Lyo rhushagalusa Yehova, rhugwasirwe rhube n’obuyemere. Ciru akaba ntyo, Ebibliya edesire oku “arhali boshi bayankirira obuyemere.” (2 Ts. 3:2) Lugenda abakag’imuhagalika, entumwa Paolo yadesire oku bali ‘bantu babi na mihera,’ anal’ilagirire acizibwe kuli bo. Cikone ebi aderhaga lugenda obuyemere biyerekire ciru n’abandi bantu. Bantu baguma na baguma banacishoge okulahira ebintu biyerekine n’obwalagale oku haba Omulemi. (Rm. 1:20) Abandi banaderha oku bagwerhe obuyemere muli Nnâmahanga. Cikone okuyemera ntyo kone arhali bo buyemere rhulagirireko lyo rhushagalusa Yehova.

Rhushinganine rhuyemere n’obwalagale oku ho Yehova aba n’oku ‘anahembe’ abajira obuyemere busezire muli ye. (Hb. 11:6) Obuyemere ciba cigabi c’ilehe ly’iroho litagatifu. Okuyegera Yehova kugerera isala kwanarhabala omuntu ahâbwe iroho litagatifu. (Lk. 11:9, 10, 13) Eyindi njira y’obulagirire rhwakahâbwamwo iroho litagatifu kuli kusoma Akanwa ka Mungu kalongozibagwa n’iroho lyage. Enyuma z’aho, rhwanarhanya kw’ebi rhusomire n’okucihangana rhubikolese. Omu kujira ntyo, rhunaleke iroho lya Yehova lirhurhabale rhube n’akalamo kayerekine oku rhugwerhe obuyemere bushagalusa Yehova.