1. Bici birhabala abakozi ba Yehova bagendekere bamuharamya ciru akaba bali balwisa amazibu?

 EBIBLIYA eyerekine oku ensiku rhulamiremwo gali “mango mazibu. (2 Tm. 3:1) Ahanyuma n’amazibu ngasi muguma agwerhe mw’er’igulu libi, abantu ba Yehova bali balwisa n’amazibu g’okuhagalikwa n’okulibuzibwa. Bici birhurhabala lyo rhugendekera rhwaharamya Yehova ciru akaba hali ago mazibu? Akantu k’obulagirire bwenene kuli kubona oku rhwahikire okumanya oku Yehova ye “Nyamuzinda ôzinê.”​—Yer. 10:10; 2 Tm. 1:12.

2. Njira nci Yehova abamwo Nyamuzinda ozine?

² Yehova aba Muntu w’okunali orhurhabala omu mazibu girhu ananalonze obulyo bw’okurhutugika. (2 Nga. 16:9; Enna. 23:4) Okumubona nka Nyamuzinda ozine kwanarhurhabala rhulwise bwinja ngasi mazibu gakarhuhikira. Rhuganirire gurhi Mwami Daudi ajijiremwo ntyo.

3. Bici Daudi alonzagya okuderha erhi aderha oku “Yehova aba azine”?

³ Daudi al’imanyire Yehova anal’imulangalire. Amango akag’ikulikirwa n’abashombanyi bage, kuhiramwo na Mwami Sauli, Daudi ashenga Yehova ly’amuhûna oburhabale. (Enna. 18:6) Enyuma za Mungu okushuza isala lya Daudi n’okumulikûza, Daudi aderha ntya: “Yehova aba azine!” (Enna. 18:46, NWT) Omu kuderha ezo nderho, Daudi arhayerekanaga kone oku amanyire oku ho Mungu aba. Citabu ciguma cihâna amahugûlo g’Ebibliya cidesire oku Daudi, omu kuderha ezo nderho, ayerekine oku ayemire n’obwalagale oku Yehova “aba mungu ozine orhabala abantu bage ensiku zoshi.” Kobinali, kugerera ebi Daudi aciboneraga, al’imanyire oku Mungu wage aba azine, n’okuyemera ntyo n’obwalagale kwazibuhya omuhigo gwage gw’okukolera  Yehova n’okumuha irenge.​—Enna. 18:28, 29, 49.

4. Gurhi rhuyungukamwo omu kubona Yehova nka Nyamuzinda ozine?

⁴ Erhi rhwakaba rhuyemire oku Yehova aba Nyamuzinda ozine, oko kwanarhurhabala rhumukolere n’obushiru. Rhwanaba n’emisi y’okulembera amazibu n’okushumibwa rhugendekere rhwajira binji omu mukolo gwage. Kandi kwanarhuma rhwahiga okugendekera rhwayegera Yehova.

NYAMUZINDA OZINE AKUZIBUHYA

5. Bici byakarhurhabala rhube n’obulangalire amango rhuli rhwalwisa amazibu? (Abafilipi 4:13)

⁵ Erhi rhwakakengera oku Yehova aba Nyamuzinda ozine n’oku ensiku zoshi ajira obuhashe bw’okurhurhabala, rhwanahash’ilembera ngasi mazibu, gabe manene erhi masungunu. Kobinali, nta mazibu gakarhuhikira gakarhaluka obuhashe bwa Yehova. Ye Ogala-byoshi, ananarhuha obuhashe bw’okulembera. (Osome Abafilipi 4:13.) Muli ntyo, rhugwerhe ngasi cirhumire c’okulwisa amazibu girhu rhunagwerhe obulangalire. Okucibonera oburhabale bwa Yehova omu mazibu masungunu kunarhuyemeze n’obwalagale oku arhurhabala n’omu mazibu madarhi.

6. Bici Daudi acibwinire omu busole bwage byarhumaga alangalira Yehova bwenene?

⁶ Rhuganirire bintu bibirhi Daudi acibwinire omu kalamo kage byamurhabire alangalire Yehova bwenene. Erhi Daudi aciri musole anali mungere, mango maguma empangaza n’entale, ngasi nguma yahêka ecibuzi c’ishe. Mw’ako kanga kombi, Daudi ayerekana oburhwali omu kulibirha kw’ezo nsimba anayokola ebyo bibuzi. Cikone, arhaderhaga oku yene wacihîre obo buhimi. Al’imanyire oku Yehova ye wamuhaga obuhashe bw’okujira ntyo. (1 Sam. 17:34-37) Daudi arhayibagiraga ciru n’ehitya ebyo aciboneraga. Omu kubirhanyako, ayemera n’obwalagale oku Nyamuzinda ozine akamuzibuhize agandi mango.

7. Bici Daudi asegizeko obwenge, na gurhi oko kwamurhabire ly’alwisa Goliyati?

⁷ Enyuma z’aho, amango Daudi aciri musole w’omushuko, alambagirira omu kambi k’omurhwe gw’Abaisraheli. Arhimana abasoda Baisraheli bayobohire bwenene bulya Omufilistini muhamu bwenene wakag’ihamagalwa Goliyati al’iyishire ‘al’ijacira emirhwe ya bene Israheli.’ (1 Sam. 17:10, 11) Abo basoda bayobohire bulya bakag’isegeza obwenge bwabo kw’oyo Mufilistini muhamu n’oku bintu akag’ibabwira. (1 Sam. 17:24, 25) Cikone, Daudi yehe abona ako kanga omu njira eri lubero. Abona ebyo bintu byabaga, arhali nka mazibu kuyerekera emirhwe y’Abaisraheli, cikone nka mazibu kuyerekera “engabo ya Nyamuzinda Ozine.” (1 Sam. 17:26) Daudi al’isegize obwenge bwage kuli Yehova. Al’ilangalire oku Mungu wamurhabalaga amango ali mungere, akamurhabire na mw’ako kanga. Bulya Daudi al’iyemire n’obwalagale oku Mungu amurhabala, alwisa Goliyati, na kobinali amuhima!​—1 Sam. 17:45-51.

8. Bici byakazibuhya obulangalire bwirhu amango rhuli rhwalwisa amazibu? (Olole n’enfoto.)

⁸ Na nirhu rhwanalwisa bwinja amazibu girhu erhi rhwakakengera oku Nyamuzinda ozine aba mubidu okurhurhabala. (Enna. 118:6) Rhwanazibuhya obulangalire bwirhu muli oko omu kurhanya oku bintu ajijire omu mango gageraga. Okasoma emyanzi y’Ebibliya ekukengezize gurhi Yehova acizizemwo abakozi bage. (Iz. 37:17, 33-37) Kandi, okalola erhi kusoma eraporo ziri oku jw.org ziyerekine gurhi Yehova arhabiremwo bene wirhu na bali birhu ba muli gano mango. Na kandi, okakengera amango Yehova akurhabalaga omu kalamo kawe. Orhayobohaga erhi akaba orhabwini akantu k’okurhangaza, kali nk’okulwisa empangaza erhi ntale, Yehova okujirire omu kalamo  kawe. Bulya gurhi? Okuderha okuli, hali bintu binji Yehova akujirire omu kalamo kawe! Akukulwire ly’ojira obwîra haguma naye. (Yn. 6:44) Enyanya z’oburhabale bwage, co cirhumire ocigendekire wamukolera. Wanamuhûna akurhabale okengere amango ashuzize oku masala gawe, amango akuhaga oburhabale omu mango go n’ago wal’ibulagirireko, erhi amango akushibiriraga omu kanga kazibu. Okurhanya bwenene oku bintu bya ntyo waciboneraga kwanakuyemeza bwenene oku Yehova agendekera akurhabala.

9. Gurhi rhushinganine rhukabona amazibu girhu? (Emigani 27:11)

⁹ Okubona Yehova nka Muntu ozine kwanarhurhabala rhube n’entanya nyinja lugenda amazibu girhu. Omu njira nci? Amango rhuli omu mazibu, rhulagirire oku kusegeza obwenge bwirhu oku kantu k’obulagirire bwenene. Ibilisi anaderhe oku amango rhuli omu mazibu rhwanaleka Yehova. Co cirhumire oku rhujira amango rhuli omu mazibu, kwanarhuma Yehova aciyumva bwinja erhi kubi. (Ayu. 1:10, 11; osome Emigani 27:11.) Cikone erhi rhubêra bishwekerezi ciru akaba rhuli omu mazibu, rhunayerekane obuzigire bwirhu kuli Yehova n’okuyerekana oku Shetani aba munywesi. K’oli walwisa amazibu g’okuhagalikwa n’oburhegesi bw’ecihugo cawe, amazibu g’okubula ensaranga, abantu okurhakuyumvirhiza omu mahubiri, erhi gandi mazibu? Akaba ntyo, okengere oku akanga kawe kakuhîre obulyo bw’okushagalusa omurhima gwa Yehova. Kandi okengere oku nta mango akakuleka orhangulwe kulusha oku wakahash’ilembera. (1 Kr. 10:13) Akuha emisi y’okulembera.

NYAMUZINDA OZINE AKUHEMBA

10. Bici Nyamuzinda ozine ayish’ijirira abamuharamya?

¹⁰ Ensiku zoshi Yehova anahembe abantu bamuharamya. (Hb. 11:6) Anarhuhe omurhûla n’okurhimukwa ene, anayish’irhuha obuzine bw’ensiku n’amango omu mango gayisha. Rhwanalangalira Yehova n’okuyemera n’obwalagale oku ajira irala n’obuhashe bw’okurhuhemba. N’okuyemera ntyo n’obwalagale kwanarhushumya rhugendekere rhwajira binji omu  nterekêro yirhu, nk’oku abakozi bishwekerezi ba Mungu b’omu mango ga mîra bashumibwe okujira. Ntyo ko Timoteyo ajijire omu myaka igana mirhanzi.​—Hb. 6:10-12.

11. Bici byashumize Timoteyo ly’akola n’obushiru omu cigamba? (1 Timoteyo 4:10)

¹¹ Osome 1 Timoteyo 4:10. Timoteyo al’ihizire obulangalire bwage muli Nyamuzinda ozine. Muli ntyo, al’igwerhe ecirhumire cinja c’okukolera Yehova n’obushiru n’okukolera abandi. Omu njira zihi ajijiremwo ntyo? Entumwa Paolo yamuhîre omurhima ajire amajambere ly’aba mwalimu mwinja omu cigamba n’ omu mukolo gw’amahubiri. Kandi Timoteyo al’igwasirwe abe lwiganyo lwinja oku babo bemezi, babe misole erhi abakola bakuzire. Na kandi al’ihâbirwe mikolo milebe mizibu, yal’ihiziremwo okuhâna amahano buzibu-zibu cikone omu njira y’obuzigire oku bantu bal’igalagirireko. (1 Tm. 4:11-16; 2 Tm. 4:1-5) Timoteyo akayemire n’obwalagale oku, ciru n’amango abandi barhakabwine omukolo gwage erhi kugushagalukira, Yehova yehe akamuhembire.​—Rm. 2:6, 7.

12. Bici byakashumya abagula lyo bagendekera baba na binji bya kujira omu mukolo gwabo? (Olole n’enfoto.)

¹² Ene, abagula nabo banayemera n’obwalagale oku Yehova anabone omukolo gwabo mwinja ananagushagalukire. Ahanyuma n’omukolo gw’okulanga ebibuzi, okuyigiriza, n’okuhubiri, bagula banji banalunge okuboko omukolo gw’obubasi n’omukolo gw’okuhâna oburhabale omu mango g’obuhanya. Abandi banakole omu Bikundi by’Okulambagirira Abalwala erhi omu Komite Zijira Olushangi Haguma n’Ehopitali. Abagula bacihâna omu mikolo ya ntyo banabone ecigamba oku guli mupango gwa Yehova, ci arhali gwa bene bantu. Oko kunarhume bajira emikolo yabo n’obugumaguma bwabo boshi, banaba balangalire loshi-loshi oku Mungu abahemba kw’ebi bali bajira.​—Kl. 3:23, 24.

13. Gurhi Yehova abona obushiru ngasi muguma wirhu ajira omu mukolo gwage?

¹³ Rhweshi rhurhakaba bagula. Cikone rhweshi rhugwerhe kantu kalebe rhwakaha Yehova.  Mungu wirhu anashagaluke bwenene erhi rhujira oku rhwakanahasha koshi lyo rhumukolera. Anabone emicango rhuhâna lyo rhugendekeza omukolo gw’omw’igulu lyoshi, ciru yakaba misungunu. Anashagaluke erhi rhucihangana okuhima enshonyi zirhu n’okuhira okuboko enyanya lyo rhuhâna ishuzo oku ntimanano, kandi anashagaluke erhi rhuleka okusegeza obwenge oku magosa g’abandi n’okubababalira. Ciru wakaciyumva oku orhakajira binji omu mukolo gwa Yehova nk’oku wakalonzize, oyemere n’obwalagale oku Yehova anashagalukire ebi wakajira. Aba akuzigire enyanya z’ebi oli wajira, ananakuhembe.​—Lk. 21:1-4.

OGENDEKERE WAYEGERA NYAMUZINDA OZINE

14. Gurhi okugendekera rhwayegera Yehova kwakarhurhabala lyo rhubêra bishwekerezi kuli ye? (Olole n’enfoto.)

¹⁴ Erhi rhwakakabona Yehova oku ali Muntu w’okunali, kwanaba kulembu kuli rhwe okubêra bishwekerezi kuli ye. Ntyo ko byali omu kanga ka Yozefu. Alahira loshi-loshi okujira ecijiro c’eby’enshonyi. Mungu ali Muntu w’okunali kuli ye, arhanalonzagya okumugayisa. (Murh. 39:9) Lyo Yehova aba Muntu w’okunali kuli rhwe, rhushinganine rhucihe akasanzi k’okusalira n’okuyiga Akanwa kage. Omu kujira ntyo, obwîra bwirhu haguma naye bwanasêra. Erhi rhwakaba rhugwerhe obwîra bwa hofi-hofi haguma na Yehova, aka Yozefu, rhurhakalonza okujira akantu koshi-koshi kakamugayisa.​—Yk. 4:8.

15. Isomo lihi rhwakaciyigiriza kugerera ebyahikiraga Abaisraheli omw’irungu? (Abahabraniya 3:12)

¹⁵ Abantu bayibagira oku Yehova aba Nyamuzinda ozine, kurhakaba kulembu kuli bo okubêra bishwekerezi kuli ye. Rhuganirire ebyahikiraga Abaisraheli amango bali omw’irungu. Bal’imanyire oku ho Yehova aba, cikone barhondera baba n’akarhinda oku akabahikirigize amalagirire gabo. Ciru badosa ntya: “Ka Nyakasane [Yehova, NWT] anacibâ ekagarhî kirhu erhi nanga?” (Lub. 17:2, 7) N’oko kwarhuma bagomera Mungu. Kobinali, rhulonzize rhuyake olwiganyo lwabo lubi lw’okurharhumikira.​—Osome Abahabraniya 3:12.

16. Bici byakarhangula obuyemere bwirhu?

 ¹⁶ Igulu linajire kube kuzibu kuli rhwe okugendekera rhwayegera Yehova. Bantu banji banalahire okuyemera oku ho Mungu aba. Kanji-kanji abalahira okurhumikira amarhegeko ga Mungu banabonekane nka bagwerhe akalamo kinja. Erhi rhubona ntyo, obuyemere bwirhu bwanarhangulwa. Ciru akaba rhurhakalahira oku ho Mungu aba, nkaba rhwanarhondera rhwacidosa erhi kobinali arhurhabala. Omwandisi w’Olulanga lwa 73 hali amango naye aciyumvirhe ntyo. Abona abantu bal’imuzungulusire barhali bakenga amarhegeko ga Mungu cikone banali bashagalukira akalamo. Oko kwarhuma arhondera okucidosa erhi kobinali okukolera Mungu kwal’igwerhe obunguke.​—Enna. 73:11-13.

17. Bici byarhurhabala lyo rhugendekera rhwayegera Yehova?

¹⁷ Bicigi byarhabire omwandisi w’olo lulanga lw’akubûla entanya zage? Arhanya bwenene oku bintu byakahikire abantu bayibagira Yehova. (Enna. 73:18, 19, 27) Kandi arhanya oku bunguke omuntu aba nabo omu kukolera Yehova. (Enna. 73:24) Nirhu rhwanarhanya bwenene oku migisho Yehova arhuhîre. Rhushushanye akalamo kirhu k’ene n’oku kakabire acibage rhurhakoleraga Yehova. Okujira ntyo kwanarhurhabala rhugendekere rhwabêra bishwekerezi n’okuderha nk’oku oyo mwandisi w’ennanga aderhaga: “Niehe okubêraho Nyamuzinda kwo kwinja kwani.”​—Enna. 73:28.

18. Bulya gurhi rhurhashinganini rhuyobohe amango gayisha?

¹⁸ Rhwanalwisa ngasi mazibu gakarhuhikira muli zino nsiku nzinda bulya ‘rhunashige Nyamuzinda w’obuzine na w’okunali.’ (1 Ts. 1:9) Mungu wirhu aba Muntu w’okunali orhabala abamuharamya. Ayerekine oku ali haguma n’abakozi bage omu mango ga mîra, ananali haguma na nirhu ene. Hano hofi-hofi, rhwarhimanana n’amalibuko madarhi bwenene gaba okw’igulu. Cikone rhurhagalwise rhwene. (Iz. 41:10) Neci, rweshi “rhwanahash’iderha n’oburhwali, nti: ‘Nyakasane [Yehova, NWT] ye murhabazi wani; ntaco nankayoboha.’”​—Hb. 13:5, 6.