1. Bici rhuyemire n’obwalagale, na bulya gurhi?

 ERHI olaba ebiri byaba omw’igulu, k’onabone nka kuli kuzibu okuyemera oku ebintu byanaciyinjihe? Abantu b’omu mulala muguma barhacizigirana nk’oku byali burhanzi. Abantu bali bagendekera okuba baminya bwenene, ba kucikaliza, na bakali. Bantu banji bali babona oku kuli kuzibu okulangalira abarhegesi. Cikone, ebyo biri byajirikana byoshi byanakuha obulangalire. Bulya gurhi? Bulya abantu bali bacigendesa nk’oku byanal’ilebirwe omu bulebi buguma bwago-bwago bw’Ebibliya okubiyerekire ‘ensiku nzinda.’ (2 Tm. 3:1-5) Nta muntu mwirhohye wakalahira oku obo bulebi burhali bwahikirira, n’okuhikirizibwa kw’obo bulebi kuyerekine n’obwalagale oku Yezu akola ali Mwami w’Obwami bwa Nnâmahanga. Cikone, obo buli bulebi buguma bone b’omu bulebi bunji bwenene buyerekire Obwami bwa Nnâmahanga. Okuganirira obundi bulebi bwahikirizibwe mw’eyi myaka okubiyerekire Obwami bwa Nnâmahanga kwanaseza obuyemere bwirhu.

2. Bici rhwaganirira mw’eci cigabi, na bulya gurhi? (Ohugûle enfoto eri oku cijalada c’eyi gazeti.)

² Mw’eci cigabi, rhwaganirira (1) obulebi burhurhabire okuhugûkwa amango Obwami bwarhonderaga okurhegeka, (2) obulebi bunji burhurhabire okuhugûkwa oku Yezu ajijirwe Mwami w’Obwami bwa Nnâmahanga na (3) obulebi bunji buyerekine gurhi abashombanyi b’Obwami bwa Nnâmahanga bayish’isherezibwa. Rhwabona oku obo bulebi boshi buba bupatine bwinja-bwinja nka kula balunga haguma ebihande by’enfoto ly’eba nguma-guma, bunarhuyeresire ngahi rhwahika oku kalandriye ka Yehova.

3. Bici obulebi buli omu Daniyeli 7:13, 14 burhuyemezize n’obwalagale okubiyerekire Omwami w’Obwami bwa Nnâmahanga?

³ Obulebi buli omu Daniyeli 7:13, 14 burhuyemezize n’obwalagale oku Kristu Yezu ayish’iba Murhegesi mwinja bwenene w’Obwami bwa Nnâmahanga. Abantu ba ngasi ishanja “bakazimurhumikira” n’omwishingo na nta wundi murhegesi wanarhôle enafasi yage. Obundi bulebi buli omu citabu ca Daniyeli bwayerekine oku Yezu akahâbirwe obo Bwami oku buzinda bw’amango gahamagirwe rhusanzi nda. Ka byanahashikana okumanya mangaci Yezu ajiragwa Mwami?

4. Ohugûle gurhi olwandiko lwa Daniyeli 4:10-17, NWT, lurhurhabire okuhugûkwa omwaka Yezu ajiragwa Mwami w’Obwami bwa Nnâmahanga. (Olole n’amahugûlo g’idako.)

⁴ Osome Daniyeli 4:10-17, NWT. Orho “rhusanzi nda” gali mango ga myaka 2520. Ago mango garhonderaga omu mwaka gwa 607 Embere za Kano Kasanzi Kirhu (E.K.K.K), erhi Abababiloni bakûla omwami muzinda oku ntêbe ya Yehova omu Yeruzalemu. Gahwa omu mwaka gwa 1914 muli Kano Kasanzi Kirhu (K.K.K.), erhi Yehova ayimika Yezu, k’okuderha “olya ogwerhe ehaki kushimbana n’irhegeko,” y’okuba Mwami w’Obwami bwa Nnâmahanga. *​—Eze. 21:25-27, NWT.

5. Omu njira nguma ehi obulebi okubiyerekire ‘orhusanzi nda’ bwakarhulerheramwo obunguke?

⁵ Gurhi obo bulebi bwakarhulerheramwo obunguke? Okuhugûkwa obulebi okubiyerekire ‘orhusanzi nda’ kwanarhuyemeza n’obwalagale oku Yehova ahikiriza ebiragane byage omu kasanzi kashinganine. Nk’oku Yehova ahiragaho akasanzi Obwami bwage bwakarhondire okurhegeka, ayish’ijira obundi bulebi boshi buhikirizibwe oku kasanzi ahizireho. Kobinali, olusiku lwa Yehova lwahika “buzira kulegama!”​—Hab. 2:3.

6. (a) Bici biri byajirikana omw’igulu biyerekine oku Kristu ali arhegeka omu mpingu? (b) Gurhi ebyo biri byajirikana omw’igulu bipatine n’obulebi buli omu citabu c’Amafulûlo 6:2-8?

⁶ Oku buzinda bw’omukolo gwage hanw’igulu, Yezu alebire bintu biguma na biguma byakajire byajirikana omw’igulu byakarhabire abanafunzi bage bamanye oku akola ali arhegeka omu mpingu. Muli ebyo bintu, adesire amavita, ishali, n’emisisi y’idaho. Kandi, alebire oku hakabire endwala z’okuyahukira hantu “hanji,” n’obu bulwala bw’okuyahukira bw’e COVID-19 luli lwiganyo luguma muli ezo ndwala. Ebyo byoshi ciri cigabi c’ebi Ebibliya ehamagire “cimanyiso” c’okubaho kwa Kristu. (Mt. 24:3, 7; Lk. 21:7, 10, 11) Myaka 60 na kulusha enyuma z’okufâ kwage n’okugaluka empingu, Yezu ayeresire entumwa Yowane ebindi biyerekine oku ebyo bintu byakajirikine omw’igulu. (Osome Amafulûlo 6:2-8.) Ebyo byoshi biri byajirikana omw’igulu kurhenga amango Yezu abaga Mwami omu mwaka gwa 1914.

7. Bulya gurhi ehali z’igulu zabihire bwenene erhi Yezu arhondera okurhegeka?

⁷ Bulya gurhi ehali ziri omw’igulu zabihire bwenene erhi Yezu aba Mwami? Olwandiko lw’Amafulûlo 6:2 luhânyire amahugûlo g’obulagirire, luyerekine oku omukolo murhangiriza Yezu ajijire enyuma z’okuba Mwami w’Obwami bwa Nnâmahanga kwali kulwa ivita. Ndigi alwisize? Alwisize Shetani n’abazimu bage. Ecitabu c’Amafulûlo cigabi ca 12 ciyerekine oku Shetani ahimwa mw’er’ivita,  n’oku ye n’abazimu bage bajugucirwa okw’igulu. Oko kwarhuma igulu ‘lyahanyagala,’ bulya Shetani akunire bwenene anali arhera bene bantu.​—Maf. 12:7-12, Mashi Bible.

8. Gurhi rhwakayungukamwo omu kubona oku obulebi okubiyerekire Obwami bwa Nnâmahanga buli bwahikirira?

⁸ Gurhi obo bulebi bwakarhulerheramwo obunguke? Ebyakajire byaba omw’igulu n’okushanja kw’oborhere bw’abantu birhurhabire rhuhugûkwe oku Yezu akola ali arhegeka. Co cirhumire, ahali h’okugaya omu kubona abantu bali baminya banali bacikaliza, rhushinganine rhukengere oku ebijiro byabo biri byahikiriza obulebi bw’Ebibliya. Obwami bwa Nnâmahanga buli bwarhegeka! (Enna. 37:1) N’oku ivita lya Armagedoni ligendekire lyayegera, ko n’amazibu gagendekera gayushuka bwenene omw’igulu. (Mk. 13:8; 2 Tm. 3:13) Rhuvuzire omunkwa bwenene okubona Larha wirhu w’obuzigire w’omu mpingu arhurhabire okuhugûkwa bulya gurhi hali mazibu manji bwenene mw’er’igulu.

9. Gurhi obulebi buli omu Daniyeli 2:28, 31-35, buganirire oburhegesi bukulu buzinda bw’igulu, na mangaci bwarhonderaga okurhegeka?

⁹ Osome Daniyeli 2:28, 31-35. Obo bulebi buli bwahikirira ene. Ecilorho ca Nebukadnezari cal’iyerekine ebyakabire omu “nsiku nzinda,” enyuma za Yezu okuhâbwa oburhegesi. Abashombanyi ba Yezu ba hanw’igulu bakahiziremwo oburhegesi bukulu buzinda bw’igulu lyoshi bwal’ilebirwe omu Bibliya, k’okuderha oburhegesi bushushanyizibwe n’“enshando zali cihimbi cuma na cihimbi ibumba.” Obo burhegesi bukulu bw’igulu lyoshi bukola buli bwarhegaka. Bwarhonderaga okurhegeka omu mango g’Ivita lya Burhanzi ly’Igulu erhi Grande-Bretagne na États-Unis bacilunga  haguma, bajira omulungano gwa Angleterre na Amérique. Kandi, ensanamu y’ecilorho ca Nebukadnezari yal’ilebire bintu bibirhi okubiyerekire obo burhegesi bukulu bw’igulu lyoshi byakarhumire bwaba lubero n’agandi marhegesi makulu g’igulu lyoshi g’embere.

10. (a) Bici rhuli rhwabona ene biganirirwe omu bulebi bwa Daniyeli okubiyerekire omulungano gwa Angleterre na Amérique? (b) Murhego guhi rhushinganine rhuyake? (Olole ecisanduku cidesire, “ Obe Masu Lugenda Ibumba!”)

¹⁰ Burhangiriza, lubero n’agandi marhegesi makulu g’igulu lyoshi g’embere gaganirirwe mw’eco cibonekerezi, omulungano gwa Angleterre na Amérique gurhashushanyizibwi n’ecuma cizibu nka noro erhi mulinga, cikone gushushanyizibwe n’ecuma cigushemw’ibumba. Ibumba lishushanyize “engushane y’abantu,” erhi bantu barhalengeriri. (Dan. 2:43) Nk’oku rhunali rhwacibonera ene, ebi abantu bali bajira omu bulondôzi, amakampanye g’okuhalira ehaki za bacikala, amaandamano, abantu bahalira obunguke bw’abandi, ebyo byoshi biri byajira kube kuzibu kuli ebirongozi by’obo burhegesi bukulu okuhikiriza emihigo yabo.

11. Gurhi okubaho kw’oburhegesi bukulu bw’igulu lyoshi bwa Angleterre na Amérique kurhuyemezize n’obwalagale oku rhuli rhwalama omu nsiku nzinda?

¹¹ Bwakabirhi, oburhegesi bukulu bw’igulu lyoshi bwa Angleterre na Amérique, bushushanyizibwe n’enshando z’ensanamu nnenene bo burhegesi bukulu buzinda bw’igulu lyoshi bwalebirwe omu Bibliya. Nta bundi burhegesi bukulu bw’igulu lyoshi bwarhegeka enyuma z’obo. Cikone, Obwami bwa Nnâmahanga bwayish’ibushereza haguma n’agandi marhegesi goshi ga bene bantu oku ivita lya Armagedoni. *​—Maf. 16:13, 14, 16; 19:19, 20.

12. Bindi bintu bihi obulebi bwa Daniyeli buyerekine byakarhuyemeza oku rhuli rhwalama omu nsiku nzinda na gurhi birhuhiremwo oburhulirize n’obulangalire?

¹² Gurhi obo bulebi bwakarhulerheramwo obunguke? Obulebi bwa Daniyeli buyerekine ebindi bintu byakarhuyemeza oku rhuli rhwalama omu nsiku nzinda. Myaka 2500 na kulusha egezire, Daniyeli aleba oku enyuma z’oburhegesi bukulu bwa Babiloni, gandi marhegesi makulu ani g’igulu lyoshi gakahumire bwenene oku bakozi ba Nnâmahanga. Kandi Daniyeli ayerekine oku Oburhegesi Bukulu bw’Igulu Lyoshi bwa Angleterre na Amérique bo bwakabire buzinda muli ago marhegesi. Oko kurhuhire oburhulirize n’obulangalire oku, hano hofi-hofi Obwami bwa Nnâmahanga bwashereza amarhegesi goshi ga bene bantu na bone burhegeke igulu lyoshi.​—Dan. 2:44.

13. ‘Omwami wa kali-munani’ n’‘abami ikumi,’ baganirirwe omu lwandiko lw’Amafulûlo 17:9-12, bici bashushanyize, na gurhi obo bulebi bwahikirire?

¹³ Osome Amafulûlo 17:9-12. Obushereze bwajiragwa n’Ivita lya Burhanzi ly’Igulu bwahikirizize obundi bulebi bw’Ebibliya okubiyerekire ensiku nzinda. Abarhegesi b’igulu balonza gurhi bakalerhamwo omurhûla omw’igulu lyoshi. Co cirhumire, omu Mwezi gwa 1, 1920, barhondeza Ecigusho c’Amashanja (Société des Nations) cahinganulagwa n’Ecinyabuguma c’Amashanja (Nations Unies) omu Mwezi gwa 10, 1945. Eco Cinyabuguma c’Amashanja cihamagirwe “mwami wa kali-munani.” Cikone burhali burhegesi bukulu bw’igulu lyoshi. Cigwerhe obuhashe bulya amarhegesi g’igulu ganacilunge okuboko. Ebibliya ehamagire ago marhegesi “bami ikumi.”

14-15. (a) Bici olwandiko lw’Amafulûlo 17:3-5 luyerekine lugenda “Babiloni mukulu”? (b) Bici abalunga amadîni g’obunywesi okuboko barhondire okujira?

¹⁴ Osome Amafulûlo 17:3-5. Omu cibonekerezi carhenganga emwa Nnâmahanga,  entumwa Yowane yabona omukazi ohusha bwenene, k’okuderha “Babiloni mukulu,” oshushanyize amadîni goshi g’obunywesi. Gurhi eco cibonekerezi cahikirire? Hakola hali myaka minji amadîni goshi g’obunywesi g’er’igulu gali gakola haguma n’amarhegesi g’er’igulu n’okugalunga okuboko. Cikone, hano hofi-hofi Yehova ahira omu mirhima y’abarhegesi b’epolitike “emihigo y’okujira obulonza bwage.” Gurhi byayish’iba? Ago marhegesi g’epolitike, erhi “bami ikumi,” gayish’ihindukira amadîni g’obunywesi n’okugashereza.​—Maf. 17:1, 2, 16, 17.

¹⁵ Gurhi rhumanyiremwo oku obuzinda bwa Babiloni Mukulu buli hofi? Lyo rhushuza kw’er’idoso, kuli kwinja rhukengere oku ecigabi cinene c’evile ya mira ya Babiloni cal’ilanzirwe n’amishi g’olwishi lunene lwa Efrata. Ecitabu c’Amafulûlo cishushanyize emiliyoni y’abantu balunga Babiloni Mukulu okuboko n’“amishi” g’obulanzi. (Maf. 17:15) Cikone kandi ciyerekine oku ago mishi ‘gakaganyire,’ n’oko kuyerekine oku amadîni goshi g’obunywesi gakahezize bantu banji bagalunga okuboko. (Maf. 16:12) Ene, obo bulebi buli bwahikirira, bulya bantu banji barhacishibirira  eb’idîni banarhondire okulongeza handi-handi gurhi amazibu gabo gakahwamwo.

16. Gurhi rhwakayunguka omu kuhugûkwa obulebi lugenda okurhondezibwa kw’Ecinyabuguma c’Amashanja n’okusherezibwa kwa Babiloni Mukulu?

¹⁶ Gurhi obo bulebi bwakarhulerheramwo obunguke? Okurhondezibwa kw’Ecinyabuguma c’Amashanja n’okubona bantu banji barhaciri balunga Babiloni Mukulu okuboko, ebyo biyerekine oku rhuli rhwalama omu nsiku nzinda. Ciru akaba bantu banji barhaciri balunga Babiloni Mukulu okuboko, arhali oko ko kwamushereza. Nk’oku rhwabonaga embere, Yehova ayish’ihira omu mirhima y’abami ikumi,’ k’okuderha amarhegesi g’epolitike galunga Ecinyabuguma c’Amashanja okuboko, “emihigo y’okujira obulonza bwage.” Ago mashanja gayish’ishereza Babiloni Mukulu buzira kulaliza n’oko kwayish’isomeza igulu lyoshi. * (Maf. 18:8-10) Okusherezibwa kwa Babiloni Mukulu kwayish’idundaganya igulu lyoshi nkaba kwayish’ilerha n’amazibu, cikone abakozi ba Nnâmahanga bayish’iba na bintu bibirhi byayish’irhuma baba n’omwishingo. Oyo mushombanyi wa Yehova wa kurhenga mira arhakacihaba bundi, n’obucunguzi bwirhu bwayish’iba buli hofi bwenene!​—Lk. 21:28.

17-18. (a) Gurhi rhwakagendekera rhwasezamwo obuyemere bwirhu? (b) Bici rhwaganirira omu cigabi cikulikire?

¹⁷ Daniyeli alebire oku “obumanye bw’okunali bwakabire bunji bwenene.” Na ntyo ko byanabire! Rhuli rhwahugûkwa obulebi lugenda gano mango girhu. (Dan. 12:4, 9, 10, NWT) Okuhikirira kw’obo bulebi buzira magosa, kuli kwarhuma rhwakenga Yehova bwenene n’Akanwa kage kalongozibagwa n’iroho. (Iz. 46:10; 55:11) Co cirhumire, ogendekere waseza obuyemere bwawe omu kuyiga Ebibliya n’obushiru n’omu kurhabala abandi bajire obwîra bwinja haguma na Yehova. Ayish’ilanga abamulangalira loshi-loshi n’okubaha “omurhûla [gw’ensiku zoshi].”​—Iz. 26:3.

¹⁸ Omu cigabi cikulikire, rhwayish’iganirira obulebi bunji buyerekire ecigamba c’Ecikristu omu nsiku nzinda. Nk’oku rhwayish’iyiga, obo bulebi boshi nabo buyerekine oku rhuli rhwalama omu nsiku nzinda. Rhwayish’ibona ebindi biyerekine oku Omwami wirhu Yezu oli warhegeka ene, ali alongoza abanafunzi bage bishwekerezi.