1. Gurhi banji balonzamo okujira binji omu mukolo gwa Yehova?

 RHUGWERHE binji byakujira okubona er’igulu ligendekire lyaja ebuzindikiriza bwalyo. (Mt. 24:14; Lk. 10:2; 1 Pt. 5:2) Rhweshi rhunalonze okukolera Yehova nk’oku rhwakanahasha. Banji bali bayushûla omukolo gwabo gw’amahubiri. Baguma baguma banacifinje okuba bapainiya. N’abandi banacifinje okujikolera oku Beteli erhi kuja omu mukolo gw’obubasi bw’enyumpa zirhu z’eciteokrasi. N’abandi bene wirhu banji bali bahikiriza ebihûnyirwe lyo babà bagula erhi barhabazi b’abagula. (1 Tm. 3:1, 8) Yehova anashagaluke bwenene erhi abona er’iroho linja ly’okucihâna abakozi bage bali bayerekana!​—Enna. 110:3; Iz. 6:8.

2. Gurhi rhwakaciyumwa erhi akaba rhurhahikirizizi mihigo miguma na miguma y’ekiroho?

² Hali amango rhwakarhondera okuciyumva rhuvunisire omurhima erhi hakaba hamagera kasanzi kanji rhurhanacihikira mihigo milebe y’ekiroho. Erhi kandi rhwanavunika omurhima erhi akaba emyaka rhugwerhe erhi kanga rhulimo, karhacirhuyemeriri okujira mikolo milebe. (Mig. 13:12) Ko byaberaga Melissa * ntyo. Alilonzize okujikolera oku Beteli erhi kujisoma Amasomo g’Abaeneza Injili b’Obwami, cikone adesire ntya: “Nkola ntalusize emyaka ehûnyirwe ly’omuntu ajira eyo mikolo. Niehe nkola mbona eyo mikolo nka bilôrho kone. Hali amango nciyumva mvunisire omurhima.”

3. Bici baguma baguma bakwanine bajire lyo bashinganana okuhâbwa mikolo miguma na miguma yago-yago?

³ Misole miguma na miguma egwerhe amagala minja yanaba n’obulagirire bw’okurhangikula kiroho n’okuba na morhere maguma  na maguma embere bahâbwe eyindi mikolo omw’ikubuliro. Omu njira nguma byanahashikana erhi baba benge, bakurhôla emihigo duba-duba, banalonzinze okukola, cikone omu yindi njira, banaba n’obulagirire b’okuyiga okuba bakulembera, bakujira omukolo bwinja-bwinja erhi bakukenga abandi. Erhi wakakasegeza obwenge bwawe oku morhere oshinganine obe nago embere z’okuhâbwa mukolo mulebe, wanayish’ihâbwa ogo mukolo gwago-gwago omu mango orhaciri cirheganyize kw’ogo. Rhuganirire olwiganyo lwa mwene wirhu ohamagalwa Nick. Erhi agwerhe myaka 20 avunika omurhima bwenene okubona arhajijirwe murhabazi w’abagula. Adesire ntya: “Nakarhanya mpu nkaba nankajira kantu kalebe kabi.” Cikone Nick arhalekaga okukuza amorhere minja alishinganine okuba nago. Ajira okwage koshi omu mokolo gw’amahubiri n’omu cigamba. Ene ali muguma w’omu Komite y’Etawi.

4. Bici rhwaganirira mw’eci cigabi?

⁴ Ka wavunisire omurhima bulya orhazigihikirira muhigo mulebe gw’ekiroho? Erhi akaba ntyo kobiri, wanashenga Yehova n’okumubwira oku oli waciyumva. (Enna. 37:5-7) Na kandi, wanahûna bene wirhu bakuzire kiroho amahano okubiyerekire oku wakakubûlamwo omukolo gwawe oha Yehova, na buzinda wanacihangana okolese ago mahano bakuhâga. Erhi wajira ntyo, wanayishihikira aha wahâbwa ogo mukolo erhi kuhikira ogo muhigo. Cikone nk’oku byahikiraga Melissa, rhwaganiriraga embere, nkaba muli gano mango, byanaba birhacihashikini okuhikiriza emikolo oli wacifinja. Gurhigi wakajira mw’ako kanga ly’ogendekera waba n’omwishingo? Lyo rhushuza kw’er’idoso, mw’eci cigabi rhwaganirira (1) gurhi wakabamwo n’omwishingo, (2) gurhi wakayushulamw’omwishingo gwawe, na (3) mihigo ehi wakacihiraho ly’ogendekera wayushûla omwishingo gwawe.

5. Oku bici rhushinganine rhusegeze obwenge bwirhu lyo rhuba n’omwishingo? (Omuhanûzi 6:9)

⁵ Olwandiko lwa Omuhanûzi 6:9 luyerekine ebyakarhurhabala rhube n’omwishingo. (Osome.) Omuntu oshagalukira “ebi amasu gali gabona” anarhimukwe n’ebi agwerhe n’okushagalukira akanga alimo. Lubero n’oko, omuntu oshimbulira amarala g’eyi n’eyi anagendekere alalikira akantu birhakahashikana okuba nako. Isomo lihi rhukuzire aho? Lyo rhuba n’omwishingo, rhushinganine rhusegeze obwenge bwirhu oku bintu rhugwerhe ci arhali oku bintu rhurhakahash’iba nabyo.

6. Lwiganyo luhi rhukola rhwaganirira, na bici rhwasegezak’obwenge bwirhu?

⁶ Ka kobinali byanahashikana okurhimukwa n’ebi okola ogwerhe? Bantu banji banarhanye mpu birhakahashikana, bulya erhi hagera kasanzi, rhunacibilonza okuba n’ebindi bintu bihyahya. Cikone byanahashikana okurhimukwa. Rhwanashagalukira ebi rhugwerhe ci arhali ebi “amasu gali gabona.” Gurhi rhwakajiramwo ntyo? Lyo rhubona ishuzo, rhuganirire olwiganyo lw’etalanta Yezu ahânaga luganirirwe omu Mateyo 25:14-30. Rhwasegeza obwenge bwirhu kw’ebi lwakarhuyigiriza okubiyerekire okuba n’omwishingo, n’okuguyushûla omu migisho rhwakaba rhugwerhe muli gano mango.

7. Oganirire kwa bofofi olwiganyo lw’etalanta Yezu ahânaga.

⁷ Muli olo lwiganyo, Yezu aganirire mulume muguma walonzagya okubalama. Embere agende, ahamagala abajà erhi bambali na buzinda aha ngasi muguma wabo etalanta ajiramo oburhimbuzi. * Omu kuhugûkwa obuhashe bwa ngasi muguma, oyo mulume aha  mwambali muguma talanta irhanu, aha owundi ibirhi, na buzinda aha owakasharhu nguma. Oyo murhanzi n’owakabirhi bakola bwenene lyo bayungula etalanta za nnawabo. Cikone oyo wakasharhu yehe, ntaco ajijire n’eyo talanta ahâbagwa, na ntyo nnawabo amukula omu kazi.

8. Bulya gurhi omujà murhanzi w’omu lwiganyo alishinganine acishinge?

⁸ Omujà murhanzi akaciyumvire oku ahâbirwe olukengwa lunene okubona anahâbirwe talanta irhanu. Ezo zali nsaranga nyinji bwenene, zanayerekana kunganaci nnawabo alimulangalire! Gurhigi rhwakaderha lugenda omujà wakabirhi? Akavunisire omurhima okubona arhahâbirwe talanta nyinji nk’ezi bahâga omujà murhanzi. Cikone gurhi ajijire?

9. Bici Yezu adesire okubiyerekire omujà wakabirhi? (Mateyo 25:22, 23)

⁹ Osome Mateyo 25:22, 23. Yezu arhaderhaga oku oyo mujà wakabirhi agayire erhi kuyumva oburhe mpu bulya gurhi yehe bamamuha talanta ibirhi zone. Na kandi Yezu arhaderhaga oku oyo mujà acidudumire omu kuderha erhi: ‘K’ezi zone wamampaga niehe? Nani ngwerhe obuhashe bw’okurhimbula buli nk’ob’oyo wirhu wahaga talanta irhanu! Erhi akaba nnawirhu arhanshagalukira, nahumbira ezi talanta omw’idaho na ntyo ngendekeze emikolo yani.’

10. Bici omujà wakabirhi ajijire n’etalanta bamuhâga?

¹⁰ Ak’olya mujà murhanzi, omujà wakabirhi naye arhôla kwa buzibu-zibu omukolo ahâbagwa anacihanga bwenene okukolera nnawabo. Na ntyo, arhimbula n’ezo talanta nnawabo amuhâga buzinda zayunguka zindi ibirhi. Okuba mubidu n’okukola bwenene kwarhuma oyo mujà ahembwa. Nnawabo arhashagalukaga kone, cikone ayerekana oku ali mwambali mwinja ananamujira murhambo omu binji!

11. Gurhi rhwakayushûlamw’omwishingo gwirhu?

 ¹¹ Ko n’oko, nirhu rhwanayushûla omwishingo gwirhu erhi rhwakacihâna loshi omu mikolo yoshi bakarhuha oku rhujire omu mukolo gwa Yehova. ‘Ocihâne’ omu mukolo gw’amahubiri n’omu mikolo y’ecigamba. (Ebj. 18:5, Mashi Bible; Hb. 10:24, 25) Okaja oku ntimanano erhi wanarheganyize ebi mwayishiyiga ly’oyishihâna amashuzo g’okuhânana omurhima. Okabona ebipindi by’abanafunzi bakuhîre omu ntimanano y’omu garhi k’omugobe oku biri bya bulagirire. Erhi bakakuhûna oku orhabale okuhikiriza mukolo mulebe omu cigamba, wanakacihangana ogujire bwinja n’omu mango gakwanine. Orhakagi gayaguza omukolo bakuhîre omu cigamba n’okubona nk’okugujira kuli kuheza akasanzi kawe kone. Ocihangane okakubûla bwinja obuhashe bwawe. (Mig. 22:29) Oku wagendekera wacihâna loshi omu mikolo yawe y’ekiroho, ko wakagendekera wajira amajambere duba-duba n’omwishingo gwawe gwanagendekera gwayushûka. (Gl. 6:4) Na kandi wanabona oku kuli kulembu okucishinga haguma n’abahâbirwe omukolo wakagilonza okuba nago.​—Rm. 12:15; Gl. 5:26.

12. Bici Bahamirizi babirhi bajijire lyo bayushula omwishingo gwabo?

¹² K’ocikengire mwali wirhu Melissa, wagwerhe irala ly’okugendikolera oku Beteli erhi kujisoma Amasomo g’Abaeneza Injili b’Obwami? Ciru ankaba birhakacihashikine okuhikiriza er’irala lyage, adesire ntya: “Nancihâne loshi omu mukolo gwani gw’obupainiya n’okukolesa enjira zoshi z’okuhubiri. N’oko kunanderhere mwishingo munji.” Gurhi Nick naye ajijire ly’alwisa okuvunika omurhima erhi abula kuba murhabazi w’abagula? Adesire ntya: “Narhondera okusegeza obwenge bwani oku mikolo nakahashir’ijira, kwa lwiganyo okuja omu mahubiri, n’okuhâna amashuzo minja oku ntimanano z’ecigamba. Na buzinda narhuma efomu y’okugendikolera oku Beteli, n’omwaka gwakulikiraga bampamagala oku Beteli.”

13. Bunguke buhi wakaba nabo erhi wakacihâna loshi omu mukolo ogwerhe muli gano mango? (Omuhanûzi 2:24)

¹³ Erhi wakacihâna loshi omu mukolo gwawe gwa muli gano mango, ka wanayishihâbwa emikolo minene omu mango gayisha? Nkaba byanahikira ntyo nk’oku byahikiraga Nick. Cikone erhi byakakuhikira nk’oku byahikiraga Melissa, omwishingo gwawe gwanayushûka n’okurhimukwa n’ebi wakajira omu mukolo gwa Yehova. (Osome Omuhanûzi 2:24.) Buzira karhinda, wanaba na mwishingo munji omu kumanya oku Nnawirhu, Yezu Kristu, ali ashagalukira obushiru bwawe.

14. Bici rhushinganine rhukakengera ngasi mango lugenda emihigo yirhu y’ekiroho?

¹⁴ Okusegeza obwenge bwirhu oku mikolo rhugwerhe ene, ka kuli kuderha oku rhwanalekaga okulonza gurhi rhwakajirimo binji omu mukolo gwa Yehova? Nanga! Rhukakengera oku rhwanahasha rhunashinganine okucihiriraho emihigo y’ekiroho yakarhurhabala rhugendekere rhwaba n’obushiru lyo rhuyana amalehe omu mahubiri n’okurhabala bene wirhu na bali birhu. Rhwanahikira aho erhi rhwakagendekera rhwaba benge na ba lugero omu kugendekera kwasegeza obwenge bwirhu omu kurhabala abandi ahali h’okucikaliza rhwenene.​—Mig. 11:2; Ebj. 20:35.

15. Mihigo ehi miguma na miguma yakakurhabala okuyushûla omwishingo gwawe?

¹⁵ Mihigo ehi wakakacihiriraho wenene? Ohûne Yehova akurhabale ohugûkwe emihigo wakahashihikira. (Mig. 16:3; Yk. 1:5) Ka wanacihangana ohikire emihigo eganirirwe omu  cifungo cirhanzi c’eci cigabi, nk’okuba painiya murhabazi erhi wakasanzi koshi, okujikola oku Beteli, erhi kuja omu mikolo y’obubasi? Erhi nkaba wanahashiyiga olulimi luhyahya ly’ohubiri omwanzi mwinja kuli balya baderha olo lulimi erhi kugendihubiri omu yindi eneo.  Wanayiga binji okubiyerekire eyo mihigo omu kusoma ecigabi ca 10 c’ecitabu Tengenezo Lenye Kufanya Mapenzi ya Yehova na kandi wanaganira haguma n’abagula b’omu cagamba cinyu. * Erhi wakagendekera wajira okwawe koshi ly’ohikira eyo mihigo, amajambere gawe gabonekana oku bantu boshi n’omwishingo gwawe gwanayushûka.

16. Bici wakajira erhi akaba hali emihigo orhakahash’ihikira buno?

¹⁶ Cikone gurhi wakajira erhi akaba muli gano mango orhagwerhi obuhashe bw’okuhikira muhigo muguma gwa mw’eyo rhuganirire? Oku wakajira kuli kucihiriraho ogundi muhigo, ogu wakahashihikira. Rhuganirire mihigo miguma na miguma wakacihiriraho.

17. Nk’oku biyerekinwe omu lwandiko lwa 1 Timoteyo 4:13, 15, gurhi mwene wirhu akajira ly’ahikira ah’aba mwigiriza mwinja?

¹⁷ Osome 1 Timoteyo 4:13, 15, Mashi Bible. Erhi akaba oli mwene wirhu mubatize, wanacihangana okubûle obuhashe bwawe b’okuganira n’okuyigiriza. Bulya gurhi? Bulya erhi ‘wakacihâna’ loshi omu kusoma, okuganira, n’okuyigiriza wanarhabala bwenene abali bakuyumvirhiza. Ocihirireho omuhigo g’okuciyigiriza n’okukolesa ngasi ihano liyerekire okuganira liri omu broshuwa Fanya Bidii Katika Kusoma na Kufundisha. Osome borhere buguma oku bundi n’okukacikomereza amango oli aha ka, ociseze okuyerekana obo borhere omu mango oli wageza ehotuba. Wanabwira omuhanûzi murhabazi (conseiller adjoint) akuhe amahano erhi kandi wanagahûna abandi bagula “bacîshwekera oku mukolo gw’okuhanûla n’ogw’okuyigiriza n’obushiru.” * (1 Tm. 5:17, Mashi Bible) Orhasegezagya  obwenge bwawe oku kuhugûkwa obulenga kone, cikone obusegeze kandi oku wakazibuhyamwo obuyemere bw’abumvirhiza bawe n’oku wakabashumyamwo barhôle emihigo minja y’okukolesa ebi bayiga. Erhi wakajira ntyo, wanayushûla omwishingo gwawe n’ogwabo.

18. Bici byakarhurhabala rhuhikire emihigo yirhu omu mukolo gw’amahubiri?

¹⁸ Rhweshi rhugwerhe omukolo gw’okuhubiri n’okujira abanafunzi. (Mt. 28:19, 20; Rm. 10:14) K’olonzize okubûle obuhashe bwawe mw’ogo mukolo gw’obulagirire? Ocihirireho omuhigo g’okuciyigiriza ebroshuwa Kufundisha n’okukolesa ebi oli waciyigiriza. Wanabona agandi mahano gakakurhabala omu Buku la Mukutano​—Utumishi na Maisha ya Mukristo n’omu video z’enyiganyo z’enganîro zilugiyerekanwa omu ntimanano y’omu garhi k’omugobe. Okakolesa entanya ziri lubero ly’ohugûkwa eziri zakola bwinja. Wanaba n’omwishingo munji erhi wakakakulira ago mahano na kandi wanahikira aha waba Mukristu ogwerhe obulenga omu mukolo gw’amahubiri.​—2 Tm. 4:5.

19. Gurhi wakajira ly’oba n’amorhere g’Ecikristu?

¹⁹ Amango oli wacihiriraho emihigo wahikira, arhayibagiraga ogu muhigo gw’obulagirire bwenene: Okuba n’amorhere g’Ecikristu. (Gl. 5:22, 23; Kl. 3:12; 2 Pt. 1:5-8) Gurhi wakajira ly’oba n’ago morhere? Orhanye, kwa lwiganyo, obe olonzize okuba n’obuyemere buzibu. Wanasoma bigabi biguma biguma by’omu bitabu birhu biganirire oku wakazibuhyamw’obuyemere bwawe. Kobinali wanaba na bunguke bunji erhi wakakalola ebigabi by’oku JW Télédiffusion biyerekine gurhi bene wirhu na bali birhu bayerekinemw’obuyemere buzibu ciru n’omu mango bakagikalwisa amazibu ga ngasi lubero. Na buzinda wanalola gurhi wakayigamw’olwiganyo lwabo omu kalamo kawe.

20. Gurhi rhwakayushûlamw’omwishingo gwirhu n’okunyihya entanya z’okuvunika omurhima?

²⁰ Buzira karhinda, rhweshi rhuba rhulonzize rhujire binji omu mukolo gwa Yehova kulusha ebi rhuli rhwajira ene. Omw’igulu lihyahya lya Nnâmahanga, rhwayishiba n’obuhashe bw’okukolera Yehova akasanzi koshi. Omu kulinda ago mango, rhukolese obulyo rhwakaba nabo boshi lyo rhuyushûla omwishingo gwirhu n’okunyihya entanya z’okuvunika omurhima. N’ok’obulagirire bwenene, rhwanalerhera Yehova olukengwa n’irenge, “Nnâmahanga [wirhu] w’obushagaluke.” (1 Tm. 1:11, NWT) Lekagi rhweshi rhube n’omwishingo omu mikolo rhugwerhe!