1-2. Cirhumire cihi cirhanzi cakarhushumya rhushagalukire ebiri omu citabu c’Amafulûlo?

 KA MUNTU mulebe akola akuhîre ealbumu yage oku olole oku nfoto zimuli? Amango oli walola kw’ezo nfoto, obonemo amasura ga bantu banji bwenene orhaba omanyire. Cikone oyish’ihika oku nfoto nguma, oyilabirize bwenene. Bulya gurhi? Bulya nawe oyiriko. Amango oli walola eyo nfoto, wanarhondera okucidosa mangaci na ngahi mwayirhôleragwa. Na kandi, olonze okumanya ngasi muntu oli kw’eyo nfoto. Eyo nfoto ehugwîre bintu binji kuli we.

² Ecitabu c’Amafulûlo ko ciri nk’eyo nfoto. Bulya gurhi? Hali hofi birhumire bibirhi birhushumize okuderha ntyo. Burhangiriza, eci citabu cayandikagwa erhi rhwe rhurhuma. Omulongo murhangiriza gudesire ntya: “Okucîmanyisa kwa Yezu Kristu ahâbagwa na Nyamuzinda, mpu ayereke abambali ebiri hofi bibê.” (Maf. 1:1) Co cirhumire, ebyayandikagwa mw’eco citabu birhayandikagwa enyanya z’abantu boshi, cikone byayandikagwa enyanya zirhu rhwe bakozi ba Nnâmahanga bacihânyire emwage. Rhwe bakozi ba Nnâmahanga rhurhakasomerwa okubona rhuli rhwashangira okuhikiriza obulêbi buli mw’eco citabu c’okushagalusa. Omu zindi nderho, rhuli rhwacibona “kw’erya nfoto.”

3-4. Nk’oku biyerekinwe omu citabu c’Amafulûlo, mangaci obulêbi buli mw’eco citabu bwakahikirire, na bici oko kushinganine kushumye ngasi muguma wirhu ajire?

³ Ecirhumire ca kabirhi, kali kasanzi obo bulêbi buli bwahikirira. Entumwa Yowane yayerekine ako kasanzi erhi ederha ntya: “Kugerera obulongozi bw’iroho nahikira aha naja omu lusiku lwa Nnawirhu.” (Maf. 1:10, NWT) Erhi Yowane ayandika ezo nderho hofi omu mwaka gwa 96 muli Kano Kasanzi  Kirhu (K.K.K.), “olusiku lwa Nnawirhu” lwaciri kuli bwenene. (Mt. 25:14, 19; Lk. 19:12) Cikone kushimbana n’obulêbi bw’Ebibliya, olo lusiku lwarhonderaga omu mwaka gwa 1914, erhi Yezu ajirwa Mwami empingu. Kurhondera ogo mwaka, obulêbi buli omu citabu c’Amafulûlo buyerekire abakozi ba Nnâmahanga bwarhondera okuhikirira. Kobinali, rhulamire omu “lusiku lwa Nnawirhu”!

⁴ Bulya rhwe rhulamire mw’aka kasanzi k’okushagalusa, rhwe rhushinganine rhuyumvirhize er’ihano ly’obuzigire liri omu citabu c’Amafulûlo 1:3, NWT: “Ow’obushagaluke ali ola oli wasoma n’izu n’abali bayumvirhiza ebinwa by’obu bulêbi, n’abali barhumikira ebiyandisirwemo, bulya akasanzi kahizirweho kali hofi.” Kobinali, rhushinganine ‘rhukasoma n’izu,’ lyo ‘rhuyumvirhiza ebinwa by’obu bulêbi,’ n’“okubirhumikira.” Binwa bihi biguma na biguma by’obo bulêbi rhushinganine rhurhumikire?

5. Gurhi ecitabu c’Amafulûlo cisegizemwo obulagirire bw’okumanya erhi kobinali Yehova anayemere enterekêro yirhu?

⁵ Kurhondera omu cigabi cirhanzi c’Amafulûlo, rhuyizire oku Yezu aba amanyire ngasi bintu byoshi bijirikana omu bigamba by’abantu bage. (Maf. 1:12-16, 20; 2:1) Yezu ayerekine ntyo kugerera emyanzi abwiraga bigamba nda by’omu Aziya Nsungunu. Mw’eyo myanzi, ahâna obulongozi buyumvikine bwinja, bwakarhabire Abakristu b’omu myaka igana mirhanzi bamanye erhi kobinali Yehova al’iyemire enterekêro yabo. Na kandi, ebiri mw’eyo myanzi biyerekire abakozi ba Nnâmahanga boshi ene. Isomo lici rhukuzire aho? Yezu Kristu, Cirongozi wirhu, aba amanyire bwinja ehali yirhu y’ekiroho. Yezu ali arhulanga n’okurhulongoza anali abona ngasi kantu. Amanyire ebi rhushinganine rhujire lyo rhugendekera rhwayemerwa na Yehova. Bulongozi buhi ahânyire rhushinganine rhurhumikire ene?

6. (a) Nk’oku biyerekinwe omu citabu c’Amafulûlo 2:3, 4, mazibu gahi omwanzi Yezu abwiraga ecigamba c’e Efezi gwal’iyerekine oku bagwerhe? (b) Isomo lici rhukuzire aho?

⁶ Osome Amafulûlo 2:3, 4. Rhurhashinganini rhuheze obuzigire rhwagwerhe burhanzi kuli Yehova. Omwanzi Yezu abwiraga ecigamba c’e Efezi, gwal’iyerekine oku bakag’ilembera, bagendekire bakolera Yehova buzira kuleka, ciru akaba bali omu mazibu manji. Ciru akaba ntyo, bali bamaheza obuzigire bagwerhe burhanzi kuli Nnâmahanga. Bal’ishinganine bacib’igalukira obo buzigire bagwerhe. Buzira kujira ntyo, Yehova arhakayemire enterekêro yabo. Ko n’oko ene, nirhu rhushinganine rhujire binji ahanyuma n’okulembera. Rhushinganine rhulembere erhi rhunagwerhe ebirhumire binja by’okujira ntyo. Nnâmahanga wirhu arhashagalukira ebi rhujira byone, cikone kandi anashagalukire ebirhushumya rhubijire. Ebirhushumya biba bya bulagirire omu masu gage, bulya aba alonzize rhumuhe enterekêro bulya rhuba rhumuzigire rhunamuvuzire omunkwa.​—Mig. 16:2; Mk. 12:29, 30.

7. (a) Nk’oku biyerekinwe omu citabu c’Amafulûlo 3:1-3, mazibu gahi Yezu abwine ecigamba c’e Sardi cagwerhe? (b) Bici rhushinganine rhujire?

⁷ Osome Amafulûlo 3:1-3. Rhushinganine rhugendekere rhwaba masu. Abakristu b’omu cigamba c’e Sardi bagwerhe amazibu gali lubero. Ciru akaba embere bagwerhe obushiru omu mukolo bakag’ijirira Yehova, bahikira aha babuheza. Yezu ababwira oku ‘babe masu.’ Burhonde buci rhukuzire aho? Kobinali, Yehova arhakayibagira omukolo gwirhu. (Hb. 6:10) Cikone rhurhashinganini rhurhanye oku bulya omu mango gageraga  rhwakolire Yehova bwenene, rhurhacishinganini rhugendekere rhwamukolera. Ciru akaba rhwanaba rhurhacigwerhi buhashe bunji nk’oku byali embere, rhushinganine rhugendekere rhwaba na binji bya kujira omu “mukolo gwa Nyakasane,” n’okugendekera kwaba masu kuhika ebuzinda.​—1 Kr. 15:58; Mt. 24:13; Mk. 13:33.

8. Bici rhuciyigirizize kugerera enderho babwiraga bene wirhu b’e Laodikiya ziri omu citabu c’Amafulûlo 3:15-17?

⁸ Osome Amafulûlo 3:15-17. Rhushinganine rhube ba bushiru n’okuha Nnâmahanga enterekêro n’omurhima gwirhu goshi. Omwanzi Yezu abwiraga ecigamba c’e Laodikiya, gwal’iyerekine oku bagwerhe amazibu gali lubero. Bali “bîkàngà” omu nterekêro yabo. Bulya barhakag’irhôla ebintu kwa buzibu-zibu, Yezu ababwira oku ‘balihanyagîre, [banali] bakubêrwa lukogo.’ Bal’ishinganine babe na bushiru bunji omu enterekêro bakag’iha Yehova. (Maf. 3:19) Isomo lici rhukuzire aho? Erhi akaba rhwahezize ehy’obushiru hisungunu omu nterekêro rhuha Yehova, rhushinganine rhugendekere rhwashagalukira ebintu byoshi binja Yehova n’ikubuliro lyage bali barhuha. (Maf. 3:18) Rhurhayemeraga ciru n’ehitya okulongereza akalamo k’okuba na bintu binji kurhume rhwabula kuba masu, n’oko kurhume ebintu by’ekiroho byaja oku nafasi ya kabirhi omu kalamo kirhu.

9. Nk’oku biyerekinwe omu myanzi Yezu abwiraga Abakristu b’e Pergamamu n’ab’e Tiyatira, murhego guhi rhushinganine rhuyake?

⁹ Rhushinganine rhuyake enyigirizo z’abagoma. Yezu akalihira Bakristu baguma na baguma b’e Pergamamu bulya bakag’irhuma bene wirhu na bali birhu bagabikanamo. (Maf. 2:14-16) Avuga Abakristu b’e Tiyatira omunkwa bulya bagendekire bayaka ebintu by’‘amahwe ga Shetani,’ anabayinginga oku ‘bagwarhe buzibu’ okuli. (Maf. 2:24-26) Abakristu bazamba balekaga enyigirizo z’obunywesi zibashumye, bal’ishinganine baciyunjuze. Bici oko kwakarhuyigiriza ene? Rhushinganine rhuyake ngasi nyigirizo zirhapatini n’entanya za Yehova. Abagoma ‘banakayorha nk’abakombêra ebya Nyamuzinda,’ cikone “erhi banahakanyire emisi yabyo.” (2 Tm. 3:5) Kwanaba kulembu kuli rhwe okumanya enyigirizo z’obunywesi n’okuziyaka erhi akaba rhunaciyigirize kwa buzibu-zibu Akanwa ka Nnâmahanga.​—2 Tm. 3:14-17; Yd. 3, 4.

10. Lindi isomo lihi rhwakaciyigiriza kugerera omwanzi Yezu abwiraga ecigamba c’e Pergamamu n’ec’e Tiyatira?

¹⁰ Rhushinganine rhuyake ngasi lugenzi lw’ebyenshonyi. Hali agandi mazibu ecigamba c’e Pergamamu n’ec’e Tiyatira byagwerhe. Yezu  atumuza bantu baguma na baguma ba mw’ebyo bigamba bulya barhayakaga olugenzi lw’eby’enshonyi. (Maf. 2:14, 20) Isomo lici rhukuzire aho? Rhurhakalangalira oku Yehova arhuyemerera rhube n’olugenzi lw’eby’enshonyi, ciru akaba rhukola rhugwerhe myaka minji rhuli rhwamukolera erhi rhube rhugwerhe mikolo minji yago-yago omw’ikubuliro lyage. (1 Sam. 15:22; 1 Pt. 2:16) Aba alonzize rhugendekere rhwarhumikira amakanuni gage g’olugenzi lwinja ciru akaba igulu ligendekire lyasherera.​—Ef. 6:11-13.

11. Bici rhwamakayiga kuhika aha? (Olole ecisanduku cidesire “ Amasomo Rhwakaciyigiriza Ene.”)

¹¹ Gurhigi rhwakaganirira kwa bofofi ebi rhwamayiga kuhika aha? Rhwabwine obulagirire bw’okumanya erhi kobinali Yehova anayemere enterekêro yirhu. Erhi akaba rhuli rhwajira kantu kalebe kakarhuma enterekêro yirhu erhayemerwa na Yehova, rhushinganine rhujire empindulo ho n’aho zakarhurhabala rhuyemerwe naye. (Maf. 2:5, 16; 3:3, 16) Cikone hali akandi kantu Yezu ayerekine omu myanzi abwiraga ebigamba. Kantu kahi ako?

12. Bici rhwakaciyigiriza kugerera ebi Yezu abwiraga bene wirhu b’omu cigamba c’e Simirna n’ec’e Filadelfiya? (Amafulûlo 2:10)

¹² Rhuganirirage emyanzi Yezu abwiraga ecigamba c’e Simirna n’ec’e Filadelfiya. Abwira Abakristu b’eyo munda oku barhayobohaga okulibuzibwa bulya bakahembirwe enyanya z’obwishwekerezi bwabo. (Osome Amafulûlo 2:10; 3:10) Isomo lici oko kwakarhuyigiriza ene? Rhushinganine rhumanye oku rhwanalibuzibwe, kunali kwa bulagirire bwenene rhucirheganye lyo rhuyish’ilembera oko kulibuzibwa. (Mt. 24:9, 13; 2 Kr. 12:10) Bulya gurhi kuli kwa bulagirire okukengera ntyo?

13-14. Bici byahikire abakozi ba Nnâmahanga enyanya z’ebiganirirwe omu citabu c’Amafululo cigabi ca 12?

¹³ Ecitabu c’Amafulûlo cirhuyeresire oku abakozi ba Nnâmahanga bakalibuzibwe muli zino nsiku nzinda, k’okuderha omu “lusiku lwa Nnawirhu.” Ecitabu c’Amafulûlo cigabi ca 12 ciyerekine oku ivita lyaba empingu enyuma z’okuburhwa kw’Obwami bwa Nnâmahanga. Mikayeli, k’okuderha Yezu Kristu oli omw’irenge na bamalahika bage balwisa Shetani n’abazimu. (Maf. 12:7, 8) Mw’er’ivita abashombanyi ba Nnâmahanga bahimwa bajugucirwa hanw’igulu, banalerhako amalibuko banagalerhera bene bantu. (Maf. 12:9, 12) Cikone bici byahikire abakozi ba Nnâmahanga?

¹⁴ Kandi, ecitabu c’Amafulûlo cirhubwizire gurhi Shetani ajijire. Arhakacihash’ija empingu, co cirhuma ajira obukunizi kuyerekera Abakristu bashîge amavurha bacisigire hanw’igulu bulya bo ba ambasadere b’Obwami bwa Nnâmahanga hanw’igulu, bajira omukolo g’okuhâna “obuhamirizi bwa Yezu.” (Maf. 12:17; 2 Kr. 5:20; Ef. 6:19, 20) Gurhi obo bulêbi bwahikiriremwo?

15. Bandi bashushanyizibwe n’“abahamirizi babiri” baganirirwe omu citabu c’Amafulûlo cigabi ca 11, na bici byabahikire?

 ¹⁵ Shetani ashumya abashombanyi ba Nnâmahanga lyo bahira ecirhero oku bene wirhu bashîge amavurha bakag’ilongoza omukolo gw’Obwami. Abal’iyimangire omukolo, bo bashushanyizibwe n’“abahamirizi babiri” bali nk’abanigagwa. * (Maf. 11:3, 7-11, Mashi Bible) Omu mwaka gwa 1918, bene wirhu munani bakag’ilongoza omukolo bashobekwa eby’obunywesi, na ngasi muguma wabo bamutwira olubanja lw’okuyusa myaka minji omu prizo. Bantu banji barhanya oku omukolo gw’abo bashîge amavurha ‘gwamanigwa’ erhi kuyimanzibwa.

16. Kantu kahi ka kusomeza kahikire omu mwaka gwa 1919, cikone bici Shetani agendekire ajira kurhondera ago mango?

¹⁶ Na kandi obulêbi buli omu citabu c’Amafulûlo cigabi ca 11, bwali erhi bwayerekine oku abo “bahamirizi babiri” bakagalulirwe obuzine enyuma za kasanzi kasungunu. Ly’obo bulêbi buhikirira kantu kalebe k’okusomeza kaba omu mwaka gwakulikiraga okushwekwa kwabo. Oku murhondero g’omwaka gwa 1919 abo bene wirhu bashîge amavurha bashwekulwa n’ebi babashobekagwa byakûlwa. Ho n’aho, abo bene wirhu bacib’igalukira omukolo gw’Obwami. Cikone Shetani arhalekaga okuhira abakozi ba Nnâmahanga kw’ecirhero. Kurhenga ago mango, Shetani ali alerhera abakozi ba Nnâmahanga “olwishi” lw’okulibuzanya. (Maf. 12:15) Kobinali, rhweshi rhushinganine ‘rhube ba kulembera na ba buyemere.’​—Maf. 13:10, NWT.

17. Ciru akaba Shetani anakahira abakozi ba Nnâmahanga kw’ecirhero, burhabale buci bahâbirwe ciru akaba barhal’ibulangalire?

¹⁷ Ecitabu c’Amafulûlo cigabi ca 12 ciyerekine oku abakozi ba Nnâmahanga bakahâbirwe oburhabale kugerera enjira barhal’ilangalire. Byabonekana nk’“igulu” lyamamirangusa “olwishi” lw’okulibuzanya. (Maf. 12:16) Ntyo ko byanabire. Hali amango bigabi bilebe by’igulu lya Shetani birhabala abakozi ba Nnâmahanga, kwa lwiganyo nka bigabi bilebe biyerekire okutwa emanja. Kanji-kanji, abakozi ba Nnâmahanga bayazize emanja, n’oko kwabalerhera oluhuma omu njira ndebe. Gurhi bakolesize olo luhuma? Bakolesize ngasi bulyo boshi bagwerhe lyo bajira omukolo Yehova  abahâga. (1 Kr. 16:9) Bici ogo mukolo guhiziremo?

18. Omukolo gwirhu gw’obulagirire bwenene rhujira muli zino nsiku nzinda guba guhi?

¹⁸ Yezu alebire oku abakozi bage bakayalizize “omwanzi mwinja g’Obwami [bwa Nnâmahanga]” omw’igulu lyoshi embere obuzinda buhike. (Mt. 24:14, NWT) Omu kujira ntyo, banahâbwe oburhabale bwa malahika, erhi cigusho ca bamalahika, oganirirwe oku adwirhe “omwanzi gw’akalembe gw’ensiku n’amango, mpu agubwire abantu b’igulu, na ngasi mulala, na ngasi bûko, na ngasi lulimi, na ngasi ishanja.”​—Maf. 14:6.

19. Gundi mwanzi guhi abazigira Yehova bashinganine bayalize?

¹⁹ Arhali mwanzi mwinja g’Obwami gone abakozi ba Nnâmahanga bashinganine bayalize. Kandi bashinganine balunge okuboko omukolo gwa bamalahika baganirirwe omu citabu c’Amafulûlo cigabi ca 8 kuhika ca 10. Abo bamalahika bali bayaliza amahanya gahikira abarhayemera Obwami bwa Nnâmahanga. Omu ntyo, Abahamirizi ba Yehova bali bayaliza omwanzi gw’olubanja gushushanyizibwe n’“olubula n’omuliro,” biyerekine emanja Nnâmahanga atwira ebigabi by’igulu lya Shetani. (Maf. 8:7, 13) Abantu bali omu bulagirire bw’okumanya oku obuzinda buli hofi lyo bajira empindulo zishinganine omu kalamo kabo, lyo bayish’iyokoka olusiku lw’obukunizi lwa Yehova. (Sof. 2:2, 3) Cikone bantu banji barhal’ibayemera ogo mwanzi. Rhushinganine rhube n’oburhwali lyo rhugendekera rhwayaliza ogo mwanzi. Omu kasanzi k’amalibuko madârhi, omwanzi muzinda g’olubanja rhwayish’iyaliza go gwayish’igayisa abantu bwenene.​—Maf. 16:21.

20. Bici rhwayish’iganirira omu bigabi bibirhi bikulikire?

²⁰ Kobinali rhushinganine rhurhumikire “ebinwa by’obu bulêbi” bulya rhuli rhwashangira okuhikiriza ebi rhusoma omu citabu c’Amafulûlo. (Maf. 1:3, NWT) Cikone, gurhi rhwakalembera n’obwishwekerezi okulibuzibwa n’okugendekera kwayaliza eyo myanzi n’oburhwali? Hali bintu bibirhi byakarhuha emisi: burhangiriza, ebi ecitabu c’Amafulûlo cidesire okubiyerekire abashombanyi ba Nnâmahanga, na bwa kabirhi, emigisho rhwayish’ihâbwa omu mango gayisha erhi rhwakagendekera rhwabêra bishwekerezi. Rhwayish’iganirira eyo myanzi omu bigabi bibirhi bikulikire.