1-2. Nk’oku olwandiko lwa Ennanga 34:8 lunadesire, gurhi rhwakacibonera rhwene oku Yehova aba mwinja?

ORHANYE muntu mulebe akuhe biryo bilebe orhasagilyako ciru lusiku luguma. Wanaciyigiriza kantu kalebe okubiyerekire ebyo biryo omu kubilolako, omu kuyumva obwehe bwabyo, omu kumanya bici byacanzirwemwo, erhi omu kudosa abandi erhi nabo babishagalukire. Cikoki, akantu kaguma kakayerekana oku oshagalukire ebyo biryo, kuli kubilabulako.

² Rhwanaciyigiriza kantu kalebe okubiyerekire obwinja bwa Yehova omu kusoma Ebibliya, omu kusoma ebitabu birhu n’omu kuyumvirhiza abandi bali baganirira emigisho babwine kurhenga emwa Yehova. Cikoki, rhwanahugûkwa bwinja obwinja bwa Yehova omu ‘kulabula’ rhwene kunganaci aba mwinja. (Osome Ennanga 34:8, NWT.) Rhuganirire olwiganyo luyerekine oku rhwakajiramwo ntyo. Rhurhanye rhube erhi rhulonzize okujira mukolo mulebe gw’akasanzi koshi, cikoki lyo rhuhikira ogo muhigo, bihûnyire rhulame akalamo karhahûnyiri binji. Nkaba rhwanaba erhi rhwasomire eciragane ca Yezu ciyerekine oku erhi burhangiriza rhwakalonza Obwami, Yehova anarhuyushulira ebindi byoshi, cikoki, rhurhazagicibonera oku eco ciragane cahikirira kuli rhwe rhwene. (Mt. 6:33) Ciru akaba ntyo, enyanya z’obuyemere rhugwerhe muli eco ciragane ca Yezu, rhwanahikira aha rhwanyihya ebi rhwalikomire okugula, rhujire empindûlo ndebe okubiyerekire eprograme y’akasi kirhu n’okujira binji omu mukolo gw’amahubiri. Omu kujira ntyo, rhwanacibonera rhwene gurhi Yehova arhuyushulira ebi rhulagirireko. Muli eyo njira erhi rhuli ‘rhwalabula’ lyo rhubona oku Yehova aba mwinja.

3. Nk’oku biyerekinwe omu lwandiko lwa Ennanga 16:1, 2, bandi bayunguka n’obwinja bwa Yehova?

³ Yehova aba “mwinja kuli boshi” ciru n’oku barhamuyishi. (Enna. 145:9; Mt. 5:45) Cikone bwenene balya bazigira Yehova  n’okumukolera n’omurhima gwabo goshi, banabe na migisho minji kurhenga emwage. (Osome Ennanga 16:1, 2.) Ololage njira nguma na nguma rhuyungukamwo n’obwinja bwa Yehova.

4. Gurhi Yehova ayerekamw’obwinja bwage kuli balya barhondera okumuyegerera?

⁴ Ngasi mango erhi rhukolesa ebi Yehova ali arhuyigiriza, rhunabone obunguke okwo kurhulerhera omu kalamo kirhu. Erhi rhuyiga binji okubiyerekire Yehova n’okumuzigira, arhurhabire rhwahagalika entanya n’enkomêdu zakag’irhuma rhwaja kuli naye. (Kl. 1:21) N’erhi rhucihâna emwa Yehova n’okubatizibwa, rhwacibwinire rhwenene obwinja bwage omu kurhuha ezamiri zicîre, n’okujira obwîra bwa hofi-hofi haguma na nirhu.​—1 Pt. 3:21.

5. Gurhi rhucibonera n’obwalagale obwinja bwa Yehova omu mahubiri?

⁵ Rhunagendekere rhwacibonera n’obwalagale obwinja bwa Yehova erhi rhujira omukolo gw’amahubiri. K’oba muntu wanshonyi? Bakozi banji ba Yehova babà banshonyi. Nkaba embere obe Muhamirizi wa Yehova, orhakarhanyize oku lusiku luguma byakahashikine ogonge oku lumvi lwa muntu mulebe murhanamanyini, buzinda orhondere wamubwira omwanzi bantu banji barhasima okuyumva. Cikone, ene okola okajira ntyo ngasi mango. Na kulusha oko, kugerera oburhabale bwa Yehova, waciyigiriza okuzigira omukolo gw’amahubiri! Kobinali, wacibwinire oburhabale bwa Yehova omu zindi njira nyinji. Akurhabire orhulûle amango muntu mulebe alonzagya okukuhagalika. Na kandi akurhabire wakengera olwandiko lushinganine amango waganizagya omuntu osimisibwe n’omwanzi mulebe gw’Ebibliya. Kandi akuha emisi ogendekere wahubiri ciru akaba wali omu eneo abantu barhakagirhuyegerezamo.​—Yer. 20:7-9.

6. Gurhi obwinja bwa Yehova bubonekanamwo kugerera oku arhukomereza?

⁶ Kandi Yehova arhuyeresire obwinja bwage omu kurhukomereza okujira omukolo gw’amahubiri. (Yn. 6:45) Omu mango g’entimanano yirhu y’omu garhi k’omugobe, rhunabone enyiganyo z’oku rhwakarhondeza enganîro, rhunanahâbwe omurhima oku rhukakolesa ezo nganîro omu mahubiri. Oku murhondero, byanabonekana nka biri bizibu okukolesa njira ndebe mpyahya omu mahubiri, cikone erhi rhwakacihangana okujira ntyo, rhwanabona oku eyo njira eri nyinja enasimisize abantu b’omu eneo. Na kandi rhunahâbwe omurhima oku ntimanano zirhu z’ecigamba n’oku ntimanano zirhu nkulu oku kuli kwabulagirire rhukakolesa ezindi njira z’okuhubiri rhurhasagikolesa bundi. Okujira ntyo nako kwanarhuma rhwayumva ehy’oboba, cikone erhi rhujira ntyo, rhunahe Yehova akantu akagisha. Rhuganirire migisho miguma na miguma rhwakaba nayo erhi rhwakakolesa enjira mpyahya lyo rhuha Yehova ebintu birhu binja, ciru rhwakaba omu kanga kali gurhi. Na buzinda rhwaganirira njira nguma na nguma rhwakayushûlamwo omukolo gwirhu gw’amahubiri.

7. Erhi rhwakacihangana okujira binji omu mukolo gwirhu gw’amahubiri, migisho ehi rhwakaba nayo?

⁷ Rhunayegerere Yehova bwenene. Rhuganirire olwiganyo lwa mugula muguma ohamagalwa Samuel * okolera e Colombie bona mukage. Oyo mulume na mukage bali bapainiya omu cigamba cabo, cikone balonza okujira binji omu mukolo gw’amahubiri, na ntyo bahamira omu cindi cigamba calimw’obulagirire bw’abahubiri. Lyo bahikiriza ogo muhigo, bahikira aha baleka bintu biguma biguma balikomire okujira. Samuel adesire ntya: “Rhwakolesa amahano gali omu Mateyo 6:33 na ntyo, rhwahikira aha rhwaleka okugula ebintu birhali byabulagirire bwenene. Cikone akantu rhwagwerheko amazibu gw’okuleka, kwali kurhenga  omu nyumpa yirhu. Yali nyubake oku rhwalisimire erhanali kw’ideni.” Erhi bakola bali omu mukolo gwabo muhyahya, bahugûkwa oku banahash’ilama n’ensaranga nsungunu kulusha ezi bakagilamamwo. Samuel ayushwire ntya: “Rhwacibwine gurhi Yehova alongozize emihigo yirhu n’okushuza oku masala girhu. Rhuli rhwaciyumva oku rhuyemerirwe n’okuzigirwa naye omu njira rhurhabonaga embere.” Ka hali oku wakajiramwo binji omu mukolo gwawe gw’amahubri? Erhi akaba ishuzo ali neci, oyemere n’obwalagale oku okujira ntyo kwanakurhabala oyegerere Yehova n’oku akushibirira.​—Enna. 18:25.

8. Bici enderho za Ivan na Victoria zakakuyigiriza?

⁸ Rhwanaba n’omwishingo omu mukolo gwirhu. Rhuganirire enderho za Ivan na Victoria, mulume muguma na mukage babà bapainiya omu cihugo c’e Kirghizistan. Bacishozire okulama akalamo karhahunyiri binji lyo bahashicihâna omu ngasi mukolo bakahâbwa omw’ikubuliro, ciru n’omu mukolo gw’obubasi. Ivan adesire ntya: “Kobinali rhwacihanyîre loshi omu ngasi mukolo rhwahîrwe. Ciru akaba oku buzinda bw’omulegerege rhwakag’iciyumva rhurhamire bwenene, rhwakag’iciyumva rhuli omu murhula rhunarhimusirwe, bulya rhwalimanyire oku rhwahanyîre emisi yirhu omu mukolo gw’Obwami. Na kandi, obwîra rhwacijirire n’ebintu rhwacibwinire byarhulerhire omwishingo munji.”​—Mk. 10:29, 30.

9. Bici mwali wirhu muguma ajijire omu kanga kazibu ly’ajira binji omu mukolo gw’amahubiri, na bunguke buci okwo kwamudwirhire?

⁹ Rhwanaba n’omwishingo omu mukolo gwa Yehova ciru rhwakaba rhuli omu kanga kazibu. Kwa lwiganyo, Mirreh, mugikulu muguma mukana olama e Afrique de l’Ouest, alesire omukolo gwage gw’ecinganga arhondera omukolo gw’obupainiya. Mirreh ajira obulwala buzibu na ntyo arharhalusa nsa nguma yone omu mahubiri ga nyumpa oku yindi. Cikone ajira obuhashe bw’okujira kasanzi kanji omu mahubiri g’aha bantu banji. Ajira bantu banji agalukira, na mafunzo manji g’Ebibliya, baguma ba mulibo anakabahamagala oku telefone. Bici bishumya Mirreh ly’acihangana ntyo? Adesire ntya: “Omurhima gwani guba guzigire Yehova na Yezu Kristu bwenene. Na ngasi mango nshenga Yehova antabale njire byoshi nakanahasha omu mukolo gwage.”​—Mt. 22:36, 37.

10. Nk’oku biyerekinwe omu lwandiko lwa 1 Petro 5:10, bici Yehova aha balya bacihangana okujira binji omu omukolo gwage?

¹⁰ Yehova anarhukomereze kulusha. Painiya muguma ohamagalwa Kenny okolera omu Ile Maurice, abwine oku ezo nderho ziri z’okuli. Erhi ayiga okuli, aleka okusoma e université, abatizibwa, na buzinda aja omu mukolo gw’akasanzi koshi. Adesire ntya: “Nancihangane okuyiga omulebi Izaya waderhaga ntya: ‘Nie ono, ontume!’” (Iz. 6:8) Kenny akozire omu mikolo minji y’obubasi, ananarhabire okuhindula bitabi binji biyimangire oku Bibliya omu lulimi lwage lw’akaburhano. Kenny adesire ntya: “Nakomerezibwe bwenene lyo mba n’obuhashe nal’ilagirireko lyo mpikiriza emikolo yani.” Cikone aciyigirizize bintu binji ahanyuma n’obufundi. Ayushwire ntya, “Naciyigirizize binji okubiyerekire ebi ntakahasha, n’amorhere nshinganine mbe nago lyo mba mukozi mwinja wa Yehova.” (Osome 1 Petro 5:10.) K’orhakalola akanga olimwo ly’omanya erhi hali oku wakajira ly’ocibikomerezibwa na Yehova kulusha?

11. Gurhi bali birhu b’e Corée du Sud bajijire lyo bagendekera omu mukolo gw’amahubiri, na bunguke buhi oko kwabadwirhire? (Olole enfoto eri oku cijalada c’eyi gazeti.)

¹¹ Ciru n’Abahamirizi ba Yehova bakola bamanyire binji banayunguke n’okukomerezibwa lyo barhondera omukolo muhyahya. Amango g’obu bulwala bw’e Korona, abagula b’omu cigamba ciguma c’e Corée du Sud bayandika ntya: “Bahubiri baguma na baguma bakag’irhanya oku barhakacihash’ijira omukolo gw’amahubiri enyanya z’obulwala, kuhika buno bali bajira ogo mukolo kugerera e vidéoconférence. Bali birhu basharhu bagwerhe myaka kulusha 80,  baciyigirizize okukolesa eyi teknoloji mpyahya na ntyo barhondera okujira ogo mukolo hofi ngasi lusiku.” (Enna. 92:14, 15) Ka wanalonza okujira binji omu mukolo gw’amahubiri ly’olabula n’okucibonera bwenene oku Yehova aba mwinja? Rhuganirire bintu biguma na biguma wakajira ly’ohikira ogo muhigo.

12. Bici Yehova alaganyize abamulangalira?

¹² Ociyigirize okulangalira Yehova. Arhulaganyize migisho minji erhi rhwakagendekera rhwamulangalira n’okujira okwirhu koshi lyo rhumukolera. (Mal. 3:10) Mwali wirhu muguma olama e Colombie ohamagalwa Fabiola abwîne gurhi Yehova ahikirizize eco ciragane omu kanga kage. Hisanzi hisungunu enyuma z’okubatizibwa, alonza okurhondera omukolo gw’obupainiya bw’akasanzi koshi. Cikone, omushahara agwerhe oku kasi go gwakagirhabala iba n’abana bage basharhu. Erhi abona oku ali hofi ahabwe epansyo, ashenga Yehova bwenene oku amurhabale. Adesire ntya: “Okuderha okuli, binahûne kasanzi kanji lyo baha omuntu epansyo, cikone eyani yayemerwa nanayihâbwa omu mwezi muguma enyuma z’okuyihûna. Nabona nk’eco ciri cisomerine!” Erhi hagera myezi ibirhi, ayunjuza efomu y’okuba painiya. Ene, akola agwerhe myaka 70 na kulusha, anakola agwerhe myaka 20 na kulusha omu mukolo gw’obupainiya. Mw’ako kasanzi koshi, arhabire bantu 8 bahikira okubatizibwa. Adesire ntya: “Ciru akaba mango maguma na maguma naciyumve ndi muzamba, ngasi lusiku Yehova anantabale lyo nkenga eprograme yani.”

13-14. Nyiganyo zihi zakarhurhabala rhukalangalira Yehova n’okucihangana rhujire binji omu mukolo gwage?

¹³ Ociyigirize binji kugerera balya bal’ilangalire Yehova. Ebibliya erimo nyiganyo nyinji  z’abantu bacihanyîre loshi omu mukolo gwa Yehova. Kanji-kanji abo bakozi ba Yehova bajijire kantu kalebe embere bahâbwe emigisho yago-yago na Yehova. Kwa lwiganyo, erhi Abrahamu arhenga ahamwage, “agenda arhanamanyiri aha aja,” go mango Yehova amugishaga. (Hb. 11:8) Yakobo ahabagwa emigisho yago-yago enyuma z’okulwisa malahika. (Murh. 32:24-30) Erhi ishanja ly’aba Israheli liri hofi lihike omu Cihugo c’Amalaganyo, abantu bayikiraga erhi abakuhani bayusihira amagulu omu Yordani.​—Yoz. 3:14-16.

¹⁴ Na kandi wanaciyigiriza binji kugerera enyiganyo z’Abahamirizi ba Yehova ba muli gano mango girhu balangalire Yehova banacihangana okujira binji omu mukolo gwage. Kwa lwiganyo, mwene wirhu muguma ohamagalwa Payton na mukage Diana, bakagishagalukira okusoma emyanzi eyerekire bene wirhu na bali birhu bayushwire obushiru bwabo omu omukolo gwa Yehova, kwa lwiganyo balya baganirirwe omu mwanzi gudesire “Walijitoa kwa Kujipendea.” * Payton adesire ntya: “Erhi rhusoma emyanzi eyerekire olwiganyo lwabo, rhwaciyumva nka kulya rhwakanalabire omuntu oli washagalukira ebiryo binja bwenene. Oku rhwagendekire rhwalaba, ko rhwanagendekire rhwaba n’irala ly’okulabula n’okubona oku Yehova aba mwinja.’” Buzinda, Payton na Diana bahamira omu eneo yalimw’obulagirire bw’abahubiri. K’okola osomire ebyo bigabi? Na kandi k’okola olabire evideo zidesire Wanahubiri Katika Eneo la Mbali​—Australia na Kuhubiri Katika Eneo la Mbali​—Ireland ziri oku jw.org? Ezo video zanakurhabala olole gurhi wakayushûlamw’omukolo gwawe gw’amahubiri.

15. Gurhi abîra binja bakarhurhabalamwo?

¹⁵ Ocishôge bwinja abîra bawe. Erhi rhwakakageza akasanzi haguma n’abantu bashagalukira biryo bilebe, nirhu rhwanashumibwa okubilyako. Ko n’oko erhi rhwakakajira obwîra haguma na balya baheba Yehova oku nafasi ya burhanzi omu kalamo kabo, rhwanahikira aha rhwabona omu njira nci rhwakayushûla obushiru bwirhu omu mukolo gwa Nnâmahanga. Mulume muguma ohamagalwa Kent na mukage Veronica babwine oku olo lwiganyo luli lw’okuli. Kent adesire ntya: “Abîra birhu n’abantu b’omulala gwirhu barhuhîre omurhima rhupime eyindi mikolo omu mukolo gwa Yehova. Rhwahikire aha rhwahugûkwa oku okujira obwîra haguma na balya bagwasa Obwami oku nafasi ntanzi omu kalamo kabo, kwarhuhîre oburhwali bw’okurhondera akandi kantu kahyahya.” Ene, Kent na Veronica bali bapainiya bapekee omu cihugo c’e Serbie.

16. Nk’oku biyerekinwe omu lwiganyo Yezu ahânaga luli omu Luka 12:16-21, bulya gurhi rhushinganine rhube babidu okuleka bintu biguma biguma?

¹⁶ Rhuleke bintu biguma biguma enyanya z’omukolo gwa Yehova. Kurhali kuderha oku bihûnyire okuleka ebintu byoshi lyo rhusimisa Yehova. (Muh. 5:19, 20) Cikone, erhi rhwakaleka okujira binji omu mukolo gwa Yehova mpu bulya rhurhalonzizi okuleka bintu bilebe, rhwanahikira aha rhwarhogera omu murhego guli nka gulya mulume muguma oganirirwe omu lwiganyo Yezu ahânaga arhogeragamo; oyo mulume alonza okulama akalamo kinja bwenene cikone ayibagira Nnâmahanga. (Osome Luka 12:16-21.) Mwene wirhu muguma ohamagalwa Christian, olama e France, adesire ntya, “Ntakag’iha Yehova n’omulala gwani ecigabi cinja c’akasanzi kani n’emisi yani.” Ye na mukage bahiga okurhondera omukolo gw’obupainiya. Cikone lyo bahikira ogo muhigo, balishinganine baleke emikolo yabo. Lyo bagendekera bahikiriza amalagirire gabo g’omubiri, barhondera okukola omu entreprise nsungunu y’okukoroperana enyumpa, banaciyigiriza okurhimûkwa na bintu bisungunu. Ka hali obunguke babire nabo omu kujira ezo mpindûlo? Christian adesire ntya: “Rhuli rhwashagalukira  bwenene omukolo gw’amahubiri, na kandi rhunashagaluke bwenene erhi rhubona abanafunzi birhu b’Ebibliya n’abantu rhugalukira bayiga binji okubiyerekire Yehova.”

17. Bici byakarhuma rhwarhindira okukolesa enjira mpyahya y’okuhubiri?

¹⁷ Obe mubidu okupima ezindi njira mpyahya z’okuhubiri. (Ebj. 17:16, 17; 20:20, 21) Painiya muguma ohamagalwa Shirley, olama e États-Unis, ashanjire oku akag’ijiramwo omukolo gw’amahubiri muli aka kasanzi k’obulwala bw’e Korona. Oku murhondero, akag’irhindira okuhubiri kugerera etelefone. Buzinda erhi akomerezibwa amango mwangalizi w’omuzunguko alambagiriraga ecigamba cabo, arhondera okukolesa ngasi mango eyo njira y’okuhubiri. Adesire ntya: “Oku murhondero, naliyobohire, cikone ene nkola nshagalukira eyo njira y’okuhubiri. Rhukola rhuganira na bantu banji kulusha oku byaliyosire omu mahubiri ga nyumpa oku yindi!”

18. Bici byakarhurhabala rhulwise amazibu amango rhuli rhwalonza okujira binji omu mukolo gw’amahubiri?

¹⁸ Ocihirireho eprograme onayikolese. Erhi amazibu garhuhikira, rhunasalire n’okukolesa obuhashe bwirhu bw’okurhanya lyo rhubona ebi rhushinganine rhujire. (Mig. 3:21) Mwali wirhu muguma ohamagalwa Sonia, okolera e Bulaya omu cikundi c’olulimi lw’Eciromania adesire ntya: “Nanshagalukire bwenene okuyandika eprograme zani oku hiradasi n’okuhihira aha nakakahibona ngasi mango. Oku meza gani, mbancapire mabarabara abirhi gahesire ngasi liguma olwalo luhande. Amango nshinganine ntôle omuhigo, nanarhangilaba kw’ezo nfoto n’okurhanya okubiyerekire emunda ogo muhigo gwani gwampêka.” Sonia anajire okwage koshi ly’aba n’entanya nyinja okubiyerekire amazibu ali alwisa. Adesire ntya: “Ngasi kanga kahyahya kanaba nka cibambazi cimpanzize okujira bintu bilebe, erhi kandi lyanaba nk’irheme erhi cilalo cintabire lyo nyikira; ebyo byoshi byahashikana kugerera entanya zani.”

19. Bici rhushinganine rhuhige okujira?

¹⁹ Yehova anakarhugisha omu njira nyinji bwenene. Rhwanayerekana kunganaci rhuba rhushagalukire eyo migisho, omu kujira okwirhu koshi lyo rhukuza Nnâmahanga. (Hb. 13:15) Okujira ntyo kuhiziremo okukolesa enjira mpyahya lyo rhujira binji omu mukolo gwirhu gw’amahubiri, n’oko kwanarhuma rhwahâbwa migisho minji. Ngasi lusiku rhukalonza enjira ‘rhwakalabulamwo n’okubona oku Yehova aba mwinja.’ Erhi rhwakajira ntyo, rhwanayiga Yezu waderhaga ntya: “Ebiryo byani kuli kujira obulonza bw’owantumaga n’okuyukiriza omukolo gwage.”​—Yn. 4:34.