Naburhagwa omu nsiku 19/5/1940 omu lugo lw’e Amioûn, e Liban. Myaka misungunu enyuma z’aho, omulala gwirhu gwahamira omu lugo lw’e Tripoli, nakulira eyo munda omu mulala mwinja, gwalimanyire Nnamahanga Yehova gwanalimuzigire. Omu mwirhu rhwali bana barhanu, banyere basharhu na barhabana babirhi, niè nali murho wabo bana. Ababusi bani barhakagihira okuba n’obuhirhi oku nafasi ntanzi omu kalamo kabo. Ebintu by’obulagirire rhwakagihira oku nafasi ntanzi omu kalamo kirhu kwali kuyiga Ebibliya, okuja oku ntimanano z’Ecikristu, n’okurhabala abandi bahikire aha bamanya Nnamahanga.

Omu cigamba cirhu mwali Bakristu banji bashîge amavurha. Muguma mulibo ye wali Michel Aboud, ye wakagilongoza entimanano yakag’iderhwa ifunzo ly’ecitabu. Enyuma z’okumanyira okuli kw’Ecikristu e New York, oku murhondera gw’emyaka ya 1920 ajikuyigiriza e Liban. Ncikengire kunganaci akagikenga n’okurhabala Anne na Gwen Beavor, abo bene wirhu babiri baciri misole barhengaga oku Masomo g’Egileadi. Babà bîra birhu bwenene. Myaka minji enyuma z’aho, nashagaluka bwene okucibirhimanana na Anne e États-Unis. Nsiku nsungunu enyuma z’aho narhimanana na Gwen erhi ajijire obuhya na Wilfred Gooch, bakagikolera oku Beteli ye Londres, e Angleterre.

Bahamirizi basungunu bo bali omu cihugo c’e Liban erhi ndi musole. Cikone rhwakabwira abandi kw’ebi rhwalimanyire omu Bibliya. Rhwacihangana okujira ntyo ciru akaba rhwakag’ihagalikwa n’abakulu b’amadîni. Ciru nciba nkengire bintu biguma na biguma bakagirhujirira.

Lusiku luguma, niè na mwali wirhu Sana rhwakag’iganirira abandi okubiyerekire omwanzi guli omu Bibliya. Padiri muguma ayisha oku etage rhwaliko. Nkaba hali owamubwizire oku rhuli aho. Oyo padiri arhondera okujacira mwali wirhu. Arukûza bwenene kuhika atundulika Sana oku ma eskalye, Sana ayagalika. Muntu muguma ahamagala abapolisi oku telefone, bayisha bashibirira Sana banarhuluba oyo padri. Baheka oyo padiri oku biro by’abapolisi, n’erhi bahik’eyo munda babona oku aliyambalire oku bunduki. Omukulu w’abapolisi amudosa ntya: “Oligi ndi? K’oligi mukulu w’idîni erhi oli mukulu w’ebishungu?”

Ncibankengire bwinja-bwinja agandi mango ecigamba cirhu caluwage omutuga lyo gurhuheka rhujiyaliza omwanzi mwinja omu vile nguma eba kuli bwenene. Rhwageza akasanzi kinja omu mahubiri kuhika padiri w’eyo munda ayumva ebi rhwakag’ijira na ntyo ahamagala ba maibobo. Baja barhujacira, n’okurhubanda ciru n’amabuye, na larha ayagalika. Ncikengire oku namubonaga erhi obusu bwage buyunjwire muko. Agaluka bona nyama emunda omutuga gwirhu gwali, na nirhu rhwayisha enyuma erhi rhweshi rhunayobohire bwenene. Ntalusiku nanayibagire ezi nderho nyama aderhaga erhi ali ahorhola larha ogo muko, aderha ntya: “Yehova we kasinga obafe bonjo. Barhamanyiri eci badwirhe bajira.”

Gandi mango maguma rhwagend’ilambagirira abantu b’omu mulala gwirhu, omu lugo rhwarhengagamo. Rhwarhimana mukulu muguma w’idîni wal’imanyikine bwenene aha mwa shakulwe. Oyo mukulu w’idîni alimanyire oku ababusi bani babà Bahamirizi ba Yehova. Ampeka mahwè, ciru akaba ago mango nagwerhe myaka 6 yone. Andosa ntya: “Bulya gurhi orhasag’ibatizibwa?” Namushuza oku nciri mwana, na kandi lyo mbatizibwa kuli kwa bulagirire mmanye bintu binji okubiyerekire Ebibliya, na kandi bihunyîre mbe n’obuyemere busêzire. Agaya erhi mushuza ntyo, abwira shakulwe mpu namamubulira obukenge.

Ebintu bigalugalu rhwabwine eyo munda birhali binji. Bulya, hofi abantu b’e Liban babà bashagalusi na bakuyegereza ebigolo. Na ntyo, rhwakag’ijira enganîro nyinja z’Ebibliya haguma n’abandi, rhwanakag’ilongoza mafunzo manji g’Ebibliya.

Amango naciri e masomo, mwene wirhu muguma w’e Vénézuéla waciri musole alambagirira e Liban. Aja oku ntimanano omu cigamba cirhu, anarhondera okusheba mwali wirhu Wafa. Erhi hagera kasanzi, bajira obuhya, banagend’ilama e Vénézuéla. Omu maruba goshi Wafa akagiyandikira larha, akamuyinginga oku ahame n’omulala goshi bajilama omu Vénézuéla. Akagimubwira ntyo, bulya akagirhudula bwenene. Buzinda, ayishirhuyemeza, rhwahikira aha rhwahamira e Vénézuéla!

Rhwahika e Vénézuéla omu mwaka gwa 1953 rhwaja e Caracas, hofi n’aha mwa prezida. Okubona naciri murhabana murhorho, nakagiba n’irala ly’okugendikalolako prezida amango omutuga alimo  gwagera. Birhali bilembu oku babusi bani okukomêra enkomêdu z’ecihugo, olulimi, ebiryo, n’oku ehali y’amalunga (climat) y’eyo munda eba eyosire. Cikone, erhi barhondera okukomera, akanga kazibu karhuhikira.

Larha arhondera aciyumva nk’olwazire. Okuciyumva ntyo kwarhusomera bwenene, bulya ali ntwali ya mulume anagwerhe amagala nkana. Rhurhakakengera ciru amango rhwamubwine alwazire. Bamupima oku alwazire akansere oku lusingo, na buzinda bamubera. Akantu k’okugayisa kuli kubona oku mugobe muguma enyuma z’aho afâ.

Kulingana n’akanga rhwalimo, kuli kuzibu okuhugûla kunganaci rhwaciyumvirhe. Ago mango nagwerhe myaka 13. Rhwakaciyumva kubi bwenene rhwabona nk’igulu lyamarhuhwera. Nyama ayusize kasanzi kanji arhanahashiyemera oku kobinali iba ananafîre. Cikone rhwayishirihikira aha rhwahugûkwa ako kanga, na kugerera oburhabale bwa Yehova rhwahash’ilembera. Nahâbiragwa ediplome yani oku masomo gali e Caracas ago mango erhi ngwerhe myaka 16, muli ako kasanzi nayumva irala ly’okukola lyo nshibirira omulala gwirhu.

Muli ago mango, mwali wirhu Sana aheruka omu mwa Rubén Araujo, oyo mwene wirhu alijire oku Masomo g’e Gileadi na buzinda agaluka e Vénézuéla. Bayishihiga okugendilama e New York. Erhi omulala guhiga oku njisoma e université, nakasomire eyo munda bulya ntakacibuzire aha nalama. Mwali wirhu na mulamu wani bantabire okujira amajambere g’ekiroho muli ako kasanzi nalilamire haguma nabo. Na kandi omu cigamba c’olulimi lw’eci Espagnol cali e Brooklyn, mwali bene wirhu banji bakuzire kiroho. Nahikira aha namanya babirhi ba mulibo nanabashagalukira: Milton Henschel na Frederick Franz; bakagikola oku Beteli y’e Brooklyn.

Erhi rhuli hofi rhuhike oku buzinda bw’omwaka gwani murhanzi oku université e New-York, narhondera okuba n’akarhinda okubiyerekire oku ndi nakolesa akalamo kani. Nasoma nanarhanya kwa buzibu-zibu, oku bigabi byali omu Ilabiro ly’Akalalizi byaliganirire lugenda Bakristu baguma na baguma bagwerhe emihigo y’obulagirire. Nakagibona kunganaci bapainiya na Babetelite b’omu cigamba cirhu bagwerhe omwishingo, nanal’igwerhe irala ly’okuba akâbo. Cikone ago mango ntalic’ibatizibwa. Kasanzi kasungunu enyuma z’aho, nahikira aha nahugûkwa obulagirire b’okucihâna emwa Yehova. Nacihâna emwage nanahikira aha nabatizibwa omu nsiku 30/3/1957.

Erhi nyus’irhôla ogo muhigo gw’obulagirire, narhanya oku gundi muhigo gw’obulagirire nal’ishinganine ntôle: omuhigo gw’okurhondera omukolo gw’akasanzi koshi. Ogo muhigo gwagendekera gwanshagalusa, cikone narhondera okubona oku kwaba kuzibu okugurhôla. Ka byakahashikine njire ogo mukolo na ngendekere okusoma ago masomo g’e université? Erhi ndi e New-York niè n’omulala gwani rhwarhumirana maruba manji bwenene erhi mbabwira oku nkola naleka amasomo lyo ngaluka e Vénézuéla njirhondera omukolo gw’obupainiya.

Nagaluka e Caracas omu Mwezi gwa 6, 1957. Cikone nabona oku omulala gwani gurhali omu hali  nyinja. Balilagirire oku muntu wakaba ali oku kazi ly’ahikiriza amalagire gabo g’omubiri. Gurhi nakabarhabiremwo wani? Nahâbwa akazi k’okukola oku banke, cikone nanal’ilonzize mbe painiya. Okuba painiya ko kantu karhumaga nagaluka eyo munda. Nahiga okujira eyo mikolo yombi; okuba painiya n’okukola oku banke. Nakagikola akasanzi koshi oku banke, erhi nandi nakola nka painiya. Ntacigwerhe lusiku lwa kuhumûka cikone ago mango naligwerhe omwishingo munji!

Omwishingo gwani gwayushuka erhi nsheba Sylvia mwali wirhu muguma w’e Allemagne walizigire Yehova bwenene na buzinda rhwajira obuhya. Ye n’ababusi bage bahamiraga e Vénézuéla. Buzinda rhwaburha bana babirhi, mugala wirhu Michel (Mike), na mwali wirhu, Samira. Nagwerhe n’omukolo gw’okushibirira nyama. Ayishilama aha mwirhu. Ciru akaba nayishihikira aha naleka omukolo gwani gw’obupainiya lyo ngendekera nahikiriza amalagirire gw’omulala gwani, cikone nagendekera naba n’iroho ly’obupainiya. Amango g’amafungo, niè na Sylvia rhwakag’ijira omukolo gw’obupainiya murhabazi.

Abana birhu baciri e masomo erhi ntanya kulya naganiriraga oku murhonderho gw’eci cigabi. Nanayemera oku nagwerhe akalamo kinja, n’ebwa banke bakaginkenga bwenene. Cikone nalilonzize abantu bakambona nka mukozi wa Yehova. Entanya narhanyagya lulya lusiku zirhacintengaga omu bukengere. Na ntyo niè na mukaniè rhwadamala rhwaganira okubiyerekire ensaranga rhwagwerhe. Okuhiga oku ntacikole oku banke kwakarhumire bampa omushahara gwani muzinda erhi (décompte final). Bulya nt’ideni lya muntu rhwagwerhe, rhwabona oku erhi rhwakalama akalamo karhahunyîri bintu binji, rhwanaba n’ensaranga zarhurhabala kasanzi karhali kanyi.

Kurhali kulembu okurhôla ogo muhigo, cikone mukaniè muzigirwa na nyama bagulunga okuboko. Na ntyo nacib’ishubirira omukolo gw’akasanzi koshi. Oko kwansimisa bwenene! Ebintu byoshi byali embere zirhu, byakag’ibonekana oku byaba binja bwenene. Cikone, kasanzi kasungunu enyuma z’aho, rhwabwirwa omwanzi rhurhalic’irheganyizeko.

Lusiku luguma munganga wirhu arhubwira oku Sylvia ali izîmi. Oko kali kantu rhurhalic’irheganyizeko! Kwarhushagalusa bwenene, cikone kandi kwarhuma narhanya okubiyerekire omuhigo nali namarhôla g’okuba painiya. Ka nahikire aha naleka obupainiya? Buzira kurhindira rhwahira omu bukengere bwirhu n’omu ntanya zirhu z’ekandalala oku hano hofi-hofi owundi muntu muhyahya ayushûka omu mulala gwirhu. Gurhi byakabire okubiyerekire emihigo nalikola ngwerhe?

 Enyuma z’okuganirira emihigo rhwagwerhe, rhwahiga oku rhwayigendekeza. Mugala wirhu Gabriel aburhagwa omu Mwezi gwa 4, 1985. Ciru akaba ntyo, naleka omukolo gwani gw’oku banke, narhondera omukolo gw’obupainiya bw’akasanzi koshi omu Mwezi gwa 6, 1985. Erhi hagera akasanzi, nahâbwa olukengwa lw’okukola omu Komite y’Etawi. Cikone Etawi erhali e Caracas, yali oku bilometre 80 kurhenga aha mwirhu, byakag’ihûna omu mugobe ngende nsiku ibirhi erhi isharhu lyo ngendikola oku tawi.

Ebiro by’etawi byali omu lugo lw’e La Victoria, na ntyo rhwahiga omu mulala oku rhuhamire mw’olo lugo lw’e La Victoria lyo rhulama hofi n’Ebeteli. Gwali muhigo muzibu ogo bwenene kuli rhwê. Ntakahash’iganirira kunganaci navuzire omulala gwani omunkwa erhi bayemera okuhamira eyo munda. Oborhere bw’abantu b’omu mulala gwani bwarhurhabire bwenene. Mwali wirhu Baha aderha oku ali mubidu okushibirira nyama. Mike ali amaja omu buhya, cikone Samira na Gabriel baciri aha ka. Okuhamira e La Victoria kwarhuma baheza abîra babo bagwerhe e Caracas. Na kandi mukaniè muzigirwa Sylvia alishinganine akomere olugo lusungunu lurhali lwinja nk’olu alikomîre. Na ngasi muguma wirhu al’ishinganine acikomereze okulama omu nyumpa nsungunu. Neci, banji barhabire okuhikiriza ogo muhigo gwirhu gw’okurhenga e Caracas n’okuja e La Victoria.

Cikone, ebintu byacib’ishanja. Gabriel aja omu buhya na Samira aba n’obuhashe bw’okulama yenene. Na buzinda niè na Sylvia rhwahamagalwa oku Beteli omu mwaka gwa 2007, na kuhika buno rhuli rhwashagalukira olo lukengwa. Mugala wirhu mukulu Mike, ali akola nka mugula, anakola agwerhe kasanzi kanji ali akola nka painiya ye na mukage Monica. Gabriel naye aba mugula, ali akolera omu cihugo c’e Italie ye na mukage Ambra. Samira, naye aba painiya na kandi anakole nka volontaire orhalama oku Beteli.

Kobinali, nalamire akalamo kalimo mihigo minji ya kurhôla. Nta mango naciyunjuzize enyanya z’okurhôla eyo mihigo. Nanacibirhôla eyo mihigo agandi mango. Mba nshagalukire bwenene emikolo minji y’ekiroho nahabîrwe omu kukolera Yehova. Mw’eyi myaka yoshi egezire, nabwine kunganaci kuba kwa bulagirire okugendekera kwaba n’obwîra busêzire haguma na Yehova. Erhi rhwakarhôla emihigo y’ekiroho, ebe minene erhi misungunu, Yehova anarhuha omurhula “gulushire ngasi nkengero.” (Fl. 4:6, 7) Niè na Sylvia rhuba rhushagalukire omukolo gwirhu oku Beteli, na kandi rhwabwine oku emihigo rhwarhozîre omu kalamo, yagishirwe, bulya rhwakagihira Yehova oku nafasi ntanzi embere z’okuyirhôla.