1. Bici Yehova ajirîre ngasi muguma wirhu?

YEHOVA ye wakululaga ngasi muguma wirhu emunda ali. (Yn. 6:44) Orhanye bici oko kuhugwîre. Erhi Yehova aba ali alabiriza emirhima y’emiliyoni n’emiliyoni y’abantu bali hanw’igulu, abona akantu kw’obulagirire muli we: murhima mwirhohye gwakahikira aha gwamuzigira. (1 Nga. 28:9) Yehova akuyishi, aba akuhugûsirwe, anaba akuzigire. Okwo kurhuhire omurhima bwenene!

2. Lwiganyo luhi Yezu ahânyire ly’ayerekana kunganaci Yehova ashibirira ngasi muguma w’omu bibuzi Byage?

² Yehova anakushibirire bwenene, na kandi anashibirire bene winyu na bali binyu Bakristu. Lyo Yezu ahugûla ntyo, ashushanya Yehova na lungere. Gurhi lungere ogwerhe bibuzi 100 akajira erhi akabona oku cibuzi ciguma cirhali omu buso? “K’arhakaleka birya bindi makumi gali mwenda na mwenda omu ntondo, agend’ilonza cirya cihezire.” Erhi lungere akabona eco cibuzi, arhakacikalihira mpu bulya caheraga. Lubero n’oko anacishinga bwenene. Isomo lici rhukuzire aho? Ngasi cibuzi ciba ca babulagirire omu masu ga Yehova. Yezu aderha ntya: “Burhali bulonza bwa Sho w’empingu mpu muguma muli aba barhorho ahere.”​—Mt. 18:12-14.

3. Bici rhwaganirira mw’eci cigabi?

³ Rhurhakalonza ciru n’ehitya rhube nshôko ya kuvuna bene wirhu na bali birhu omurhima. Gurhi rhwakayaka okukasarhaza abandi? Na bici rhushinganine rhujire erhi muntu mulebe akarhusarhaza? Mw’eci cigabi rhwashuza kw’ago madoso. Burhangiriza, rhwarhangiyiga birhali binyi lugenda “aba bana barhorho” baganirirwe omu Mateyo cigabi 18.

4. “Aba bana barhorho” bo bandi?

⁴ “Aba bana barhorho” bali banafunzi ba Yezu boshi. Ciru ankaba bagwerhe myaka inga, boshi babà nka “cirhaba” bulya babà  babidu okuyigirizibwa na Yezu. (Mt. 18:3) Ciru ankaba banarhenge omu bûko erhi omu nkomêdu ziri lubero bananajira amorhere n’okubona ebintu omu njira eri lubero, boshi bajira obuyemere muli Kristu, na Kristu naye, aba abazigire bwenene.​—Mt. 18:6; Yn. 1:12.

5. Gurhi Yehova aciyumva erhi abona muntu mulebe asarhaza erhi kulibuza abantu Bage?

⁵ “Aba bana barhorho” boshi babà ba bulagirire omu masu ga Yehova. Lyo rhuhugûkwa oku Yehova aciyumva okubibayerekire, rhurhanye gurhi rhuciyumva okubiyerekire abana barhorho. Rhunababone oku bali ba bulagirire bwenene. Rhunalonze okubalanga bulya barhajira misi, barhamanyire binji, barhanajira bwenge buli nk’obw’abantu bakulu. Neci, ciru ankaba rhurhasima nka muntu mulebe amasarhala erhi kulibuka, cikone rhunaciyumve kubi bwenene, n’okuhikira aha rhwagaya, erhi muntu mulebe akahikira aha asarhaza omwana erhi kumulibuza. Ko n’oko, Yehova naye aba alonzize arhulange, anaciyumve kubi bwenene n’okuhikira aha agaya erhi abona muntu mulebe asarhaza erhi kulibuza abantu Bage!​—Iz. 63:9; Mk. 9:42.

6. Nk’oku biyerekinwe omu lwandiko lwa 1 Abakorinti 1:26-29, gurhi iguli libona abanafunzi ba Yezu?

⁶ Omu yindi njira nci abanafunzi ba Yezu babà nka “bana barhorho”? Bandi igulu libona oku bali ba bulagirire? Bagale, bantu bamanyikine bwenene erhi bantu bagwerhe buhashe bunji. Lubero n’oko, abanafunzi ba Yezu banakabonekana nka barhali ba bulagirire, “bana barhorho” ba busha-busha. (Osome 1 Abakorinti 1:26-29.) Cikone Yehova yehe arhababona ntyo.

7. Gurhi Yehova alonzize rhukaciyumva okubiyerekire bene wirhu na bali birhu?

⁷ Yehova aba azigirie abakozi bage boshi, babe bakola bagwerhe myaka minji omu okuli erhi babe baciri bahyahya omu okuli. Bene wirhu na bali birhu boshi babà ba bulagirire omu masu ga Yehova, co cirhumire nirhu rhushinganine rhukababona oku bali ba bulagirire. Rhuba rhulonzize ‘okuzigira bene wirhu [boshi],’ ci arhali baguma ba muli bo bone. (1 Pt. 2:17) Rhushinganine rhube babidu okujira ngasi ebi rhwakanahasha lyo rhubalanga n’okubashibirira. Erhi rhwakahugûkwa oku rhwasarhazize muntu mulebe erhi kumugayisa, rhurhashinganini rhulekere aho, n’okurhanya oku oyo muntu naye anakagayira busha erhi oku ahikira aha ayibagira oko rhwamujiriraga. Bulya gurhi bantu baguma na baguma bahikira aha basarhazibwa? Nkabaga enyanya z’ebi bageziremo, bene wirhu na bali birhu baguma baguma banakacibona oku bali babusha bwenene. N’abandi baciri bahyahya omu okuli, barhacihugûkwa oku bashinganine bakalembera obuzamba bw’abandi. Omu kanga koshi, rhushinganine rhukalonza omurhula agarhi kirhu. Na kandi, omuntu okalug’ibona oku abandi banakamugokeza ashinganine ahugûkwe oku obo buli buzamba anahûnyire okujira empindûlo. Ashinganine azijire ly’aba n’omurhula gw’ekandalala na ly’abandi bakaciyumva bwinja.

8. Ntanya zihi bantu banji bagwerhe zayahukiraga abanafunzi ba Yezu?

⁸ Bici byashumyagya Yezu aganire okubiyerekire “aba bana barhorho”? Abanafunzi bage bali bamamudosa ntya: “Ndi wankaderha mukulu omu Bwami bw’empingu?” (Mt. 18:1) Bayahudi banji ba mw’ago mango bakagibona oku okuba n’ecêyo erhi cikono cilebe oku kuli kwa bulagirire bwenene. Muntu muguma w’obwenge (savant) adesire ntya: “Omu kalamo kabo koshi, abalume bakagilongereza olukengwa, okumanyikana, okuhâbwa irenge, erhi kuyemerwa n’abandi.”

9. Bici abanafunzi ba Yezu bal’ishinganine bajire?

⁹ Yezu alimanyire oku abanafunzi bage balishinganine bajire okwabo koshi lyo bakula omu murhima gwabo er’iroho ly’akamashigwe lyali omu nkomêdu z’Eciyahudi bakuliragamo.  Ababwira ntya: “Oli mukulu muli mwe, abe nka ye murho, n’omurhegesi abe nka ye murhumisi.” (Lk. 22:26) Rhunacibone oku rhuli nka “murho” erhi rhuyereka abandi oku ‘barhulushire.’ (Fl. 2:3) Erhi rhwakakaba n’entanya za ntyo, rhurhakacikasarhaza abandi ngasi mango.

10. Ihano lihi Paolo ahânaga rhushinganine rhukakengera?

¹⁰ Bene wirhu na bali birhu boshi babà barhulushire omu njira nguma erhi omu yindi. Kwanaba kulembu okuhugûkwa ntyo erhi rhwakakasegeza obwenge bwirhu oku morhere gabo minja. Ngasi mango rhukakengera er’ihano Paolo ahâga Abakritu b’e Korinti: “Ndi wakuhâga ecirhuma orhumanini n’abandi? Cici ojira orhahabagwa? N’akaba kuhâbwa wacihâbagwa, ca cirhuma walimbira abandi nka kulya arhali kuhâbwa wahâbagwa?” (1 Kr. 4:7) Co cirhumire rhushinganine rhube masu lyo rhurhagikaja omu murhego g’okulonza rhubonekane n’abandi erhi kurhanya mpu rhubalushire. Erhi akaba mwene wirhu mulebe anakageza ehotuba zihumire oku murhima na mwali wirhu mulebe aba mulenga okurhondeza ifunzo ly’Ebibliya, oyo mwene wirhu erhi oyo mwali wirhu ashinganine akaba mubidu okuha Yehova irenge.

11. Bici Yezu alonzagya okurhuyigiriza kugerera olwiganyo lwa mwami n’omurhumisi wage?

¹¹ Hisanzi hisungunu enyuma za Yezu okurhonda entumwa zage oku zirhakag’ikasarhaza abandi, abaha olwiganyo lwa mwami n’omurhumisi wage. Oyo mwami ababalira omwenda g’omurhumisi wage bulya arhagwerhe buhashe bwa kugujuha. Oyo murhumisi yo n’oyo, arhacihashigi babalira omwenda musungunu owabo murhumisi amugwerhe. Enyuma z’aho, oyo mwami akunira bwenene anaderha oku bamuhire omu lukoba. Isomo lici rhukuzire aho? Yezu adera ntya: “Ntyo kwo Larha w’empingu ayish’immujirira, akaba ngasi muguma arhababaliri owabo n’omurhima gwoshi.”​—Mt. 18:21-35.

12. Erhi rhwakalahira oku rhurhababalira, mazibu maci oko kwakalerhera abandi?

¹² Ebijiro oyo murhumisi ajiraga arhali yene byalerhire amazibu cikone byagalerhera n’abandi barhumisi. Burhangiriza, ajira owabo murhumisi kubi erhi “aj’imuhira omu lukoba, kuhika alyûle.” Bwakabirhi, agayisa ababo barhumisi babonaga ebi anajiraga. Erhi ababo “babona byaba ntyo, bagaya bwenene.” Ko n’oko, ebijiro birhu binahûme oku bandi. Gurhi byakaba erhi muntu mulebe akarhugokeza buzinda rhulahire oku rhurhamubabalira? Burhangiriza, rhwanarhuma aciyumva kubi bulya rhwamalahira oku rhurhamubabalire, rhurhamushibirire, na kandi rhurhamuzigiri. Bwakabirhi, rhwanarhuma abandi bali omu cigamba baciyumva kubi hano babona oku nta murhula guli egarhi kirhu n’oyo mwene wirhu erhi mwali wirhu.

13. Bici ociyigirizize kugerera olwiganyo lwa painiya muguma?

¹³ Erhi rhubabalira bene wirhu na bali birhu, okwo kunarhulerhere obunguke na kandi kunabulerhere n’abandi. Ntyo ko painiya muguma rhwahamagala okw’izino lya Crystal acibwinire. Mwali wirhu muguma w’omu cigamba omusarhaza. Crystal akengire ntya: “Enderho zage z’ilogorha hali amango zakagintwa nieshi-nieshi nka kula akere katwa. Erhi rhukaja omu mahubiri, nta cikagishagalukira nje cikundi ciguma naye erhi kuja mutuga muguma haguma naye. Narhondera okunyihya obushiru n’omwishingo gwani.” Crystal akagirhanya oku agwerhe ehaki y’okuciyumva ntyo. Cikone arhabikiraga oyo mwali wirhu akarhinda arhanasegezagya obwenge oku ntanya zage. Akolesa n’obwirhohye ihano ly’Amandiko lyali omu cigabi calidesire ntya “Msamehe Kutoka Moyoni Mwako” cali omu Ilabiro ly’Akalalizi ly’omu nsiku 15/10/1999 (omu Ciswahiri c’e Kenya). Ababalira  mwali wabo. Crystal adesire ntya: “Nkola mba mpugûsirwe oku rhweshi rhunaciseze okuyambala obumuntu buhyahya n’oku Yehova anarhubabalire n’obulonza ngasi lusiku. Nanciyumve nka narhûzire omuzigo gugwerhe biro binji bwenene. Nacibiba n’omwishingo.”

14. Nk’oku biyerekinwe omu lwandiko lwa Mateyo 18:21, 22, bibonekine oku bici byakagiyabira entumwa Petro, na bici ishuzo Yezu ahânaga likuyigirizize?

¹⁴ Rhuyishi oku rhushinganine rhukababalira abandi, n’ako kali kantu kinja rhwakajira. Cikone kwanaba kuzibu okujira ntyo. Nkaba hali amango entumwa Petro nayo yakagiyabirwa okujira ntyo. (Osome Mateyo 18:21, 22.) Bici byakarhurhabala lyo rhuhash’ibabalira abandi? Burhangiriza, orhanye kunganaci Yehova akubabalire. (Mt. 18:32, 33) Rhurhaba rhushinganine obonjo bwage, cikone anarhubabalire n’obulonza. (Enna. 103:8-10) Co cirhumire, “kukwanine nirhu rhuzigirane.” Na ntyo okubabalira abandi l’ir’irhegeko, rhushinganine rhukababalira. Rhujira ideni ly’okubabalira bene wirhu na bali birhu. (1 Yn. 4:11) Bwakabirhi, orhanye oku bintu byakahika erhi rhwakakababalira abandi. Rhwanaba erhi rhurhabire oyo muntu warhugokezagya, rhwanajira ecigamba cibe n’ecinyabuguma, rhwanalanga obwîra bwirhu haguma na Yehova, na kandi rhwanarhula ogo muzigo muzirho. (2 Kr. 2:7; Kl. 3:14) Buzinda, rhukashenga Olya orhuhûnyire oku rhukababalira abandi. Orhahâga Shetani engwarhiro y’okuyusa omurhula oshagalukira guba egarhi kawe na bene winyu. (Ef. 4:26, 27) Rhulagirire oku burhabale bwa Yehova lyo rhurhagikarhogera omu murhego gwa Shetani.

15. Nk’oku biyerekinwe omu lwandiko lwa Abakolosi 3:13, bici rhushinganine rhujire erhi rhwakagayisibwa n’ebijiro bya mwene wirhu erhi mwali wirhu mulebe?

¹⁵ Gurhi byakaba erhi owinyu Mukristu akajira akantu kakugayisize? Bici oshinganine ojire mw’ako kanga? Ojire okwawe koshi ly’ohira omurhula egarhi kawe naye. Obwire Yehova  kugerera isala lirhenzire oku murhima gurhi oli waciyumva. Omuhûne agishe oyo muntu wakugokezagya anakurhabale obone amorhere minja muli oyo muntu, kw’okuderha amorhere garhuma Yehova amuzigira. (Lk. 6:28) Erhi wakabona oku wamayabirwa okuyibagira ebi oyo mwene wirhu akujiriraga, wanalola gurhi wakagend’iyumvanya naye. Ensiku zoshi, kuli kwinja okakengera oku oyo mwene wirhu erhi mwali wirhu naye arhalilonzize mpu akuyagaze. (Mt. 5:23, 24; 1 Kr. 13:7) Amango oli waganira naye, okengere oku naye agwerhe obulonza bwinja. Gurhi wakajira erhi akaba arhalonzizi habe omurhula egarhi kinyu? “Mukalemberana.” Orhayakaga mwene winyu, ogendekere wamulembera. (Osome Abakolosi 3:13.) N’okw’obulagirire bwenene, orhabikaga akarhinda bulya kanashereza obwîra bwawe haguma na Yehova. Orhayemereraga akantu koshi-koshi karhuma wasarhala. Omu kujira ntyo, wanayerekana oku ozigire Yehova kulusha akandi kantu koshi-koshi.​— Enna. 119:165.

16. Mukolo guhi ngasi muguma wirhu agwerhe?

¹⁶ Rhunashagalukire olukengwa rhugwerhe l’okukolera Yehova omu cinyabuguma nka “buso buguma” buyabwirwe na “lungere muguma”! (Yn. 10:16) Ecitabu Tengenezo Lenye Kufanya Mapenzi ya Yehova, omu cigabi ca 16, cifungo ca 8, cidesire ntya: “Bulya nawe onayunguke n’eco cinyabuguma, ogwerhe omukolo gw’okucigendekeza.” Na ntyo, rhushinganine “rhucikomereze okukabona bene wirhu na bali birhu nk’oku Yehova ababona.” Rhweshi rhuli “bana barhorho,” rhunali ba bulagirire omu masu ga Yehova. Ka ntyo ko nawe obona bene winyu na bali binyu? Yehova anabone n’okushagalukira ngasi kantu koshi ojira ly’obarhabala n’okubashibirira.​—Mt. 10:42.

17. Bici rhuhizire okujira?

¹⁷ Rhuba rhuzigire bwenene abirhu Bakristu. Co cirhumire ‘rhumanye rhwankarhuma mwene wirhu asarhala erhi ahirime.’ (Rm. 14:13) Rhunakabona bene wirhu na bali birhu oku barhulushire, rhunaba rhulonzize okubababalira n’omurhima gwoshi. Na nirhu rhurhakagicileka rhusarhazibwe n’abandi. Lubero n’oko, “rhushimbulire ebilerha omurhûla n’ebyankarhabala abirhu.”​—Rm. 14:19.