1. Bici ecitabu c’Amafulûlo cidesire lugenda abakozi ba Nnâmahanga?

 ECITABU c’Amafulûlo ciyerekine oku Obwami bwa Nnâmahanga bwashimisirwe n’oku Shetani alibisirweko empingu. (Maf. 12:1-9) Oko kulibirhako Shetani kwalerha omurhûla omu mpingu, cikone kwarhulerhera mazibu manji. Bulya gurhi? Bulya Shetani agwerhe obukunizi oku bantu bali hanw’igulu bali bakolera Yehova n’obwishwekerezi.​—Maf. 12:12, 15, 17.

2. Bici byakarhurhabala lyo rhugendekera rhwabêra bishwekerezi kuli Nnâmahanga?

² Gurhi rhwakabêramwo bishwekerezi kuli Nnâmahanga ciru akaba Shetani ali arhuhirako ecirhero? (Maf. 13:10) Kantu kaguma kakarhurhabala kuli kumanya ebyaba omu mango gayisha. Kwa lwiganyo, omu citabu c’Amafulûlo entumwa Yowane eganirire migisho miguma na miguma rhwashagalukira hano hofi-hofi. Egarhi k’eyo migisho muli okuhererekezibwa kw’abashombanyi ba Nnâmahanga. Rhwarhang’iganirira ebi ecitabu c’Amafulûlo cidesire okubiyerekire abashombanyi ba Nnâmahanga n’ebyayish’ibahikira.

3. Bimanyiso bihi biguma na biguma bikolesibwe omu citabu c’Amafulûlo?

³ Omulongo murhanzi gw’ecitabu c’Amafulûlo gurhubwizire oku emyanzi rhuli rhwasoma yahânagwa omu njira “y’ebimanyiso,” k’okuderha, omu nderho z’olwiganyo. (Maf. 1:1, NWT) Abashombanyi ba Nnâmahanga baganirirwe omu njira y’olwiganyo. Omu milongo ekulikire rhwayish’ibona omubalè gw’ebiryanyi  bishushanyize abashombanyi ba Nnâmahanga. Kwa lwiganyo, “eciryanyi cayinamuka omu nyanja.” Cagwerhe “mahembe ikumi na marhwe nda.” (Maf. 13:1) Enyuma z’aho “ecindi ciryanyi carhenga omu idaho.” Eco ciryanyi cakag’iderha nka wankuba-joka “canamanula omuliro oku nkuba.” (Maf. 13:11-13) Buzinda rhwabona eciryanyi ciri lubero, “ciryanyi cidukula-cidukula,” omukazi ohusha bwenene al’icishonyireko. Ebyo biryanyi bisharhu bishushanyize abashombanyi ba Yehova Nnâmahanga bagwerhe nsiku nyinji bali bamuhagalika n’okuhagalika Obwami bwage. Co cirhumire kuli kwa bulagirire okubamanyirira.​—Maf. 17:1, 3.

4-5. Gurhi ebiganirirwe omu citabu ca Daniyeli 7:15-17 birhurhabire rhuhugûkwe ebi ebimanyiso bihugwîre?

⁴ Embere rhumanye abo bashombanyi ba Nnâmahanga bo bandi, rhushinganine rhurhang’ihugûkwa ebi ezo nderho z’olwiganyo zihugwîre. Enjira nyinja y’okubahugûkwa kuli kuleka Ebibliya ecihugûle yonene. Bimanyiso binji biri omu citabu c’Amafulûlo byarhanzir’ihugûlwa omu bindi bitabu by’Ebibliya. Kwa lwiganyo, omulêbi Daniyeli, alorha “nsimba [biryanyi] ini nnênene zafunûnuka omu nyanja.” (Dan. 7:1-3, Mashi Bible) Daniyeli arhubwizire bici ezo nsimba erhi biryanyi bishushanyize. Ebyo biryanyi binenene bishushanyize “bami,” erhi marhegesi ani. (Osome Daniyeli 7:15-17.) Ago mahugûlo garhurhabire rhuhugûkwe oku ebiryanyi biganirirwe omu citabu c’Amafulûlo nabyo bishinganine bibe erhi bishushanyize amarhegesi makulu g’epolitike.

⁵ Rhuganirirage bimanyiso biguma na biguma biyerekinwe omu citabu c’Amafulûlo. Omu kujira ntyo, rhwabona gurhi Ebibliya yakarhurhabala rhuhugûkwe ebi ebyo bimanyiso biba bihugwîre. Rhwarhang’iganirira ebyo biryanyi n’ebi bishushanyize. Enyuma z’aho, rhwabona bici byayish’ibihikira. Na buzinda rhwayish’ibona ebi ebyo byoshi bihugwîre kuli rhwe.

6. Bici eciryanyi cigwerhe marhwe nda ciganirirwe omu citabu c’Amafulûlo 13:1-4 cihugwîre?

⁶ Bici eciryanyi cigwerhe marhwe nda cishushanyize? (Osome Amafulûlo 13:1-4.) Rhubwine oku eco ciryanyi cal’ishushire engwi (lopard), cikone amagulu gali ga mpangaza (ours), n’akanwa k’entale (lion), canagwerhe mahembe ikumi. Ntyo kw’ebiryanyi bini biganirirwe omu citabu ca Danieyeli cigabi ca 7 nabyo byal’iyosire. Cikone, omu citabu c’Amafulûlo ebyo biyerekire ciryanyi ciguma, ci arhali biryanyi bini biberulukine. Eco ciryanyi cirhashushanyizi burhegesi buguma bone erhi bwami buguma bw’omw’igulu. Yowane adesire oku ciri nk’ecirhambwire “ngasi bûko, na ngasi mulala, na ngasi lulimi, na ngasi ishanja.” Co cirhumire cishinganine cibe cinene kulusha ngasi burhegesi boshi bw’ishanja. (Maf. 13:7) Eco ciryanyi, cishinganine cibe erhi cishushanyize amarhegesi goshi g’epolitike makulu gamakarhegeka bene bantu kuhika buno. *​—Muh. 8:9.

7. Bici ngasi irhwe ly’omu marhwe nda g’eciryanyi lishushanyize?

⁷ Bici ngasi irhwe ly’omu marhwe nda lishushanyize? Ishuzo liri omu citabu c’Amafulûlo cigabi ca 17, bulya ciganirire enshushano y’eciryanyi ciganirirwe omu citabu c’Amafulûlo cigabi ca 13. Omu citabu c’Amafulûlo 17:10, NWT, barhubwizire ntya: “Hali bami nda, barhanu bahirigisire, muguma ho aciri, n’owundi arhaciyisha; n’amango ayisha, kukwanine ashinge hisanzi hitya.” Egarhi k’amarhegesi g’epolitike gagwerhe obukulu Shetani amakakolesa, nda go gamanyikine nka “marhwe,” bulya gagwerhe bukulu bunji. Ago mami g’igulu, gahumire oku bakozi ba Nnâmahanga. Omu nsiku z’entumwa  Yowane, marhegesi arhanu egarhi k’ago gali erhi gamarhegeka. Galimo: Misri, Ashuru, Babiloni, Abamedi n’Abapersi, n’Obugiriki. Oburhegesi bwa kali ndarhu bukulu, k’okuderha, Roma, bwacikag’irhegeka erhi Yowane afulûlirwa aga mafulûlo. Irhwe lihi erhi burhegesi bukulu buhi bw’igulu bwakabire bwa kali nda na bwa buzinda?

8. Ndi oshushanyizibwe n’irhwe lya kali nda ly’eciryanyi?

⁸ Nk’oku rhwayish’ibona, obulêbi buli omu citabu ca Daniyeli bwarhurhabala rhuhugûkwe ebi irhwe lya kali nda na lizinda ly’eciryanyi lishushanyize. Burhegesi buhi bw’igulu bwakabire buli bwarhegeka omu kasanzi kazinda, erhi omu mango g’“olusiku lwa Nnawirhu”? (Maf. 1:10, NWT) Guli mulungano gw’e Grande-Bretagne na États-Unis d’Amérique, omu zindi nderho buli burhegesi Bukulu bw’Igulu bw’e Angeterre na Amérique. Kugerera oko, rhwanahash’ishwinja omu kuderha oku oburhegesi bw’e Angleterre na Amérique ly’irhwe lya kali nda ly’eciryanyi ciganirirwe omu citabu c’Amafulûlo 13:1-4.

9. Bici bishushanyizibwe n’eciryanyi cigwerhe “mahembe abiri gali nka ga mwana-buzi”?

⁹ Ecitabu c’Amafulûlo cigabi ca 13 cigendekire okurhubwira oku irhwe lya kali nda, k’okuderha, Oburhegesi Bukulu bw’omw’Igulu Lyoshi Angleterre na Amérique bunakakola nka ciryanyi cigwerhe “mahembe abiri gali nka ga mwana-buzi, erhi cinadwirhe caderha aka wankuba-joka.” Eco ciryanyi “cajira ebisômerine, . . . ciru calinda cimanula omuliro oku nkuba, gwarhogera ahanshi abantu bâsinza.” (Maf. 13:11-15) Ecitabu c’Amafulûlo cigabi ca 16 n’eca 19 ciganirire eco ciryanyi nka “mulêbi w’obwihambi.” (Maf. 16:13; 19:20, Mashi Bible) Daniyeli aganirire akantu kashushine n’ako erhi aderha oku, oburhegesi bukulu bw’igulu, k’okuderha, Angleterre na Amérique bwakabire bwa “kushêreza” bwenene. (Dan. 8:19, 23, 24, Mashi Bible) Ntyo ko byanabire amango g’Ivita lya Kabirhi ly’Igulu. Ebombe Atomike ibirhi zakolesibagwa omu kuyukiza er’ivita omu Pacifique zatulagwa n’abasomaga esiyanse b’e Angletere n’e Amérique. Omu ntyo, oburhegesi Bukulu bw’omw’Igulu Lyoshi, k’okuderha Angleterre na Amérique, bwahikira aha “bwamanula omuliro oku nkuba gwarhogera ahanshi.”

10. Bici “enshushano y’eciryanyi” eshushanyize? (Amafulûlo 13:14, 15; 17:3, 8, 11)

¹⁰ Rhukolaga rhwacib’ibona ecindi ciryanyi. Ciri nk’ecishushine n’eciryanyi cigwerhe marhwe nda, cikone cohe ciri cidukula-cidukula. Cinahamagalwe “nshushano y’eciryanyi” cinaganirirwe nka “mwami wa kali munani.” * (Osome Amafulûlo 13:14, 15; 17:3, 8, 11.) Yowane abwine oku oyo “mwami” ahabire, enyuma z’aho arhacibagaho, na buzinda acib’ihaba. Oko kuganirire bwinja Ecinyabuguma c’Amashanja, cigendekeza ecigabi c’er’igulu ciyerekire eby’epolitike! Embere cal’imanyikine nka Sociéte de Nations. Amango g’Ivita lya Kabirhi ly’Igulu, cirhacibagaho, buzinda cacibiyisha omw’izino cimanyikinemo ene, k’okuderha, Ecinyabuguma c’Amashanja.

11. Bici ebiryanyi by’epolitike biri byashumya abantu bajire na bulya gurhi rhurhashinganini rhubiyobohe?

¹¹ Kugerera epropaganda zabo, ebiryanyi by’epolitike erhi marhegesi, ganakashumya abantu bahagalike Yehova n’abakozi bage. Yowane adesire oku, ko kuli nka bashubuzize ngasi “mwami w’en’igulu lyoshi” lyo baja okw’ivita lya Armagedoni “lusiku lukulu lwa Nyamuzinda” Ogala Byoshi. (Maf. 16:13, 14, 16) Cikone rhurhayobohaga akantu koshi-koshi. Nnâmahanga wirhu Yehova ayish’iyokola ho n’aho bala boshi bali balunga okuboko oburhegesi bwage.​—Eze. 38:21-23.

12. Bici byayish’ihikira ebiryanyi byoshi?

¹² Bici byayish’ihikira ebyo biryanyi byoshi? Ecitabu c’Amafulûlo 19:20, Mashi Bible, cishuzize ntya: ‘Erya nsimba [ciryanyi] yahirwa omu mugozi  boshi n’olya mulêbi w’obwihambi, ye wanakag’ijira ebirhangaza emalanga gayo. Ebyo birhangaza byo arhebaga mwo balya bâli bamâhebwa kw’ecimanyiso c’erya nsimba n’okuharamya ensalamu yayo. Eyo nsimba n’oyo mulêbi w’obwihambi, bakwebwa omu nyanja y’omuliro gutwanyirwe n’ecibiriti erhi banazine.’ K’okuderha oku, abo bashombanyi ba Nnâmahanga bayish’isherezibwa loshi-loshi omu kasanzi bayish’iba bacir’ibarhegeka.

13. Mazibu gahi maguvernema maguma na maguma gali galerhera Abakristu?

¹³ Bici ebi bihugwîre kuli rhwe? Rhuli Bakristu rhushinganine rhugendekere rhwabêra bishwekerezi kuli Nnâmahanga n’Obwami bwage. (Yn. 18:36) Lyo rhujira ntyo, rhurhashinganini rhukalunga okuboko oluhande loshi-loshi omu by’epolitike by’er’igulu. Cikone, oko kurhalunga okuboko oluhande loshi-loshi omu by’epolitike by’er’igulu kwanaba kuzibu bulya amaguvernema g’er’igulu ganakalonza rhugalunge okuboko loshi-loshi omu bijiro n’omu nderho. Abayemera okulunga okuboko amarhegesi g’er’igulu, banahîrweko ecimanyiso c’eciryanyi. (Maf. 13:16, 17) Cikone, ngasi yeshi oyemera eco cimanyiso arhaciyemerwa na Yehova ananaheze obulyo bw’okuyish’ilama ensiku n’amango. (Maf. 14:9, 10; 20:4) Kuli kwa bulagirire bwenene kuli ngasi muguma wirhu okurhalunga okuboko oluhande loshi-loshi omu by’epolitike, ciru akaba rhuli rhwasezibwa okujira ntyo!

14. Nk’oku biyerekinwe omu citabu c’Amafulûlo 17:3-5, kandi kantu kahi k’okusomeza entumwa Yowane yacibir’ibona?

¹⁴ Entumwa Yowane yayerekana oku ‘yasomerwa’ enyanya z’akandi kantu yabonaga. Bici ebyo abonaga? Mukazi wal’ishonyire oku ciguma c’ebyo biryanyi bikali bwenene. (Maf. 17:1, 2, 6) Aganirirwe nka “mukazi ohusha bwenene” na kandi anahamagalwe “Babiloni mukulu.” Anajire ‘obuhushi’ haguma n’“abami b’igulu.”​—Osome Amafulûlo 17:3-5.

15-16. “Babiloni mukulu” ye ndi, na gurhi rhumanyiremwo ntyo?

¹⁵ “Babiloni mukulu” ye ndi? Oyo mukazi arhakashushanyizibwa n’ecinyabuguma c’epolitike bulya aganirirwe nk’oli wajira obuhushi haguma n’ebirongozi by’epolitike by’er’igulu. (Maf. 18:9) N’okushona kw’eco ciryanyi c’olwiganyo, kuyerekine oku ali alonza okubarhegeka. Na kandi, arhakashushanyizibwa n’ecigabi c’er’igulu lya Shetani ciyerekire eby’abarhunzi balonza okuba na bintu binji. Abo baba baganirirwe omu njira eberulukine omu citabu c’Amafulûlo, banahamagirwe “barhunzi b’igulu.”​—Maf. 18:11, 15, 16.

¹⁶ Omu Mandiko, oluderho “muhushi” lwanaganirira abantu bali bacikunga oku bali baharamya Nnâmahanga, cikone banacihire omu bintu biguma na biguma by’okuharamya ensanamu, erhi omu bintu biyerekine oku bali bîra b’igulu. (1 Nga. 5:25; Yk. 4:4) Lubero n’oko, abantu baharamya Yehova n’obwishwekerezi baganirirwe nka ba “bikira.” (2 Kr. 11:2; Maf. 14:4, NWT) Babiloni wa mîra ye wali cisisi c’enterekêro y’obunywesi. Co cirhumire, Babiloni Mukulu ashinganine abe ashushanyizibwe n’amadîni goshi g’obunywesi. Kobinali, Babiloni Mukulu co cisisi c’idîni ly’obunywesi ly’omw’igulu lyoshi.​—Maf. 17:5, 18; olole omwanzi guli omu jw.org gudesire “Babiloni Mukulu Ye Ndi?”

17. Bici byayish’ihikira Babiloni Mukulu?

¹⁷ Bici byayish’ihikira Babiloni Mukulu? Ecitabu c’Amafulûlo 17:16, 17 cishuzize kw’er’idoso ntya: “Amahembe ikumi wabonaga na cirya ciryanyi, bikolaga byashomba nyamukazi namuhushà, bimutûngôle, bimusige mushugunu, birye enyama zage binamuyôkere oku cîko. Bulya Nyamuzinda ahebire omu mirhima yabyo emihigo y’okujira obulonza bwage.” Kobinali, Yehova ayish’ishumya amashanja gakolese eciryanyi  cidukula-cidukula, k’okuderha, Ecinyabuguma c’Amashanja lyo bahira ecirhero oku madîni goshi gʼobunywesi nʼokugashereza loshi-loshi.​—Maf. 18:21-24.

18. Gurhi rhwakamanyamwo oku rhurhali rhwalunga Babiloni Mukulu okuboko omu njira yoshi-yoshi?

¹⁸ Bici ebyo bihugwîre kuli rhwe? Rhushinganine rhugendekere rhwalunga okuboko “idini licîre lirhanalikwo ibala [izabyo] omu masu ga Larha Nyamuzinda.” (Yk. 1:27) Rhurhakalonza ciru n’ehitya enyigirizo z’obunywesi, amadinye g’ecipagani, olugenzi lw’eby’enshonyi, n’ebijiro by’obukurungu bya Babiloni Mukulu bikarhushumya! Rhunalonzize rhugendekere rhwabwira abandi bantu oku ‘barhenge muli ye,’ lyo Nnâmahanga arhagiyish’ibahanira haguma.​—Maf. 18:4.

19. ‘Enkuba-joka nnênênè eshushire isêsè’ ye ndi?

¹⁹ Kandi ecitabu c’Amafulûlo cishubir’iganirira ‘enkuba-joka nnênênè eshushire isêsè.’ (Maf. 12:3) Eyo nkuba-joka yalilwisize Yezu na bamalahika bage. (Maf. 12:7-9) Eri yahira abakozi ba Nnâmahanga kw’ecirhero, enali yaha ebiryanyi by’epolitike obukulu. (Maf. 12:17; 13:4) Eyo nkuba-joka ye ndi? Y’olya “mujoka wa mira, [ohamagalwa, NWT] Shetani.” (Maf. 12:9; 20:2) Y’erhegeka abashombanyi boshi ba Yehova.

20. Bici byayish’ihikira enkuba-joka?

²⁰ Bici byayish’ihikira enkuba-joka? Ecitabu c’Amafulûlo 20:1-3 cihugwîre oku malahika ayish’ikweba Shetani omu abiso, eabiso eshushanyize eprizo arhakacirhengamo. Ako kasanzi Shetani ayish’iba ali omu abiso ly’‘arhak’ihabula kandi embaga kuhika erya myaka cihumbi ebe yamâhwa.’ Buzinda bw’aho, Shetani n’abazimu bage bayish’isherezibwa liguma lya loshi, oko kushushanyizibwe n’okubakweba omu “nyanja y’omuliro n’ecibiriti.” (Maf. 20:10, Mashi Bible) Obone omu bwenge bwawe gurhi igulu lirhacirimo Shetani n’abazimu bage lyayish’iyorha. Ako kayishiba kasanzi kinja bwenene!

21. Bulya gurhi rhwanashagalukira ebi rhwasomire omu citabu c’Amafulûlo?

²¹ Rhuhîrwe omurhima bwenene okuhugûkwa amahugûlo g’ebyo bimanyiso biganirirwe omu citabu c’Amafulûlo! Arhali bashombanyi ba Nnâmahanga bone rhwayizire, cikone kandi rhwabwine ebyayish’ibahikira. Kobinali, “ow’obushagaluke ali ola oli wasoma n’izu na balya bayumvirhiza ebinwa by’obu bulêbi”! (Maf. 1:3, NWT) Cikone, enyuma z’okusherezibwa kw’abashombanyi ba Nnâmahanga, migisho ehi bene bantu bishwekerezi bayish’ishagalukira? Rhwayish’iganirira eyo myanzi omu cigabi cizinda c’ebi bigabi biyerekire ecitabu c’Amafulûlo.