1. Omu Ennanga 18:46, bici Yehova ashushanyizibwe nabyo?

 RHULAMIRE omw’igulu amazibu rhurhal’irhanyizeko gakajira akalamo kirhu kabe kazibu erhi ciru kukashanja loshi-loshi. Rhuvuzire omunkwa bwenene okubona oku rhwanalangalira oburhabale bwa Yehova Mungu! Omu cigabi c’embere, rhwakengezibwe oku Yehova aba Nyamuzinda ozine n’oku ensiku zoshi aba mubidu okurhurhabala. Erhi rhupata oburhabale bwage, oko kunarhuyemeze n’obwalagale oku “Yehova aba azine!” (Osome Ennanga 18:46, NWT.) Cikone, enyuma z’okuderha ezo nderho, Daudi aderha oku Mungu ye ‘Kabuye ayâkiraho.’ Bulya gurhi ashushanyagya Yehova, Nyamuzinda ozine n’ibuye, kantu karhajira buzine?

2. Daudi ahamagire Yehova “ibuye lyani,” bici rhwayiga kugerera ezo nderho zage?

² Mw’eci cigabi, rhwaganirira bulya gurhi Yehova ashushanyizibwe n’ibuye na bici ezo nderho zirhuyigirizize okubimuyerekire. Kandi rhwayiga gurhi rhwakahikiramwo okumubona nk’ibuye lirhu. Buzinda, rhwaganirira enjira rhwakayigamwo amorhere ga Yehova garhumire ashushanyizibwa n’ibuye.

BULYA GURHI YEHOVA AHAMAGIRWE IBUYE

3. Gurhi Ebibliya ekolesizemwo kanji-kanji oluderho “ibuye”? (Olole enfoto.)

³ Ebibliya eshushanyize Yehova n’“ibuye” ly’erhurhabala rhuhugûkwe morhere gage maguma na maguma. Kanji-kanji olo luderho lubonekine omu mandiko gakuzize Yehova nka Mungu orhajira oyu akagererwako. Omu lwandiko lw’Olushika 32:4 mwo Yehova ahamagirwe “ibuye” oburhangiriza. Omw’isala, Ana aderha oku “nt’ibuye lizibu aka Nyamubâho.” (1 Sam. 2:2) Habakuki adesire oku Yehova ye ‘Kabuye ayâkiraho.’ (Hab. 1:12) Omwandisi w’Olulanga lwa 73 adesire ntya lugenda Mungu: “We Kabuye  k’omurhima gwani.” (Enna. 73:26) Na ciru Yehova acishushanyize yene n’ibuye. (Iz. 44:8) Lekagi rhuganirire morhere asharhu gali nka g’ibuye Yehova ayerekana na gurhi rhwakamujiramwo “ibâle [ibuye] lirhu.”​—Lush. 32:31.

4. Gurhi Yehova abamwo lwakiro? (Ennanga 94:22)

⁴ Yehova aba lwakiro. Nka kula omuntu akacifulika omw’ibuye linenene amango hali empusi ndarhi, Yehova anarhulange erhi rhuhikirwa n’akanga kakahira obuzine bwirhu omu mazibu. (Osome Ennanga 94:22.) Anarhulange n’okurhucîka n’amazibu gakashereza loshi-loshi obuzine bwirhu. Anarhulaganyize binji kulusha: Buzinda ayish’ikûlaho ngasi kantu karhuma rhwabula omurhûla n’obulanzi.​—Eze. 34:25, 26.

5. Gurhi Yehova akabamwo nk’ibuye ly’Olwakiro kuli rhwe?

⁵ Njira nguma rhwakajiramwo Yehova abe nk’ibuye lirhu ly’Olwakiro kuli kukamuyegera kugerera isala. Erhi rhusalira, Yehova anarhuhe “omurhûla gwa Nyamuzinda” gulanga omurhima gwirhu n’obukengere bwirhu. (Fl. 4:6, 7) Rhuganirire ebyahikiraga Artem, mwene wirhu muguma wakwebagwa omu prizo enyanya z’obuyemere bwage. Amango ali omu prizo, omuntu mukali bwenene wakag’ijira e ankete amudosa amadoso kanji-kanji, amujirira kubi, n’okulonza okumuyobohya. Artem adesire ntya: “Ngasi mango nakag’iyoboha erhi oyo wakag’ijira e ankete akampamagire. . . . Nakag’ishenga Yehova ngasi mango. Nakamuhûna ampe obwenge n’omurhûla omu murhima gwani. Ebi oyo wakag’ijira e ankete ajiraga byoshi birhampashaga. . . . Kugerera oburhabale bwa Yehova, nakaciyumva nka nyimanzire enyuma z’olukuta lw’amabuye.”

6. Bulya gurhi rhwanalangalira Yehova ensiku zoshi? (Izaya 26:3, 4)

⁶ Yehova aba wa kulangalirwa. Ak’ibuye lirharhenga aha linali, ensiku zoshi Yehova abaho ly’arhurhabala. Rhwanamulangalira bulya aba “ibuye rhwâcîfulika mwo emyaka n’emyaka.” (Osome Izaya 26:3, 4, Mashi Bible.) Ensiku zoshi, aba azîne ly’ahikiriza ebiragane byage, ly’ayumvirhiza amasala girhu, n’okurhuha oburhabale rhulagirireko. Kandi rhwanalangalira Yehova bulya aba mwishwekerezi oku bantu bamukolera. (2 Sam. 22:26) Nta mango akayibagira ebi rhumujirira, na kandi arhuhemba ensiku zoshi.​—Hb. 6:10; 11:6.

7. Gurhi biba erhi rhulangalira Yehova? (Olole n’enfoto.)

⁷ Rhunajire Yehova abe ibuye lirhu erhi rhumulangalira loshi-loshi. Rhunalangalire oku rhwayunguka omu kumurhumikira, ciru n’omu mango mazibu. (Iz. 48:17, 18) Erhi rhucibonera oburhabale bwage, obulangalire bwirhu muli ye bunayushuke. Omu kujira ntyo, rhunayemezibwe n’obwalagale oku, Yehova yene wakahash’irhurhabala okulembera amazibu goshi-goshi, ciru gakaba madarhi gurhi. Kanji-kanji omu kanga rhubwine oku nta wundi muntu wakahash’irhurhabala, rhunahikire aha rhwahugûkwa kunganaci Yehova aba wa kulangalirwa. Vladimir adesire ntya: “Akasanzi nagezagya omu prizo, go gali mango minja bwenene omu bwîra bwani haguma na Mungu. Naciyigiriza okulangalira Yehova bwenene bulya nali niene na ntaco nakahashire okujira mw’ako kanga.”

8. (a) Bulya gurhi rhwakaderha oku Yehova arhashanja? (b) Gurhi rhwakayungukamwo omu kuba na Nnâmahanga nka Ibuye lirhu? (Ennanga 62:6, 7)

 ⁸ Yehova arhashanja. Ak’ibuye linenene, Yehova arhahuligana arhanashanja. Obumuntu bwage n’omuhigo gwage birhashanja. (Mal. 3:6) Yehova arhahuliganaga erhi alwisa obugoma omw’ishwa ly’e Edeni. Nk’oku entumwa Paolo yayandikaga, Yehova “arhankacihakana yêne.” (2 Tm. 2:13) Oko kuli kuderha oku ciru bici byakaba erhi ciru abandi bakajira gurhi, nta mango Yehova akashanja amorhere gage, omuhigo gwage, erhi amakanuni gage. Bulya Yehova arhashanja ciru n’olusiku luguma, rhumanyire oku arhurhabala omu mango mazibu, n’oku ahikiriza ebiragane byage lugenda amango gayisha.​—Osome Ennanga 62:6, 7.

9. Bici rhuciyigirizize kugerera ebyahikiraga Tatyana?

⁹ Rhunajire Yehova abe Ibuye lirhu omu kusegeza obwenge oku morhere gage n’omu kurhanya bwenene oku muhigo gwage lugenda bene bantu n’igulu. Okujira ntyo kwanarhurhabala lyo rhugendekera rhwaba n’omurhûla gw’ekandalala amango rhuli rhwalembera amazibu. (Enna. 16:8) Ntyo ko byabire omu kanga ka mwali wirhu muguma ohamagalwa Tatyana, wahamikiragwa omu mwage enyanya z’obuyemere bwage. Adesire ntya: “Nakag’iba ndi niene omu njira y’okunali. Oku murhondero, byali bizibu. Nakavunika omurhima kanji-kanji.” Cikone, erhi abona gurhi amazibu gage gal’igwerhe olushangi na Yehova n’omuhigo gwage, aba n’obuhashe bw’okugalembera anacib’iba n’emisi y’ekandalala. Adesire ntya: “Okuhugûkwa bulya gurhi oko kwajirikanaga kwantabala nakengera oku nali mw’ako kanga enyanya za Yehova. Oko kwantabala naleka okurhanya okubinyerekire niene.”

10. Bici rhwakajira lyo Yehova aba Ibuye lirhu ene?

¹⁰ Omu nsiku ziri embere, rhwarhimanana n’amazibu gayish’ihûna rhulangalire Yehova bwenene kulusha agandi mango goshi. Ene, go mango g’okuzibuhya obulangalire bwirhu oku ayish’irhuha ebi rhulagirireko byoshi lyo rhulembera n’obwishwekerezi. Gurhi rhwakajiramwo ntyo? Okasoma emyanzi eganirirwe omu Bibliya n’ebyabwinwe n’Abahamirizi ba Yehova ba muli gano mango girhu. Okahugûkwa gurhi Mungu ayerekinemwo amorhere garhuma aba nk’ibuye ly’arhabala abakozi bage. Okarhanya bwenene kw’eyo myanzi. Okujira ntyo kwanakurhabala ly’ojira Yehova abe Ibuye lyawe.

AMORHERE GARHUMA YEHOVA ABA NK’IBUYE

11. Bulya gurhi rhulonzize okuyiga amorhere ga Yehova garhuma aba nk’ibuye? (Olole n’ecisanduku cidesire “ Omuhigo Bene Wirhu Baciri Misole Bakacihiriraho.”)

¹¹ Rhwaganirire amorhere garhuma Yehova aba nk’ibuye kuli rhwe. Rhuganirirage gurhi rhwakayigamwo ago morhere gage. Erhi rhwakajira okwirhu koshi lyo rhuyiga ago morhere ga Yehova, rhwanazibuhya bwenene bene wirhu na bali birhu. Kwa lwiganyo, Yezu ayirisire Simoni izino lya Kefa (lyahindwirwe “Petro”), lihugwîre “Ibuye.” (Yn. 1:42) Yezu alonzagya okuderha oku Petro akarhulirizize abandi omu cigamba n’okuzibuhya obuyemere bwabo. Abagula  b’ecigamba baganirirwe nka “cihôho ca lwâla lunênênè.” Oko kuyerekine gurhi balangamwo abantu omu cigamba. (Iz. 32:2) Kobinali, ecigamba cinayunguke erhi abantu boshi, bene wirhu na bali birhu, bayiga amorhere ga Yehova.​—Ef. 5:1.

12. Oganirire enjira rhwakabamwo lwakiro oku bandi.

¹² Obe lwakiro. Hali amango rhuba n’obuhashe bw’okuha bene wirhu na bali birhu olwakiro lw’okunali amango hali obuhanya bucilerha bone, akavulindi egarhi ka bacikala, erhi ivita. Oku ehali omu “nsiku nzinda” zagendekera zabiha bwenene, buzira karhinda rhwaba na bulyo bunji bw’okurhabalana. (2 Tm. 3:1) Rhwanaba lwakiro kuli bene wirhu na bali birhu omu hali y’ekandalala n’ey’ekiroho. Njira nguma rhwakajiramwo ntyo kuli kubajira baciyumve bwinja aha Nyumpa y’Obwami, n’oko kwanarhuma haba ehali nyinja y’obuzigire n’omurhûla omu cigamba. Rhulamire omw’igulu abantu bali bajirirana omu njira y’obukali, n’oko kwanarhuma bene wirhu na bali birhu baciyumva bahangayisire bwenene omu bukengere barhanazigirwi. Co cirhumire, erhi bene wirhu na bali birhu bayisha oku ntimanano, rhuba rhulonzize rhujire okwirhu koshi lyo baciyumva bwinja, bazigirwe, banali omu bulanzi.

13. Gurhi abagula nabo bakabamwo lwakiro oku bandi? (Olole n’enfoto.)

¹³ Abagula banaba lwakiro kuli bene wirhu na bali birhu b’omu cigamba bali balembera empusi y’okunali erhi y’olwiganyo. Amango g’obuhanya n’omu kanga k’ecinganga kahûnyire okujira duba-duba, abagula baba badidu okurhôla emipango lyo bene wirhu na bali birhu bahâbwa oburhabale. Kandi abagula banahâne oburhabale bw’ekiroho. Bene wirhu na bali birhu baba babidu okuyegera omugula erhi akaba aba amanyikine oku aba mwinja, wa bwonjo, na mubidu okuyumvirhiza. Amorhere ga ntyo ganarhabale bene wirhu na bali birhu baciyumve bashibirirwe, n’oko kunarhume kwaba kulembu kuli  bo okukolesa obulongozi boshi-boshi buyimangire oku Bibliya omugula akabaha.​—1 Ts. 2:7, 8, 11.

14. Gurhi rhwakayerekanamwo oku rhuli ba kulangalirwa?

¹⁴ Obe wa kulangalirwa. Rhuba rhulonzize abandi balangalire oku rhwabarhabala, ci bwenene omu mango mazibu. (Mig. 17:17) Gurhi rhwakajira ly’abandi bakarhulangalira? Rhwanacihangana okuyiga amorhere ga Mungu ngasi lusiku omu kukahikiriza ebiragane birhu n’omu kukahika oku kasanzi kahûnyirwe. (Mt. 5:37) Kandi rhwanacihangana okuha abandi oburhabale balagirireko. Na kandi, rhunacihangane okumanya n’obwalagale erhi rhuli rhwahikiriza emikolo yirhu kushimbana n’obulongozi rhuhâbirwe.

15. Gurhi ecigamba ciyungukamwo amango abagula bali ba kulangalirwa?

¹⁵ Abagula b’okulangalirwa guba mugisho oku cigamba. Omu njira nci? Abahubiri banaciyumve bashibirirwe amango bamanyire oku banahamagala abagula ensa zoshi banalonzize, kwa lwiganyo omwimangizi w’ecikundi cabo c’amahubiri. Kandi abahubiri banaciyumva bashibirirwe amango bamanyire oku abagula baba babidu okubarhabala. Kandi erhi akaba amahano g’abagula gayimangire oku Bibliya n’oku bicapo bya mushizi mwirhonzi na mwikubagirwa, ahali h’okuyimangira oku ntanya zabo bo nnene,  ababo bemezi banabalangalire. Na kandi bene wirhu na bali birhu banaba n’ecirhumire c’okulangalira omugula obîka amahwe n’ohikiriza ebiragane byage.

16. Bunguke buhi rhucilerhera rhwene n’abandi amango rhugendekire rhwajira ebi Yehova adesire oku bishinganine?

¹⁶ Ogendekere wajira ebi Yehova adesire oku bishinganine. Erhi akaba rhunarhumikire Yehova omu bintu byoshi n’erhi akaba rhunarhôle emihigo eyimangire oku Bibliya, rhwanaba lwiganyo lwinja oku bandi. Amango rhuli rhwakula omu buyemere n’omu bumanye burhagwerhi magosa, rhunasimike bwenene omu okuli. Rhurhayabirwa okurhôla emihigo, rhurhadundagana, rhurhanayehulwa eyi n’eyi n’enyigirizo z’obunywesi n’entanya z’er’igulu. (Ef. 4:14; Yk. 1:6-8) Obuyemere bwirhu muli Yehova n’omu biragane byage bunarhume rhurhahuligana erhi rhuyumva emyanzi mibi. (Enna. 112:7, 8) Kandi rhuba babidu okurhabala abali balwisa amazibu.​—1 Ts. 3:2, 3.

17. Gurhi abagula bashumyamwo abandi omu njira nyinja?

¹⁷ Abagula bashinganine babe ba lugero omu nkomedu zabo, ba bukengere bwinja, ba burhimanya, barhashinganini babe ba kavulindi. Abo balume banashumye abandi omu njira nyinja, bananazibuhye ecigamba omu ‘kucishwekera oku kanwa k’okuli.” (Tt. 1:9; 1 Tm. 3:1-3) Kugerera olwiganyo lwabo n’omukolo gw’okulanga ebibuzi, abagula banarhabale abahubiri bakaja oku ntimanano ngasi mango, omu mukolo gw’amahubiri, n’okujira ifunzo lyabo bone. Erhi bene wirhu na bali birhu bahikirwa n’amazibu gabababazize, abagula banabakengeze oku balangalire Yehova n’okusegeza obwenge oku biragane byage.

18. Bulya gurhi rhulonzize okukuza Yehova n’okumuyegera ensiku zoshi? (Olole n’ecisanduku cidesire “ Enjira y’Okuyegera Yehova.”)

¹⁸ Enyuma z’okuganirira amorhere minja bwenene ga Yehova, rhwanaderha nk’oku Mwami Daudi aderhaga: “Nyamuzinda aganze! Bulya lyo ibuye ly’olwakiro.” (Enna. 144:1, Mashi Bible) Nta mango Yehova akabula buba Nnâmahanga rhwakalangalira. Omu kalamo koshi, ciru n’omu myaka yirhu y’obushosi, rhwanaderha ntya: “Ly’ibuye lyani,” erhi rhunayemire n’obwalagale oku ensiku zoshi arhurhabala rhuyololoke omu hali y’ekiroho.​—Enna. 92:14, 15, Mashi Bible.