Naburhagwa omu mwaka gwa 1935 omu vile y’e Darlaston, cigabi ciguma c’e Pays Noir, eneo y’e Angleterre ehamaglwa ntyo bulya omugi guba guyunjwire ngasi hoshi enyanya z’ama izine manji gabamwo. Erhi ngwerhe hofi myaka irhanu, ababusi bani barhondera okuyiga Ebibliya haguma n’Abahamirizi ba Yehova. Omu myaka yani mirhanzi y’omushuko, nayemera n’obwalagale oku napasire okuli nanabatizibwa omu mwaka gwa 1952 erhi ngwerhe myaka 16.

Muli ako kasanzi ko n’ako, narhondera okuyigirizibwa akazi omu izine nnene bwenene yakag’itûla ebikolanwa bikolesibwa n’amaboko n’ebyuma by’emituga. Narhondera okukomerezibwa lyo mba mwandisi (secrétaire) w’eyo uzine, nanal’izigire ogo mukolo bwenene.

Nalikwanine ntôle omuhigo gw’obulagirire erhi mwangalizi muguma ambwira oku ntondere okulongoza Entimanano y’omu kagarhi k’omugobe y’Ifunzo ly’Ecitabu ly’Ecigamba omu vile yirhu y’e Willenhall. Cikone, okurhôla ogo muhigo kurhali kulembu. Ago mango, nakag’ija oku ntimanano z’ecigamba omu bigamba bibirhi. Omu kagarhi k’omugobe, nakag’ija oku ntimanano y’ecigamba cali hofi n’e vile y’e Bromsgrove nakag’ikoleramwo, yali oku bilometre hofi 32 kurhenga aha mwirhu. N’oku buzinda bw’omugobe, bulya nakag’iba ndi emwirhu, nakag’ija oku ntimanano y’ecigamba c’omu Willenhall.

Bulya nal’ilonzize okulunga ikubuliro lya Yehova okuboko, nayemera ogo mukolo mwangalizi ampâga, ciru akaba lyo njira ntyo byal’ihûnyire ndeke ako kazi nakag’iyiga nalizigire bwenene. Okuleka Yehova alongoze enjira yani muli ako kasanzi kwanyigulira enjira y’akalamo nciba nshagalukire bwenene kuhika buno.

Omu Cigamba c’e Bromsgrove, narhimanana na mwali wirhu muguma w’iranga linja wanal’izigire bwenene omukolo gwa Yehova ohamagalwa Anne. Rhwajira obuhya omu mwaka gwa 1957, rhwanashagalukire okukola haguma nka bapainiya b’akasanzi koshi, bapainiya ba pekee, omukolo gw’obwangalizi, n’okukola oku Beteli. Anne arhumire naba n’omwishingo omu kalamo kani.

Omu mwaka gwa 1966, rhwashagaluka bwenene okusoma isomo lya 42 ly’Amasomo g’e Gileyadi. Rhwarhumwa omu cihugo c’e Malawi, cihamagalwa murhima gw’obushagaluke gw’e Afrique bulya abantu b’amo  baba ba lukogo na ba kuyegereza ebigolo. Rhurhal’irhanyize oku rhurhayemererwe okubêra mw’eco cihugo myaka minji.

Rhwahikaga omu Malawi omu lusiku 1/2/1967. Omu mwezi murhanzi, rhwakolesa akasanzi kirhu kanji lyo rhuyiga olulimi, buzinda rhwarhondera omukolo gw’e Wilaya. Rhwakag’igenda omu mutuga muguma gw’e Jeep bantu baguma na baguma bakag’irhanya mpu gwanagera ngasi hoshi, ciru n’omu nyishi. Cikone arhali ntyo ko byali, bulya rhwakag’igera omu mishi garhagwerhi ntûla gone. Hali amango rhwalamire omw’ibanda ly’ebijondo n’obukere lyakag’ihûna okuhebwako ebashe omu mango g’empondo lyo lirhag’ikaloba. Birhali bilembu okulama ntyo oku murhondero gw’omukolo gwirhu gw’obumisiyonere, cikone rhwal’igushagalukire!

Omu Mwezi gwa 4, namanya oku oburhegesi bw’eco cihugo bukola bwarhulerhera amazibu. Oku radiyo, nayumvirhiza ehotuba ya prezida w’e Malawi, Dogtere Hastings Banda. Aderha oku Abahamirizi ba Yehova barhalipa ikoli n’oku bali balerha akavulindi omu burhegesi bw’ecihugo. Okuderha okuli, ebyo arhushobekaga byali bya bunywesi. Rhweshi rhwal’imanyire oku, obo burhegesi burhushombire bulya rhwakag’ilahira okulunga okuboko oluhande loshi-loshi omu by’epolitike na bwenene bulya rhwakag’ilahira okugula amakarte g’ebyama by’epolitike.

Omu Mwezi gwa 9, rhwasoma omwanzi omu jurnale nguma gwal’iyerekine oku prezida ashobesire bene wirhu oku bali balerha akavulindi ngasi hoshi omu cihugo. Oku ntimanano nguma y’abantu b’epolitike, amanyisa oku oburhegesi bwage bwakola duba-duba lyo bulahira Abahamirizi ba Yehova omu cihugo. Omu nsiku 20/10/1967, balahira Abahamirizi ba Yehova mw’eco cihugo. Kasanzi kasungunu enyuma z’aho, abakulu b’abapolisi n’abakola omu mabiro galabire eby’okuhamira omu cihugo bayisha oku biro by’etawi lyo bayifunga n’okulibirhako bamisiyonere omu cihugo cabo.

 Enyuma z’okuyusa nsiku isharhu omu prizo, barhuhêka omu cihugo c’e Mauritanie, cakag’irhambulwa n’ecihugo c’e Grande-Bretagne. Cikone, abakulu b’ecihugo c’e Mauritanie barharhuyemereraga okuba bamisiyonere omu cihugo cabo. Na ntyo, rhwarhumwa omu cihugo c’e Rhodesie (cihamagalwa Zimbabwe ene). Erhi rhuhika omu Zimbabwe, rhwarhimanana na muntu muguma mukali bwenene wakag’ikola omu biro byakag’ilola eby’okuhamira mw’eco cihugo, analahira oku rhurhajaga omu cihugo cabo. Arhubwira ntya: “Bamulibisireko e Malawi. Barhanamuyemeraga omu Mauritanie, mwamayishaga eno bulya yo nyinja.” Anne arhondera okulaka. Byabonekana nka nta muntu wal’irhulonzize! Muli ako kasanzi, narhanya nti ncigalukire emwirhu e Angleterre ho n’aho. Buzinda, abakulu balaba eby’okuhamira omu cihugo barhuyemerera oku rhulale oku biro by’etawi mw’obo budufu n’oku irhondo rhuyishe rhuciyerekane oku biro byabo bikulu. Rhwarhama bwenene, cikone rhwagendekera rhwaleka ebintu omu maboko ga Yehova. Olusiku lwakulikiraga enyuma z’emidi, rhwasomerwa erhi barhuyemerera okulama nka bigolo omu cihugo c’e Zimbabwe. Ntakayibagira oku naciyumvirhe olo lusiku, nayemera n’obwalagale oku Yehova akag’ilongoza enjira yirhu.

Oku biro by’etawi y’e Zimbabwe, nakag’ikola omu Departema y’Omukolo, yakag’ishibirira ecihugo c’e Malawi n’ec’e Mozambique. Bene wirhu b’e Malawi bakag’ilibuzibwa bwenene. Cigabi ciguma c’omukolo gwani, kwali kuhindula omu lundi lulimi eraporo zakag’irhumwa n’abangalizi b’omuzunguko b’e Malawi. Bijingo biguma erhi ndi nakola enyuma z’ensa z’akazi, nalaka erhi nsoma lugenda oku bene wirhu na bali birhu bakag’ikolerwa omu njira y’obuminya bwenene. * Cikone, nahâbwa omurhima bwenene erhi nyumva okubiyerekire obwishwekerezi bwabo, obuyemere bwabo, n’okulembera kwabo.​—2 Kr. 6:4, 5.

Rhwakag’ijira okwirhu koshi ly’ebiryo by’ekiroho bikahikira bene wirhu na bali birhu bal’isigire omu Malawi n’abalibirhiraga omu Mozambique lyo bayâka obo buminya bakag’ijirirwa. E ekipe yakag’ihundula ebicapo omu lulimi lw’e Chichewa, lulimi lw’omu Malawi luderhwa na bantu banji, yahamira omu ferme nguma nnene ya mwene wirhu muguma w’e Zimbabwe. Oyo mwene wirhu ayerekana obuzigire omu kubayubakira enyumpa n’ebiro by’okukoleramwo. Eyo munda e Zimbabwe, bagendekeza omukolo gwabo gw’obulagirire gw’okuhindula ebicapo biyimangire oku Bibliya omu lundi lulimi.

Rhwarhôla emipango ly’abangalizi b’omuzunguko b’omu Malawi bakayisha omu Zimbabwe ngasi mwaka oku ntimanano y’e wilaya y’olulimi lw’e Chichewa. Erhi bakahisire e Zimbabwe, lyo bakag’ihâbwa e plan z’ehotuba z’eyo ntimanano y’e wilaya. Erhi bakagalusire e Malawi, bakag’ijira okwabo koshi lyo bashangira eyo myanzi haguma na bene wirhu. Mwaka muguma erhi bayisha kw’eyo ntimanano omu Zimbabwe, rhwarhôla emipango lyo amasomo gaderhwa Masomo ya Huduma ya Ufalme gajirwa lyo rhuha omurhima abo bangalizi b’omuzunguko b’oburhwali.

Omu Mwezi gwa 2, 1975, naj’ilambagiririra Abahamirizi ba Yehova b’e Malawi bayakiraga omu makambi e Mozambique. Abo bene wirhu bakag’ikulikira emipango y’ikubuliro lya Yehova, ciru n’omupango muhyahya gw’okuba n’embaraza y’abagula. Abo bagula bahyahya b’omu makambi bakag’ijira mikolo minji y’ekiroho, kwa lwiganyo ehotuba z’abantu boshi, okuganirira olwandiko lw’olusiku n’Ilabiro ly’Akalalizi, ciru banakag’ijira entimanano z’omuzunguko. Balipanzire amakambi gabo nka kula entimanano nkulu epangwa, bal’igwerhe edepartema z’obusafi, ez’okugaba ebiryo n’ez’obulanzi. Abo bene wirhu bishwekerezi bakag’ihikiriza binji kugerera oburhabale bwa Yehova, n’enyuma z’okubalambagirira, nahâbwa omurhima bwenene.

Oku buzinda bw’emyaka ya 1970, ebiro by’etawi y’e Zambie byarhondera okushibirira bene wirhu na bali birhu b’omu Malawi. Cikone, nagendekera okukarhanya lugenda bene wirhu na bali birhu b’omu Malawi n’okushenga enyanya z’abo, na ntyo ko bene wirhu na bali birhu banji bakag’ijira. Bulya nali muguma w’omu Komite y’Etawi y’e Zimbabwe, kanji-kanji narhimanine n’abarhumirwe n’ebiro bikulu by’Abahamirizi ba Yehova, n’abandi bene wirhu bakag’ilongoza omukolo omu Malawi, omu Afrique du Sud, n’omu Zambie. Ngasi mango erhi rhwakarhimanine, rhwakag’iganirira er’idoso, “Bindi bici rhwakajirira bene wirhu b’omu Malawi?”

 Erhi hagera kasanzi kalebe, bene wirhu na bali birhu barhacikag’ilibuzibwa bwenene. Bene wirhu na bali birhu bayakaga e Malawi barhondera okugaluka bunyi-bunyi, n’abal’isigire mw’eco cihugo barhacikag’ilibuzibwa bwenene. Ebihugo biba hofi n’ecihugo c’e Malawi byarhondera okuyemera omukolo gw’Abahamirizi ba Yehova. Abahamirizi ba Yehova bayemerwa omu Mozambique namo omu mwaka gwa 1991. Cikoki rhwakacidosa ntya: ‘Mangaci Abahamirizi ba Yehova b’e Malawi nabo bahâbwa oluhûma?’

Omu mwaka gwa 1993, haba empindulo omu by’epolitike y’ecihugo c’e Malawi, n’Abahamirizi ba Yehova bayemerwa mw’eco cihugo. Kasanzi kasungunu enyuma z’aho, misiyonere muguma nakag’iganira naye andosa ntya: “Ka wagaluka e Malawi?” Ago mango nagwerhe myaka 59, namushuza ntya: “Nanga, nkola mushosi!” Cikone, mw’olo lusiku lo n’olo Embaraza Eri Yalongoza yarhurhumira emesaje y’okurhuhûna oku rhugaluke e Malawi.

Rhwal’izigire bwenene omukolo gwirhu omu Zimbabwe, co cirhumire ogo gwali muhigo muzibu bwenene kuli rhwe. Rhwal’igwerhe omwishingo omu Zimbabwe rhwanalikola rhugwerhemw’abîra binja bwenene. Embaraza Eri Yalongoza erharhusezagya oku rhugaluke e Malawi, cikone yal’irhubwizire oku rhwanabêra omu Zimbabwe nkaba rhulonzize. Co cirhumire, kwakabire kulembu rhucishoge enjira yirhu rhwene omu kubêra e Zimbabwe. Cikone nkengire gurhi narhanyagya okubiyerekire Abrahamu na Sara balekaga enyumpa yabo nyinja omu bushosi bwabo lyo barhumikira obulongozi bwa Yehova.​—Murh. 12:1-5.

Rhwahiga okurhumikira obulongozi bw’ikubuliro lya Yehova rhwanagaluka e Malawi omu lusiku 1/2/1995, olo lusiku lyo rhwayenezagya myaka 28 kurhenga amango rhwahikaga yo oburhangiriza. Ekomite y’Etawi yajirwa, yalimwo bene wirhu babirhi na nani, na buzira kulegama rhwarhondera okupanga emikolo y’Abahamirizi ba Yehova.

Gwali mugisho bwenene okubona gurhi Yehova agishire omukolo gwajira amajambere duba-duba! Omubalè gw’abahubiri gwayushuka duba-duba: hali bahubiri hofi 30 000 omu mwaka gwa 1993, baba 42 000 omu mwaka gwa 1998. * Embaraza Eri Yalongoza yayemera emipango y’okuyubaka ebiro bihyahya by’etawi lyo rhuhikiriza emikolo yal’ishinganine okujirwa mw’eco cihugo. Rhwagula eciwanja c’ehektare 12 omu vile y’e Lilongwe, nanahâbwa omukolo gw’okukola omu komite y’obubasi.

Mwene wirhu Guy Pierce w’omu Mbaraza Eri Yalongoza ye wajiraga ehotuba y’okuha Yehova ezo  nyumpa mpyahya omu Mwezi gwa 5, 2001. Bene wirhu b’omu Malawi bihumbi bibirhi na kulusha bo bali kw’eyo ntimanano, na banji ba mulibo balikola bagwerhe myaka 40 na kulusha bali babatize. Abo bene wirhu na bali birhu bishwekerezi balembire amalibuko madarhi myaka minji omu mango omukolo gwirhu gwal’ihanzibwe. Barhagwerhe obuhirhi bw’omubiri cikone omu hali y’ekiroho bali bagale bwenene. Olo lusiku bashagaluka bwenene okulambagira omu Beteli yabo mpyahya. Ngasi hoshi bakag’igera omu Beteli, bakayimba enyimbo z’Obwami nk’oku bayimba omu Afrique, nanashagalukira oko bwenene; ko kantu kinja bwenene nacibwinire omu kalamo. Oko kwayerekana n’obwalagale oku Yehova anagishe bwenene abalembera amarhangulo n’obwishwekerezi.

Enyuma z’obubasi bw’etawi, nashagalukira olukengwa nakag’ihâbwa lw’okukagend’igeza ehotuba z’okuha Yehova Enyumpa z’Entimanano. Ebigamba by’omu Malawi byayunguka n’eprograme y’okuyubaka duba-duba Enyumpa z’Entimanano omu bihugo birhagwerhi buhirhi bunji. Embere z’aho, bigamba biguma na biguma byakag’ijirira entimanano omu bihando biyubake n’emirhi y’akaratusi. Bakag’ilunga amasheke haguma lyo bafunika enyanya, n’e bancs z’ibumba zo bakag’itamalako. Lero bene wirhu barhondera okukakola bwenene lyo bayoca amatofali omu mafuru n’okuyubaka enafasi mpyahya nyinja-nyinja z’entimanano. Cikone bagendekera okujira ebirhi by’e bancs bulya bakag’ibona nk’ebirhi by’e bancs byo bitamalako bantu banji.

Na kandi nashagalusire bwenene okubona gurhi Yehova arhabire abantu bage lyo baba Bakristu bakuzire kiroho. Nahumirwe oku murhima bwenene omu kubona gurhi bene wirhu b’emisole b’omu Afrique bakag’icihâna lyo barhabala oku mikolo, n’okuyiga bintu binji bwenene duba-duba omu kukomerezibwa n’ikubuliro lya Yehova n’omu kujira emikolo. Bakahâbwa mikolo minji kulusha omw’ikubuliro lya Yehova, oku Beteli n’omu bigamba. Na kandi, kugerera abangalizi b’omuzunguko bahyahya b’omu Malawi ebigamba byasêra bwenene, banji mulibo balikola bajire omu buhya. Abo bene wirhu na bakabo bacishozire okurhaburha abana lyo bajira binji omu mukolo gwa Yehova, ciru akaba kurhali kulembu kulibo okurhaburha abana, enyanya z’enkomedu z’emwabo n’abantu b’emilala yabo.

Enyuma z’okukola myaka 52 omu Afrique, nahikirwa n’amazibu g’obulwala. Ekomite y’Etawi yayandikira Embaraza Eri Yalongoza oku barhurhume rhuj’ikolera omu Grande-Bretagne, n’Embaraza Eri Yalongoza yayemera ntyo. Rhurhashagalukiraga okuleka omukolo rhwal’izigire, cikoki omulala gw’e Beteli y’e Grande-Bretagne guli gwarhushibirira bwinja mw’eyi myaka yirhu y’obushosi.

Nyemire n’obwalagale oku, okuleka Yehova alongoze enjira yani go muhigo mwinja bwenene narhôzire omu kalamo. Nciyegemerage obumanye bwani niene, ntamanyiri ngahi kalya kazi nakag’iyiga kakampêsire. Ensiku zoshi, Yehova al’imanyire ebi nal’ilagirireko lyo ‘nyumanyanya enjira zani.’ (Mig. 3:5, 6) Erhi ndi musole, nal’ishagalukire okuyiga binji okubiyerekire akazi k’omu uzine nnene. Cikone, ikubuliro lya Yehova lyampire omukolo gw’okushagalusa bwenene na kulusha. Kuli nie, okukolera Yehova kwarhumire narhimukwa kunacigendekire kwarhuma narhimukwa bwenene omu kalamo!