebintu by’ekiroho. (Yn. 7:15) Enyuma z’aho erhi arhondera omukolo gwage gw’amahubiri, ahanûla abumvirhiza bage ntya: “Murhakag’ikolera ebiryo by’okugaga, cikwone mukâkolera ebirhagaga byo bilerha obuzine bw’ensiku n’amango.” (Yn. 6:27, Mashi Bible) N’omu Mahubiri gage g’oku Ntondo, Yezu aderha ntya: “Mucibikire amahirhi empingu.”​—Mt. 6:20.

10. Mazibu gahi bantu baguma na baguma bali barhimanana nago okubiyerekire omukolo gwabo gw’omubiri?

¹⁰ Obwenge bwarhenga emwa Nnâmahanga bunarhurhabale rhube n’entanya z’olugero okubiyerekire omukolo gwirhu gw’omubiri. Rhwe nka Bakristu, rhwayigirizibwe oku ‘rhukakola n’amaboko girhu . . . , ebishinganine.’ (Ef. 4:28) Kanji-kanji ba bose birhu banakabona oku rhuli bikubagirwa na ba bushiru, ciru hali n’amango barhubwira oku banashagalukire oku rhukola. Hali amango rhurhondera okukola enyuma z’ensa  z’akazi erhi rhugwerhe ebirhumire binja, omukulonza rhuyerese bose wirhu oku Abahamirizi ba Yehova baba banyakazi binji. Cikone bunyi-bunyi, rhwanahikira aha rhwahugûkwa oku rhukola rhuli rhwabula akasanzi rhwageza haguma n’emilala yirhu, erhi kujira mikolo miguma na miguma y’eciteokrasi. Bihûnyire rhujire empindulo lyo rhucib’iba balugero.

11. Bici mwene wirhu muguma aciyigirizize lugenda okuba n’entanya z’olugero okubiyerekire omukolo gw’omubiri?

¹¹ Mwene wirhu muguma musole ohamagalwa William, abwine obulagirire bw’okuhira omukolo gw’omubiri oku nafasi yago. Okubiyerekire mugula muguma William akag’ikolera embere, adesire ntya: “Oku [oyo mwene wirhu] akag’ijira omukolo gwage kwal’iyerekine oku ali lwiganyo lwinja okubiyerekire okuba wa lugero. Akag’ikola n’obushiru n’abakliya bage bakag’imuderha bwinja enyanya z’oku akag’ihikiriza omukolo gwage. Cikone oku buzinda bw’omulegerege erhi akayusize akola, akag’ileka omukolo gwage n’okukolesa akasanzi kage n’emisi yage omukushibirira omulala gwage n’enterekêro yage. Ka mumanyire obunguke oko kwamulerhire? Ali muguma w’omu bantu mba manyire bajira omwishingo!” *

12. Gurhi Solomoni ayerekinemwo oku agwerhe entanya z’olugero okubimuyerekire yenene, cikone gurhi azihezizemwo?

¹² Amango Solomoni akag’ikolera Yehova n’obwishwekerezi, agwerhe entanya z’olugero okubimuyerekire yenene. Erhi ali musole, al’ihugûsirwe oku hali ebi arhakahash’ijira n’oko kwakamushumya ahûne Yehova amahano. (1 Bam. 3:7-9) Oku murhondero gw’oburhegesi bwage, Solomoni al’ihugûsirwe obuhanya bulerhwa n’obucîbone. Ayandika ntya: “Obucîbone bulerha okusherera, n’abantu b’okucîkunga ebwakufa baja [kuhirima bahirima, NWT].” (Mig. 16:18, Mashi Bible) Ebintu by’okugayisa kuli kubona oku Solomoni arhakolesagya er’ihano ahânaga. Mango malebe erhi ali arhegeka, obucîbone bwarhuma aleka okurhumikira marhegeko maguma na maguma  ga Nnâmahanga. Kwa lwiganyo, irhegeko liguma ly’ago marhegeko lyal’isegize oku omwami Muhabraniya arhashinganini ‘aluze abakazi, omurhima gwage gwakanahabuka.’ (Lush. 17:17) Solomoni arharhumikiraga er’irhegeko, arhôla bakazi 700, na baherula 300, na banji ba muli bo bali bapagani! (1 Bam. 11:1-3) Nkaba Solomoni akag’ibona oku oko “kurhamulerhere mazibu goshi-goshi.” Solomoni abe erhi ntyo kw’akag’irhanya erhi nanga, erhi hagera nsiku, ahikirwa n’amazibu galerhagwa n’oko kurharhumikira Yehova.​—1 Bam. 11:9-13.

13. Bici rhwakaciyigiriza omukurhanya okubiyerekire entanya za Yezu z’obwirhohye?

¹³ Yezu ali mwirhohye, ananagendekire aba n’entanya z’olugero okubimuyerekire yenene. Embere Yezu ayishe hanw’igulu, ajijire bintu binji binja omu mukolo gwa Yehova. Kugerera Yezu, ‘byoshi byalemwa emalunga n’en’igulu.’ (Kl. 1:16) Erhi Yezu abatizibwa, buzira karhinda akengire ebintu ahikirizize erhi ali haguma n’Ishe empingu. (Mt. 3:16; Yn. 17:5) Cikone, oko kuhugûkwa ebyo bintu, kurharhumaga Yezu aba wa bucîbone. Lubero n’oko, nta lusiku ayerekine oku alushire abandi. Abwira abanafunzi bage oku arhayishaga hanw’igulu “mpu akolerwe, ci akolere abandi, anahâne obuzine bwage mpu lyo acungula banji.” (Mt. 20:28) Na kandi aderha oku arhakajira akantu koshi-koshi Ishe arhamurhegekaga oku ajire. (Yn. 5:19) Kobinali, Yezu ali muntu mwirhohye! Yezu ayerekine olwiganyo lwinja rhushinganine rhuyige.

14. Bici olwiganyo lwa Yezu lwakarhuyigiriza okubiyerekire okuba n’entanya nyinja okubirhuyerekire?

¹⁴ Yezu ayigirizize abanafunzi bage oku bakaba n’entanya nyinja okubibayerekire bonene. Mango maguma Yezu ababwira n’obwalagale ntya: “Emviri z’irhwe linyu zoshi ziri nganje!” (Mt. 10:30) Okumanya oku emviri zirhu nazo ziba nganje kurhurhulirizize, ci bwenene erhi akaba rhujira entanya z’okucibona oku rhuli ba busha-busha. Oko kuyerekine oku Laha wirhu w’omu mpingu aba arhushibirire, k’okuderha oku rhuba ba bulagirire bwenene omu masu gage. Rhurhashinganini rhube n’akarhinda okubiyerekire entanya za Yehova z’okuderha oku rhushinganine rhube bakozi bage n’oku rhushinganine rhuyish’ihâbwa obuzine bw’ensiku n’amango omw’igulu lihyahya.

15. (a) Ntanya zihi z’olugero okubirhuyerekire rhwenene Ilabiro ly’Akalalizi lidesire rhushinganine rhube nazo? (b) Nk’oku biyerekinwe oku nfoto eri oku bukurasa bwa 24, migisho ehi rhurhakaba nayo erhi rhwakakacisegezako obwenge?

 ¹⁵ Omu myaka 15 egezire, hali Ilabiro ly’Akalalizi lyal’idesire oku rhube n’entanya z’olugero okubirhuyerekire. Lidesire ntya: “Buzira karhinda, rhurhakalonza rhukacirhanyiza okulushire olugero n’oko kurhume rhwaba n’obucîbone. Na kandi rhurhakalonza rhukaciyumva oku rhuli ba busha-busha ciru n’ehitya. Ahali h’okujira ntyo, omuhigo gwirhu gushinganine gube gwa kuba n’entanya nyinja okubirhuyerekire, omukukengera oku hali ebi rhurhakahasha. Mukazi muguma Mukristu adesire ntya: ‘Niono, ntaba muntu mubi; ntanaba mwinja kulusha abandi. Njira amorhere minja n’obuzamba bwani, ntyo ko n’abandi bantu nabo bayorha.’” * Rhwanabona n’obwalagale obunguke rhwakaba nabo erhi rhwakagendekera rhwaba n’entanya z’olugero okubirhuyerekire rhwenene.

16. Bulya gurhi Yehova arhuha amahano g’obwenge?

¹⁶ Yehova ali arhuha amahano g’obwenge kugerera Akanwa kage. Aba arhuzigire, analonzize rhube n’omwishingo. (Iz. 48:17, 18) Omuhigo mwinja rhwakarhôla gwakanarhuma rhwaba n’omwishingo, kuli kugendekera kwajira ebintu byakashagalusa Yehova Nnâmahanga. Erhi rhwakajira ntyo, rhurhakacihikirwa na mazibu manji gahikira abantu basegeza obwenge bwabo oku nsaranga, oku mukolo gw’omubiri, n’okubibayerekire bonene. Mâshi ngasi muguma wirhu ahige okuba mwenge n’okushagalusa omurhima gwa Yehova!​—Mig. 23:15.