1. Bintu bihi biguma na biguma abantu balug’iyoboha?

 ORHANYE kw’ezi hali zahikire Bahamirizi ba Yehova baguma na baguma. Nestor na mukage María, bal’ilonzize okukolera omu eneo yalimwo obulagirire bunji bw’abahubiri. * Cikone, lyo bahikiriza ogo muhigo, bal’ihûnyirwe baciyigirize okulama na nsaranga nsungunu. Cikoki, bayoboha oku nkaba barhabe n’omwishingo erhi bakalama buzira nsaranga nyinji. Erhi Biniam aba Muhamirizi wa Yehova omu cihugo ciguma omukolo gwirhu gwal’ihagalisirwemwo, ahugûkwa oku ye nka mukozi wa Nnâmahanga, alibuzibwa. Oko kwamuyobohya. Cikone, akantu al’iyobohire bwenene kwali kurhanya gurhi abantu b’omu mulala gwage bamujirira hano bamanya oku akola ali omw’idîni lihyahya. Valérie bamupimw’akansere kadarhi bwenene, anaba n’amazibu g’okupata munganga wakamubezire omu kukenga obuyemere bwage buyimangire oku Bibliya okubiyerekire omuko. Ayoboha oku nkaba afâ, n’obo boba bwage buyumvikine.

2. Bulya gurhi rhushinganine rhucihangane okuhima oboba bwirhu?

² Ka nawe okola ohikirwe n’oboba bwa ntyo? Banji muli rhwe bahikirwe n’oboba bwa ntyo. Erhi akaba rhurhaciyigirizizi okuhima oboba bwirhu, rhwanahikira aha rwarhôla emihigo mibi ciru yakazambanya obwîra bwirhu haguma na Yehova. Ntyo ko Shetani aba alonzize. Na kandi, analonze okurhuyobohya lyo rhuvuna amarhegeko ga Yehova, ciru n’irhegeko lirhuhûnyire okuhubiri omwanzi mwinja. (Maf. 12:17) Shetani aba mubi, arhajira bwonjo, ananajira obuhashe. Cikone wanacilanga naye. Gurhi wakajiramwo ntyo?

3. Bici byakarhurhabala okuhima oboba bwirhu?

 ³ Erhi rhwakayemera n’obwalagale oku Yehova aba arhuzigire, k’okuderha oku ali haguma na nirhu, Shetani arhakarhuyobohya. (Enna. 118:6) Kwa lwiganyo, omuzihi w’Olulanga lwa 118 arhimanine na hali nguma na nguma z’okuyobohya bwenene. Al’igwerhe bashombanyi banji, ciru baguma na baguma bal’ilengerire (mulongo gwa 9, 10). Hali amango ayobohire bwenene (mulongo gwa 13). Anahâbwa obuhane buzibu-zibu kurhenga emwa Yehova (mulongo gwa 18). Ciru akaba ntyo, oyo muzihi w’olo lulanga ayimba ntya: “Nta bwoba bungwerhe.” Bici byarhumire aciyumva omu murhûla ntyo? Al’imanyire oku, ciru akaba Yehova Ishe w’omu mpingu amuhîre obuhane, al’imuzigire bwenene. Oyo muzihi w’olo lulanga al’iyemire n’obwalagale oku ciru akarhimanine na kanga kahi, Nnâmahanga wage w’obuzigire akabire mubidu okumurhabala ensiku zoshi.​—Enna. 118:29.

4. Boba buhi rhwakahima erhi rhwakayemera n’obwalagale oku Yehova aba arhuzigire?

⁴ Rhushinganine rhuyemere n’obwalagale oku Yehova aba azigire ngasi muguma wirhu. Okuyemera ntyo n’obwalagale kwanarhurhabala rhuhime ebi bintu bisharhu abantu balug’iyoboha: (1) okuyoboha oku rhurhahashe okuhikiriza amalagirire g’omulala gwirhu, (2) okuyoboha abantu, (3) n’okuyoboha olufû. Abantu rhwaganiriraga omu cifungo ca burhanzi bahashire okuhima oboba bwabo bulya bal’iyemire n’obwalagale oku Yehova aba abazigire.

5. Bintu bihi na bihi byakayobohya irhwe ly’omulala? (Olole enfoto eri oku cijalada c’eyi gazeti.)

⁵ Omukristu oli irhwe ly’omulala anarhôle kwa buzibu-zibu omukolo gwage gw’okuhikiriza amalagirire g’omubiri gw’omulala gwage. (1 Tm. 5:8) Nkaba oli irhwe ly’omulala, byanahashikana omu kasanzi k’e Korona wakag’iyoboha oku waheza akazi kawe. Nkaba wakag’iyoboha oku orhahashe okulisa omulala gwawe erhi kugulipira enyumpa. Nkaba kandi wakag’iyoboha oku okaheza akazi kawe, orhahashe okupata akandi. Erhi, aka Nestor na María rhwaganiriraga embere, nkaba wakag’iyoboha oku orhakahasha okulama na nsaranga nsungunu. Shetani ahashire okujira bantu banji baleke okukolera Yehova omu kukolesa oboba bwa ntyo.

6. Bici Shetani alonza okurhuyemeza?

⁶ Shetani analonze okurhuyemeza oku Yehova arhashibirira ngasi muguma wirhu n’oku arharhurhabale lyo rhuhikiriza amalagirire g’omulala gwirhu. N’oko kwanarhuma rhwarhanya mpu rhushinganine rhujire ngasi kantu kahûnyirwe lyo rhurhag’iheza akazi kirhu, ciru akaba ako kantu karhapatini n’amakanuni g’Ebibliya.

7. Bici Yezu arhuyemezize n’obwalagale?

⁷ Bulya Yezu aba amanyire Yehova bwinja kulusha owundi muntu yeshi-yeshi, arhuyemezize n’obwalagale oku Nnâmahanga wirhu ‘ayishi ebi rhulagirirekwo embere rhumuhune.’ (Mt. 6:8) Kandi Yezu aba amanyire oku Yehova aba mubidu okuhikiriza amalagirire girhu. Rhuli Bakristu, rhuba baguma b’omu mulala gwa Nnâmahanga. Bulya ye Irhwe ly’omulala gwirhu, rhwanayemera n’obwalagale oku arhumikira akanuni ahîre b’ishe w’omulala kali omu 1 Timoteyo 5:8.

8. (a) Bici byakarhurhabala lyo rhurhakag’iyoboha oku rhurhahashe okuhikiriza amalagirire g’omulala gwirhu? (Mateyo 6:31-33) (b) Gurhi rhwakayigamwo olwiganyo lw’oyu mulume na mukage badwirhire oyu mwali wirhu muguma ebiryo?

⁸ Erhi rhwakayemera n’obwalagale oku Yehova aba arhuzigire anaba azigire omulala gwirhu, rhurhakayoboha oku rhwabula ebintu  rhulagirireko. (Osome Mateyo 6:31-33.) Yehova aba alonzize okurhuhikirigiza amalagirire girhu, n’enyanya z’obuzigire bwage, anarhuhe bintu binji bwenene! Erhi alema igulu, ajijire bintu binji bwenene kulusha ebi rhuba rhulagirireko lyo rhulama. Enyanya z’obuzigire bwage, ayunjuza igulu bintu binji rhushagalukira bwenene. (Murh. 2:9) Ciru akaba hali amango rhuba rhugwerhe ebintu rhulagirireko byone, rhwanakengera oku rhugwerhe ebyo bintu bulya Yehova anarhuhîre byo. (Mt. 6:11) Rhushinganine rhukakengera oku Yehova arhuha bintu binji kulusha ebi rhuli rhwaciyima ene, n’oku omu mango gayisha ayish’irhuha obuzine bw’ensiku n’amango. Ntyo ko Nestor na María bahikire aha bahugûkwa.​—Iz. 65:21, 22.

9. Bici olwiganyo lwa Nestor na María lwakakuyigiriza?

⁹ Nestor na María bashagalukire akalamo kinja omu cihugo c’e Colombie. Badesire ntya: “Rhwarhanya gurhi rhwakalama akalamo karhahûnyiri bintu binji n’okuyushula omukolo gwirhu gw’amahubiri, cikone rhwal’iyobohire oku rhurhakaba n’omwishingo erhi rhwakalama na nsaranga nsungunu.” Bici byabarhabire bahime obo boba bwabo? Barhanya oku njira nyinji Yehova abayeresiremwo obuzigire bwage. Bulya bal’iyemire n’obwalagale oku Yehova abashibirira ensiku zoshi, baleka akazi kabo k’omushahara mwinja. Baguza enyumpa yabo banahamira omu eneo y’ecihugo cabo yalimwo obulagirire bunji bw’abahubiri b’Obwami. Gurhi bali baciyumva enyanya z’ogo muhigo barhôzire? Nestor adesire ntya: “Rhwacibwinîre oku enderho ziri omu Mateyo 6:33 ziri z’okunali. Nta kantu koshi-koshi k’omubiri rhusag’ibula. N’ene rhukola rhugwerhe mwishingo munji omu kalamo kirhu.”

10. Bulya gurhi rhurhakasomerwa okubona bene bantu banakayoboha ababo?

¹⁰ Kurhenga mîra, abantu banakalibuza ababo. (Muh. 8:9) Kwa lwiganyo, abantu banakolese kubi obukulu bwabo, abantu babisha banakajira ebijiro by’obuminya, abanafunzi bahalalira ababo e masomo banakabajacira n’okubayobohya, hali ciru n’abantu bajirira ab’omu mulala gwabo n’obukali. Gurhi Shetani akolesamwo oboba bwa bene bantu ly’arhushumya rhurhôle emihigo mibi?

11-12. Gurhi Shetani akolesamwo oboba bwa bene bantu ly’arhushumya rhurhôle emihigo mibi?

¹¹ Shetani anakolese oboba bwa bene bantu ly’arhushumya rhuleke omukolo gw’amahubiri erhi lyo rhuleka okujira ebi Yehova arhuhûnyire rhujire. Shetani anashumye amarhegesi  ga bene bantu lyo gahanza omukolo gwirhu n’okurhulibuza. (Lk. 21:12; Maf. 2:10) Bigabi bilebe by’igulu lya Shetani binakalumîza emyanzi y’obunywesi okubirhuyerekire. Abantu bayemera obo bunywesi banarhushekera, erhi ciru banarhuhira kw’ecirhêro. (Mt. 10:36) Ka rhwanasomêrwa n’obo bulenga bwa Shetani? Nanga, ciru n’ehitya. Ali amabukolesa omu myaka igana mirhanzi.​—Ebj. 5:27, 28, 40.

¹² Okuyoboha okuhagalikwa n’amarhegesi arhali yone njira Shetani akolesa. Bantu baguma na baguma banayobohe gurhi abantu b’omu mulala gwabo barhanya hano baba Bahamirizi ba Yehova. Hali amango bayoboha oko bwenene kulusha oku bayoboha okushurhwa. Baba bazigire bwenene abantu b’omu mulala gwabo banaba balonzize bahikire aha bamanya Yehova n’okumuzigira. Banaciyumve kubi erhi bayumva abantu b’omu mulala gwabo bali baderha kubi Nnâmahanga w’okuli n’abakozi bage. Cikone, omu hali nguma na nguma abantu b’omulala bakag’irhuhagalika embere, bahikire aha bayemera okuli. Cikone, gurhigi rhwakajira erhi abantu b’omu mulala gwirhu bakarhukaga enyanya z’obuyemere bwirhu buhyahya?

13. Okuyemera n’obwalagale oku Yehova aba arhuzigire, gurhi kwakarhurhabalamwo erhi abantu b’omu mulala gwirhu bakarhukaga? (Ennanga 27:10)

¹³ Rhwanarhulirizibwa n’enderho nyinja ziri omu Ennanga 27:10. (Osome.) Erhi rhukengera kunganaci Yehova aba arhuzigire, rhurhayoboha ciru akaba rhuli rhwahagalikwa n’abantu b’omu mulala gwirhu. Kandi rhuba rhuyemire n’obwalagale oku anarhuhembe enyanya z’okulembera kwirhu. Yehova ashibirira bwinja bwenene amalagirire girhu g’omubiri, ag’ekandalala, n’ag’ekiroho kulusha oku omuntu yeshi-yeshi akajira! Ntyo ko Biniam, rhwaganiriraga embere, ahikire aha ahugûkwa.

14. Bici olwiganyo lwa Biniam lwakakuyigiriza?

¹⁴ Biniam ahikire aha aba Muhamirizi wa Yehova ciru akaba al’imanyire oku akalibuzibwe bwenene. Rhulole gurhi Biniam ahimiremwo oboba bwa bene bantu omu kumanya oku Yehova aba amuzigire. Adesire ntya: “Okulibuzibwa kwali kubi bwenene kulusha oku nal’irhanyize. Cikone, okuhagalikwa n’abantu b’omu mulala gwani ko nal’iyobohire bwenene kulusha ciru okulibuzibwa n’abarhegesi b’ecihugo. Nal’iyobohire oku omuhigo gwani gw’okuba Muhamirizi wa  Yehova gwavuna larha omurhima bulya arhali Muhamirizi wa Yehova n’oku abantu b’omulala gwani barhanya mpu nahezire.” Cikone, Biniam al’iyemire n’obwalagale oku ensiku zoshi Yehova anashibirire abantu aba azigire. Biniam ahugwîre ntya: “Narhanya gurhi Yehova arhabire abandi balembere obukenyi, akabôlo, n’ebijiro by’abantu baminya. Nal’imanyire oku, erhi nakacishwekerako Yehova, akangishire. Erhi nshwekwa kanji-kanji ciru n’okushurhagulwa, nacibonera kunganaci Yehova arhurhabala amango g’obulagirire erhi rhwakabêra bishwekerezi kuli ye.” Ago mango Yehova aba Ishe wa Biniam w’okunali, n’abakozi bage baciyerekana oku guli mulala gw’okunali gwa Biniam.

15. Bulya gurhi kurhali kubi okuyoboha olufû?

¹⁵ Ebibliya edesire oku olufû aba mushombanyi. (1 Kr. 15:25, 26) Erhi rhwakarhanya okubiyerekire olufû, rhwanaciyumva rhuyobohire, ci bwenene erhi rhwakaba rhulwazire bwenene erhi muzigirwa wirhu. Bulya gurhi rhuyoboha olufû? Bulya Yehova arhulemire n’irala ly’okulama ensiku n’amango. (Muh. 3:11) Oboba bw’olugero okubiyerekire olufû bwanarhurhabala rhulange obuzine bwirhu. Kwa lwiganyo, bwanarhushumya rhukacishoga bwinja ebi rhwalya n’okujira e sporo, okugend’ibona muganga amango rhulwazire, n’okuyaka ebyakahira obuzine bwirhu omu mazibu.

16. Gurhi Shetani akolesa oboba bwirhu bw’akaburhano okubiyerekire olufû?

¹⁶ Shetani aba amanyire oku rhuba rhuzigire obuzine. Cikone anaderhe oku rhwanaleka ngasi kantu rhugwerhe, ciru n’obwîra bwirhu haguma na Yehova, lyo rhulanga obuzine bwirhu. (Ayu. 2:4, 5) Obo buli bunywesi bwenene! Cikone, bulya Shetani ye “nn’olufû,” anakalonza okukolesa oboba bwirhu bw’akaburhano okubiyerekire olufû ly’arhushumya rhuleke okukolera Yehova. (Hb. 2:14, 15) Omu kanga kaguma na kaguma, abantu ba Shetani banayobohye Abahamirizi ba Yehova oku babaniga lyo balahira obuyemere bwabo. Erhi kandi, anakolesa akanga kazibu rhulimo k’okubukwa duba-duba ly’arhushumya rhuvune amarhegeko ga Yehova. Badogtere erhi abantu b’omulala gwirhu barhali Bahamirizi ba Yehova banarhuseza oku rhuyemere okuhirwamwo omuko, n’obo okujira ntyo kuli kuvuna irhegeko lya Nnâmahanga. Kandi erhi muntu mulebe analonza okurhushumya lyo rhuyemera njira ndebe y’okubukwa erhapatini n’Amandiko.

17. Kushimbana n’Abaroma 8:37-39, bulya gurhi rhurhashinganini rhukayoboha olufû?

¹⁷ Ciru akaba rhurhaba rhulonzize okufâ, rhuba rhumanyire oku Yehova arhakaleka okurhuzigira ciru rhwakafâ. (Osome Abaroma 8:37-39.) Erhi abîra ba Yehova bafâ, anagendekere ababîka omu bukengere bwage, banabe nk’abacizîne. (Lk. 20:37, 38) Aba agwerhe irala ly’okubagalulira obuzine. (Ayu. 14:15) Yehova alipire ebeyi likali bwenene lyo ‘rhubona obuzine bw’ensiku n’amango.’ (Yn. 3:16) Rhumanyire oku Yehova aba arhuzigire bwenene ananarhushibirire. Co cirhumire, ahali h’okuleka Yehova amango rhulwazire erhi amango rhuli omu kanga kazibu, rhunamuhûne arhurhulirize, arhuhe obwenge, n’emisi. Ntyo ko Valérie n’iba bajijire.​—Enna. 41:3.

18. Bici olwiganyo lwa Valérie lwakakuyigiriza?

¹⁸ Erhi Valérie agwerhe myaka 35, bamupimamw’akansere kadarhi bwenene abantu barhalug’ilwala. Olole gurhi obuzigire bwamurhabire ahime oboba bw’olufû. Adesire ntya: “Erhi bampimw’akansere, akalamo kirhu kashanje ho n’aho. Byal’ihûnyire mberwe lyo  ngendekera nalama. Nabonana na banganga banji babera, cikone boshi balahira oku barhakambera buzira kumpiramw’omuko. Nayoboha bwenene, cikone ntako nakayemire okuhirwamw’omuko bulya irhegeko lya Nnâmahanga likuhanzize! Omu kalamo kani koshi, Yehova anyeresire obuzigire bunji bwenene. Muli ako kanga, nani nagwerhe obulyo bw’okumuyeresa oku mba muzigire. Ngasi mango erhi bakambwizire omwanzi mubi, oko kwagirhuma nahiga ciru bwenene okushagalusa Yehova n’okurhaleka Shetani ahime. Buzinda, nayish’iberwa bwinja buzira kuhirwamw’omuko. Ciru akaba obulwala bwani bugendekire, ngasi mango Yehova anarhuhe ebi rhulagirireko. Kwa lwiganyo, oku ntimanano y’ecigamba rhwajiraga oku buzinda bw’omugobe embere bampimw’akansere, rhwayiga ecigabi cal’idesire; ‘Kupambana na Matatizo ya Leo kwa Ujasiri.’ * Eco cigabi carhurhuliriza bwenene. Rhwakacisoma ngasi mango. Okusoma ebigabi biri nk’eco n’okuba n’eprograme nyinja y’ebintu by’ekiroho, kwampire nie n’ibanie omurhûla gw’ekandalala kwanarhurhabire rhugendekere rhwaba ba lugero n’okurhôla emihigo minja.”

19. Bici byahika hano hofi-hofi?

¹⁹ Kugerera oburhabale bwa Yehova, omw’igulu lyoshi, Abakristu bahimire akanga kazibu banahashire okuhagalika Shetani. (1 Pt. 5:8, 9) Nawe wanahasha okujira ntyo. Hano hofi-hofi, Yehova ayish’irhegeka Yezu n’aba ayish’irhegeka nabo lyo ‘bahererekeza emikolo ya shetani.’ (1 Yn. 3:8) Enyuma z’aho, abakozi ba Yehova bayish’iba bali bamukolera okw’igulu ‘barhakaciba n’obwôba bulya burhankacibayegera.’ (Iz. 54:14; Mik. 4:4) Cikone, embere ako kasanzi kahike, rhukwanine rhujire okwirhu koshi lyo rhuhima oboba bwirhu.

20. Bici byakarhurhabala lyo rhuhima oboba bwirhu?

²⁰ Rhushinganine rhugendekere rhwayemere n’obwalagale oku Yehova anazigire n’okulanga abakozi bage. Eby’akarhurhabala rhujire ntyo, kuli kurhanya n’okuganirira abandi okubiyerekire gurhi Yehova alanziremwo abakozi bage omu mango ga mîra. Na kandi, rhwanakakengera gurhi arhurhabiremwo lyo rhuhima akanga kazibu. Kugerera oburhabale bwa Yehova, rhwanahima oboba bwirhu!​—Enna. 34:4.