Kobinali Yehova aba alonzize bantu babirhi barhôline babe n’omwishingo n’okushagalukira obwîra bwa hofi-hofi ensiku zoshi. (Mt. 19:4-6) Erhi akaba olonzize okuja omu buhya, gurhi wakabonamwo omuntu mwarhôlana naye? Bulya Yehova ye Mulemi wirhu, aba amanyire ebyakarhuma abalibashebana baba n’obuhya buyololosire. Co cirhumire, erhi wakakakolesa amakanuni aba arhuhîre, oko kwanakulerhera obunguke. Rhuganirire makanuni maguma na maguma.

Burhangiriza, ngasi muguma wirhu ashinganine ahugûkwe oku: “Omurhima gwo guyengeha gwarhalusa, gucigwerhage n’oburhebanyi.” (Yer. 17:9) Amango omuntu ali alongereza omulume erhi mukazi asheba, anabà n’entanya nyinji z’ekandalala kuli oyo muntu n’oko kwanarhuma arhacirhanye bwinja. Kanji-kanji ebintu birhalugiba binja erhi abantu bakaleka entanya zabo z’ekandalala zibalongoze omu kulonza oyu barhôlana naye. (Mig. 28:26) Co cirhumire burhakaba bwenge erhi bantu babirhi basimine bakarhondera okuyerekana entanya zabo z’ekandalala ho n’aho oku murhondero g’obwîra bwabo erhi kuhânana biragane bilebe n’obu barhacimanyana bwinja.

Olwandiko lwa Emigani 22:3 ludesire: “Omwenge akabona obuhanya anabuyâke, abahwinja bohe mpu barharhaluka, bayandûle.” Murhego guhi gwakahaba erhi omuntu akakakolesa esite z’e Enterneti ly’alonza oyu arhôlana naye? Eby’okugayisa, kuli kubona oku bantu baguma baguma babuganine n’abantu barhamanyiri bwinja oku Enterneti, barhondera okujira obwîra nabo na buzinda bahikira aha babona oku abo bantu babarhebire. Na kandi, abantu barhali bikubagirwa banayerekane oku bagwerhe nsaranga ndebe lyo bakazimba ensaranga z’abantu bali nka mbula bwenge. Agandi mango, abo balonza okurheba abantu ntyo banacihambe mpu bali Bahamirizi.

Rhuganirire obundi buhanya. Site nguma na nguma zinakolese okushura ensabu kwakabonekana nka kwanakuhashisa okubona omuntu mwarhôlana naye okushinganine. Cikone, nta kantu koshi karhuyemezize oku ezo njira zinalerhe amalehe minja. Ka bwanaba bwenge erhi omuntu akakolesa enjira yajiragwa na mwene muntu mpu ly’amanya erhi ashiyololoka omu muhigo gw’obulagirire, kw’okuderha obuhya? Ezo programe z’e ordinatere zirhakacikubagirwa ciru n’ehitya nk’oku  rhwakacikubagira amakanuni g’Ebibliya.​— Mig. 1:7; 3:5-7.

Akanuni kali omu lwandiko lwa Emigani 14:15, Mashi Bible, kadesire: “Embula bwenge enayemereze ngasi kanwa, cikwone okengukwa kulola alolêreza aha agera.” Embere oderhe oku lebe ayish’iba mulume erhi mukazi wawe, oshinganine orhangimumanya bwinja. Cikone birhakaba bilembu okujira ntyo kugerera esite y’e Enterneti. Ciru ankaba ngasi muguma anabona emyanzi okubiyerekire owundi n’okujira kasanzi kanji muli mwarhumirana amamesaje, ka wanahash’iderha oku kobinali omumanyire? Bantu baguma bakagirhanya oku bamabona omuzigirwa wabo w’okunali bahikire aha bavunika omurhima n’ebi bayish’iricibonera erhi barhimanana n’oyo muntu.

Mwandisi muguma w’ennanga aderha ntya: “Ntatamala ahali ababi, ntanaja omu ndêko y’endyalya.” (Enna. 26:4) Bantu banji banarhanye mpu kurhaba kubi okunywerha enyanya z’emyanzi bakahira oku site z’okushebana lyo babonekana bakusimisa. Banafulika oku bayorha amango bali baganira. Haligi n’abandi bayerekana oku bali Bahamirizi ba Yehova, cikone k’omuntu anamanya erhi bali Bakristu babatize? Ka bakuzire ekiroho? Ka bagwerhe obwîra bwa hofi-hofi haguma na Yehova? Ka babà bakenzirwe omu bigamba byabo? Erhi ciru nkaba babà lwiganyo lubi omu cigamba erhi nkaba bali ‘bîra babi’? (1 Kr. 15:33, Mashi Bible; 2 Tm. 2:20, 21) Na kandi, ka bagwerhe oluhuma lw’okuja omu buhya nk’oku Amandiko gadesire? Kuli kwa bulagirire bwenene obe n’amashuzo g‘ago madoso, cikone orhakagabona erhi akaba orhaganîzizi abandi Bahamirizi bakaba bamanyire bwinja oyo muntu. (Mig. 15:22) Na kandi, omukozi mwishwekerezi wa Yehova, ‘arhankajira olushangi’ haguma n’orhali mwemezi.​—2 Kr. 6:14, Mashi Bible; 1 Kr. 7:39.

Rhwamayumva amazibu goshi gakahaba erhi rhwakalongeza oyu rhwarhôlana naye oku site z’e Enternete, cikone hali enjira nyinja zakarhuhashisa okubona oyu rhwarhôlana naye n’okuba n’obwîra bwinja haguma naye bwakarhuma rhwayishiba n’obuhya bwinja. Gurhi wakabamwo n’obulyo bw’okurhimanana n’oyu wakayishijira naye obuhya? Amango barhahanzizi entimanano nkulu, Abahamirizi ba Yehova banarhimanane n’abandi bantu amango g’entimanano y’ecigamba, oku ntimanano z’omuzunguko, eze eneo, n’oku zindi ntimanano.

Amango okurhimanana ntyo kurhali kwahashikana enyanya z’obu bulwala bw’e Korona, rhunakolese ebikolanwa by’eci elektroniki lyo rhujira ntimanano z’ecigamba n’okujira ntyo kwanakuha obulyo b’okumanya bene wirhu erhi bali birhu baciri misole. Wanabona gurhi bageza ebipindi byabo na gurhi bahâna amashuzo gayerekine obuyemere bwabo. (1 Tm. 6:11, 12) Na kandi wanaba n’obulyo b’okuganiza owundi muntu nk’entimanano za mahwa. Kugerera ebigusho by’ecielektroniki by’Abahamirizi ba Yehova, wanamanya bwinja omuntu okusimisize bulya wanabona gurhi ajirira abandi bantu na ntyo oko kwanayerekana amorhere g’okunali g’oyo muntu. (1 Pt. 3:4) Hano hagera nsiku, oku mugendekire mwaganira ko mwakanayishibona erhi mugwerhe mihigo miguma n’erhi mulinganine.

Erhi abalamba bakakolesa enjira elinganine n’amakanuni g’Ebibliya lyo balonza omuntu barhôlana naye, banayish’icibonera oku ogu mugani guli gw’okuli. Gudesire ntya: “Owàbwine omukazi [erhi mulume] erhi hinja arhôzire, erhi ngalo ya Nyakasane [Yehova, NWT] abwine.”​—Mig. 18:22.