1. Bici Yehova akujirire?

GURHI wahikiragamwo aha waba Muhamirizi wa Yehova? Nkaba oburhanzi wayumvagya “omwanzi mwinja” waguyumvagya kugerera ababusi bawe, erhi abinyu mukola mweshi erhi binyu banafunzi, erhi kugerera amahubiri ga nyumpa oku yindi. (Mk. 13:10, NWT) Buzinda, muntu mulebe akolesa kasanzi kanji na misi minji ly’alongoza ifunzo ly’Ebibliya haguma na nawe. Kugerera er’ifunzo, wahikira aha wazigira Yehova wanayiga oku naye aba akuzigire. Yehova akukulula waja omu okuli, na buno, bulya oli mwanafunzi wa Yezu Kristu, ogwerhe obulangalire bw’okuyishilama ensiku n’amango. (Yn. 6:44) Buzira karhinda onavuge Yehova omunkwa okubona Ashumize muntu mulebe akuyigirize okuli n’okubona Akuyemire oku obe muguma w’abakozi bage.

2. Bici rhwaganirira mw’eci cigabi?

² Obu rhukola rhumanyire okuli, rhugwerhe olukengwa lw’okurhabala abandi bacilunge haguma na nirhu omu njira ehesire ebwa buzine. Nkaba rhunabone oku kuli kulembu okuhubiri nyumba oku yindi, cikone nkaba rhunabone oku kuli kuzibu okurhondeza amafunzo g’Ebibliya n’okugalongoza. Ka ntyo k’ociyumva? Akaba ntyo, nkaba wabona oku amahano gali mw’eci cigabi gali ga bulagirire. Rhwaganirira ebintu birhushumya rhujire omukolo gw’okujira abanafunzi. Na kandi rhwabona gurhi rhwakahimamwo amazibu gakarhuma rhwayabirwa okulongoza ifunzo ly’Ebibliya. Burhangiriza, rhuganirire bulya gurhi rhurhashinganini rhube bahubiri bone cikone kandi rhushinganine rhube bigiriza b’omwanzi mwinja.

3. Bulya gurhi rhukahubiri?

³ Erhi Yezu ali hanw’igulu, aha abanafunzi bage omukolo  gugwerhe bigabi bibirhi. Burhangiriza, ababwira oku bahubiri omwanzi mwinja g’Obwami, anabayeresa gurhi bakajira ntyo. (Mt. 10:7; Lk. 8:1) Kwa lwiganyo, ababwira gurhi bashinganine okujira amango abantu bayankirire bwinja omwanzi g’Obwami n’amango barhaguyankiriri. (Lk. 9:2-5) Na kandi alêba emunda omukolo gwabo gw’okuhubiri gwakahisire omu kubabwira oku bakahânyire “obuhamirizi oku mashanja goshi.” (Mt. 24:14, NWT; Ebj. 1:8) Abanafunzi balishinganine babwire abantu enyanya z’Obwami bwa Nnamahanga n’ebi bwayish’ihikiriza, buzira kulola oku abantu bayankirire omwanzi gwabo.

4. N’oku biyerekinwe omu Mateyo 28:18-20, bindi bici rhushinganine okujira ahanyuma n’okuhubiri omwanzi g’Obwami kone?

⁴ Ecigabi ca kabirhi c’omukolo Yezu ahânaga co cihi? Abwira abanafunzi bage oku bayigirize abantu okushimba ebintu byoshi arhegekaga. Cikone, k’ogo mukolo g’okuhubiri n’okuyigiriza omu myaka igana mirhanzi mone gwalirhegesirwe oku gujirwe, nk’oku bantu baguma baderha? Nanga, Yezu ayerekine oku ogo mukolo gw’obulagirire gwakajijirwe muli zino nsiku zirhu, “kuhika oku buzinda bw’igulu.” (Osome Mateyo 28:18-20.) Nkaba Yezu ahânaga er’irhegeko amango abonekeraga banafunzi bage 500 na kulusha. (1 Kr. 15:6) Na kandi, omu mafulûlo Yezu ahâga Yowane, ayerekana n’obwalagale oku abanafunzi bage boshi bashinganine barhabale abandi bayige binji lugenda Yehova.​—Maf. 22:17.

5. Nk’oku biyerekinwe omu 1 Abakorinti 3:6-9, lwiganyo luhi Paolo akolesize ly’ayerekana olushangi luli egarhi k’okuhubiri n’okuyigiriza?

⁵ Entumwa Paolo yashushanyize omukolo g’okujira abanafunzi n’omukolo g’obuhinzi, ayerekana oku rhushinganine rhujire binji ahanyuma n’okurhwera emburho kone. Akengeza Abakorinti ntya: “Niono nie narhweraga, Apolo naye akâbombêza eyo mburho n’amîshi . . . mwe ishwa [lya Nyamuzinda].” (Osome 1 Abakorinti 3:6-9, Mashi Bible.) Rhwê nka bakozi ba Nyamuzinda bali omu “ishwa lyage” arhali mburho zone rhurhwera cikone rhunakâzibombêza n’okulabiriza ngasi mango erhi ziri zajira amajambere. (Yn. 4:35) Na ciru rhwakajira ebyo byoshi, ngasi mango rhunakakengera oku Nnamahanga orhuma emburho zakula.

6. Amango rhuli rhwayigiriza abantu, bici rhukwanine rhubarhabale bajire?

⁶ Rhunakalonza balya “bagwerhe irala ly’okuba n’obuzîne bw’ensiku n’amango.” (Ebj. 13:48, NWT) Lyo rhurhabala abo bantu bahikire okuba banafunzi, rhushinganine rhubarhabale (1) bahugûkwe, (2) bayemere, na (3) bakolese ebi bali bayiga omu Bibliya. (Yn. 17:3; Kl. 2:6, 7; 1 Ts. 2:13) Ngasi muntu w’omu cigamba anarhabala abanafunzi b’Ebibliya omu kubayeresa obuzigire n’okubayegereza amango bayishire oku ntimanano. (Yn. 13:35) Oli walongoza ifunzo ly’Ebibliya naye anahâna kasanzi kanji na misi minji ly’arhabala omwanafunzi aleke obuyemere erhi bijiro “byagwasire emizi” muli ye. (2 Kr. 10:4, 5, NWT) Byanahûna hagere myezi minji embere omuntu ahikire aho n’okuhikira omuhigo g’okubatizibwa. Cikone hali obunguke bw’okujira ntyo.

7. Bici birhushumya rhukahubiri n’okujira abanafunzi?

⁷ Bulya gurhi rhukahubiri n’okujira abanafunzi? Burhangiriza, bulya rhuba rhuzigire Yehova. Onayerekane oku ozigire Nnamahanga, erhi ojira okwawe koshi ly’orhumikira irhegeko ly’okuhubiri n’okujira abanafunzi. (1 Yn. 5:3) Okengere oku buzigire bwawe kuli Yehova bo bwakushumagya orhondere okuhubiri nyumpa oku yindi. Ka kwali kulembu okurhumikira er’irhegeko? Nkaba nanga. Ka wal’iyobohire erhi ohika hofi n’enyumpa ntanzi wahubirigiko? Buzira karhinda nkaba waliyobohire!  Cikone walimanyire oku ogo g’omukolo Yezu alonzize ojire, n’oko kwarhuma warhumikira er’irhegeko. Na ntyo erhi hagera kasanzi, orhacikag’iyoboha okuja omu mukolo gw’amahubiri. Gurhigi wakaderha lugenda okulongoza ifunzo ly’Ebibliya? K’okurhanya gurhi walilongoza kunakarhuma wayoboha? Nkaba. Cikone, erhi wakashenga Yehova oku akurhabale ohime obo boba n’oku aguhe oburhwali bw’orhondeza ifunzo, Yehova anakurhabala omu kuzibuhya irala lyawe ly’okujira abanafunzi.

8. Nk’oku biyerekinwe omu lwandiko lwa Marko 6:34, bindi bici byakarhushumya okuyigiriza abandi?

⁸ Bwakabirhi, obuzigire rhujira oku balungu birhu bo burhushumya rhubayigirize okuli. Mango maguma Yezu n’abanafunzi bage bayumva omurhamo enyanya z’okugeza kasanzi kanji omu mahubiri. Balilagirire oku hantu h’okurhamukira, cikone engabo y’abantu yayisha ebakulikire. Obwonjo bwashumya Yezu, arhondera okubayigiriza “binji.” (Osome Marko 6:34.) Acihâna okubayigiriza ciru ankaba ali amarhama. Bulya gurhi ajiraga ntyo? Yezu acihira oku nafasi y’eyo ngabo y’abantu. Abona kunganaci bali balibuka, kunganaci balilagirire oku bulangalire, na ntyo alonza okubarhabala. Ene nalyo abantu ntyo ko bayosire. Oku bali bonekana embuga kurhakag’irhurheba. Bali nka buso bwa bibuzi buli bwaja eyi n’eyi kone, bulya birhagwerhi omungere wabilongoza. Paolo ayerekine oku abo bantu ba ntyo balamire buzira bulangalire barhanamanyiri Nnâmahanga. (Ef. 2:12) Bali omu ‘muhango mugali guhesire omw’iherero’! (Mt. 7:13, Mashi Bible) Erhi rhulola ehali y’ekiroho y’abantu b’omu eneo yirhu, obuzigire n’obonjo bunarhushumye okurhabala. N’enjira nyinja rhwakabarhabalamwo kuli kubayigiriza Ebibliya.

9. Nk’oku biyerekinwe omu lwandiko lwa Abafilipi 2:13, gurhi Yehova akakurhabala?

⁹ Nkaba onarhindire okurhangiza ifunzo ly’Ebibliya bulya oba omanyire oku okulongoza ifunzo kuba kuhûnyire kasanzi kanji. Akaba ntyo k’ociyumva, wanabwira Yehova oko okaciyumva. Omuhûne akurhabale obe n’irala ly’okulonza n’okulongoza ifunzo ly’Ebibliya. (Osome Abafilipi 2:13.) Entumwa Yowane erhubwizire n’obwalagale oku Nnamahanga anashuze oku masala galinganine n’oku Alonzize. (1 Yn. 5:14, 15) Na ntyo wanayemera n’obwalagale oku Yehova okurhabala obe n’irala ly’okujira abanafunzi.

10-11. Bici byakarhuma rhwarhindira okulongoza ifunzo ly’Ebibliya?

¹⁰ Rhunarhôle omukolo gwirhu g’okuyigiriza kwa buzibu-zibu ciru ankaba rhuli rhwalwisa amazibu gakarhuhanza okujira binji nk’oku rhwalilonzize omu mukolo g’okujira abanafunzi. Rhuganirire gurhi rhwakahimamwo mazibu maguma maguma.

¹¹ Rhwanaciyumva nka hali ebi rhurhakahasha enyanya z’akanga rhulimo. Kwa lwiganyo, bahubiri baguma baguma bakola bashosi erhi babà balwazire bwenene. Ka ko kanga olimo ako? Erhi akaba ko kanga olimo ako, wanakengera isomo liguma ly’omu masomo rhwaciyigirizize kugerera obulwala bw’e Korona. Rhwahikire aha rhwabona oku rhwanahashilongoza amafunzo g’Ebibliya kugerera ebyombo by’eci elektroniki! Co cirhumire wanahasha okurhondeza ifunzo n’okulilongoza erhi onali aha mwawe. Na kandi hali obundi bunguke b’okujira ntyo. Hali abasima okuyiga Ebibliya, cikone barhabonekana amango bene wirhu na bali birhu balugija omu mahubiri. Cikone, banabonekana sezi-sezi erhi cajingwe. Ka wanaciha akasanzi k’okuyiga Ebibliya n’abantu ba ntyo muli ako kasanzi? Yezu budufu bo ayigirizagya Nikodemu, bulya ko kali kasanzi Nikodemu alicishozire.​—Yn. 3:1, 2.

12. Bici birhuyemezize oku rhwanaba bigiriza binja?

¹² Rhwanarhanya mpu nta buhashe rhugwerhe  b’okulongoza ifunzo ly’Ebibliya. Nkaba rhwanarhanya mpu bihûnyire rhube na bumanye bunji erhi buhashe bunji embere rhulongoze ifunzo na muntu mulebe. Akaba ntyo k’ociyumva, ololage bintu bisharhu byakakuyemeza oku wanahashiyiga Ebibliya na muntu mulebe. Burhangiriza, Yehova anakubone oku ogwerhe obuhashe bw’okuyigiriza abandi. (2 Kr. 3:5) Bwakabirhi, Yezu wahâbagwa “obuhashe bwoshi bw’omu mpingu n’obw’igulu,” akurhegesire oku oyigirize abandi. (Mt. 28:18) Na bwakasharhu, wanalangalira oku abandi banakurhabala. Yezu akagiyigiriza ebi Ishe alimubwizire oku aderhe, na nawe wanakajira ntyo. (Yn. 8:28; 12:49) Na kandi, wanabwira omwangalizi w’ecikundi cinyu c’amahubiri, erhi painiya kandi erhi muhubiri ogwerhe obulenga akurhabale ohash’irhondeza ifunzo onalilongoze. Wanakalusa abo bahubiri oku mafunzo gabo lyo nawe oba mwalimu mwinja.

13. Bulya gurhi kuli kwa bulagirire rhucikomereze enjira mpyahya z’okuyigiriza?

¹³ Nkaba rhunabe n’amazibu g’okukômera enjira mpyahya y’okuhubiri n’ebikolanwa bihyahya. Oku rhwakagilongoza amafunzo kwashanjire. Ecitabu cirhu c’okulongoza ifunzo, Oshagalukire Akalamo Ensiku n’Amango!, cihûnyire rhukarheganya ifunzo n’okulilongoza lubero n’oku rhwakagijira embere. Rhukasoma bifungo bisungunu, cikone rhwanajira nganîro nyinji haguma n’omwanafunzi. Amango rhuli rhwayigiriza, rhwakakolesa mavideo manji n’ebikolanwa by’eci elektroniki, kwa lwiganyo nka JW Library^®. Akaba orhasagimanya okukolesa ebyo bikolanwa, wanabwira mwene wirhu erhi mwali wirhu muguma akurhabale. Rhuli bene bantu rhuba rhusimire okujira ebi rhukomire. Kurhaba kulembu rhukomere enjira mpyahya y’okujira ebintu. Cikone kugerera okuburhabale bwa Yehova n’obw’abandi, wanabona oku kuli kulembu okujira empindûlo na ntyo wanashagalukira bwenene okuyiga haguma n’abantu. Nk’oku painiya muguma aderhaga, eyi njira mpyahya y’okuyigiriza “eri yashagalula omwanafunzi n’omwigiriza.”

14. Bici rhushinganine rhukakengera amango rhuli rhwahubiri omu eneo abantu barharhuyumvirhiza, na gurhi olwandiko lwa 1 Abakorinti 3:6, 7 lurhuhîremw’omurhima?

¹⁴ Nkaba rhuba rhulamire omu eneo ebamw’amazibu g’okurhondeza amafunzo. Bantu baguma baguma barhasimisibwa n’omwanzi gwirhu erhi ciru nkaba banakaguhagalika. Bici byakarhurhabala rhube n’entanya njinja omu eneo ya ntyo? Okengere oku mw’er’igulu libi rhulamiremo ene, akanga k’abantu kanahikira aha kashanja na balya barhakag’ishagalukira ebi rhwakag’ibayigiriza banahikira aha bahugûkwa amalagirire gabo g’ekiroho. (Mt. 5:3) Abakag’ilahira ebitabu birhu embere, bahikire aha bayemera ifunzo ly’Ebibliya. Na kandi rhumanyire oku Yehova ye Nn’emyaka (erhi Nnawabo w’ebisarulwa). (Mt. 9:38) Aba alonzize rhugendekere rhwarhwera n’okubômbêza, cikone yene ye meza emburho. (1 Kr. 3:6, 7) Na kandi, rhwanahâbwa omurhima bwenene omu kukengera oku, ciru akaba nt’ifunzo ly’Ebibliya rhuli rhwalongoza mwa zino nsiku, Yehova anarhuhemba kugerera obushiru bwirhu ci arhali kugerera amafunzo rhuli rhwalongoza! *

15. Gurhi Yehova aciyumva erhi muntu mulebe ayemera ifunzo ly’Ebibliya n’okurhondera okukolesa ebi ali ayiga?

¹⁵ Yehova anashagaluke bwenene erhi omuntu ayemera okuli, n’amango arhondera okuganirira abandi ebi ali ayiga. (Mig. 23:15, 16) Ene Yehova ali acishinga bwenene erhi abona ebi abakozi bage bali bahikiriza! Kwa lwiganyo,  ciru akaba hali obu bulwala bw’okuyahukira omw’igulu lyoshi, omu mwaka gw’omukolo gwa 2020, rhwalongozize mafunzo g’Ebibliya 7 705 765, rhwarhabala bantu 241 994 bacihâna emwa Yehova n’okubatizibwa. Abo banafunzi bahyahya nabo bacibilongoza amafunzo g’Ebibliya n’okujira banafunzi banji kulusha. (Lk. 6:40) Buzira karhinda, rhunarhume Yehova aba n’omwishingo erhi rhujira abandi babe banafunzi.

16. Muhigo mwinja guhi rhwakacihiriraho?

¹⁶ Omukolo gw’okujira abanafunzi guba mukolo muzibu, cikone kugerera oburhabale bwa Yehova, rhwanahash’ijira okwirhu koshi lyo rhuyigiriza abahyahya bahikire aha bazigira Larha wirhu w’omu mpingu. Ka rhwanacihirirah’omuhigo g’okurhondeza n’okulongoza ciru ifunzo liguma lyone ly’Ebibliya? Nkaba rhwasomerwa n’okubona ebi rhwahikirizize amango rhuli rhwakolesa ngasi bulyo rhugwerhe b’okurhondeza ifunzo ly’Ebibliya haguma na ngasi muntu rhurhimanine naye. Rhwanayemera n’obwalagale oku Yehova agisha obushiru bwirhu.

17. Gurhi rhwakaciyumva erhi akaba rhugwerhe obulyo b’okulongoza ifunzo?

¹⁷ Luli lukengwa lunene rhugwerhe lw’okuhubiri n’okuyigiriza abandi okuli! Kobinali ogo mukolo gunarhulerhere obushagaluke. Entumwa Paolo yarhabalaga bantu banji b’e Tesalonika babe banafunzi, ayerekine oku akag’iciyumva omu kuderha ntya: “Bundi bulangalire buci rhugwerhe, gandi masima maci rhwabone, lindi ishungwe lihi lyarhulerhere irenge embere za Nnawirhu Yezu olusiku agaluka [amango g’okubâho kwage, NWT] aha nyuma zinyu? Neci, mw’oyo mwe irenge lirhu, mwe na busime bwirhu.” (1 Ts. 2:19, 20; Ebj. 17:1-4) Bantu banji ene nabo bali baciyumva ntyo. Mwali wirhu Stéphanie n’iba bahikire aha barhabala bantu banji babatizibwe, adesire ntya: “Nta kandi kantu kakaha omuntu omwishingo kalusha okurhabala abantu bacihâne emwa Yehova.”