KURHENGA mîra, aba Israheli bagwerhe enkomêdu y’okuhâna oburhabale lyo balunga enterekêro y’okuli okuboko. Cikone, erhi Yezu ali hanw’igulu eby’okuvurha ikoli byaba bizibu na muzigo bwenene oku Bayahudi.

Ngasi muntu mukulu w’omu Bayahudi, alishinganine akavurha enusu y’eshekeli (drakma ibirhi), lyo balunga okuboko enterekêro ya Nnamahanga bakagijirira omu ihema na buzinda omu hekalu. Omu myaka igana mirhanzi, ezo nsaranga zakag’ikolesibwa omu kugula ebi bahâna nterekêro n’omu kukubula ehekalu Herode ayubakaga. Bayahudi baguma na baguma badosa Petro entanya za Yezu lugenda okuvurha ikoli, cikone Kristu arhayerekanaga oku kuli kubi okuvurha ikoli. Na ntyo, abwira Petro oku ajilonza olufaranga lw’ecicere bavurhe mw’ikoli.​—Mt. 17:24-27.

Abakozi ba Nnamahanga ba mîra bakagihâna ecakumi, kw’okuderha cigabi ca kali ikumi c’omu mburho zabo, erhi obuhirhi bakabire bagwerhe. (Lev. 27:30-32; Mib. 18:26-28) Abakulu b’amadîni bago mango bakasegeza oku abantu bashinganine bakahâna n’ecakumi c’ebishogoshogo, ciru n’ecakumi c’ “omurhi gw’omunana, n’ec’ebizari, n’ec’ejira.” Yezu arhayerekanaga oku kuli kubi okuhâna ecakumi, cikone ayerekana entanya z’obulyalya z’Abafarisayo n’abashamuka b’ihano.​—Mt. 23:23, Mashi Bible.

Ago mango, Abaroma bo bakagirhambula, nabo bahiriraho ngasi cikala amakoli akavurha. Hali ikoli lyalihîrirwe ngasi yeshi ogwerhe ishwa, analishinganine ahâne ensaranga erhi bintu bilebe ly’avurha er’ikoli. Bibonekine nk’er’ikoli lyali lyakuhâna bigabi kurhangira oku 20 kuhika bigabi 25 okw’igana. Hàligi n’erindi ikoli ngasi cirhwe c’omulala gw’Omuyahudi akagivurha. Er’ikoli lyo lyarhumaga badosa Petro entanya za Yezu lugenda okuvurha ikoli. Ayerekana entanya rhushinganine okuba nazo lugenda okuvurha ikoli omu kuderha ntya: “Ahoo! ebya Sezari bigaluliragi Sezari, n’ebya Nyamuzinda mubihe Nyamuzinda.”​—Mt. 22:15-22.

Na kandi hali ikoli bakagikavurha enyanya z’oburhunzi bwakagirhenga omu provense kuja omu yindi. Bakagikavurhira er’ikoli oku mashinji (port), oku marheme, aha mashangajira, n’omu njira zijire omu vile erhi omu cibuye.

Abalirhegesirwe n’Abaroma bakagiyumva bali omu mazibu bwenene enyanya z’ago makoli manji bakagivurha. Tacitus, historien muguma Muroma, ayerekine oku amango gw’oburhegesi bwa Tiberius, erhi Yezu ali hanw’igulu, abantu b’e “Siriya n’e Yudeya, bahûna oku babanyihize amakoli bakagikavurha erhi babona oku gwamaba muzigo muzirho.”

Okubakag’ikavurhamwo ago makoli, ko kwarhumaga gwaba muzigo muzirho bwenene. Erhi omuntu akahânyire nsaranga nyinji, akahâbirwe omukolo gw’ okuvurhisa ikoli. Baguma bamulibo bagivurha ikoli ly’abandi bantu embere z’akasanzi buzinda banayish’igalulirwa ebi bahânaga banabahirireko obunguke. Bibonekine oku Zakayo ali mukulu w’abo bakag’ivurhisa abantu ikoli lya ntyo. (Lk. 19:1, 2) Co carhumire abantu bakag’iciyumva kubi enyanya z’oko banagwerhe entanya mbi lugenda balya bakag’ivurhisa ikoli.