1. Bici Yehova ayemezize n’obwalagale abanya-byaha baciyunjuzize?

 CIRU akaba Yehova ye Mulemi wirhu, ye ohâna amarhegeko, na Mutwi w’Emanja, kandi aba Larha wirhu w’obuzigire w’omu mpingu. (Enna. 100:3; Iz. 33:22) Erhi rhwakamugokeza rhukanaciyunjuza n’omurhima goshi, aba agwerhe obuhashe bw’okurhubabalira anaba alonzize okujira ntyo. (Enna. 86:5) Kugerera omulebi Izaya, Yehova ayemeza abantu bage n’obwalagale ntya: “Ebyaha binyu bikabâ bidukwire nka mwambalo gwa kaduku, byahinduka byêru nka lubula.”​—Iz. 1:18.

2. Erhi akaba rhulonzize rhube n’omurhûla haguma n’abandi, bici rhushinganine rhukajira?

² Bulya rhurhaba bimana, rhweshi rhunaderhe erhi kujira ebintu byagayisa abandi. (Yk. 3:2) Cikone, oko kurhali kuderha oku rhurhakaba n’obwîra bwa hofi-hofi haguma nabo. Rhwanaba n’obwîra bwa ntyo haguma nabo erhi rhwakaciyigiriza okukababalira. (Mig. 17:9; 19:11; Mt. 18:21, 22) Erhi rhwakagokezanya omu njira nsugunu-ngunu, Yehova aba alonzize rhukababalirana. (Kl. 3:13) Rhugwerhe ebirhumire binja by’okujira ntyo. Kobinali, Yehova anarhubabalire “omu njira nnene” buzira kusezibwa.​—Iz. 55:7, NWT.

3. Bici rhwaganirira mw’eci cigabi?

³ Mw’eci cigabi, rhwaganirira gurhi abantu barhali bimana bakahash’iyiga olwiganyo lwa Yehova lw’okubabalira. Byaha  bihi rhushinganine rhukamanyisa abagula? Bulya gurhi Yehova aba alonzize rhukababalira abandi? Na bici rhwakaciyigiriza kugerera abirhu Bakristu baguma na baguma baciyumvirhe kubi bwenene enyanya z’ebyaha by’abandi?

4. (a) Erhi omukozi wa Yehova akajira ecaha cizibu, bici ashinganine ajire? (b) Omukolo gw’abagula guba guhi erhi barhimanana n’omuntu wajijire ecaha?

⁴ Rhushinganine rhukamanyisa abagula erhi muntu mulebe akajira ecaha cizibu. Enyiganyo z’ebyaha bizibu ziyerekinwe omu 1 Abakorinti 6:9, 10. Ecaha cizibu kuba kuvuna irhegeko lya Nnâmahanga omu njira mbi bwenene. Erhi Omukristu akajira ecaha ca ntyo, akwanine ayegere Yehova kugerera isala, n’okugend’ibona abagula lyo bamurhabala. (Enna. 32:5; Yk. 5:14) Omukolo gw’abagula muli ako kanga guba guhi? Yehova yene ojira obuhashe bw’okubabalira ebyaha loshi-loshi, ananajire ntyo kugerera engombôlo. * Cikone, Yehova ahîre abagula omukolo gw’okuhiga kugerera Amandiko erhi omunya-byaha anacibêra omu cigamba erhi nanga. (1 Kr. 5:12) Egarhi k’ebintu bajira lyo bahikiriza ogo muhigo, kuba kulonza amashuzo kw’aga madoso: K’oyo muntu anajijire eco caha n’obulonza? K’oyo muntu alipanzire embere z’akasanzi oku ajira eco caha? Ka liguma lyone ajijire eco caha erhi hamagera nsiku nyinji ali acijira? N’akantu k’obulagirire bwenene, ka hali ebimanyiso biyerekine oku aciyunjuzize n’omurhima goshi? Ka hali ebimanyiso biyerekine oku Yehova amubabalire.​—Ebj. 3:19.

5. Migisho ehi omukolo gw’abagula gulerha?

⁵ Erhi abagula barhimanana n’omuntu wajijire ecaha, baba balonzize okurhôla omuhigo gushushine n’ogw’arhôzirwe empingu. (Mt. 18:18) Bunguke buci ogo mupango gulerhera ecigamba? Ogo mupango gunalerhere ecigamba obunguke omu kujira abanya-byaha barhaciyunjuzizi barhenzibwemwo lyo barhag’ishereza ebibuzi bya Yehova by’engulo ndârhi. (1 Kr. 5:6, 7, 11-13; Tt. 3:10, 11) Na kandi, oko kunarhabale omunya-byaha aciyunjuze ly’ababalirwa na Yehova. (Lk. 5:32) Abagula banashenge enyanya z’omunya-byaha ociyunjuzize n’okuhûna Yehova amurhabale ly’acibiba n’ehali nyinja y’ekiroho.​—Yk. 5:15.

6. Erhi omuntu akatengwa n’ecigamba, k’anacibabalirwa? Ohugûle.

⁶ Gurhigi byakaba erhi omuntu akabula buciyunjuza amango abagula barhimananaga naye? Omu kanga ka ntyo, oyo muntu anatengwa n’ecigamba. Erhi akaba oyo muntu avunyire irhegeko ly’ecihugo, abagula barhakamucîka mpu ly’arhag’isarula amalehe g’eco caha cage. Yehova aba ayemerire abarhegesi b’ecihugo okuciranûla n’okuhana omuntu yeshi-yeshi ovunyire irhegeko ly’ecihugo, abe aciyunjuzize erhi nanga. (Rm. 13:4) Cikone, erhi buzinda omuntu akahugûkwa oku ebi ajijire byali bibi, akanaciyunjuza n’omurhima goshi n’okushanja entanya zage n’ebijiro byage, Yehova aba mubidu okumubabalira. (Lk. 15:17-24) Yehova anamubabalira ciru akaba ebyaha byage byali bizibu bwenene.​—2 Nga. 33:9, 12, 13; 1 Tm. 1:15.

7. Okubabalira omuntu warhugomîre, k’okuderha gurhi?

⁷ Rhuvuzire omunkwa okubona rhurhagwerhi omukolo gw’okuhiga erhi Yehova ababalira omuntu erhi nanga! Cikone, hali ebi rhuba rhushinganine okuhiga. Bici ebyo? Hali amango omuntu akaba anarhugomîre, ciru bwenene, cikone anarhuhûna obwonjo. Hali agandi mango omuntu akarhugokeza arhanarhûne obwonjo. Ciru akaba  ntyo, rhwanahiga okubabalira oyo muntu n’okuyaka okumubikira akarhinda erhi burhe. Kobinali, okujira ntyo kwanahûna akasanzi n’okucihangana bwenene, ci bwenene erhi akaba ebi oyo muntu arhujirire byarhulumisize omurhima bwenene. Ilabiro ly’Akalalizi ly’omu nsiku 15/9/1994 (omu Ciswahiri) lidesire ntya: “Erhi obabalira omunya-byaha, oko kurhali kuderha oku olunzire okuboko eco caha cage. Erhi Omukristu ababalira ecaha, kuba kuleka ebintu byoshi omu maboko ga Yehova. Ye Mutwi w’Emanja mushinganyanya w’empingu n’igulu, ananahikiriza obushinganyanya omu kasanzi kashinganine.” Bulya gurhi Yehova arhuhîre omurhima oku rhukababalira n’okuleka obushinganyanya oku nafasi bukwanine, k’okuderha omu maboko gage?

8. Gurhi okubabalira abandi kuyerekana oku rhuvuzire Yehova omunkwa enyanya z’obwonjo bwage?

⁸ Erhi rhubabalira, rhunayerekane oku rhuvuzire Yehova omunkwa enyanya z’obwonjo bwage. Omu lwiganyo luguma, Yezu ashushanyize Yehova na mwami muguma wababaliraga ideni linene ly’omuja wage muguma bulya arhahashaga okulilyula. Cikone, oyo muja bababaliraga ayabirwa okubêra obwonjo owabo muja wamugwerhe ideni lisungunu bwenene ly’ensaranga. (Mt. 18:23-35) Bici Yezu alonzagya okurhuyigiriza? Erhi akaba rhuvuzire Yehova omunkwa enyanya z’obwonjo bunji arhuyeresa, oko kwanarhushumya rhukababalira abandi. (Enna. 103:9) Omu myaka yageraga, Ilabiro ly’Akalalizi liguma lyadesire ntya: “Ciru rhwakababalira abirhu bantu kanga, nta mango rhwakahikira oku kubabalira kwa Nnâmahanga n’obwonjo arhuyeresa kugerera Kristu.”

9. Bandi Yehova abêra obwonjo? (Mateyo 6:14, 15)

⁹ Yehova anababalire abababalira abandi. Yehova anabêre obwonjo ababubêra abandi. (Mt. 5:7; Yk. 2:13) Yezu ayerekine ntyo n’obwalagale erhi ayigiriza abanafunzi bage okushenga. (Osome Mateyo 6:14, 15.) Embere z’aho, Yehova ali erhi ayerekine ntyo kugerera ebi abwiraga omukozi wage Ayubu. Oyo mulume mwishwekerezi ayagazibwa bwenene n’enderho mbi z’abarhuliriza bage b’obunywesi, k’okuderha Elifazi, Bildadi, na Sofari. Yehova abwira Ayubu oku asalire enyanya zabo. Erhi Ayubu ayus’ijira ntyo, Yehova amugisha.​—Ayu. 42:8-10.

10. Bulya gurhi okubîka akarhinda kwanarhulerhera amazibu? (Abefezi 4:31, 32)

¹⁰ Okubîka akarhinda kwanarhulerhera amazibu. Okubîka akarhinda ko kuba nka kubarhula omuzigo muzirho, na Yehova aba alonzize rhushagalukire omurhûla gulerhwa n’okurhûla omuzigo gwa ntyo. (Osome Abefezi 4:31, 32.) Yehova arhuyinginzire oku ‘rhuleke okukunira, rhucîke oburhe burhugwerhe.’ (Enna. 37:8) Erhi rhwakakolesa er’ihano lyanarhurhabala. Okubîka akarhinda, kwanashereza amagala girhu n’obukengere bwirhu. (Mig. 14:30) Okubîka akarhinda ntako kwakajira owarhugokezagya, kuli nka kula wakanywa sumu omanye mpu ye munywire. Cikone erhi rhubabalira abandi, rhunabe erhi rhucijirire aminja. (Mig. 11:17) Rhunabe n’omurhûla omu bwenge n’omu murhima, rhunanahashe okugendekera embere omu mukolo gwa Yehova.

11. Bici Ebibliya edesire lugenga okucihôla? (Abaroma 12:19-21)

¹¹ Rhuleke Yehova acihôle. Yehova arhaba arhuhire oluhuma lw’okucihôla erhi muntu mulebe akarhugokeza. (Osome Abaroma 12:19-21.) Rhurhajira obuhashe bw’okuciranûla  ebintu omu njira eshinganine, nk’oku Nnâmahganga ajira, bulya rhurhaba rhuhugûsirwe ebintu byoshi rhurhanaba bimana. (Hb. 4:13) Hali n’amango entanya zirhu zirhuma rhurhaciranûla ebintu bwinja. Kugerera iroho lyage litagatifu, Yehova alongoza Yakobo okuyandika ntya: “Obukunizi bw’omuntu burhajira omukolo gw’obushinganyanya bwa Nnâmahanga.” (Yk. 1:20) Rhwanayemera n’obwalagale oku Yehova ajira ebintu bishinganine n’okujira obushinganyanya buhikirizibwe.

12. Gurhi rhwakayerekanamwo oku rhulangalire obushinganyanya bwa Yehova?

¹² Okubabalira kunayerekane oku rhulangalire obushinganyanya bwa Yehova. Omukuleka ebintu omu maboko ga Yehova, rhunayerekane oku rhulangalire oku ayish’ikûla amazibu goshi gadwirhwe n’ecaha. Omw’igulu lihyahya arhulaganyize, ebirhulumisa omurhima ‘ntaye wacibikengêre, byoshi byahera omu bukengêre.’ (Iz. 65:17, Mashi Bible) Cikone, erhi akaba omuntu anarhugokize n’oko kurhulumise omurhima bwenene, ka byanahashikana rhuleke okubîka oburhe n’akarhinda omu murhima gwirhu? Rhulole gurhi Bahamirizi baguma na baguma bahashire okujira ntyo.

13-14. Bici olwiganyo lwa Tony na José lukuyigirizize okubiyerekire okubabalira?

¹³ Bene wirhu na bali birhu banji bahizire okubabalira ciru akaba ebijiro by’abandi byabalumisize omurhima bwenene. Migisho ehi okujira ntyo kwabalerhire?

¹⁴ Myaka minji embere Tony, * olama omu Philippines, ayige okuli, amanya oku mulume muguma ohamagalwa José ye wanigaga mukulu wage muguma. Ago mango, Tony ali mukali bwenene nka ntale na muminya, analonza okucihôla. José agwarhwa anahêkwa omu prizo enyanya z’obo bunizi. Enyuma z’aho erhi José ashwekûlwa, Tony ahiga oku amulongereza kuhika amunige. Agula ebunduki ly’ahikiriza ogo muhigo. Muli ako kasanzi, Tony arhondera okuyiga Ebibliya haguma n’Abahamirizi ba Yehova. Adesire  ntya: “Kugerera ifunzo lyani ly’Ebibliya, nahugûkwa oku nal’ishinganine okushanja oborhere bwani n’ebijiro byani, n’oko kwal’ihiziremwo okuleka akarhinda kani.” Erhi hagera nsiku, Tony abatizibwa n’enyuma z’aho aba mugula omu cigamba. Orhanye kunganaci asomirwe erhi ayumva oku José naye akola aba Muhamiziri wa Yehova! Erhi bombi barhimanana, bahoberana n’obushagaluke, na Tony abwira José oku amubabalire. Tony adesire oku okubabalira José kwamulerhire mwishingo munji, ciru arhakahash’iganirira gurhi aciyumvirhe. Kobinali, Yehova agishire Tony enyanya z’okubabalira buzira kusezibwa.

15-16. Bici olwiganyo lwa Peter na Sue lukuyigirizize okubiyerekire okubabalira?

¹⁵ Omu mwaka gwa 1985, Peter na Sue bali oku ntimanano y’ecigamba omu Nyumpa y’Entimanano erhi ebombe ebasha buzira kulaliza. Mulume muguma ali erhi arhezire eyo bumbe omu Nyumpa y’Entimanano! Sue ayagalika bwenene n’oko kwamulerhera amazibu g’okurhacibona n’okurhaciyumva. Na kandi, Sue arhacikag’ibayirwa n’akantu koshi-koshi. * Kanji-kanji Peter na Sue bakagicidosa ntya: ‘K’omuntu wajiraga ecijiro cigalugalu ntya ali muguma-guma erhi gurhi?’ Myaka minji enyuma z’aho, oyo muntu warhegaga eyo bombe, orhali Muhamirizi wa Yehova, ashwêkwa analutwirwa okubêra omu prizo akalamo kage koshi. Erhi badosa Peter na Sue erhi babalire oyo mulume, baderha ntya: “Yehova anarhuyigirize oku okubîka oburhe n’akarhinda kwanarhulerhera amazibu g’omubiri, ag’ekandalala, n’ag’omu bukengere. Erhi ago maligo gayus’ijirwa ntya, rhwashenga Yehova oku arhurhabale rhuyake okubîka akarhinda n’oburhe rhunagendekere n’akalamo kirhu.”

¹⁶ Ka kwali kulembu kuli bo okubabalira oyo mulume? Nanga ciru n’ehitya. Bayushwire ntya: “Hali amango rhuyumva oburhe bwenene erhi Sue ayumva amalumwa enyanya z’oko kuyagazibwa ayagazibagwa. Cikone rhurhasegeza obwenge bwirhu kw’ebyo, n’obo burhe  bwirhu bunahwe duba-duba. Rhwanaderha n’omurhima gwirhu goshi oku, erhi lusiku luguma oyo warhegaga eyo bombe akaba mwene wirhu, rhwanamuyegereza. Ebyo byarhuhikiraga byarhuyigirizize oku amakanuni g’Ebibliya ganarhukûle omu buja, omu njira nyinji bwenene rhurhakahash’irhanya! Na kandi, okumanya oku hano hofi-hofi Yehova ayusa amazibu goshi kunarhurhulirize bwenene.”

17. Bici olwiganyo lwa Myra lukuyigirizize okubiyerekire okubabalira?

¹⁷ Myra ayigaga okuli erhi ajire omu buhya anakola agwerhe bana babirhi barho. Iba arhayemeraga okuli. Erhi hagera nsiku ajira obuhushi analeka omulala gwage. Myra adesire ntya: “Erhi ibanie andeka nie n’abana birhu babirhi, naciyumva kubi bwenene nk’oku bantu banji baciyumva enyuma z’okulenganywa n’omuzigirwa wabo: nayumva amalumwa omu murhima, ntacikag’icilangalira, nagaya, nakacitumuza, nakaciyunjuza n’okuyumva oburhe.” Ciru akaba obuhya bwabo bwavunisire, Myra agendekera ayumva amalumwa bulya iba amulenganyize. Myra acib’iriderha ntya: “Hagezire myaka minji ndi nayumva oburhe n’obukunizi nanahugûkwa oku okuciyumva ntyo kwakag’ishereza obwîra bwani haguma na Yehova na haguma n’abandi.” Buno Myra adesire oku alesire obo bukunizi arhanacigwerhi entanya mbi okubiyerekire oyo wali iba. Alangalire oku lusiku luguma oyo wali iba anakolere Yehova. Myra ahashire okusegeza obwenge bwage oku kasanzi kayisha. Ciru akaba yene walezire abo bana bage babirhi, abarhabire bahikira okuba bakozi ba Yehova. Ene, Myra ashagalusire okukolera Yehova haguma n’abo bana bage babirhi n’emilala yabo.

18. Bici rhwakayemera n’obwalagale okubiyerekire Yehova bulya ye Mutwi w’Emanja Mukulu?

¹⁸ Rhuhîrwe omurhima okumanya oku, arhali rhwe rhushinganine rhuhige gurhi abantu bakwanine okutwirwa olubanja! Bulya Yehova ye Mutwi w’Emanja Mukulu, ahikiriza ogo mukolo gw’obulagirire. (Rm. 14:10-12) Rwanayemera n’obwalagale oku, ensiku zoshi atwa emanja kushimbana n’amakanuni gage mimana gayerekire aminja n’amabi. (Murh. 18:25; 1 Bam. 8:32) Nta lusiku akajira akantu karhali kashinganyanya!

19. Bici Yehova ayish’ihikiriza bulya ye Mutwi w’Emanja mushinganyanya?

¹⁹ Rhuli rhwalindirira amango Yehova ayusa amazibu goshi galerhwa n’ecaha n’okurhaba bimana. Ago mango, amalumwa girhu goshi g’omubiri nag’ekandalala gayish’ihwa loshi-loshi. (Enna. 72:12-14; Maf. 21:3, 4) Ago malumwa garhakac’ikengerwa ciru n’ehitya. Embere ako kasanzi kinja kahike, rhuvuzire Yehova omunkwa bwenene okubona arhuhîre obuhashe bw’okuyiga olwiganyo lwage lw’okubabalira.