Paolo ayandika ntya: “Kugerera irhegeko nafîre enyanya z’irhegeko, lyo mpikira aha nalama erhi Nnamahanga orhuma.”​—Gl. 2:19, NWT.

Ebi Paolo ayandikaga byalipatine n’akantu k’obulagirire ayandikiraga ebigamba by’Ecikristu byali omu provense y’e Galasiya. Bakristu baguma na baguma b’eyo munda bali bamashumibwa n’abalimu b’obunywesi. Abo balimu b’obunywesi bakagiyigiriza oku ly’omuntu acunguka bihûnyire okukenga irhegeko lya Musa, bwenene irhegeko lyaliyerekire okukembulwa. Cikone Paolo alimanyire oku Nnamahanga arhalicirhegesire abemezi oku lyo bacunguka kuli kwa bulagirire bakakembulwa. Kugerera enganîro z’oburhwali ajiraga haguma n’abo bantu, ayerekana n’obwalagale ezo nyigirizo z’obunywesi anazibuhya obuyemere bwa bene wabo omu ngombôlo Yezu Kristu ahânaga.​—Gl. 2:4; 5:2.

Ebibliya eyerekine n’obwalagale oku erhi omuntu afâ, arhacimanya kantu koshi-koshi. (Muh. 9:5) Erhi Paolo aderha erhi: “Kugerera irhegeko nafîre,” alonzagya okuderha oku arhacir’irhegesirwe n’Irhegeko lya Musa. Paolo alimanyire n’obwalagale oku kugerera okuba n’obuyemere omu ngombôlo Yezu ahânaga, anahikira aha ‘alama erhi Nnamahanga orhuma.’

Ezo mpindûlo zajirikanaga omu kanga ka Paolo zayishaga “kugerera irhegeko.” Gurhi byabagamwo ntyo? Aciyusagya ahugûla oku “omuntu arhajirwa mweru-kweru n’ebijiro b’Irhegeko; ci omu kuyemera Yezu Kristu.” (Gl. 2:16) Neci, irhegeko lyarhanzir’ikolesibwa omu kuhikiriza mukolo mulebe gw’obulagirire. Paolo ahugûlira Abagalasiya ntya: “Lyadwirhwe erhi byaha birhuma, kuhika liyishe lirya iburha lyalaganyibagwa eciragane.” (Gl. 3:19) Neci, Irhegeko lyayerekine n’obwalagale oku bene bantu barhali bimana na banya byaha barhakahashir’ikenga Irhegeko okushinganine n’oku bal’ilagirire oku ngombôlo nyimana. Na ntyo irhegeko lyaheka abantu ebwa lirya “iburha,” kw’okuderha Kristu. Okuba n’obuyemere omu ngombôlo Yezu Kristu ahânaga, ko kwakarhuma Nnamahanga aderha oku omuntu ali mushinganyanya. (Gl. 3:24) Paolo ayerekine ntyo n’obwalagale bulya kugerera Irhegeko, ahikire aha ayemera Kristu n’okuba n’obuyemere muli ye. Oko kwarhuma Paolo aderha erhi “kugerera irhegeko nafîre,” lyo mpikira aha “nalama erhi Nnamahanga orhuma.” Irhegeko lirhacigwerhe buhashe kuli ye, cikone Nnamahanga aligwerhe obuhashe kuli ye.

Paolo arhanziriderha entanya za ntyo omu maruba ayandikiraga Abaroma. “Bene wirhu: mwafîre, mwarhenzibwa omu lukoba lw’amarhegeko erhi mubiri gwa Kristu gurhuma . . . Rhwafîre oku byakag’irhushweka nka mpira, rhwarhenzibwe omu lukoba lw’amarhegeko.” (Rm. 7:4, 6) Mw’olo lwandiko n’olwa Abagalasiya 2:19, lufulwire oku Paolo arhakag’iganirira okufâ nka munya-byaha oshwesirwe n’Irhegeko. Lubero n’oko, akag’iganirira okuhâbwa oluhûma. Nta buhashe boshi-boshi Irhegeko lyacigwerhe kuli ye erhi oku bandi bali akage. Bàba n’oluhûma kugerera okuba n’obuyemere omu ngombôlo Yezu Kristu ahânaga.