1. Gurhi rhushinganine rhukabona olukengwa lw’okuyegera Yehova kugerera isala?

 RHWAHÂBIRWE olukengwa lwinja bwenene, k’okuderha okuyegera Omulemi w’empingu n’igulu kugerera isala. Rhanya k’oku: Rhwanabwira Yehova ebirhuli emurhima byoshi akasanzi rhulonzize n’omu lulimi rhulonzize, buzira kumulaliza. Rhwanamushenga ciru akaba rhuli oku ncingo omu hopitali erhi ciru akaba rhuli omu prizo, n’okuba n’obulangalire oku Larha wirhu w’obuzigire arhuyumvirhiza. Rhuba rhushagalukire bwenene eyo ngalo yirhu y’isala.

2. Gurhi Mwami Daudi ayerekinemwo oku al’ishagalukire olukengwa lw’okuyegera Yehova kugerera isala?

² Mwami Daudi al’ishagalukire olukengwa lw’okuyegera Yehova kugerera isala. Ayimbire Yehova ntya: “Isala lyani libe nka bukû burheganye embere zawe.” (Enna. 141:1, 2, NWT) Omu mango ga Daudi, obukû butagatifu abakuhani bakag’ikolesa omu nterekêro y’okuli bakag’iburheganya bwinja-bwinja. (Lub. 30:34, 35) Omu kuganirira obukû, Daudi al’ilonzize okuyerekana oku alishinganine akarhanya bwinja-bwinja kw’ebi abwira Ishe w’omu mpingu kugerera isala. Ntyo ko nirhu rhuba rhulonzize okujira. Rhuba rhulonzize amasala girhu gashagaluse Yehova.

3. Gurhi rhushinganine rhukayegeramwo Yehova, na bulya gurhi?

³ Omu mango rhuli rhwayegera Yehova kugerera isala, rhushinganine rhukayaka izala. Lubero n’oko, rhushinganine rhukayegera Yehova kugerera isala omu njira y’obukenge bwenene. Orhanye lugenda ebibonekerezi by’okusomeza Izaya, Ezekiyeli, Daniyeli, na Yowane babonaga. Ebyo bibonekerezi byoshi biri lubero, cikone hali kantu kaguma bishushineko.  Byoshi biyerekine oku Yehova ali Mwami wa bushashe bunji bwenene. Izaya ‘abwine Nyakasane [Yehova, NWT] erhi atamîre oku ntebe yage ndîri y’obwami.’ (Iz. 6:1-3) Ezekiyeli abona Yehova atamire oku ngalè y’empingu, al’izungulusirwe n’“obulangashane . . . bwali buyosire nka mutirigongo.” (Eze. 1:26-28, Mashi Bible) Daniyeli abona “omushosi mulamu” ayambirhe emyambalo myeru, n’engulumira z’omuliro zakag’irhenga oku ntebe yage y’obwami. (Dan. 7:9, 10, Mashi Bible) Na Yowane abwine Yehova atamire oku ntebe yage yal’izungulusirwe n’akantu kali nka mutirigongo gwakag’ibonekana nk’ibuye ly’engulo ndarhi lihamagalwa emerodi. (Maf. 4:2-4) Erhi rhurhanya oku bukuze bunji bwa Yehova, rhunakengere oku, okumuyegera kugerera isala luli lukengwa bwenene n’oku rhushinganine rhukajira ntyo omu njira y’obukenge. Cikone bici rhushinganine rhukaderha omu masala girhu?

4. Bici rhuciyigirizize kugerera enderho ntangiriza z’isala ly’olwiganyo liri omu Mateyo 6:9, 10?

⁴ Osome Mateyo 6:9, 10. Omu Mahubiri gage g’oku Ntondo, Yezu ayigirizize abanafunzi bage gurhi bakakasalira omu njira eshagalusa Nnâmahanga. Enyuma z’okuderha “alagi oku mwakashenga,” Yezu arhanzir’iganirira ebintu by’obulagirire bipatine n’obulonza bwa Yehova: okucêsibwa kw’izino lyage; okuyisha kw’Obwami bwage, bwayish’ishereza abashombanyi ba Nnâmahanga boshi; n’emigisho y’amango gayisha ayish’ilerhera abantu n’igulu. Omu kuhira ebyo bintu omu masala girhu, rhunayerekane oku obulonza bwa Nnâmahanga buli bwa bulagirire kuli rhwe.

5. Ka kuli kwinja rhukasalira okubiyerekire amaligirire girhu?

⁵ Omu cigabi cikulikire c’er’isala, Yezu ayerekine oku kuli kwinja rhukasalira okubiyerekire amalagirire girhu. Rhwanashenga Yehova arhuhe ebiryo birhu bya ngasi lusiku, arhubabalire ebyaha birhu, arhulange lyo rhurhag’ija omu mashumi, anarhulikûze kw’olya mubi. (Mt. 6:11-13) Erhi rhushenga Yehova ebyo bintu, rhunamuyerese oku, rhumanyire oku rhulagirire oku burhabale bwage n’oku rhulonzize okumushagalusa.

6. K’ebidesirwe omw’isala ly’olwiganyo byone rhushinganine rhukahira omu masala girhu? Ohugûle.

⁶ Yezu arhahûnaga abanafunzi bage oku bakagalukira ebinwa biri omw’isala ly’olwiganyo  byo n’ebyo. Omu gandi masala Yezu ajiraga, ashenzire okubiyerekire ebindi bintu al’ilagirireko muli ako kasanzi biri lubero n’ebiri omw’isala ly’olwiganyo. (Mt. 26:39, 42; Yn. 17:1-26) Na nirhu, rhwanashenga okubiyerekire ngasi kantu rhulagirireko. Amango bihûnyire rhurhôle omuhigo, rhwanashenga Yehova arhuhe obwenge n’obumanye. (Enna. 119:33, 34) Amango rhuhâbirwe omukolo muzibu omw’ikubuliro lya Yehova, rhwanashenga Yehova arhurhabale rhumanye gurhi rhwakagujiramwo bwinja. (Mig. 2:6) Ababusi banashenga enyanya z’abana babo, n’abana banashenga enyanya z’ababusi babo, na kandi rhweshi rhwanashenga rhunashinganine rhukashenga enyanya z’abanafunzi birhu b’Ebibliya n’abantu rhuhubiri. Cikone, amasala girhu garhashinganini gakaba ga nsengero zone.

7. Bulya gurhi rhushinganine rhukakuza Yehova omu masala girhu?

⁷ Rhukwanine rhukakengera okukuza Yehova omu masala girhu. Ntaye oshinganine okuhâbwa obukuze bwenene kulusha Nnâmahanga wirhu. Aba ‘mwinja na mubidu w’okubabalira.’ Na kandi ‘anajire aminja, aba wa lukogo na mulembêdu, n’obwinja bw’obwikubagirwa bwage buba bunji.’ (Enna. 86:5, 15, Mashi Bible) Kobinali, rhugwere ebirhumire binja by’okukuza Yehova enyanya z’amorhere gage minja n’enyanya z’ebi arhujirira.

8. Bintu biguma na biguma bihi rhwakavugako Yehova omunkwa? (Ennanga 104:12-15, 24)

⁸ Ahanyuma n’okukuza Yehova omu masala girhu, rhwanakamuvuga omunkwa enyanya z’ebintu binja arhuha. Kwa lwiganyo, rhwanamuvuga omunkwa enyanya z’amarangi minja rhubona oku mauwa, ebiryo binunu bya ngasi lubero rhujira, n’omwishingo g’okuba n’abîra ba hofi-hofi. Larha wirhu w’obuzigire anarhuhe ebyo byoshi n’ebindi bintu binji lyo rhuba n’omwishingo. (Osome Ennanga 104:12-15, 24.) N’akantu k’obulagirire bwenene, rhunavuge Yehova omunkwa enyanya z’ebiryo binji by’ekiroho arhuha n’obulangalire bwinja rhugwerhe lugenda akasanzi kayisha.

9. Bici byakarhurhabala lyo rhukakengera okuvuga Yehova omunkwa? (1 Abatesalonika 5:17, 18)

⁹ Kwanaba kulembu bwenene okuyibagira okuvuga Yehova omunkwa oku bintu byoshi  arhujirira. Bici byakakurhabala ly’okakengera? Wanajira e liste y’ebintu wahûnyire Yehova omu masala gawe n’okulabiriza ngasi mango gurhi Yehova ashuzize kw’ago masala. Na buzinda, wanasalira ly’omuvuga omunkwa oku burhabale bwage. (Osome 1 Abatesalonika 5:17, 18.) Orhanye k’oku: Erhi abandi barhuvuga omunkwa kw’ebi rhwabajirire, rhunashagaluke n’okuciyumva oku barhuzigire. Ko n’oko, erhi rhukengera okuvuga Yehova omunkwa bulya ashuzize oku masala girhu, oko kunamushagaluse. (Kl. 3:15) Cikone, hali ebindi by’obulagirire byakarhuma rhwakavuga Nnâmahaga wirhu omunkwa.

10. Kushimbana na 1 Petro 2:21, bulya gurhi rhushinganine rhukavuga Yehova omunkwa okubona arhumire Yezu hanw’igulu?

¹⁰ Osome 1 Petro 2:21. Rhushinganine rhukavuga Yehova omunkwa okubona arhumire Omugala muzigirwa ly’arhuyigiriza. Okuyiga akalamo ka Yezu kunarhurhabale rhumanye binji okubiyerekire Yehova n’oku rhwakamushagalusamwo. Erhi rhwakaba n’obuyemere omu nterekêro Kristu ahânaga, rhwanaba n’obwîra bwinja haguma na Yehova Nnâmahanga, na kandi rhwanaba n’omurhûla haguma naye.​—Rm. 5:1.

11. Bulya gurhi rhusalira okw’izino lya Yezu?

¹¹ Rhunavuge Yehova omunkwa okubona rhwanamuyegera omw’isala kugerera Omugala. Yehova anashuze oku masala girhu kugerera Yezu. Yehova anayumvirhize n’okushuza amasala rhusalira okw’izino lya Yezu. Yezu adesire ntya: “Ngasi kantu mwahûne Larha oku izino lyani, nammujirirekwo, lyo Larha akubizibwa n’Omugala [kugerera Omugala, NWT].”​—Yn. 14:13, 14.

12. Bindi bici byakarhuma rhwavuga Yehova omunkwa enyanya z’Omugala?

¹² Yehova anarhubabalire ebyaha birhu kugerera engombôlo ya Yezu. Amandiko gayerekine oku Yezu ali “kuhani wirhu mukulu [otamire] ebwa kulyo kw’entebe y’Obukulu omu mpingu.” (Hb. 8:1, NWT) Yezu ye ‘mubulanyi [murhabazi] oba ho Larha.’ (1 Yn. 2:1, Mashi Bible) Rhuvuzire Yehova omunkwa bwenene okubona arhuhîre Omukuhani Mukulu w’obwonjo ohugûkwa obuzamba bwirhu n’‘okurhulagira’ emwa Larha! (Rm. 8:34; Hb. 4:15) Rhuli bantu barhali bimana, co cirhumire birhakahashikine kuli rhwe okuyegera Yehova kugerera isala buzira enterekêro ya Yezu. Kobinali, nkaba nawe wanayemera oku rhurhakabona enderho zishinganine z’okuvuga Yehova omunkwa enyanya z’eyo ngalo nyinja bwenene arhuhîre, k’okuderha obuzine bw’Omugala muzigirwa!

13. Omu budufu buzinda embere z’okufâ kwa Yezu, gurhi ayerekinemwo oku al’izigire abanafunzi bage?

¹³ Omu budufu buzinda embere z’okufâ kwage, Yezu ayusize kasanzi kanji ali asalira enyanya z’abanafunzi bage, ahûna Ishe oku ‘abalange oku Mubi.’ (Yn. 17:15) Oko kuyerekine oku al’ibazigire bwenene! Ciru akaba al’imanyire oku ali hofi alibuzibwe bwenene, agendekire ahangayikira entumwa zage.

14. Gurhi rhwakayerekanamwo oku rhuba rhuzigire bene wirhu na bali birhu?

¹⁴ Omu kuyiga olwiganyo lwa Yezu, rhurhasegeza obwenge oku malagirire girhu rhwene. Lubero n’oko, ngasi mango rhunasalire enyanya za bene wirhu na bali birhu. Erhi rhujira ntyo, rhunabe rhuli rhwarhumikira irhegeko lya Yezu ly’okuzigirana rhwene na nnene, rhunanayerese Yehova kunganaci rhuba rhuzigire abirhu bemezi. (Yn. 13:34) Okusalira enyanya  za bene wirhu na bali birhu kurhaba kuhêza akasanzi busha. Akanwa ka Nnâmahanga karhubwizire oku “omusengero gw’omushinganyanya washenga n’omurhima gwage gwoshi gujira buhashe bunji.”​—Yk. 5:16.

15. Bulya gurhi bene wirhu na bali birhu balagirire oku masala girhu?

¹⁵ Abirhu bemezi baba balagirire oku masala girhu bulya bali balwisa mazibu manji. Rhwanashenga Yehova abarhabale okulembera endwala, obuhanya, amavita, okulibuzibwa, n’agandi mazibu. Na kandi rhwanasalira enyanya za bene wirhu na bali birhu bali bacihâna lyo barhabala abali omu bulagirire. Nkaba wanaba erhi omanyire bene wirhu na bali birhu baguma na baguma bali balwisa amazibu ga ntyo. Wanaderha amazino gabo omu masala gawe. Rhunayerekane obuzigire bw’okunali kuli bene wirhu na bali birhu omu kukashenga Yehova abarhabale lyo bahasha okulembera ago mazibu.

16. Bulya gurhi rhushinganine rhukasalira enyanya z’abali barhulongoza?

¹⁶ Abali balongoza omu cigamba baba balagirire bwenene oku masala g’abandi gananabarhabale. Paolo naye al’imanyire oku al’ilagirire oku masala g’abandi. Ayandika ntya: “Munsengerere nani, lyo mbona oku nabumbûla akanwa, nderhe nampanule n’oburhwali ihwe ly’Emyanzi y’Akalembe.” (Ef. 6:19) Ene nalyo, rhugwerhe bene wirhu banji bali barhulongoza bakola n’obushiru bwenene. Rhunayerekane oku rhubazigire omu kukashenga Yehova agishe omukolo gwabo.

17-18. Mangaci rhwakahûnwa rhusalire embere z’abandi, na bici rhushinganine rhukakengera?

¹⁷ Hali amango rhuhâbwa olukengwa lw’okusalira embere z’abandi. Kwa lwiganyo, mwali wirhu muguma oli walongoza ifunzo ly’Ebibliya anahûna owundi mwali wirhu omulusize kw’er’ifunzo oku asalire. Oyo mwali wirhu olusize owabo nkaba anaba arhamanyiri oyo mwanafunzi bwinja, na muli ntyo nkaba anabona oku kuli kwinja ajire isala oku buzinda bw’ifunzo. Omu kujira ntyo, kwanaba kulembu kuli ye okuhira amalagirire g’oyo mwanafunzi mw’er’isala.

¹⁸ Mwene wirhu mulebe anahûnwa oku asalire oku ntimanano y’amahubiri erhi y’ecigamba. Bene wirhu bahâbwa olo lukengwa  bashinganine bakakengera omuhigo gw’eyo ntimanano. Isala lirhashinganini likakolesibwa omu kuhâna amahano erhi omu kujira amatangazo. Ntimanano zirhu nyinji z’ecigamba zijira miniti irhanu y’olwimbo n’isala, co cirhumire mwene wirhu wajira isala arhashinganini aderhe “binji,” bwenene oku murhonderho gw’entimanano.​—Mt. 6:7.

19. Bici byarhurhabala ly’olusiku lwa Yehova lw’okutwa olubanja lurhimana rhicirheganyize?

¹⁹ Bulya olusiku lwa Yehova luyegerire, rhushinganine rhujire isala libe lya bulagirire bwenene omu kalamo kirhu. Lugenda oko, Yezu adesire ntya: “Kuziga mube masu, munashenge ngasi mango, lyo mukwanana okuyish’ifuma ebyo byoshi.” (Lk. 21:36) Kobinali, okusalira ngasi mango kwanarhurhabala rhugendekere rhwaba masu kiroho ly’olusiku lwa Yehova lw’okutwa olubanja lurhimana rhucirheganyize.

20. Gurhi amasala girhu gakabamwo nka bukû bw’ehisununu hinja?

²⁰ Bici rhwaganirire? Rhunabone olukengwa rhugwerhe lw’okuyegera Yehova omw’isala oku luli lwa bulagirire bwenene. Ebintu by’obulagirire rhushinganine okukahira omu masala girhu biri bintu bipatine bwenene n’obulonza bwa Yehova. Kandi rhunavuge Yehova omunkwa enyanya z’Omugala n’Obwami bwage, rhunanasalire enyanya z’abirhu bemezi. Na kandi, rhunasalire lugenda amalagirire girhu g’omubiri n’ag’ekiroho. Erhi rhurhanya bwenene kw’ebi rhwaderha omu masala girhu, rhunayerekane oku rhushagalukire olukengwa lwinja bwenene rhugwerhe lw’okuyegera Yehova kugerera isala. Enderho zirhu zanaba nka bukû bw’ehisununu hinja ‘ashagalukira.’​—Mig. 15:8, Mashi Bible.