1. Gurhi Yehova ajijire erhi Adamu na Eva bayus’ijira ecaha? (Omurhondêro 3:15)

 ERHI Adamu na Eva bayus’ijira ecaha, Yehova aha iburha lyabo obulangalire kugerera bulebi buguma bw’obulagirire. Ebi adesire biri omu lwandiko lw’Omurhondêro 3:15.​—Osome.

2. Bulya gurhi obo bulebi buli bwa bulagirire?

² Obo bulebi buli omu citabu cirhanzi c’Ebibliya. Cikone omu njira nguma erhi yindi, ebindi bitabu byoshi by’Ebibliya biba bipatine n’obo bulebi. Nka kula ecibambiro c’ecitabu cihumanya haguma orhuratasi rhoshi, enderho ziri omu lwandiko lw’Omurhondêro 3:15 zinahumanye haguma ebitabu byoshi by’Ebibliya lyo guba mwanzi muguma gone, k’okuderha oku hakabire Omucunguzi wayish’ishereza Shetani n’abantu babi boshi bamulunga okuboko. * Oko kwayish’ilerhera abazigira Yehova boshi emigisho!

3. Bici rhwaganirira mw’eci cigabi?

³ Mw’eci cigabi, rhwashuza kw’aga madoso lugenda obulebi b’omu lwandiko lw’Omurhondêro 3:15: Bandi baganirirwe mw’obo bulebi? Gurhi obo bulebi buli bwahikirizibwamwo? Na gurhi rhuli rhwayunguka kugerera obo bulebi?

4. ‘Enjoka,’ ye ndi na gurhi rhumanyiremwo ntyo?

⁴ Abaganirirwe omu mwanzi guli omu Omurhondêro 3:14, 15 bahiziremwo ‘enjoka,’ “iburha” ly’enjoka, ‘omukazi,’  n’“iburha” ly’omukazi. Ebibliya erhurhabire okumanya ngasi muguma wa mulibo ali ndi. * Rhurhonderage n’‘enjoka.’ Enjoka y’okunali erhakayumvirhe ebi Yehova aderhaga omw’ishwa ly’e Edeni. Co cirhumire, ebinwa bya Yehova byal’iyerekire eciremwa c’obwenge. Eco ciremwa aligi ndi? Olwandiko lw’Amafulûlo 12:9 luyerekine n’obwalagale enjoka ye ndi. Olo lwandiko luyerekine n’obwalagale oku ‘omujoka wa mîra’ ye Shetani Ibilisi. Cikone iburha ly’enjoka bo bandigi?

5. Iburha ly’enjoka bo bandi?

⁵ Hali amango Ebibliya ekolesa oluderho “iburha” omu kuganirira abayiga bwinja-bwinja olwiganyo lwa muntu mulebe, na muli ntyo banahamagalwa bana bage. K’okuderha oku iburha ly’enjoka lijijirwe n’ebiremwa by’ekiroho n’abantu bahagalika Yehova n’abakozi bage, aka Shetani. Abo bahiziremwo bamalahika balekaga enafasi yabo omu mpingu omu nsiku za Nuhu n’abantu babi bacigendesa ak’ishe wabo Ibilisi.​—Murh. 6:1, 2; Yn. 8:44; 1 Yn. 5:19; Yd. 6.

6. Bulya gurhi ‘omukazi’ arhakabire Eva?

⁶ Rhulolage ‘omukazi’ naye ye ndi. Omukazi arhakabire Eva. Bulya gurhi? Rhuganirire cirhumire ciguma cone. Obo bulebi buyerekine oku iburha ly’omukazi ‘lyakalabasire [erhi, kuvunyungula]’ irhwe ly’enjoka. Nk’oku rhwaderhaga embere, enjoka ciri ciremwa ca kiroho cihamagalwa Shetani, na nta muntu orhali mwimana w’omw’iburha lya Eva wakabire n’obuhashe bw’okuvunyungula Shetani. Gurhigi Shetani akasherezibwemwo?

7. Nk’oku biyerekinwe omu lwandiko lw’Amafulûlo 12:1, 2, 5, 10, omukazi oganirirwe omu lwandiko lw’Omurhondêro 3:15 ye ndi?

⁷ Ecitabu cizinda c’Ebibliya cirhuyeresire omukazi ye ndi. (Osome Amafulûlo 12:1,  2, 5, 10.) Oyo arhali mukazi mulebe hanw’igulu! Agwerhe omwezi aha magulu gage n’ecimanè c’enyenyezi 12 oku irhwe lyage. Aburha omwana orhali ak’abandi bana, k’okuderha Obwami bwa Nnâmahanga. Obwami bwa Nnâmahanga buba b’omu mpingu, k’okuderha oku oyo mukazi naye ashinganine abe w’omu mpingu. Ashushanyize ecigabi c’omu mpingu c’ikubuliro lya Yehova ciba cijijirwe na bamalahika bage bishwekerezi.​—Gl. 4:26.

8. Ecigabi cirhanzi c’iburha ly’omukazi ye ndi, na mangaci abaga co? (Omurhondêro 22:15-18)

⁸ Kandi Akanwa ka Nnâmahanga karhurhabire okuhugûkwa ecigabi cirhanzi c’iburha ly’omukazi. Al’ishinganine abe w’omw’iburha lya Abrahamu. (Osome Omurhondêro 22:15-18.) Nk’oku byanal’ilebirwe mw’obo bulebi, Yezu ali w’omw’iburha ly’oyo mulume mwishwekerezi. (Lk. 3:23, 34) Cikone, er’iburha lyakabire n’obuhashe bunji bulushire obwa bene bantu bulya lyo lyayish’ivunyungula Shetani Ibilisi. Co cirhumire, erhi Yezu aba na myaka hofi 30, ashigwa amavurha n’iroho litagatifu lya Nnâmahanga. Erhi Yezu ashigwa amavurha, aba cigabi cirhanzi c’iburha ly’omukazi. (Gl. 3:16) Enyuma z’okufâ n’okufûka kwa Yezu, Nnâmahanga ‘amuyambika ishungwe ly’irenge n’obukuze’ anamuha “obuhashe bwoshi bw’omu mpingu n’obw’igulu,” buhiziremwo n’obuhashe bw’‘okuhererekeza emikolo ya Shetani.’​—Hb. 2:7; Mt. 28:18; 1 Yn. 3:8.

9-10. (a) Bandi bahi baba cigabi c’iburha ly’omukazi, na mangaci bajirwa cigabi c’er’iburha? (b) Bici rhukolaga rhwaganirira?

⁹ Cikone hakabire ecigabi ca kabirhi c’er’iburha. Entumwa Paolo yayerekine eco cigabi c’er’iburha erhi abwira Abakristu bashige amavurha Bayahudi n’abarhali Bayahudi ntya: “Akaba muli ba Kristu, muli iburha ly’Ibrahimu [Abrahamu], mwe mwanayîme mwa birya alaganyibagwa.” (Gl. 3:28, 29) Erhi Yehova ashiga Omukristu amavurha kugerera iroho lyage litagatifu, oyo muntu anabe w’omu cigabi c’iburha ly’omukazi. K’okuderha oku er’iburha lijijirwe na Yezu Kristu n’abantu 144 000 bayish’irhambula haguma naye. (Maf. 14:1) Boshi banacihangane okuba n’entanya n’ebijiro biri nk’eb’Ishe, Yehova Nnâmahanga.

¹⁰ Bulya rhwamamanyaga abaganirirwe omu lwandiko lw’Omurhondêro 3:15, rhuganirirage kwa bofofi gurhi Yehova agendekire okuhikiriza obo bulebi na gurhi rhuli rhwayunguka kugerera bo.

11. Omu njira nci iburha ly’omukazi lyalumirwe “oku kansisira”?

¹¹ Kushimbana n’obo bulebi b’omu lwandiko lw’Omurhondêro 3:15, enjoka yakalumire iburha ly’omukazi “oku kansisira.” Oko kwahikirizibwe erhi Shetani ashumya Abayahudi n’Abaroma banige Mugala wa Nnâmahanga. (Lk. 23:13, 20-24) Nka kula ecihulu c’oku kansisira cilemaza omuntu kasanzi kasungunu, Yezu arhakajijire kantu koshi-koshi erhi ayusa nsiku isharhu ali omu nshinda.​—Mt. 16:21.

12. Gurhi na mangaci irhwe ly’enjoka lyavunyungulwa?

¹² Obo bulebi b’omu lwandiko lw’Omurhondêro 3:15 buyerekine oku Yezu arhakabêzire omu nshinda. Bulya gurhi? Bulya buyerekine oku iburha ly’omukazi lyakavunyungwire irhwe ly’enjoka. Oko kuyerekine oku byal’ihûnyire Yezu afume ecihulu c’oku kansisira. Na ntyo ko byanabire! Omu lusiku lwa kasharhu enyuma z’okufâ kwage, Yezu afûlwa anahâbwa obuzine burhakacifâ empingu. Omu kasanzi Nnâmahanga  acishozire, Yezu ayish’ivunyungula Shetani arhakanacihaba bundi. (Hb. 2:14) Yezu n’abayish’irhambula haguma naye bayish’ishereza abashombanyi boshi ba Nnâmahanga, k’okuderha iburha ly’enjoka.​—Maf. 17:14; 20:4, 10. *

13. Gurhi rhuli rhwayunguka omu kuhikirizibwa kw’obo bulebi?

¹³ Erhi akaba oli mukozi wa Nnâmahanga wacihânyire emwage, oli wayunguka omu kuhikirizibwa kw’obo bulebi. Erhi Yezu ali hanw’igulu, agwerhe omubiri gw’omuntu. Ayerekine n’obwimana amorhere g’Ishe. (Yn. 14:9) Co cirhumire kugerera Yezu, rhwahikire aha rhwamanya Yehova Nnâmahanga n’okumuzigira. Na kandi, rhwayungusire kugerera enyigirizo zage n’oku ali alongozamwo ecigamba c’Ecikristu ene. Arhuyigirizize gurhi rhwakalamamwo omu njira yakarhurhabala rhuyemerwe na Yehova. Na kandi, rhweshi rhwanayunguka kugerera olufû lwage, k’okuderha okulumirwa oku kansisira. Omu njira nci? Erhi Yezu afûka, ahânyire akamaro k’omuko gwage nka nterekêro nyimana ‘eshuka ebyaha birhu byoshi.’​—1 Yn. 1:7.

14. Gurhi rhumanyiremwo oku obulebi Yehova aderhaga omu Edeni burhakahikirire ho n’aho? Ohugûle.

¹⁴ Enderho Yehova aderhaga omw’ishwa ly’e Edeni ziyerekine oku kasanzi kalebe kakagezire embere obo bulebi buhikirizibwe boshi-boshi. Byal’ihûnyire hagere akasanzi ly’omukazi aba n’iburha lyalaganyizibagwa, lyo Shetani aba n’abambali, na kandi lyo enshombo eba egarhi k’ebyo bigusho bibirhi. Rhuyungusire omu kuhugûkwa obo bulebi bulya burhurhonzire oku igulu lirhambwirwe na Shetani lyashomba abakozi ba Yehova. Enyuma z’aho, Yezu ahîre abanafunzi bage oburhonde buli nk’obo. (Mk. 13:13; Yn. 17:14) Buzira karhinda, rhwacibwinire gurhi ecigabi c’obo bulebi cahikirire, bwenene muli eyi myaka igana egezire. Omu njira nci?

15. Bulya gurhi igulu lishombire bwenene abakozi ba Nnâmahanga kulusha agandi mango goshi, cikone bulya gurhi rhurhashinganini okuyoboha Shetani?

¹⁵ Erhi Yezu ayus’ijirwa Mwami w’Ecimasiya omu mwaka gwa 1914, afukuza Shetani e mpingu. Akola aba okw’igulu arhanacigwerhi obuhashe bw’okugaluka empingu, ali alinda obushereze bwage. (Maf. 12:9, 12) Cikone Shetani arhakunjiri amaboko. Akunîre bwenene anali arhera abakozi ba Nnâmahanga. (Maf. 12:13, 17) Co cirhumire, igulu ligendekire okubashomba bwenene. Ciru akaba ntyo, rhurhashinganini rhuyobohe Shetani n’abambali. Lubero n’oko, aka entumwa Paolo, nirhu rhushinganine rhuyemere ntya n’obwalagale: “Akaba Nyamuzinda ali olunda lwirhu, ndi wankacirhuhima?” (Rm. 8:31) Rhwanalangalira Yehova loshi-loshi bulya, nk’oku rhwabonaga, ecigabi cinene c’obulebi buli omu Omurhondêro 3:15 cahikirizibwe.

16-18. Gurhi Curtis, Ursula, na Jessica bayungusiremwo omu kuhugûkwa olwandiko lw’Omurhondêro 3:15?

¹⁶ Eciragane ca Yehova ciri omu lwandiko lw’Omurhondêro 3:15 canarhurhabala rhulwise ngasi mazibu gakarhuhikira omu kalamo. Mwene wirhu Curtis, oba misiyonere omu Guam, adesire ntya: “Hali amango nalwisize amarhangulo n’okuvunika omurhima omu kalamo kani, n’oko kwarhuma kwaba kuzibu kuli nie okugendekera nabêra mwishwekerezi kuli Yehova. Cikone okurhanya bwenene oku bulebi buli omu lwandiko lw’Omurhondêro 3:15 kwantabire ngendekere nalangalira Larha w’omu mpingu.” Curtis ali  alindirira olusiku Yehova ayusa amazibu girhu goshi.

¹⁷ Mwali wirhu muguma w’omu Bavière ohamagalwa Ursula adesire oku, okuhugûkwa olwandiko lw’Omurhondêro 3:15 kwamurhabire ayemere n’obwalagale oku Ebibliya yalongozibagwa n’iroho lya Nnâmahanga. Abwine oku obundi bulebi boshi bw’Ebibliya bupatine n’obo bulebi n’oko kwamusomeza bwenene. Acibir’iderha ntya: “Nahûmirwe oku murhima erhi mpugûkwa oku Yehova ajijire kantu kalebe ho n’aho lyo bene bantu barhabêraga buzira bulangalire.”

¹⁸ Mwali wirhu Jessica, olama omu Micronésie, adesire ntya: “Nancikengere gurhi naciyumvirhe erhi mpugûkwa oburhangiriza oku nabwine okuli! Obulebi buli omu lwandiko lw’Omurhondêro 3:15 bwakag’ihikirizibwa. Bwantabire nahugûkwa oku akalamo rhuli rhwalama ene, arhali ko kalamo k’okunali. Kandi obo bulebi bwarhumire nayemera n’obwalagale oku, okukolera Yehova kwanarhuma naba n’akalamo kinja muli gano mango n’akalamo kinja kulusha omu mango gayisha.”

19. Bulya gurhi rhwakayemera n’obwalagale oku ecigabi cizinda c’obo bulebi cahikirizibwa?

¹⁹ Nk’oku rhwabwine, olwandiko lw’Omurhondêro 3:15 lugendekire okuhikirira. Iburha ly’omukazi n’iburha ly’enjoka byamanyikine n’obwalagale. Yezu, cigabi cirhanzi c’iburha ly’omukazi, afumire ecihulu alumiragwa oku kansisira n’ene ali Mwami ogwerhe obuhashe orhakanafâ. Kuhika buno Yehova acishozire abayish’irhegeka haguma n’Omugala omu mpingu hofi boshi, k’okuderha ecigabi ca kabirhi c’iburha ly’omukazi. Bulya ecigabi cirhanzi c’obo bulebi cahikirizibwe, rhugwerhe ecirhumire cinja c’okuyemera n’obwalagale oku ecigabi cizinda, k’okuderha okuvunyungula irhwe ly’enjoka, naco cahikirizibwa. Hano Shetani asherezibwa, abantu bishwekerezi bayish’irhulirizibwa bwenene! Embere ako kasanzi kahike, orharhamaga. Nnâmahanga wirhu aba mwikubagirwa. Kugerera iburha ly’omukazi, ayish’ilerhera abantu b’“amashanja goshi g’igulu” migisho minji bwenene.​—Murh. 22:18.