1. Bulya gurhi Yehova arharhugerera oku bandi?

YEHOVA asima ebintu biri lubero-lubero. Oku alemire bene bantu n’ebindi byoshi kunayerekane ntyo. Ngasi muguma wirhu arhayumanana n’owundi. Co cirhumire nta mango Yehova akarhugerera oku bandi. Analabirize omurhima gwawe, ananalolereze akandalala kawe. (1 Sam. 16:7) Na kandi ayishi obuhashe bwawe, obuzamba bwawe n’oku wakulagamwo. Arhakanakuhûna oku ojire ebintu bilushire obuhashe bwawe. Rhushinganine rhuyige Yehova omu kukacibona nk’oku naye arhubona. Na ntyo rhwanaba “n’engererezo zishinganine,” zakarhuma rhurhacikarhanya oku rhulushire abirhu erhi rhuli ba busha.​—Rm. 12:3, Mashi Bible.

2. Bulya gurhi kurhali kwinja okukacigerera oku bandi?

² Kobinali, rhwanaciyigiriza binji kugerera enyiganyo za bene wirhu erhi bali birhu bishwekerezi bahikiriza omukolo gw’amahubiri bwinja. (Hb. 13:7) Okujira ntyo kwanarhuma rhwabona gurhi rhwakajira lyo nirhu rhuhikiriza omukolo gw’amahubiri bwinja. (Fl. 3:17) Cikone haba olubero egarhi k’okuyiga olwiganyo lwinja lwa muntu mulebe n’okulukolesa ly’ocigerera kuli ye. Oko kucigerera oku bandi kwanarhuma wahikira aha wakabayumviza obumvu, kwanarhuma wavunika omurhima, kandi erhi ciru ocibone oku oli wa busha-busha. Nk’oku rhwabonaga omu cigabi cagerega, okujira akamashigwe n’abandi b’omu cigamba kwanashereza ehali yirhu y’ekiroho. Co cirhumire Yehova arhuyinginzire n’obuzigire ntya: “Mâshi ngasi muguma alole okw’ebijiro byage biyosire. Erhi ankacîkungira okwo, acîkunge, c’arhali kucîgerera oku bandi.”​—Gl. 6:4.

3. Majambere gahi g’ekiroho wamakajira gakarhuma waba n’omwishingo?

 ³ Yehova aba alonzize rhukashagalukira ebi rhwahashire okujira lyo rhumukolera. Kwa lwiganyo, erhi akaba wabatizibwe, wanashagalukira okubona wahikirizize ogo muhigo! Wene wacishogaga okurhôla ogo muhigo. Buzigire bwawe kuli Nnamahanga bwakushumyagya oku ogurhôle. Orhanyagye oku majambere wamakajira kurhondera ago mango. Kwa lwiganyo, k’obuzigire bwawe okubiyerekire okusoma Ebibliya n’ifunzo lyawe ly’Ebibliya bwayushusire? K’amasala gawe gakola gaba minja kulusha na kandi gakurhenga oku murhima? (Enna. 141:2) K’okola oba mubidu okurhondeza enshambalo omu mahubiri erhi k’okola ohashikolesa bwinja ebikolanwa birhu by’okuhubiri? N’erhi akaba ojira omulala, ka Yehova akurhabire wahikira aha waba mulume mwinja, mukazi mwinja erhi mubusi mwinja? Wanaciyumva orhimusirwe n’okushagaluka enyanya z’amajambere wajijire muli ebyo bintu.

4. Bici rhwaganirira mw’eci cigabi?

⁴ Rhwanarhabala abandi nabo bakashagalukira ebi bahashire okujira lyo bakolera Yehova. Na kandi rhwanabarhabala baleke okukacigerera oku bandi. Mw’eci cigabi, rhwaganirira gurhi ababusi bakakarhabalamwo abana babo, gurhi abarhôline bakakarhabalana na gurhi abagula n’abandi bakakarhabalamwo bene wabo na bali babo. Na buzinda, rhwaganirira makanuni maguma na maguma gakarhurhabala rhukacihiriraho emihigo y’olugero elinganine n’obuhashe n’akanga rhulimo.

5. Nk’oku biyerekinwe omu lwandiko lwa Abefezi 6:4, bici ababusi barhashinganini okujira?

⁵ Ababusi bashinganine babe masu lyo barhagikagerera omwana oku wundi erhi kuhûna omwana ajire ebintu bilushire obuhashe bwage. Okujira ntyo kwanarhuma omwana avunika omurhima. (Osome Abefezi 6:4.) Mwali wirhu ohamagalwa Sachiko * adesire ntya: “Abalimu bani bakagilonza nkakola bwinja emasomo kulusha abirhu banafunzi. Na kandi, nyama naye alilonzize nkole bwinja emasomo mpu lyo mpana obuhamirizi kuli mwalimu wani, na kuli larha orhali Muhamirizi. Kuli kuderha oku alilonzize nkapata 100 okw’igana amango g’amashindano, n’obu nakagibona oku birhakahashikana. Ciru akaba hamagera myaka minji nyusize amasomo, hali amango ntanya oku nkaba Yehova arhanshagalukira ciru ankaba nanjire okwani koshi lyo mmukolera.”

6. Bici olwandiko lwa Ennanga 131:1, 2, lwakayigiriza ababusi?

 ⁶ Isomo ly’obulagirire ababusi bakaciyigiriza liri omu lwandiko lwa Ennanga 131:1, 2. (Osome.) Mwami Daudi aderha erhi “ntaharhîri bya bukulu” erhi ebimulenzire bulî. Obwirhohye n’olugero byakarhuma ‘arhûza n’okudêkerera.’ Bici ababusi bakaciyigiriza kugerera enderho za Daudi? Arhali mw’ebi bashinganine okujira byone ababusi bashinganine okubamo birhohye na ba lugero cikone na mw’ebi bakalonza abana babo bahikirize. Ababusi banarhabala abana babo bahugûkwe obuhashe bwabo n’obuzamba bwabo amango bali babarhabala bacihirireho emihigo eshinganine. Mwali wirhu muguma ohamagalwa Marina akengire ntya: “Nta lusiku nyama akagingererako bashinja bani erhi kuli balumuna bani erhi kuli abandi bana. Anyigirizize oku ngasi muntu ajira enshokano ziri lubero n’ez’owundi n’oku rhweshi Yehova anarhubone oku rhuba ba bulagirire. Ntalugicigerera oku bandi enyanya z’olwo lwiganyo lwage.”

7-8. Gurhi omulume akayerekanamwo oku akenzire mukage?

⁷ Omulume Mukristu ashinganine akakenga mukage. (1 Pt. 3:7) Okukenga muntu mulebe kuhiziremo okumushibirira. Kwa lwiganyo, omulume anayerekane oku akenzire mukage omu kumuyereka oku kobinali aba wa bulagirire. Arhakamuhûna ajire ebintu bilushire obuhashe bwage. Na kandi, arhakakagerera mukage oku bandi bakazi. Gurhi akaciyumva Erhi akakamugerera oku bandi? Mulume muguma orhali Muhamirizi, oba iba wa mwali wirhu muguma ohamagalwa Rosa anakamugerera oku bandi bakazi. Ezo nderho z’iba zitwa nka mugushu zinarhume aciyumva kubi bwenene na kandi zinarhumire obona nka arhamuzigira. Adesire ntya: “Mba ndagirire okukengezibwa ngasi mango oku Yehova ananshagalukire.” Lubero n’oyo mulume, omulume Mukristu yehe anahe mukage olukengwa. Aba amanyire oku ebijiro bya ntyo, byanahuma oku bwîra bwage haguma na mukage, n’oku bwîra bwage haguma na Yehova. *

⁸ Omulume okenzire mukage anamukunga-kunga, anamuvuge omunkwa n’okumuyereka n’obwalagale oku aba amusimire. (Mig. 31:28) Ntyo kw’iba wa Katerina, rhwaganiriraga omu cigabi cageraga amurhabalagamwo ly’alwisa entanya zage z’okuciyumva wa busha. Erhi ali mwana, nnina akagimugayaguza bwenene, n’okumugerera okubandi banyere, ciru n’oku bîra bage. Na ntyo, Katerina arhondera okukacigerera oku bandi, ciru ecigendekire okujira ntyo erhi amaja n’omu okuli! Cikone, bulya iba ali Mukristu, amurhabala okulwisa ezo ntanya na kandi amurhabala abe n’entanya nyinja kuli ye yene. Adesire ntya: “Aba anzigire bwenene, ananvuge omunkwa na kandi anampire omu masala gage. Na kandi, anankengeze amorhere minja ga Yehova, n’okuntabala nyake entanya z’okucibona wa busha.”

9-10. Gurhi abagula barhabiremwo mwali wirhu muguma ly’aleka okukacigerera oku bandi?

⁹ Gurhi abagula bakarhabalamwo bala bakalonza okucigerera oku bandi? Rhuganirire olwiganyo lwa mwali wirhu muguma ohamagalwa Hanuni barhakag’ilugivuga omunkwa erhi aciri mwana. Akengire ntya: “Nali wanshonyi nanakagirhanya oku abandi bana bo babà binja kundusha. Narhondera okukacigerera oku bandi erhi nancirhi murho bwenene.” Ciru n’erhi Hanuni aja omu okuli, acib’ikacigerera oku bandi. N’oko kwarhuma akaciyumva oku arhali wa bulagirire bunji omu cigamba. Cikone kuhika buno, ali painiya agwerhe omwishingo. Bici byamurhabire ashanje entanya zage?

¹⁰ Hanuni adesire oku abagula bakag’imushibirira  bo bamurhabire. Bakagimuyereka oku bamulangalire n’okumuvuga omunkwa enyanya z’olwiganyo lwage lwinja. Ayandisire ntya: “Hali amango abagula bakagimbwira oku njiha omurhima bali birhu balagirire okuguhâbwa. Ogo mukolo gwakarhuma nabona oku mba wa bulagirire. Ncikengire gurhi abagula b’obuzigire banvugaga omunkwa okubona najir’iha omurhima bali birhu baguma baguma baciri misole. Buzinda bansomera olwandiko lwa 1 Abatesalonika 1:2, 3. Oko kwampuma oku murhima bwenene! Kugerera oku burhabale bw’abo balungere binja, nkolamba nshagalukire enafasi yani omw’ikubuliro lya Yehova.”

11. Nk’oku biyerekinwe omu lwandiko lwa Izaya 57:15, gurhi rhwakarhabalamwo “abalibusire n’abacîrhôhize omu murhima”?

¹¹ Osome Izaya 57:15, Mashi Bible. Yehova anashibirire “abalibusire n’abacîrhôhize omu murhima.” Ngasi muguma wirhu anarhabala omu kuha abo bene wirhu na bali birhu bazigirwa omurhima, ci arhali abagula bone. Njira nguma rhwakabahâmwo omurhima kuli kuyerekana oku kobinali rhubashibirire. Yehova aba alonzize rhuyereke ebyo bibuzi byage by’obulagirire kunganaci aba abizigire. (Mig. 19:17) Na kandi rhwanarhabala bene wirhu na bali birhu omu kuba birhohye na ba lugero. Rhurhalonza okujira ebintu byakarhuma abandi barhusegezako entanya zabo bulya oko kwanarhuma barhuyumviza obumvu. Lubero n’oko, rhwanakolesa obuhashe n’obumanye bwirhu lyo rhuhânana omurhima.​—1 Pt. 4:10, 11.

12. Bulya gurhi abantu birhohye bakagiyegera Yezu? (Olole enfoto eri oku cijada c’eyi gazeti.)

¹² Rhwanayiga gurhi rhwakakajirira abandi omu kulola gurhi Yezu akagikolera abanafunzi bage. Ye wali muntu mukulu bwenene walamaga hanw’igulu. Cikone, ali “mutûdu na mwirhohye w’omurhima.” (Mt. 11:28-30) Arhalonzagya okuciyerekana oku ali mwenge erhi amanyire binji kulusha. Akagiyigiriza omu kukolesa enderho nembu, n’enyiganyo nyinja zakag’ikahuma oku mirhima y’abantu birhohye. (Lk. 10:21) Lubero n’abakulu b’amadini bali ba bucibone, nta lusiku Yezu ajijire abandi baciyumve oku barhali ba bulagirire emwa Nnamahanga. (Yn. 6:37) Ahali hw’okujira ntyo, akagikenga abantu barhali lengerire.

13. Gurhi obwinja n’obuzigire bwa Yezu bwakagibonekana kugerera oku akagijirira abanafunzi bage?

¹³ Obwinja n’obuzigire bwa Yezu bwakagibonekana kugerera oku akagijirira abanafunzi bage. Alimanyire oku bagwerhe obuhashe n’akanga kali lubero. Barhakahâbirwe mikolo miguma na kandi boshi barhakalehesire kuguma omu mahubiri. Ciru akaba ntyo, akagishagalukira obushiru burhenzire oku murhima goshi ngasi muguma wabo akagiyerekana. Oborhere bwa Yezu bw’okuhugûkwa akanga ka ngasi muntu, bubonekine kugerera olwiganyo ahânaga lw’amagerha (talanta). Mw’olo lwiganyo, oyo muntu (nnawabo) aha ngasi murhumisi wage omukolo kushimbana n’ “obuhashe bwage.” Murhumisi muguma wa muli balya barhumisi babirhi bali masu ayunguka binji kulusha owabo. Cikone nnawabo abavuga bombi omunkwa omu kukolesa ezi nderho zishushine: “Kwokwo, murhumisi mwinja na mwikubwagirwa!”​—Mt. 25:14-23.

14. Gurhi rhwakayiga oku Yezu akagikajirira abandi?

¹⁴ Ngasi mango Yezu anakarhukolera n’obuzigire n’obwinja. Ayishi oku obuhashe n’akanga kirhu biba lubero, na kandi anashagaluke erhi rhujira okwirhu koshi lyo rhukolera Ishe. Kuli kwinja rhukajirira abandi aka Yezu. Rhurhakagirhuma owirhu Mukristu aciyumva wa busha erhi ayumve enshonyi bulya arhakahashijira binji nk’abandi. Lubero n’oko, rhukalola bulyo buhi rhwakavugamwo bene wirhu na bali birhu omunkwa okubona bali bajira okwabo koshi lyo bakolera Yehova.

15-16. Gurhi mwali wirhu muguma ayungusiremwo omu kucihirira emihigo y’olugero?

¹⁵ Emihigo y’ekiroho enalongoze akalamo n’okurhuma kaba n’omuhigo. Cikone, akantu kakarhurhabala, kuli kukacihiriraho emihigo elinganine n’obuhashe bwirhu n’akanga kirhu, ci arhali mihigo eri nk’ey’abandi. Rhurhakalonza rhwenene rhukajira ebyakarhuma rhwavunika omurhima. (Lk. 14:28) Rhuganirire olwiganyo lwa mwali wirhu painiya ohamagalwa Midori.

¹⁶ Ishe wa Midori akagimugayaguza amango ali mwana omu kumugerera oku bandi bana bage ciru n’oku babo bakagisoma boshi. Midori adesire ntya: “Nakagiciyumva wa busha.” Cikone erhi akula arhondera okubona oku arhaba wabusha. Adesire ntya: “Nakasoma Ebibliya ngasi lusiku lyo mba n’omurhula gw’ekandalala na ntyo nakaciyumva oku Yehova aba anzigire.” Na kandi, acihiriraho emihigo y’olugero, anashenga Yehova enyanya z’eyo mihigo ly’ayihikiriza. Na ntyo, Midori arhondera okushagalukira ebi akahashir’ijira ly’akolera Yehova.

17. Gurhi ‘rhwakagendekera rhwahindulwa buhyahya omu nkengero zirhu,’ na bunguke buci oko kwakalerha?

¹⁷ Entanya zirhashinganini n’okuciyumva ba busha birhankahwa oku lusiku luguma. Co cirhumire Yehova arhubwizire ntya: “Mushinganine mugendekere mwahindulwa buhyahya omu enkengero zinyu.” (Ef. 4:23, 24, NWT) Lyo rhuhikira aho, rhushinganine rhukasalira, okuyiga Akanwa ka Nnamahanga, n’okukarhanyako. Ocihâne wenene muli ebyo bintu, onahûne Yehova emisi. Iroho litagatifu lyage lyanakurhabala olwise ngasi kantu kakarhuma walonza okucigerera oku bandi. Na kandi Yehova anakurhabala amanye erhi ogwerhe obucibone n’erhi oli wacifinja eby’abandi, ananakurhaba okule duba-duba ago morhere mabi omu murhima gwawe.

18. Gurhi enderho ziri omu lwandiko lwa 2 Enganîro 6:29, 30 zakakurhulirizamwo?

 ¹⁸ Osome 2 Enganîro 6:29, 30. Yehova ayishi omurhima gwirhu. Na kandi ayishi kunganaci rhulwisa iroho l’igulu n’obuzamba bwirhu. Yehova anarhuzigire bwenene erhi abona kunganaci rhuli rhwalwisa ebyo byoshi.

19. Lwiganyo luhi Yehova akolesize ly’ayerekana gurhi aciyumva kuli rhwê?

¹⁹ Yehova akolesize olwiganyo lw’obuzigire buba egarhi k’omuzire n’akabonjo kage ly’ayerekana gurhi aciyumva kuli rhwê. (Iz. 49:15) Rhuganirire olwiganyo lwa muzire muguma ohamagalwa Rachel. Ayandisire ntya: “Mwali wani Stephanie aburhagwa erhi arhanacibumba emyezi y’okuburhwa. Erhi mmulolak’oburhanzi ali musungunu bwenene anali ngonyi. Cikone oku hopitali banyemerera oku nka mubagalira ngasi lusiku mw’ogo mwezi murhanzi ayusagya omu mashini bahebamw’abana baburhwa barhanacibumba emyenzi. Ako kasanzi karhuma rhwaba n’obwîra bwa hofi-hofi haguma naye. Kuhika buno akola agwerhe myaka ndarhu cikone aba musungunu bwenene kulusha abandi bana bagwerhe emyaka yage. Ciru akaba ntyo, mba muzigire bwenene bulya alwisize mazibu manji ly’alama, na kandi arhumire naba n’omwishingo omu kalamo!” Rhuhîrwe omurhima okumanya oku Yehova anarhuzigire bwenene erhi abona rhuli rhwajira okwirhu koshi lyo rhumukolera n’omurhima goshi!

20. Okubona oli mukozi wa Yehova wacihânyire emwage, cirhumire cihi cakarhuma wacikunga?

²⁰ Okubona oli mukozi wa Yehova, orhashushini n’owundi, onali wa bulagirire omu mulala gwawe gulimo abantu bali lubero-lubero. Yehova arhakukululaga emwage mpu bulya wali mwinja bwenene kulusha abandi bantu. Cikone akukulwire emwage bulya abwine omu murhima gwawe oku oli muntu mwirhohye wakayigirizibwa n’okujira empindûlo. (Enna. 25:9) Oyemere n’obwalagale oku anashagaluke bwenene erhi ojira okwawe koshi ly’omukolera. Okulembera n’obwishwekerezi bwawe binayerekane oku ojira “omurhima nkana na mwinja.” (Lk. 8:15) Co cirhumire ogendekere wajira okwawe koshi ly’oha Yehova ebi wakanahasha. Na ntyo wanaba n’ecirhumire cinja c’ ‘okucîkungira.’