LISA * adesire ntya: “Olukogo lwa bene wirhu na bali birhu Bakristu lo lwampumire oku murhima bwenene.” Akag’iganirira ebyamushumyagya ayemere okuli. Ntyo ko byabire omu kanga ka Anne naye. Adesire ntya: “Olukogo lw’Abahamirizi ba Yehova lo lwanshumize bwenene nyemere okuli kulusha enyigirizo zabo.” Ene, abo bali birhu bombi bali bashagalukira okusoma Ebibliya n’okurhanya bwenene kw’ebi bali basoma, cikone olukogo lo lwabahumire oku murhima bwenene.

Gurhi rhwakayerekanamwo olukogo lwahuma oku mirhima y’abantu barhuzungulusire? Rhuganirire njira ibirhi: kugerera olulimi lwirhu na kugerera ebijiro birhu. Buzinda, rhwaganirira bandi rhushinganine rhuyereke olukogo.

“Irhegeko ly’olukogo” liba oku lulimi lw’omukazi nkana oganirirwe omu citabu c’Emigani cigabi ca 31. (Mig. 31:26, NWT) Analeke er’“irhegeko” lishumye ebi aderha n’izu abiderhamwo. B’ishe w’omulala nabo bashinganine babe n’er’“irhegeko” oku lulimi lwabo. Babusi banji baba hahugûsiwe oku enderho ziderhwa n’izu ly’obukali zanarhuma abana babo baciyumva kubi, n’oku abana babo barhakayumvirhiza ebi badesire omw’izu lya ntyo. Erhi ababusi bakaderha n’izu ly’olukogo, kwanaba kulembu oku bana babo okuyumvirhiza n’okujira ebi badesire.

Obe mubusi erhi nanga, gurhi wakajira ly’okaderha omu njira y’olukogo? Ishuzo liri omu cigabi cirhanzi c’olwandiko lw’Emigani 31:26, NWT. Cidesire ntya: “Anabumbule akanwa kage nʼobwenge.” Oko kuhiziremwo okucishoga n’obwenge enderho zirhu n’izu rhwaziderhamwo. Kwanaba kwinja rhukacidosa ntya: ‘K’ebi nkola naderha byakuniza abali banyumvirhiza erhi byalerha omurhûla?’ (Mig. 15:1) Neci, kobinali kuba kwinja rhuzunguluse olulimi ekanwa embere rhuderhe.

Ogundi mugani gudesire ntya: “Ola oderha duba buzira kugerêreza anayagaze owabo nka ngorho.” (Mig. 12:18, Mashi Bible) Erhi rhwakakarhanya gurhi ebi rhwaderha n’izu rhwabiderhamwo byakajira abandi baciyumve, oko kwanarhushumya rhukalabiriza ebi rhwaderha. Okurhumikira “irhegeko ly’olukogo” kwanarhurhabala rhuyake okuderha enderho mbi n’izu ly’obukali. (Ef. 4:31, 32) Rhwanayaka entanya mbi n’enderho mbi n’okukakolesa enderho nyinja n’izu linja na lya bushagaluke. Yehova ayerekine olwiganyo lwinja muli oko erhi aha omukozi wage Eliya omurhima amango al’iyobohire. Malahika warhumagwa na Yehova amuganiza omu “izu ly’akahwenyenye n’obutûdu.” (1 Bam. 19:12, NWT) Cikone, okuba wa lukogo kuhiziremwo binji ahanyuma n’okuderha kone enderho nyinja. Kandi rhushinganine rhujire ebijiro by’olukogo. Gurhi rhwakajiramwo ntyo?

Rhunayige olwiganyo lwa Yehova omu kuderha enderho z’olukogo n’omu kujirira abandi ebijiro by’olukogo. (Ef. 4:32; 5:1, 2) Lisa, rhwaganiriraga embere, aganirire olukogo Abahamirizi bamuyeresagya. Adesire ntya: “Erhi omulala gwirhu guhûnwa okuhama buzira kulaliza, bene wirhu babirhi b’omu cigamba cirhu na bakabo barhôla ekonje oku kazi lyo bayish’irhurhabala  okuhama. Ago mango, ciru ntalicirhondera okuyiga Ebibliya!” Ebyo bijiro by’olukogo byashumya Lisa ayemere okuli.

Anne, rhwaganiriraga oku murhondero gw’eci cigabi, naye ashagalukire olukogo Abahamirizi bamuyeresagya. Adesire ntya: “Enyanya z’oku igulu liyosire ene, naba n’akarhinda okubiyerekire ngasi kantu. Ntacikag’ilangalira abantu.” Acibir’iderha ntya: “Erhi ntimanana n’Abahamirizi ba Yehova, nagwerhe akarhinda, okubiyerekire abyakag’ibashumya. Nacidosa, ‘Bulya gurhi bali banshibirira?’ Cikone, olukogo mwalimu wani w’Ebibliya anyeresagya lwarhuma nakamulangalira.” Bunguke buci oko kwadwirhe? Acibir’iyushula ntya: “Buzinda, narhondera okusegeza obwenge bwani kw’ebi nakag’iyiga.”

Rhuyumvirhe oku Lisa na Anne bahumirwe oku murhima bwenene n’ebijiro by’olukogo n’obuzigire bene wirhu na bali birhu baguma na baguma b’omu cigamba babayeresagya, n’oko kwarhuma bayiga okuli. N’olo lukogo bayeresibagwa lwabashumya barhondere okulangalira Yehova n’abakozi bage.

Bantu baguma na baguma banakolesa enderho z’olukogo n’okukamwemwerhwa enyanya z’oku baleragwa erhi aha bakuliraga. Kuli kwinja okubona bantu baguma na baguma baba birhonzi enyanya z’aha bakuliraga erhi enyanya z’oborhere bwabo. Cikone, erhi akaba ebyo byone byo birhushumya, oko kurhakayerekana oku rhuli rhwayiga olukogo lwa Nnâmahanga.​—Oshushanye n’Ebijiro by’Entumwa 28:2.

Olukogo lw’okunali ciba cigabi c’ilehe ly’iroho litagatifu lya Nnâmahanga. (Gl. 5:22, 23) Co cirhumire, lyo rhuyerekana olukogo rhukwanine rhukashenga Nnâmahanga iroho lyage litagatifu lyo lirhurhabala. Okujira ntyo kwanayerekana oku rhugwerhe irala ly’okuyiga olwiganyo lwa Yehova na Yezu. Na kandi, bulya rhuli Bakristu, rhuba rhushibirire abandi. Co cirhumire, obuzigire rhujira kuli Yehova Nnâmahanga na kuli omulungu wirhu bunarhushumye rhuyerekane olukogo. Muli ntyo, olukogo lwirhu bunabe borhere bugwerhe emisi bwenene burhenga oku murhima Nnâmahanga aba ayemire.

Kwanaba kulembu okuyeresa olukogo abantu barhuyeresirelo erhi abantu rhumanyine nabo. (2 Sam. 2:6) Njira nguma rhwakajiramwo ntyo kuli kubavuga omunkwa. (Kl. 3:15) Cikone, gurhigi rhwakajira erhi rhwakabona nka muntu mulebe arhashinganini okujirirwa omu njira y’olukogo?

Rhanya k’oku: Yehova ayerekine olwiganyo lwinja bwenene omu kuyerekana obuzigire burhashinganinwi, n’omu Kanwa kage arhuyigirizize isomo ly’obulagirire bwenene okubiyerekire okuyerekana obo borhere. Oluderho “lukogo lurhashinganinwi” lukolesibwe kanji bwenene omu Mandiko g’Ecigiriki g’Ecikristu. Gurhi Nnâmahanga arhuyeresamwo olukogo?

Orhanye oku miliyoni y’abantu Yehova ayereresire olukogo omukubaha ebi balagirireko lyo bagendekera balama. (Mt. 5:45) Ciru n’embere rhumanye Yehova, arhuyeresire olukogo. (Ef. 2:4, 5, 8) Kwa lwiganyo, ahâna Omugala cusha muzigirwa bwenene ly’afîra abantu boshi. Entumwa Paolo yayandisire oku Yehova ahânyire engombôlo “kushimbana n’obuhirhi bw’olukogo lwage lurhashinganinwi.” (Ef. 1:7) Na kandi, ciru akaba rhunajire ebyaha n’okugayisa Yehova, anagendekere arhulongoza n’okurhuyigiriza. Enyigirizo zage n’enderho zage ziba nka “nkuba” y’ehishishirha. (Lush. 32:2) Kobinali, rhurhakahash’ilyula Yehova enyanya z’olukogo loshi arhuyeresa. Na kandi, rhumanyire oku Yehova arhacirhuyeresagye olukogo lwage lurhashinganinwi, rhurhakabire n’obulangalire bw’amango gayisha.​—Oshushanye na 1 Petro 1:13.

Buzira karhinda, olukogo lwa Yehova lunarhushumye. Co cirhumire, ahali h’okucishoga abantu rhwayeresa okukogo, rhushinganine rhuyige olwiganyo lwa Yehova omukuyeresa abandi olukogo ngasi lusiku. (1 Ts. 5:15) Erhi rhwakakayeresa abandi olukogo buzira kurhama, rhwanaba nka muliro gulerha idurhu olusiku lw’emboho. Rhwanarhuliriza abantu b’omu mulala gwirhu, abirhu Bakristu, abirhu banya-kazi, abirhu banafunzi, n’abalungu birhu.

Orhanye oku bantu b’omu mulala gwawe erhi b’omu cigamba cinyu bakayunguka n’enderho zawe z’olukogo n’ebijiro byawe by’olukogo. Hanaba muntu mulebe omu cigamba cinyu wakaba alagirire omurhabale oku mukolo gw’okushibirira enyumpa, ebustani, erhi kujira ogundi mukolo, kwa lwiganyo, nk’okugend’igula bintu bilebe omu cibuye. Na kandi, erhi wakarhimanana na muntu mulebe olagirire oku burhabale omu mukolo gw’amahubiri, wanamurhabala.

Omu kuyiga olwiganyo lwa Yehova, rhuleke enderho zirhu n’ebijiro birhu bikalongozibwa ensiku zoshi n’“irhegeko ly’olukogo.”