ECIGABI C’OKUYIGA 24
Yehova Ye Babalira Bwenene
“Nyamuzinda oba mwinja Muhanyi, bulya oba mubidu w’okubabalira, orhanayima [ojira obuzigire bwishwekerezi kuli, NWT] ngasi boshi bakushenga.”—ENNA. 86:5, Mashi Bible.
LWIMBO 42 Sala ya Watumishi wa Mungu
EBI RHWAYIGA *
1. Nk’oku biyerekinwe omu Omuhanûzi 7:20, kantu kahi k’okuli Mwami Solomoni ayerekine?
MWAMI Solomoni aderha ntya: “Hanola igulu harhali muntu mushinganyanya olya wankakola aminja buzira kulogorha [kujira ecaha] ciru n’eriguma.” (Muh. 7:20) Kobinali ntyo! Rhweshi rhuba banya-byaha. (1 Yn. 1:8) Co cirhumire, rhweshi rhuba rhulagirire oku kubabalirwa na Nnâmahanga n’abirhu bantu.
2. Gurhi omuntu aciyumva erhi ababalirwa n’omwîra wage wa hofi-hofi?
2 Buzira karhinda, okengire amango wagokezagya omwîra wawe wa hofi-hofi. Wal’ilonzize mugendekere mwaba bîra, na ntyo wamuhûna obwonjo n’omurhima goshi. Gurhi waciyumvirhe erhi oyo mwîra wawe akubabalira buzira kusezibwa? Kobinali, waciyumvirhe bwinja wanashagaluka bwenene!
3. Bici rhwaganirira mw’eci cigabi?
3 Rhuba rhulonzize Yehova abe Mwîra wirhu wa hofi-hofi, cikone hali amango rhuderha erhi kujira ebintu byamugayisa. Cikoki, bulya gurhi rhwakayemera n’obwalagale oku Yehova aba alonzize okurhubabalira? Omu njira nci okubabalira kwa Yehova kuba kwago-kwago kulusha oku rhwehe rhubabalira? Na buzinda, ndi wakababalirwa na Yehova?
YEHOVA ABA MUBIDU OKUBABALIRA
4. Bulya gurhi rhwakayemera n’obwalagale oku Yehova aba mubidu okubabalira?
4 Akanwa ka Nnâmahanga karhuyemezize n’obwalagale oku Yehova aba mubidu okubabalira. Erhi Yehova afulûlira Musa amorhere gage oku Ntôndo Siyoni, aderha ntya kugerera malahika: “Yehova, Yehova, Nnâmahanga w’olukogo n’obwonjo, orhakunîra duba anaba wa buzigire bunji bwishwekerezi n’okuli, anakayerekana obuzigire bwishwekerezi oku bihumbi by’abantu, anababalire igosa n’obubi n’ecaha.” (Lub. 34:6, 7, NWT) Yehova aba Nnâmahanga w’olukogo n’obwonjo anaba mubidu ensiku zoshi okubabalira abanya-byaha baciyunjuzize.—Neh. 9:17; Enna. 86:15.
Yehova ayishi bwinja ebyarhuhikire omu kalamo kirhu byarhumaga rhwaba n’oborhere rhugwerhe ene (Olole ecifungo ca 5)
5. Nk’oku biyerekinwe omu Ennanga 103:13, 14, bici okumanyirira abantu kushumya Yehova ajire?
5 Bulya Yehova ye Mulemi wirhu, aba amanyire ngasi kantu okubirhuyerekire. Okuhugûkwa oku Yehova aba amanyire ngasi kantu okubiyerekire ngasi muntu hanw’igulu kusomezize bwenene. (Enna. 139:15-17) Co cirhumire, anabona okurhaba bimana koshi rhwayimire kurhenga oku babusi birhu. Ciru aba amanyire ebyarhuhikire omu kalamo byarhumaga rhwaba n’oborhere rhugwerhe ene. Bici oko kumanyirira abantu kushumya Yehova ajire? Oko kunamushumye abe wa bwonjo kurhuyerekera.—Enna. 78:39; osome Ennanga 103:13, 14.
6. Gurhi Yehova ayerekinemwo oku aba alonzize okubabalira?
6 Yehova ayerekine oku aba alonzize okubabalira. Aba ahugûsirwe oku enyanya z’ebijiro bya Adamu, muntu murhanzi, rhweshi rhwahêsire ihanja ly’ecaha n’olufû. (Rm. 5:12) Nta kantu rhwakahash’ijira lyo rhurhenga mw’er’ihanja ly’olufû n’ecaha erhi kulirhenzamwo owundi muntu. (Enna. 49:7-9) Cikone, Nnâmahanga wirhu w’obuzigire ayerekine obwonjo anajira kantu kalebe ly’arhukûla mw’er’ihanja. Kantu kaci ajijire? Nk’oku olwandiko lwa Yowane 3:16 luyerekine, Yehova arhuma Omugala cusha ly’arhufîra. (Mt. 20:28; Rm. 5:19) Yezu afâ ahali hirhu ly’acungula ngasi yeshi waba n’obuyemere muli ye. (Hb. 2:9) Kobinali, Yehova aciyumvirhe kubi bwenene erhi abona Omugala muzigirwa afâ olufû lw’amalumwa manji na lwa kubonesa nshonyi! Buzira karhinda, Yehova arhakalesire Omugala afê erhi akaba arhal’ilonzize okurhubabalira.
7. Nyiganyo zihi nguma na nguma ziganirirwe omu Bibliya z’abantu Yehova ababalire buzira kusezibwa?
7 Ebibliya erimwo nyinganyo nyinji z’abantu Yehova ababalire buzira kusezibwa. (Ef. 4:32) Ndi okengire? Nkaba orhanyize okubiyerekire Mwami Manasé. Manasé ali muntu mubi wagomeraga Yehova omu njira nyinji mbi bwenene. Aharamya rhunnâmahanga rhw’obunywesi anashumya abandi nabo bajire ntyo. Aniga abana bage yenene omu kubahâna nterekêro kuli rhunnâmahanga rhw’obunywesi. Ciru ahikira aha ahira ensanamu ya hinnâmahanga hy’obunywesi omu hekalu ntagatifu ya Yehova. Okubimuyerekire, Ebibliya edesire ntya: “Ajira mabi manji omu masu ga Nyamubâho, galya ga okumukuniza.” (2 Nga. 33:2-7) Cikone, erhi Manasé aciyunjuza n’omurhima goshi, Yehova amubabalira buzira kusezibwa. Ciru, Yehova acib’imugalula oku cirhi cage c’obwami. (2 Nga. 33:12, 13) Nkaba ocibir’irhanya okubiyerekire Mwami Daudi, wagomeraga Yehova erhi ajira ebyaha bizibu, bihiziremwo obuhushi n’obunizi. Cikone, erhi Daudi aciyunjuza n’omurhima goshi n’okuyemera amagosa gage, naye Yehova amubabalira. (2 Sam. 12:9, 10, 13, 14) Kobinali, rhwanayemera n’obwalagale oku Yehova aba alonzize okubabalira. Na nk’oku rhwayish’ibona, Yehova anababalire omu njira yago-yago kulusha oku bene bantu bababalira.
YEHOVA ANABABALIRE OMU NJIRA YAGO-YAGO
8. Bulya Yehova ye Mutwi w’Emanja oshinganine, gurhi oko kuhuma oku bushashe bwage bw’okubabalira?
8 Yehova ye “mutwi w’emmanja w’igulu lyoshi.” (Murh. 18:25) Omutwi w’emanja mwinja aba ashinganine ahugûkwe bwinja amarhegeko. Yehova ye Mutwi wirhu w’Emanja anaba ahugûsirwe bwinja amarhegeko bulya ye gahâna. (Iz. 33:22) Ahanyuma na Yehova, nta wundi muntu oba omanyire bwinja-bwinja ebinja n’ebibi. Bindi bici omutwi w’emanja mwinja aba alagirireko? Aba alagirire oku kumanya ebintu byoshi okubiyerekire kanga kalebe embere atwe olubanja. Co cirhumire, Yehova ye Mutwi w’Emanja mwinja bulya ngasi mango anabe amanyire ebintu byoshi okubiyerekire ngasi kanga.
9. Bici Yehova aba ahugûsirwe erhi ahiga okubabalira muntu mulebe?
9 Lubero n’abatwi b’emanja ba bene bantu, ensiku zoshi Yehova anabe amanyire bwinja-bwinja ebintu byoshi okubiyerekire ngasi kanga. (Murh. 18:20, 21; Enna. 90:8) Obuhashe bwage bw’okutwa emanja burhaba buyimangire kw’ebi abantu babona kone erhi kuyumva. Yehova aba ahugûsirwe bwinja-bwinja oku amorhere omuntu ayimaga kurhenga oku babusi bage, oku aleragwamwo, aha aburhiragwa, n’oku ayosire ekandalala n’omu bukengere bwage, byanashumya ebijiro byage. Kandi Yehova anasome omurhima gw’omuntu. Na kandi anabone ebishumya omuntu ajire kantu kalebe. Nta kantu kaba kafulisirwe omu masu ga Yehova. (Hb. 4:13) Co cirhuma, erhi Yehova ababalira muntu mulebe, anajire ntyo bulya ahugûsirwe ebintu byoshi okubiyerekire akanga k’oyo muntu.
Yehova aba mushinganyanya, arhanajira kabôlo. Arhakahâbwa cituliro (Olole ecifungo ca 10)
10. Bulya gurhi rhwakaderha oku ensiku zoshi Yehova anatwe emanja omu bushinganyanya? (Olushika 32:4)
10 Ensiku zoshi, Yehova anakatwa emanja omu bushinganyanya. Yehova arhajira kabôlo ciru n’ehitya. Arhababalira omuntu mpu bulya ali w’iranga linja, ali mugale, amanyikine bwenene, erhi bulya agwerhe buhashe bulebe. (1 Sam. 16:7; Yk. 2:1-4) Ntaye wakaseza Yehova mpu ajire kantu kalebe erhi kumuha ecituliro. (2 Nga. 19:7) Emihigo yage erhaba eyimangire oku bihamba kandi erhi oku ali aciyumva. (Lub. 34:7) Kobinali, Yehova ye Mutwi w’Emanja mwinja bwenene bulya aba ahugûsirwe ngasi kantu okubirhuyerekire n’okubiyerekire akanga kirhu.—Osome Olushika 32:4.
11. Omu njira nci okubabalira kwa Yehova kuba lubero n’oku abantu bababalira?
11 Abayandikaga Amandiko g’Ecihabraniya bal’ihugûsirwe bwinja oku Yehova anakababalira omu njia yago-yago. Omu mandiko maguma na maguma, bakolesize oluderho lw’Ecihabraniya citabu ciguma cidesire oku “lunakolesibwe omu kuganirira okubabalira Nnâmahanga ababalira abanya-byaha, cikone nta lusiku lwakakolesibwa omukuganirira okubabalira kw’olugero omuntu ababalira owabo muntu.” Yehova yene ojira obuhashe bw’okubabalira loshi-loshi omunya-byaha ociyunjuzize. Bunguke buci rhuba nabo erhi Yehova arhubabalira?
12-13. (a) Bunguke buci omuntu aba nabo erhi ababalirwa na Yehova? (b) Erhi Yehova ababalira omuntu, k’anacimutumuza enyanya z’eco caha?
12 Erhi rhuyemera oku Yehova arhubabalire, rhunashagalukire “orhusanzi rhw’okurhuliriza,” rhuhiziremwo omurhûla gw’omu bukengere, rhunanabe n’ezamiri ecîre. Okubabalira kwa ntyo kurharhenga emwa bene bantu cikone kushinganine kurhenge emwa “Yehova yenene.” (Ebj. 3:19, NWT) Erhi Yehova arhubabalira, anagalule loshi-loshi obwîra bwage haguma na nirhu na ntyo rhunabe nk’abarhajijire ecaha.
13 Erhi Yehova arhubabalira, arhakacirhutumuza ciru n’ehitya erhi kurhuhana enyanya z’eco caha. (Iz. 43:25; Yer. 31:34) Yehova anakwebe kuli ebyaha birhu “nka kulya ebushoshokero eri kulî n’ebuzikiro.” * (Enna. 103:12) Erhi rhurhanya kunganaci Yehova ababalira, rhunasomerwe bwenene n’okumuvuga omunkwa. (Enna. 130:4) Cikone, ndi wakababalirwa na Yehova?
NDI YEHOVA ABABALIRA?
14. Bici rhwayizire kuhika aha okubiyerekire omuhigo gwa Yehova gw’okubabalira?
14 Nk’oku rhwabwine, erhi Yehova ahiga okubabalira omuntu, arhalola erhi ecaha cage ciri cinene erhi cisungunu. Kandi, rhwabwine oku Yehova anakolese obumanye bwage nka Mulemi, Ohâna amarhegeko, na Mutwi w’Emanja embere ahige erhi ababalira omuntu erhi nanga. Bintu bihi Yehova arhanyako embere ahige erhi ababalira omuntu erhi nanga?
15. Kushimbana na Luka 12:47, 48, kantu kaguma kahi Yehova arhanyako embere ahige erhi ababalira erhi nanga?
15 Kantu kaguma Yehova arhanyako kuba kumanya erhi omunya-byaha ahugûsirwe oku ebi anajiraga biri bibi. Yezu ayerekine ntyo n’obwalagale kugerera enderho zage ziri omu Luka 12:47, 48. (Osome.) Omuntu ohiga okujira n’obulonza akantu kabi anamanyire bwinja-bwinja oku ebi ali ajira binagayise Yehova, anabe erhi ajijire ecaha cizibu. Yehova anahiga oku arhababalire oyo muntu. (Mk. 3:29; Yn. 9:41) Cikone, hali agandi mango rhuhugûkwa oku ebi rhwajijire biri bibi. Ka rhwanaba n’obulangalire boshi-boshi bw’okubabalirwa muli ako kanga? Neci! Bulya hali akandi kantu Yehova arhanyako embere ahige erhi arhubabalira erhi arharhubabalire.
Rhwanalangalira oku Yehova arhubabalira erhi rhwakaciyunjuza n’omurhima goshi (Olole ecifungo ca 16-17)
16. Okuciyunjuza k’okuderha gurhi, na bulya gurhi kuli kwa bulagirire erhi akaba rhulonzize Yehova arhubabalire?
16 Akandi kantu Yehova arhanyako, kuba kumanya erhi omunya-byaha aciyunjuzize okunali. Okuciyunjuza k’okuderha gurhi? Okuciyunjuza kuba “kushanja obukengere, entanya, erhi muhigo.” Kuhiziremwo entanya z’okuciyumva kubi n’okugaya bwenene enyanya z’ebintu bibi omuntu anajijire erhi enyanya z’ebintu binja al’ishinganine ajire cikone arhabijijire. Omuntu ociyunjuzize anagaye enyanya z’ebintu bîbi anajijire na kandi bulya analesire obwîra bwage haguma na Yehova buzambanye n’oko kwarhuma ajira ebyo bintu bibi. Okengere oku Mwami Manasé na Mwami Daudi bombi bajijire ebyaha bizibu; ciru akaba ntyo Yehova abababalira bulya baciyunjuzize n’omurhima goshi. (1 Bam. 14:8) Kobinali, Yehova aba ashinganine abone ebimanyiso biyerekine oku omuntu aciyunjuzize ly’amubabalira. Cikone rhurhashinganini rhuciyumve kubi kone enyanya z’ecaha rhwajijire. Rhushinganine rhube babidu okurhôla omuhigo. * N’ako kali kandi kantu Yehova arhanyako.
17. Okuhinduka k’okuderha gurhi, na bulya gurhi kuli kwa bulagirire lyo rhurhagicib’igalukira ebyaha birhu bya mîra? (Izaya 55:7)
17 Akandi kantu k’obulagirire Yehova arhanyako kuba kuhinduka kw’omuntu wajiraga ecaha. Okuhinduka kuba “kuhindula olugenzi.” Omu zindi nderho, omuntu ashinganine ahindule olugenzi lwage omu kuleka ebijiro byage bibi n’okurhondera alama nk’oku Yehova alonzize. (Osome Izaya 55:7.) Oyo muntu akwanine ashanje obukengere bwage ly’arhondera okulongozibwa n’entanya za Yehova. (Rm. 12:2; Ef. 4:23) Ashinganine ahige okuleka entanya mbi n’ebijiro byage bibi bya mîra. (Kl. 3:7-10) Kobinali, obuyemere bwirhu omu nterekêro Kristu ahânaga bo burhuma Yehova arhubabalira n’okurhucêsa kurhenga omu caha. Yehova anarhubabalira kugerera eyo nterekêro erhi akabona oku rhuli rhwajira okwirhu koshi lyo rhushanja olugenzi lwirhu lwa mîra.—1 Yn. 1:7.
OLANGALIRE OKU YEHOVA ANAKUBABALIRA
18. Bici rhwayizire okubiyerekire okubabalira kwa Yehova?
18 Rhuganirirage kwa bofofi bintu biguma na biguma by’obulagirire rhwayizire mw’eci cigabi. Yehova ye babalira bwenene empingu n’igulu. Bici birhushumize okuderha ntyo? Burhangiriza, ensiku zoshi aba mubidu okubabalira. Bwakabirhi, aba amanyire ngasi kantu okubirhuyerekire. Aba amanyire bwinja-bwinja oborhere bwirhu na yene wakamanya erhi rhuciyunjuzize okunali. Na bwakasharhu, erhi Yehova arhubabalira, anababalire loshi-loshi, binabonekane nka ciru rhurhajijire eco caha. Oko kunarhume rhwaba n’ezamiri ecîre n’okuyemerwa naye.
19. Ciru akaba rhurhaba bimana rhwanagendekera rhwajira ecaha, bulya gurhi rhwakaba n’omwishingo?
19 Kobinali, rhwagendekera okujira ecaha bulya rhurhali bimana. Cikone, ebinwa biri omu citabu Étude perspicace des Écritures, Ibugu lya 2, bukurasa bwa 765, byanarhurhuliriza. Rhusomireho ntya: “Bulya enyanya z’obwonjo bwage, Yehova anabone obuzamba bw’abakozi bage, barhashinganini bagendekere bacitumuza okurhalusire olugero enyanya z’amagosa bajiraga erhi hali yabo y’okurhaba bimana bayimaga erhumire. (Enna. 103:8-14; 130:3) Erhi bakajira okwabo koshi lyo balambagira omu njira za Yehova, banaba n’omwishingo. (Fl. 4:4-6; 1 Yn. 3:19-22).” Oko kurhuhire omurhima bwenene!
20. Bici rhwaganirira omu cigabi cikulikire?
20 Rhuvuzire omunkwa okubona Yehova aba mubidu okurhubabalira erhi rhwakaciyunjuza okunali enyanya z’ebyaha rhwajijire. Cikone, gurhi rhwakayigamwo olwiganyo lwa Yehova lw’okubabalira? Omu njira nci okubabalira kwirhu kuba kushushine n’okwa Yehova, cikone lubero luhi luhaba egarhi k’okubabalira kwirhu n’okwa Yehova? Bulya gurhi okuhugûkwa olo lubero kuli kwa bulagirire? Ecigabi cikulikire cayish’ishuza kw’ago madoso.
WIMBO 45 Mawazo ya Moyo Wangu
^ Omu Kanwa kage, Yehova arhuyemezize n’obwalagale oku aba mubidu okubabalira abanya-byaha baciyunjuzize. Cikone, hali amango rhuciyumva oku rhurhashinganini okubabalirwa naye. Mw’eci cigabi, rhwayish’iganirira bulya gurhi rhwakayemera n’obwalagale oku, ensiku zoshi Nnâmahanga aba mubidu okurhubabalira erhi rhwakaciyunjuza okunali ebyaha rhwajijire.
^ Olole ecitabu Mkaribie Yehova, cig. 26, cif. 9.
^ AMAHUGÛLO GA LUDERHO LUGUMA: “Okuciyunjuza” kuhugwîre okushanja obukengere n’okuciyumva kubi bwenene omu murhima enyanya z’olugenzi lubi lwa mîra, ebijiro bibi, erhi ebi omuntu al’ishinganine ajire cikone arhabijijire. Omuntu ociyunjuzize n’omurhima goshi anarhondere okujira ebintu omu njira mpyahya.