1. Muhigo guhi gw’obulagirire abantu boshi bashinganine barhôle?

 ABANTU bagwerhe omuhigo gw’obulagirire gw’okurhôla ene. Bashinganine bahige erhi bacishoga Yehova Nnâmahanga nka murhegesi w’amalunga n’igulu, nisi erhi baja eluhande lw’omushombanyi wage nkununu, k’okuderha, Shetani Ibilisi. Ngasi muguma ashinganine acishoge oluhande aja, bulya birhakahashikana okulunga abo bantu bombi okuboko caligumiza. Omuhigo bakarhôla, go gwakayerekana erhi bayish’ilama ensiku n’amango erhi nanga. (Mt. 25:31-33, 46) Omu kasanzi k’“amalibuko madârhi,” bayish’ihirwako ecimanyiso c’okucunguka erhi kusherezibwa.​—Maf. 7:14; 14:9-11; Eze. 9:4, 6.

2. (a) Bici olwandiko lw’Abahabraniya 10:35-39 lurhuhîre omurhima rhujire? (b) Gurhi ecitabu c’Amafulûlo cakarhurhabalamwo?

² Osome Abahabraniya 10:35-39. Erhi akaba wacishozire okulunga oburhegesi bwa Yehova okuboko, warhôzire omuhigo gw’obwenge. Byanahashikana erhi ogwerhe irala ly’okurhabala abandi nabo barhôle omuhigo mwinja. Ly’obarhabala, wanakolesa emyanzi eri omu citabu c’Amafulûlo. Eco citabu cihugwîre ebyayish’ihikira abahagalika Yehova, cikone kandi cisegize emigisho abalunga oburhegesi bwage okuboko n’obwishwekerezi bayish’iba nayo. Rhunajire bwinja erhi rhuciyigiriza oko okuli kw’obulagirire. Okujira ntyo, kunazibuhye omuhigo gwirhu gw’okugendekera rhwakolera Yehova. Na kandi rhwanarhabala abandi barhôle omuhigo gw’okukolera Yehova n’okugendekera bajira ntyo.

3. Bici rhwaganirira mw’eci cigabi?

³ Mw’eci cigabi, rhwaganirira aga madoso: Bici byayish’ihikira abali balunga okuboko oburhegesi bwa Nnâmahanga? Bici byayish’ihikira abacishoga okulunga okuboko eciryanyi cidukula-cidukula ciganirirwe omu citabu c’Amafulûlo?

4. Cigusho ca bantu bahi entumwa Yowane yabwine bali haguma na Yezu omu mpingu?

⁴ Omu cibonekerezi, entumwa Yowane yabwine bigusho bibirhi by’abantu bali balunga okuboko oburhegesi bwa Yehova, banahâbwa emigisho y’obuzine bw’ensiku n’amango. Omubalè gw’ecigusho cirhanzi bali bantu 144 000. (Maf. 7:4) Bakulagwa omw’igulu, lyo bagend’ijira oburhegesi erhi Bwami haguma na Yezu omu mpingu. Barhegeka igulu haguma na Yezu. (Maf. 5:9, 10; 14:3, 4) Omu cibonekerezi, Yowane ababona bayimanzire haguma na Yezu omu mpingu oku Ntondo Siyoni.​—Maf. 14:1.

5. Bici byahikira hano hofi-hofi abashîge amavurha bacisigire b’omu 144 000?

⁵ Kurhangira omu mango g’entumwa kuhika buno, ebihumbi by’abantu biri byacishogwa lyo baba baguma b’omu 144 000. (Lk. 12:32; Rm. 8:17) Cikone Yowane adesire oku omubalè gw’abashîge amavurha bacisigire hanw’igulu gwakabire musungunu bwenene omu nsiku nzinda. Abo bashîge amavurha “basigire” bayish’ihirwako “ecimanyiso” cizinda c’okuyemerwa na Yehova, embere amalibuko madârhi garhondere. (Maf. 7:2, 3; 12:17) Buzinda, omu kasanzi k’amalibuko madârhi, abashîge amavurha bacisigire hanw’igulu, bayish’ihêkwa empingu lyo bacilunga haguma n’ababo bʼomu 144 000, bafâga banali bishwekerezi. Eyo munda empingu, bayish’iba bami haguma na Yezu omu Bwami bwa Nnâmahanga.​—Mt. 24:31; Maf. 5:9, 10.

6-7. (a) Cindi cigusho cihi Yowane abwine, na bici rhuciyigirizize lugenda abali mw’eco cigusho? (b) Bulya gurhi abashîge amavurha bacisigire hanw’igulu n’“ehitû hy’abantu” banashagalukira ebiri omu citabu c’Amafulûlo cigabi ca 7?

⁶ Enyuma z’okubona ecigusho c’abayish’ija empingu, Yowane abona “ehitû hy’abantu.” Lubero na balya 144 000, omubalè gw’ehyo hitû hy’abantu gohe gurhankaganjwa. (Maf. 7:9, 10) Bici rhuciyigirizize kuli oko? Yowane adesire ntya: “Abo bo balya bazind’irhenga omu malibuko madârhi; bashusire emyambalo yabo banayiyeruhiza omu muko gw’Omwana-buzi.” (Maf. 7:14) Enyuma z’okuyokoka amalibuko madârhi, ehyo “hitû hy’abantu” bayish’ilama hanw’igulu, n’okushagalukira migisho minji minja.​—Enna. 37:9-11, 27-29; Mig. 2:21, 22; Maf. 7:16, 17.

⁷ Rhube rhuli omu bishogwa b’okuyish’ilama empingu erhi hanw’igulu, ka rhunacibone oku rhwayish’iba aha kuhikirizibwa kw’ebi rhusomire omu citabu c’Amafulûlo cigabi ca 7? Rhushinganine rhukacibona ntyo, bulya kayish’iba kasanzi kinja kuli ebyo bigusho byombi by’abakozi ba Nnâmahanga! Rhwayish’ishagaluka okubona rhwalunzire okuboko oburhegesi bwa Yehova. Bindi bici ecitabu c’Amafulûlo cirhubwizire okubiyerekire amalibuko madârhi?​—Mt. 24:21.

8. Gurhi amalibuko madârhi gayish’irhondera, na gurhi bantu banji bayish’ijira?

⁸ Nk’oku rhwabonaga omu cigabi c’embere, hano hofi-hofi, ebigabi by’epolitike by’er’igulu, byashomba Babiloni Mukulu, madîni goshi gʼobunywesi. (Maf. 17:16, 17) Eco cijiro co cayish’iba murhondero gw’amalibuko madârhi. Cikone, k’oko kwayish’ishumya bantu banji bahige okukolera Yehova? Nanga. Lubero n’oko, ecitabu c’Amafulûlo cigabi ca 6 ciyerekine oku muli ako kasanzi kazibu, abantu barhali bakolera Yehova, bayish’ikalongeza obulanzi omu bigabi by’er’igulu biyerekire epolitike n’eby’oburhunzi, bishushanyizibwe n’entondo. Okubona abo bantu barhayish’ije eluhande lw’Obwami bwa Nnâmahanga, Yehova ayish’ibabona nka bashombanyi bage erhi bakumuhagalika.​—Lk. 11:23; Maf. 6:15-17.

9. Gurhi abakozi ba Nnâmahanga bayish’ibamwo lubero n’abandi bantu omu kasanzi k’amalibuko madârhi, na bici oko kwayish’ilerha?

 ⁹ Kobinali, abakozi bishwekerezi ba Yehova bayish’ibonekana bali lubero muli ako kasanzi k’amalibuko madârhi. Bone bayish’iba cigusho c’abantu bali bakolera Yehova Nnâmahanga hanw’igulu, n’okulahira okulunga okuboko “eciryanyi.” (Maf. 13:14-17) Okubona bayish’igendekera babêra bishwekerezi kuli Yehova, abamuhagalika bayish’igaya bwenene. Oko kwayish’irhuma omulungano gw’amashanja gwayish’ihîra abakozi ba Nnâmahanga b’omw’igulu lyoshi kw’ecirhero. Eco cirhero bayish’ihîra kw’abakozi ba Nnâmahanga co Ebibliya eba ehamagire cirhero ca Gogu wa Magogu.​—Eze. 38:14-16.

10. Nk’oku biyerekinwe omu Amafulûlo 19:19-21, gurhi Yehova ayish’ijira hano bahira abakozi bage kw’ecirhero?

¹⁰ Gurhi Yehova ayish’ijira ago mango bahira abakozi bage kw’ecirhero? Arhubwizire ntya: “Oburhe bwananyisha emalanga.” (Eze. 38:18, 21-23) Ecitabu c’Amafulûlo cigabi ca 19, ciganirire ebyayish’iba enyuma z’aho. Yehova anarhume Omugala ly’alanga abakozi bage n’okubulabuza abashombanyi bage. Yezu ayish’iba ali haguma n’“emirhwe y’abalwi b’omu malunga,” k’okuderha, bamalahika bishwekerezi na balya 144 000. (Maf. 17:14; 19:11-15) Gurhi er’ivita lyanahwe? Okuhererekezibwa kw’abantu boshi na ngasi ikubuliro lyoshi lihagalika Yehova!​—Osome Amafulûlo 19:19-21.

11. Kantu kahi kago-kago kaganirirwe omu citabu c’Amafulûlo?

¹¹ Ocihangane okubona omu bwenge bwawe, gurhi abakozi bishwekerezi ba Nnâmahanga bayish’iciyumva hano babona oku Nnâmahanga ashereza abashombanyi bage! Kobinali ako kayish’iba kasanzi ka kushagalusa bwenene! Ciru akaba hayish’iba mwishingo munji omu mpingu amango Babiloni Mukulu asherezibwa, hali akandi kantu kayish’ilerha mwishingo munji. (Maf. 19:1-3) “Obuhya bw’Omwana-buzi,” ko kantu k’okushagalusa bwenene kaganirirwe omu citabu c’Amafulûlo​—Maf. 19:6-9.

12. Nk’oku biyerekinwe omu Amafulûlo 21:1, 2, mangaci obuhya bw’Omwana-buzi bwajirwa?

¹² Mangaci obo buhya bwajirwa? Balya 144 000, bayish’iba bakola bali omu mpingu embere ivita lya Armagedoni lirhondere. Cikone, arhali ago mango g’obuhya bw’Omwana-buzi bwayish’ijirwa. (Osome Amafulûlo 21:1, 2.) Obuhya bw’Omwana-buzi bwanajirwe enyuma z’ivita lya Armagedoni n’enyuma z’okuhererekezibwa kw’abashombanyi ba Nnâmahanga boshi.​—Enna. 45:3, 4, 13-17.

13. Bici obuhya bw’Omwana-buzi buhugwîre kuli balya banabujemo?

¹³ Bici obuhya bw’Omwana-buzi buhugwîre kuli balya banabujemo? Nka kula obuhya buhumanya haguma omulume n’omukazi, ko n’obo buhya bw’olwiganyo bwanahumanye haguma Omwami, Yezu Kristu, haguma n’“omuhya” wage, balya 144 000. Obola buhya bo bwayish’iba idinye liyerekine okurhondezibwa kw’oburhegesi buhyahya bwanarhegeke igulu myaka 1 000.​—Maf. 20:6.

14-15. Bici ecitabu c’Amafulûlo cigabi ca 21 cishushanyize na balya 144 000? (Olole enfoto eri oku cijalada c’eyi gazeti.)

¹⁴ Kandi ecitabu c’Amafulûlo cigabi ca 21 cishushanyize balya 144 000, n’olugo lwinja bwenene, luhamagirwe “Yeruzalemu muhyahya.” (Maf. 21:2, 9) Omusingi gw’olo lugo gwal’ijijirwe na mabuye 12 bal’iyandisireko “amazîno ikumi n’abiri g’entumwa ikumi n’ibiri z’Omwana-buzi.” Bulya gurhi oko kwashagalusize Yowane? Bulya abwine izîno lyage liri liyandike kuli ago mabuye. Olo luli lukengwa lunene bwenene!​—Maf. 21:10-14; Ef. 2:20.

 ¹⁵ Olo lugo, nta lundi loshi-loshi luba lushushine nalo. Ibarabara lyalo liba lijijirwe n’enoro ecîre, enyumvi zalo ziba zijijirwe n’amasholo, ebibambazi byalo n’emisingi yalo eba mipambe n’amabuye g’engulo ndârhi, haguma n’ebipimo by’okupima ebiyumanine bwinja. (Maf. 21:15-21) Cikone, Yowane abona nka hali akantu kal’ibuzire! Acibir’irhubwira ntya: “Ntabonaga muli ehekalu, bulya Yehova Nnâmahanga Ogala Byoshi ye hekalu yalo, haguma n’Omwana-buzi. Na kandi olo lugo lurhagwerhe obulagirire bw’izuba nisi erhi bw’omwezi lyo bilumolekera, bulya irenge lya Nyamuzinda bo bulangashane bwalo, n’Omwana-buzi ko kamole kalo.” (Maf. 21:22, 23, NWT) Balya baba cigabi ca Yeruzalemu Muhyahya, bayish’iba n’obulyo bw’okukabona Yehova. (Hb. 7:27; Maf. 22:3, 4) Omu ntyo, Yehova na Yezu yo hekalu y’olo lugo.

16. Bici byayish’ihikira bene bantu omu kasanzi k’Emyaka Cihumbi y’Oburhegesi bw’Obwami bwa Nnâmahanga?

¹⁶ Abashîge amavurha banashagalukire bwenene okurhanya okubiyerekire olo lugo. Cikone abajira obulangalire bw’okulama hanw’igulu nabo bagwerhe ecirhumire cinja c’okulushagalukira. Omu kasanzi k’Emyaka Cihumbi y’Oburhegesi bw’Obwami bwa Nnâmahanga, Yeruzalemu Muhyahya ayish’ilerha migisho minji erhankaganjwa okw’igulu. Yowane abona eyo migisho eri yahulula nka “lwishi lulimwo amishi g’obuzîne.” Eburhambi n’obundi bw’olo lwishi yali “emirhi y’obuzîne” yakag’irhengako ebyasi “byakukaz’ibuka abapagani [abantu b’amashanja, NWT].” (Maf. 22:1, 2) Abantu boshi bayish’iba balamire bayish’iba n’obulyo bw’okushagalukira ebintu binja. Bene bantu boshi barhumikira Yehova, bayish’ihikira aha baba bimana. Harhakaciba ndwala, amalumwa, n’endûlû.​—Maf. 21:3-5.

17. Nk’oku olwandiko lw’Amafulûlo 20:11-13 luyerekine, bandi bayish’iyunguka kugerera Oburhegesi bw’Emyaka Cihumbi?

¹⁷ Bandi bayish’ishagalukira ebyo bintu binja? Burhangiriza, hiri hitû hy’abantu bayish’icunguka ivita lya Armagedoni n’abana bayish’iburhwa omw’igulu lihyahya. Cikone kandi ecitabu c’Amafulûlo cigabi ca 20, cilaganyize oku abafîre bayish’ifûka. (Osome Amafulûlo 20:11-13.) “Abashinganyanya” bafîre n’“abarhali bashinganyanya” barhabaga n’obulyo bw’okuyiga okubiyerekire Yehova, bayish’igalulirwa obuzîne hanw’igulu. (Ebj. 24:15, NWT; Yn. 5:28, 29) Ka k’okuderha oku ngasi muntu wafîre ayish’ifûka omu kasanzi k’Oburhegesi  bw’Emyaka Cihumbi? Nanga. Abalahire n’obulonza okukolesa obulyo bagwerhe bw’okukolera Yehova embere bafê barhakafûka. Bagwerhe oluhya lw’okukolera Yehova banayerekana oku barhalonzizi okulama omu Paradizo hanw’igulu.​—Mt. 25:46; 2 Ts. 1:9; Maf. 17:8; 20:15.

18. Gurhi byayish’iba hanw’igulu oku buzinda bw’emyaka 1 000?

¹⁸ Oku buzinda bw’emyaka 1 000, abantu boshi bayish’iba balamire hanw’igulu, bayish’iba erhi bajijirwe bimana. Nta muntu wanacihikirwe n’amazibu galerhagwa n’ecaha ca Adamu rhwayimagamo. (Rm. 5:12) Amazibu galerhagwa n’ecaha ca Adamu, goshi gayish’iba erhi gamahwa. Oku buzinda bw’emyaka 1 000, abayish’iba bali hanw’igulu, bayish’igalulirwa “obuzine” nka bene bantu bimana.​—Maf. 20:5, NWT.

19. Bulya gurhi hali obulagirire bw’irhangulo lizinda?

¹⁹ Rhumanyire oku Yezu ahimire enshumi za Shetani z’okulonza oku aleke obwishwekerezi bwage. Abêzire mwishwekerezi ciru n’omu kasanzi k’amarhangulo. Cikone, ka bene bantu bimana boshi bayish’iba babidu okubêra bishwekerezi hano Shetani ahâbwa obulyo bw’okubahira omu marhangulo? Ngasi muguma wirhu ayish’iba n’obulyo by’okushuza kw’er’idoso hano Shetani akûlwa omu abiso oku buzinda bw’emyaka 1 000. (Maf. 20:7) Abayish’iyerekana obwishwekerezi omu kasanzi k’ago marhangulo mazinda, bayish’ihâbwa obuzîne bw’ensiku n’amango na buzinda banahâbwe oluhuma lw’okunali. (Rm. 8:21) Abayish’igoma, bayish’isherezibwa emyaka n’emyaka haguma na Shetani n’abazimu bage.​—Maf. 20:8-10.

20. Gurhi ociyumvirhe lugenda obulebi bw’okushagalusa buli omu citabu c’Amafulûlo?

²⁰ Gurhi ociyumvirhe enyuma z’okuganirira kwa bofofi ebiba omu citabu c’Amafulûlo? K’orhashagalusiri okubona olamire omu kasanzi k’obu bulêbi? K’oko kurhakushumizi olalike abandi bacilunge haguma na nirhu omu nterekêro ecîre rhuha Nnâmahanga wirhu? (Maf. 22:17) Okubona obwenge n’emirhima yirhu bishagalusire bwenene enyanya z’ebyaba omu mango gayisha, oko kurhushumize rhuderhe nk’oku entumwa Yowane yaderhaga. Aderha ntya: “Neci mâshi! Oyishe, Yagirwa Yezu!”​—Maf. 22:20.