1-2. Ohugûle gurhi amakanuni g’Ebibliya gahikira aha gaba ga bulagirire bwenene erhi akanga kirhu kakashanja.

 ERHI omulume n’omukazi Bakristu baja omu buhya, kanji-kanji banakayumvirhiza ehotuba eyimangire oku Bibliya ejirwa n’omugula w’ecigamba eganirira ebintu biyerekire obuhya. Amakanuni gaganirirwa mw’eyo hotuba garhaba mahyahya kulibo. Cikone olo lusiku ago makanuni ganabe ga bulagirire bwenene kulibo. Bulya gurhi? Bulya bayish’igakolesa omu kalamo kabo k’obuhya.

² Ntyo ko binaba erhi omulume n’omukazi Bakristu bahikira aha baba babusi. Omu myaka minji, nkaba banaba erhi bayumvirhizize hotuba nyinji ziganirire okubiyerekire okulera abana. Cikone amango bakola babusi ago makanuni ganaba ga bulagirire bwenene kulibo. Bakola baba n’owabo mwana balera bone. Ogo gurhali mukolo mulembu! Kobinali, erhi ebintu bishanja omu kalamo kirhu, makanuni maguma na maguma g’Ebibliya ganabe ga bulagirire bwenene kuli rhwe. Eco co cirhuma abakozi ba Yehova basoma Amandiko, n’okugarhanyako “ensiku z’akalamo [kabo] zoshi,” nk’oku abami Bayisraheli bal’ibwizirwe.​—Lush. 17:19.

3. Bici rhwaganirira mw’eci cigabi?

³ Mwe babusi, mugwerhe olukengwa lunene bwenene Omukristu akaba nalo, k’okuderha, okuyigiriza abana binyu okubiyerekire Yehova. Cikone mushinganine mujire binji ahanyuma n’okubwira abana binyu kone myanzi milebe eyerekire Nnâmahanga. Mulonzize murhabale abana binyu bazigire Yehova bwenene. Bici mwakajira lyo muyigiriza abana binyu okuzigira Yehova? Mw’eci cigabi, rhwaganirira makanuni ani g’Ebibliya gakarhabala ababusi. (2 Tm. 3:16) Na kandi, rhwayish’ibona  obunguke babusi baguma na baguma Bakristu babire nabo omu kukolesa amahano g’Ebibliya.

4. Kanuni kahi k’Ebibliya kakarhabala ababusi bayigirize abana babo okuzigira Yehova? (Yakobo 1:5)

⁴ Akanuni ka 1: Mukalongereza obulongozi bwa Yehova. Mukahûna Yehova amuhe obwenge mulagirireko lyo murhabala abana binyu bamuzigire. (Osome Yakobo 1:5.) Yene Muntu oshinganine okuhâna amahano. Hali bintu binji byakarhuma rhwaderha ntyo. Rhuganirire bibirhi bya mulibyo. Burhangiriza, ye nka mubusi aba ahugûsirwe binji bwenene. (Enna. 36:9) Na bwa kabirhi, amahano g’obwenge ahâna ganalerhe obunguke ensiku zoshi.​—Iz. 48:17.

5. (a) Bici ikubuliro lya Yehova lyajijire lyo lirhabala ababusi? (b) Nk’oku biyerekinwe muli eyo video, bici muciyigirizize kugerera oku Mwene wirhu na Mwali wirhu Amorim baleraga abana babo?

⁵ Kugerera Akanwa kage n’ikubuliro lyage, Yehova anahâne biryo binji by’ekiroho biyimangire oku Bibliya byakarhabala ababusi balere abana babo banabayigirize okuzigira Yehova. (Mt. 24:45) Kwa lwiganyo, mwanabona amahano mwakakolesa omu cigabi cidesire “Oburhabale oku Mulala,” ciri oku site yirhu y’e Enternete, embere eco cigabi cakag’icapwa omu gazeti Amuka!. Na kandi, oku jw.org kunaje mavideo manji g’enganiro haguma n’abantu n’emicezo yakarhabala ababusi bakolese amahano ga Yehova amango bali balera abana babo. *​—Mig. 2:4-6.

6. Gurhi mulume muguma na mukage baciyumva okubiyerekire obulongozi bahâbwa kugerera ikubuliro lya Yehova?

⁶ Babusi banji bayerekine oku bavuzire omunkwa enyanya z’oburhabale Yehova ahânyire kugerera ikubuliro lyage. Ishe wa mulala muguma ohamagalwa Joe, adesire ntya: “Okulerera bana basharhu omu okuli kurhaba kulembu. Nie na mukanie rhunakashenga Yehova ly’arhurhabala. Kanji-kanji rhwakag’ibona oku ecigabi erhi video ndebe, yayishire omu kasanzi kashinganine ly’erhurhabala okulwisa akanga rhulimo. Ngasi mango rhwakag’ilongereza obulongozi bwa Yehova.” Joe na mukage babwine oku ebyo bigabi n’ago mavideo byarhabire abana babo bayegere Yehova.

7. Bulya gurhi kuli kwa bulagirire ababusi bajire okwabo koshi lyo bayeresa abana babo olwiganyo lwinja? (Abaroma 2:21)

 ⁷ Akanuni ka 2: Oyigirize abana bawe kugerera olwiganyo lwawe. Abana banakalabiriza bwenene ababusi babo na kanji-kanji banabayige. Kobinali, nta mubusi oba mwimana. (Rm. 3:23) Ciru akaba ntyo, ababusi benge banajire okwabo koshi lyo bayeresa abana babo olwiganyo lwinja. (Osome Abaroma 2:21.) Omu kuganirira okubiyerekire abana, ishe wa mulala muguma adesire ntya: “Abana ko bayorha nka shifo bahira omu mishi, buzinda eyonke ago mishi goshi gabe gacîre erhi gazinzire.” Ayushwire ntya: “Banarhubwire erhi rhujira ebintu biri lubero n’ebi rhubayigiriza.” Co cirhumire erhi akaba rhulonzize abana birhu bazigire Yehova, rhwene rhushinganine rhurhang’iyerekana oku rhugwerhe obuzigire busêzire kuli ye.

8-9. Bici waciyigirizize kugerera ebi Andrew na Emma badesire?

⁸ Hali njira nyinji ababusi bakayigirizamwo abana babo okuzigira Yehova. Olole ebi mwene wirhu muguma ogwerhe myaka 17 ohamagalwa Andrew adesire. Adesire ntya: “Ensiku zoshi ababusi bani bakag’isegeza obulagirire bw’isala. Ngasi budufu, Larha akag’isalira haguma na nani ciru akaba nali erhi nasalisire niene. Ngasi mango ababusi birhu bakag’irhukengeza ntya: ‘Mwanaganiza Yehova ngasi kasanzi mulonzize okujira ntyo.’ Oko kusegeza isala kwampûmako bwenene, na buno nkola nyumva kuli kulembu okushenga Yehova n’okumubona nka Larha onzigira bwenene.” Mwe babusi, mukakengera ensiku zoshi oku, okumuzigire Yehova bwenene kwanarhabala abana binyu nabo bamuzigire.

⁹ Rhuganirirage n’olwiganyo lwa Emma. Erhi ishe aleka omulala gwabo, alekera nnina madeni manji bwenene. Emma adesire ntya: “Kanji-kanji Nyâma akag’ilwisa amazibu g’okubula ensaraga, cikone ngasi mango akagirhuganirira okubiyerekire oku Yehova ashibiriramwo abakozi bage n’okubaha ebi balagirireko. Nakag’ibona oku akalamo kage kaliyerekine oku ayemire ntyo. Nyâma akag’ijira ebintu bipatine n’ebi akag’ihubiri.” Isomo lici rhukuzire aho? Ababusi banayigiriza abana babo kugerera olwiganyo lwabo, ciru n’omu kasanzi bali omu kanga kazibu.​—Gl. 6:9.

10. Bulyo buhi bw’okuganira haguma n’abana babo babusi banji Baisraheli bagwerhe? (Olushika 6:6, 7)

¹⁰ Akanuni ka 3: Mukaganira n’abana binyu ngasi mango. Yehova al’irhegesire Abaisraheli ba mîra oku ngasi mango bakayigiriza abana babo okubimuyerekire. (Osome Olushika 6:6, 7.) Ngasi lusiku abo babusi bagwerhe obulyo bw’okuganiza abana babo n’okubayigiriza okuzigira Yehova. Kwa lwiganyo, omwana-rhabana Muisraheli akabire n’akasanzi k’okugeza haguma n’ishe amango ali amurhabala okurhwera emburho erhi okusarula. Mwali wabo naye agwerhe akasanzi kanji k’okugeza haguma na nnina omu kuhanga, kusuka bintu bilebe, n’omu yindi mikolo y’ahaka. Okubona ababusi n’abana bakag’ikola haguma, bakaganirire myanzi minji ya bulagirire. Kwa lwiganyo, bakaganirire okubiyerekire oborhere bwa Yehova bw’obwinja bakanarhanyize kunganaci Yehova arhabire omulala gwabo.

11. Ene bulyo buhi ababusi Bakristu bagwerhe bw’okuganira haguma n’abana babo?

¹¹ Akalamo karhaciyorha nk’oku kaliyosire mango mîra. Omu bihugo binji, babusi banji barhacijira akasanzi k’okugeza haguma n’abana babo omu mulegerege. Ababusi banaba bali omu kazi, n’abana banaba bali emasomo. Oko kwanarhuma ababusi banajira okwabo koshi lyo babona obulyo bakaganiramwo haguma n’abana babo. (Ef. 5:15, 16; Fl. 1:10) Enterekêro y’omulala enahâne obulyo buli nk’obo. Mwene wirhu muguma ociri musole ohamagalwa Alexander, adesire ntya: “Ngasi mango  larha akag’irhôla emipango y’okujira enterekêro y’omulala, arhanayemeraga akantu koshi-koshi karhuhanze okugeza ako kasanzi haguma. Enyuma z’okujira enterekêro y’omulala, rhwakag’iganira.”

12. Bici irhwe ly’omulala lishinganine likakengera amango g’enterekêro y’omulala?

¹² Erhi akaba oli irhwe ly’omulala, bici wakajira ly’abana bawe bakashagalukira enterekêro y’omulala? K’orhabwini oku kuli kwa bulagirire okayiga haguma n’abana bawe Ebibliya omu kukolesa ecitabu cirhu cihyahya Oshagalukire Akalamo Ensiku n’Amango!? Okukayiga eco citabu haguma n’abana bawe kwanarhuma wakajira enganiro nyinja haguma nabo. Olonzize abana bawe bakakubwira n’obwalagale oku bali baciyumva n’amazibu bali balwisa, co cirhumire orhakag’ikolesa akasanzi kinyu k’enterekêro y’omulala ly’obaderha-derha kubi erhi kubakalihira. Na kandi ocihangane orhakagigaya duba-duba erhi abana bawe bakaderha kantu kalebe karhapatini n’amakanuni g’Amandiko. Lubero n’oko, obavuge omunkwa okubona bakubwizire entanya zabo n’obwalagale, onabahe omurhima bakaciyumva oku bagwerhe oluhuma lw’okukuganiza. Kobinali wanarhabala abana bawe bwinja erhi wakahugûkwa bwinja oku bali baciyumva.

13. Bulyo buhi ababusi bajira bakarhabalamwo abana babo bayegere Yehova?

¹³ Mwe babusi, ngasi lusiku mukalonza obulyo mwakarhabalamwo abana binyu lyo bayegera Yehova. Murhakag’ilinda mpu kuhika olusiku lw’ifunzo lyabo ly’Ebibliya luhike lyo mubayigiriza okubiyerekire Nnâmahanga wirhu w’obuzigire. Muzire muguma ohamagalwa Lisa adesire ntya: “Rhwakag’ikolesa obulemi burhuzungulusire lyo rhuyigiriza abana birhu okubiyerekire Yehova. Kwa lwiganyo, erhi akabwa kirhu kakajijire akantu karhuma abana birhu basheka, rhwakag’ibabwira oku, oko kuyerekine oku Omulemi wirhu aba Nnâmahanga w’omwishingo, anajijire ntyo lyo nirhu rhuba n’omwishingo n’okukashagalukira ebintu by’okushesa.”

14. Bulya gurhi kuli kwa bulagirire ababusi barhabale abana babo bacishoge abîra n’obwenge? (Emigani 13:20)

¹⁴ Akanuni ka 4: Murhabale abana binyu bacishoge abîra binja. Akanwa ka Nnâmahanga kahugwîre oku abîra birhu banarhushumya  rhujire ebintu binja erhi bibi. (Osome Emigani 13:20.) Mwe babusi, ka muyishi abîra b’abana binyu? Ka mukola mubabwine na kandi ka mukola mugezize akasanzi haguma nabo? Bici mwakajira lyo murhabala abana binyu bacijirire obwîra haguma n’abantu bazigira Yehova? (1 Kr. 15:33) Mwanarhabala abana binyu barhôle emihigo minja, omu kukalalika bantu baguma na baguma bajira ehali nyinja y’ekiroho, bayishe bajire mikolo milebe haguma na ninyu n’abana binyu.​—Enna. 119:63.

15. Bici ababusi bakajira lyo barhabala abana babo bacijirire abîra binja?

¹⁵ Ishe muguma w’omulala ohamagalwa Tony, ahugwîre ebi ye na mukage bajijire lyo barhabala abana babo bacijirire abîra binja. Adesire ntya: “Rhwajijire myaka minji, nie na mukanie rhuli rhwayegereza bene wirhu na bali birhu b’emyaka eri lubero n’enkomêdu ziri lubero lyo bayisha aha mwirhu. Rhwakag’ilya haguma nabo n’okujira enterekêro y’omulala haguma. Eyo yali njira nnene yakag’irhurhabala rhumanyane na bene wirhu na bali birhu, baba bazigire Yehova n’okumukolera n’omwishingo. Rhwakag’ishagalukira bwenene okuyegereza aha mwirhu abangalizi, bamisioneri, n’abandi bene wirhu. Ebi bacibwinire, obushiru bwabo, n’iroho lyabo ly’okucihâna byahûmire oku bana birhu, byanabarhabala bayegere Yehova.” Mwe babusi, muhige okurhabala abana binyu bacijirire abîra binja.

16. Gurhi byakaba erhi omwana akaderha oku arhacilonzizi okukolera Yehova?

¹⁶ Gurhigi byakaba, erhi akaba mwajijire okwinyu koshi lyo murhabala abana binyu bakolere Yehova, cikone mwana muguma aderhe oku arhalonzizi okumukolera? Muyake okuderha duba-duba oku mwe mwayabirwe. Yehova ahîre ngasi muguma wirhu engalo y’oluhuma lw’okucishoga, k’okuderha, obuhashe bw’okucishoga erhi rhwamukolera erhi rhurhamukolere. Erhi omwana winyu akahiga okuleka okukolera Yehova, murhahezagya obulangalire oku arhakacimugalukira. Mukengere olwiganyo lw’omwana mulalahi. (Lk. 15:11-19, 22-24) Oyo mwana ajijire bintu binji bibi, cikone buzinda agalukirwa n’obwenge. Hali omuntu wakaderha erhi: “Olo lwali lwiganyo kone. Ka  kobinali omwana wani anac’igalukira Yehova?” Neci, byanahashikana amugalukire. Ntyo ko byahikiraga musole muguma guhamagalwa Elie.

17. Gurhi ebi Elie acibwinire bikuhîremwo omurhima?

¹⁷ Okubiyerekire ababusi bage, Elie adesire ntya: “Bajijire okwabo koshi lyo banyigiriza okuzigira Yehova n’Akanwa kage, Bibliya. Cikone omu myaka yani y’omushûko, narhondera okulalaha.” Elie arhondera okulama akalamo k’obulyalya arhanayemeraga oburhabale boshi bw’ekiroho ababusi bage bakag’imuha. Enyuma z’okurhenga aha mwabo, arhondera okuba n’olugenzi lubi. Ciru akaba ntyo, kasanzi kaguma na kaguma akajira enganiro z’Ebibliya haguma na mwîra wage muguma. Elie adesire ntya: “Oku nakag’iganirira omwîra wani okubiyerekire Yehova, ko nanakag’irhanya okubimuyerekire. Bunyi-bunyi emogomogo z’okuli ababusi bani bakag’icihangana okurhwera omu murhima gwani zarhondera okukula.” Erhi hagera nsiku, Elie acib’igaluka omu okuli. * Orhanye gurhi ababusi bage bashagalusire okubona bakag’icihangana okumuyigiriza okuzigira Yehova kurhenga ali mwana murho!​—2 Tm. 3:14, 15.

18. Gurhi ociyumvirhe okubiyerekire ababusi bacihangana bwenene okuzigira Yehova?

¹⁸ Mwe babusi, mugwerhe olukengwa lunene bwenene, k’okuderha, okulera iburha lihyahya ly’abakozi ba Yehova. (Enna. 78:4-6) Ogo gurhali mukolo mulembu, rhunamuvuzire omunkwa n’omurhima goshi oku bushiru muli mwajira lyo murhabala abana binyu! Erhi mwakagendekera mwacihangana lyo murhabala abana binyu bazigire Yehova n’okubalera omu buhane n’omu mahano gage, mwanayemera n’obwalagale oku Larha wirhu w’omu mpingu w’obuzigire ashagaluka bwenene.​—Ef. 6:4.