ECIGABI C’OKUYIGA CA 34
LWIMBO 107 Rube n’Obuzigire Aka Mungu
Oku Abagula Bayeresamwo Abanya-byaha Obuzigire n’Obwonjo
‘Obwonjo bwa Nyamuzinda bukulalisire mpu ociyunjuze.’—RM. 2:4.
EBI ECI CIGABI CISEGIZE
Oku abagula bacihangana lyo barhabala abantu b’omu cigamba bajijire ecaha cizibu.
1. Gurhi byakaba enyuma za bantu baguma na baguma okujira ecaha cizibu?
OMU cigabi c’embere, rhwabwine gurhi entumwa Paolo yashibiriragamwo akanga k’ecaha cizibu omu cigamba c’e Korinti. Oyo munya-byaha arhaciyunjuzagya, na ntyo byahûna arhenzibwe omu cigamba. Cikone nk’oku olwandiko ogu mwanzi guyimangireko luyerekine, baguma na baguma bajijire ecaha cizibu banarhabalwa. Mungu anabalongoza baciyunjuze. (Rm. 2:4) Gurhi abagula bakabarhabalamwo lyo baciyunjuza?
2-3. Bici rhushinganine rhujire erhi rhwakamanya oku owirhu mwemezi anajijire ecaha cizibu, na bulya gurhi rhushinganine rhujire ntyo?
2 Erhi akaba abagula barhamanyiri oku muntu mulebe anajijire ecaha cizibu, barhankamurhabala. Co cirhumire, bici rhushinganine rhujire erhi rhwakamanya oku owirhu mwemezi anajijire ecaha cizibu cakarhuma arhenzibwa omu cigamba? Rhushinganine rhuhe oyo muntu wajiraga ecaha omurhima aj’ibona abagula lyo bamurhabala.—Iz. 1:18; Ebj. 20:28; 1 Pt. 5:2.
3 Cikone, gurhigi erhi owajiraga ecaha akalahira okuganiza abagula? Byanahûna rhwene rhuj’iganiza abagula ly’oyo muntu ahâbwa oburhabale alagirireko. Okujira ntyo kuli kuyerekana obuzigire, bulya rhurhalonzizi rhuheze mwene wirhu erhi mwali wirhu. Erhi oyo muntu wajiraga ecaha akagendekera mw’olo lugenzi lwage, anashereza bwenene obwîra bwage haguma na Yehova. Kandi anashereza irenge ly’ecigamba. Co cirhumire, rhunayerekane oburhwali omu kugend’ibona abagula, bulya rhuzigire Yehova rhunazigire oyo wajiraga ecaha.—Enna. 27:14.
OKU ABAGULA BARHABALAMWO ABAJIJIRE ECAHA CIZIBU
4. Omuhigo gw’abagula guba guhi amango barhimanine n’omuntu wajiraga ecaha cizibu?
4 Erhi muntu mulebe w’omu cigamba akajira ecaha cizibu, embaraza y’abagula enacishoge bagula basharhu egarhi kabo bagwerhe obulenga lyo bajira ekomite. a Abo balume bashinganine babe ba lugero na birhohye. Amango bali bacihangana okurhabala omuntu wajiraga ecaha ly’aciyunjuza, banahugûkwe oku barhankaseza omuntu yeshi-yeshi ly’ashanja. (Lush. 30:19) Abagula baba bahugûsirwe oku arhali abantu boshi bajijire ecaha bayemera okuciyunjuza, nk’oku Mwami Daudi ajiraga. (2 Sam. 12:13) Bantu baguma na baguma bajijire ecaha banacishoge okulahira amahano ga Yehova. (Murh. 4:6-8) Ciru akaba ntyo, omuhigo gw’abagula guba gwa kurhabala omuntu wajijire ecaha ahikire okuciyunjuza erhi kwankahashikana. Makanuni gahi gabalongoza amango barhimanine n’owajiraga ecaha?
5. Ihano lihi abagula bashinganine bagendekere bakengera amango barhimanine n’omuntu wajiraga ecaha? (2 Timoteyo 2:24-26) (Olole n’enfoto.)
5 Abagula banabone omuntu wajiraga ecaha nka cibuzi ca ngulo ndarhi cahezire. (Lk. 15:4, 6) Co cirhumire erhi abagula barhimanana n’oyo muntu, barhamuganiza omu njira y’obukali, barhanamujirira omu njira erhali ya lukogo; na kandi barhabona eyo ntimanano nka nkomedu kone bakulikiramwo oku bayorha bajira. Lubero n’oko, banayerekane amorhere gaganirirwe omu 2 Timoteyo 2:24-26. (Osome.) Abagula banagendekere baba batûdu, binja, na ba lukogo amango bali bacihangana okuhuma oku murhima gw’omuntu wajiraga ecaha.
Ak’abangere b’omu mango ga mîra, abagula banajire oku bakanahasha koshi lyo bapata ecibuzi cahezire (Olole ecifungo 5)
6. Gurhi abagula bakarheganyamwo omurhima gwabo bonene embere z’okurhimanana n’omuntu wajiraga ecaha? (Abaroma 2:4)
6 Abagula banarheganye omurhima gwabo bonene. Banacihangane okuyiga olwiganyo lwa Yehova muli byoshi bajira amango bali bashibirira omunya-byaha, omu kukengera ezi nderho za Paolo: ‘Obwonjo bwa Nyamuzinda bukulalisire mpu ociyunjuze.’ (Osome Abaroma 2:4.) Abagula bagwasirwe bakengere oku burhangiriza baba balungere bali idako ly’obulongozi bwa Kristu. (Iz. 11:3, 4; Mt. 18:18-20) Embere ekomite y’abagula erhimanane n’omuntu wajiraga ecaha, bashinganine bashenge n’okurhanya oku muhigo gwabo: okurhabala owajiraga ecaha aciyunjuze. Bashinganine bajire obusagasi omu Mandiko n’omu bicapo birhu n’okusalira Yehova abarhabale bahugûkwe oyo muntu n’akanga kage. Bashinganine barhanye kw’ebi balagirireko okumanya lugenda akanga k’oyo muntu n’akalamo kage ka mîra, nkaba byarhumaga arhanya mw’eyo njira erhi okujira ebyo ajiraga.—Mig. 20:5.
7-8. Gurhi abagula bakayigamwo obulembedu bwa Yehova amango barhimanine n’omuntu wajiraga ecaha?
7 Abagula banayige obulembedu bwa Yehova. Banakengere gurhi Yehova akag’ijirira abantu bakag’ijira ebyaha omu mango ga mîra. Kwa lwiganyo, Yehova arhanyize haguma na Kayini omu njira y’obulembedu, amurhonda lugenda amalehe ecaha cakamudwirhire, anamuha obulangalire bw’okugishwa erhi akarhumikire. (Murh. 4:6, 7) Yehova ahanwîre Daudi kugerera omulebi Natani wakolesagya olwiganyo lwahumaga oku murhima gw’oyo mwami. (2 Sam. 12:1-7) Na Yehova agendekire ‘arhumira’ ishanja ly’Abaisraheli lyamugomeraga abalebi bage “burhahusa.” (Yer. 7:24, 25) Arhalindaga abantu bage baciyunjuze embere abarhabale. Lubero n’oko, akag’iba ye murhanzi okubayinginga lyo baciyunjuza.
8 Abagula banakulikire olwiganyo lwa Yehova amango bali bacihangana okurhabala abantu bajijire ecaha cizibu. Nk’oku olwandiko lwa 2 Timoteyo 4:2 luyerekine, banarhanye “omu butûdu [n’obulembedu boshi, NWT]” amango bali bashibirira owabo mwemezi wajijire ecaha cizibu. Co cirhumire, “ensiku zoshi omugula ashinganine abe wa kurhuza na mulembedu ly’arhabala owajiraga ecaha alonze okujira ebishinganine. Erhi omugula akaba burhe erhi kukaliha, oyo muntu nkaba arhankayumvirhiza ihano lyage, erhi kandi analahira okuciyunjuza.”
9-10. Gurhi abagula bakarhabalamwo omunya-byaha arhanye oku mihigo yarhumaga ajira ecaha?
9 Abagula banacihangane okumanya akanga karhumaga omuntu ajira ecaha. Kwa lwiganyo, k’oyo Mukristu azambanyize bunyi-bunyi bulya arhacikag’ishibirira ifunzo lyage yenene erhi omukolo gw’amahubiri? K’arhacikag’isalira Yehova ngasi mango erhi kusalira kurhenga oku murhima? K’alesire enyifinjo mbi zimurhambule? K’arhôzire emihigo erhali ya bwenge lugenda abîra erhi eby’okucishagalusa? Gurhi eyo mihigo yakaba yashumize entanya zage n’enyifinjo zage? K’ahugûsirwe kunganaci ebi acizindig’ijira n’emihigo yage byagayisize Yehova?
10 Abagula banadosa omuntu amadoso g’okumurhabala arhanye oku bintu byazambanyagya obwîra bwage haguma na Yehova n’okurhuma ajira ecaha. Banajire ntyo omu njira y’olukogo. Barhanamudosa lugenda ebintu biyerekire akalamo kage yene barhalagiririko okumanya. (Mig. 20:5) Na kandi, banakolesa enyiganyo lyo barhabala omuntu arhanye n’okubona obubi anajijire, nk’oku Natani ajiraga omu kanga ka Daudi. Nkaba amango barhimanine oburhanzi, omuntu anarhondera aciyumva kubi lugenda enjira mbi al’ikulikire. Nkaba ciru anaciyunjuza.
11. Gurhi Yezu ajirire abanya-byaha?
11 Abagula banacihangane okuyiga olwiganyo lwa Yezu. Amango ashibiriraga Saulu w’e Tarso, Yezu wafûkaga amudosa er’idoso ly’obwenge: “Saulu, Saulu, bici wandibuziza?” Muli ntyo Yezu amurhabala arhanye oku lugenzi lwage lubi. (Ebj. 9:3-6) Na lugenda akanga k’“olya mukazi Yezebeli”, Yezu aderha ntya: “Namuhîre amango nti abê acîyunjuza.”—Maf. 2:20, 21.
12-13. Gurhi abagula bakahâmwo omuntu wajiraga ecaha akasanzi k’okuciyunjuza? (Olole n’enfoto.)
12 Omu kuyiga olwiganyo lwa Yezu, abagula barhalutwa duba-duba oku owajiraga ecaha arhaciyunjuze. Ciru akaba baguma na baguma banaciyunjuza amango g’okurhimanana oburhangiriza n’ekomite, abandi banaba balagirire oku kasanzi kanji. Co cirhumire abagula banarhôla omupango gw’okurhimanana kanji n’owajiraga ecaha. Nkaba enyuma z’okurhimanana oburhangiriza, Omukristu wajiraga ecaha anarhondera arhanya buzibu-zibu kw’ebi bamubwiraga. Nkaba anayerekana obwirhohye n’okuhûna Yehova amubabalire. (Enna. 32:5; 38:18) Muli ntyo, amango bamacib’irhimanana naye, nkaba oyo munya-byaha anaba n’entanya ziri lubero n’ezi ayerekanaga erhi barhimanana naye oburhangiriza.
13 Lyo barhabala omunya-byaha aciyunjuze, abagula banayerekane obwonjo n’olukogo. Banashenge Yehova ly’agisha obushiru bwabo, bananabe balangalire oku oyo Mukristu agalukirwa n’obukengere anaciyunjuze.—2 Tm. 2:25, 26.
Abagula banarhimanana kanji n’owajiraga ecaha lyo bamuha akasanzi k’okuciyunjuza (Olole ecifungo ca 12)
14. Erhi omunya-byaha aciyunjuza, ndi oshinganine ahâbwe irenge, na bulya gurhi?
14 Erhi omunya-byaha akaciyunjuza, oko kunalerhe mwishingo munji! (Lk. 15:7, 10) Ndi oshinganine ahâbwe irenge? Ka bagula? Okengere ebi Paolo adesire lugenda abanya-byaha, ayandisire ntya: “Kwankanaba Nyamuzinda abaha okuciyunjuza.” (2 Tm. 2:25) “Co cirhumire Yehova ye rhabala Omukristu ashanje entanya zage, c’arhali mwene muntu yeshi-yeshi. Paolo ahugwîre ebintu binja biba enyuma z’omuntu okuciyunjuza. Oyo muntu anaba na bumanye bunji burhagwerhi magosa bw’okuli, anagalukirwa n’obukengere, n’okucilikuza omu mirhego ya Shetani.—2 Tm. 2:26.”
15. Gurhi abagula bakagendekera barhabala omuntu wajiraga ecaha ociyunjuzize?
15 Amango omuntu wajiraga ecaha amaciyunjuza, ekomite eshinganine erhôle emipango y’okukalambagirirwa n’abagula ly’agendekera ahâbwa oburhabale alagirireko, ly’agendekera ahagalika emirhego ya Shetani n’okukubûla enjira zage. (Hb. 12:12, 13) Okuderha okuli, abagula barhabwira omuntu yeshi-yeshi lugenda ebi omunya-byaha ajijire. Cikone, bicigi ecigamba cakamanyisibwa?
“OKABAKALIHIRA EMALANGA G’ABANTU BOSHI”
16. Kushimbana na 1 Timoteyo 5:20, Mashi Bible, “abantu boshi” Paolo aganiriraga bo bahi?
16 Osome 1 Timoteyo 5:20, Mashi Bible. Paolo ayandikire owabo mugula Timoteyo ezo nderho lugenda enjira y’okushibiriramwo “abajira ebyaha.” Bici al’ilonzize okuderha? K’al’ilonzize okuderha oku ecigamba coshi bo ‘bantu boshi?’ Arhali bujayo. Lubero n’oko, akag’iganirira abantu basungunu bakaba bakola bamanyire lugenda ebyaha byajijirwe. Banaba bantu baciboneraga bone erhi ecaha cijirwa, erhi banaba bantu oyo wajiraga ecaha aganiriraga lugenda ecaha cage. Abagula banamanyisa abo bantu bufunda-funda oku bashibirire ako kanga, n’oku oyo munya-byaha arhabirwe.
17. Erhi ecaha cizibu cakaba cimanyikine bwenene omu cigamba erhi bibonekane oku camanyikana, itangazo lihi lyakajirwa, na bulya gurhi?
17 Omu kanga kalebe, ecaha cajiragwa byanahashikana cibe camanyikine bwenene omu cigamba erhi bibonekane oku camanyikana. Omu kanga ka ntyo, “abantu boshi” canaba cigamba coshi. Muli ntyo, mugula muguma anageza itangazo omu cigamba oku mwene wirhu erhi mwali wirhu anakalihirwe. Bulya gurhi? Paolo ashuzize ntya: “Lyo abandi nabo bayoboha” okujira ecaha.
18. Gurhi abagula bashinganine bashibirire akanga k’omwana mubatize orhaciyeneza myaka 18 wajijire ecaha cizibu? (Olole n’enfoto.)
18 Gurhigi erhi omwana mubatize orhaciyeneza myaka 18 akajira ecaha cizibu? Embaraza y’abagula eshinganine erhôle emipango lyo bagula babirhi barhimanana n’oyo mwana haguma n’ababusi bage Bakristu bombi erhi muguma mulibo. b Abagula bashinganine balonze okumanya ebi ababusi bamakajira lyo barhabala omwana wabo aciyunjuze. Erhi akaba omwana ayumvirhe amahano g’ababusi anali ajira empindûlo omu ntanya zage n’omu lugenzi lwage, abo bagula babirhi banahiga oku kurhaciri kwa bulagirire arhimanane n’ekomite y’abagula ye haguma n’ababusi bage. Okuderha okuli, okukubûla abana omu njira y’obuzigire guba mukolo Mungu ahîre ababusi. (Lush. 6:6, 7; Mig. 6:20; 22:6; Ef. 6:2-4) Enyuma z’aho, abagula bashinganine bakaganira n’ababusi mango oku gandi, lyo bamanya erhi kobinali oyo mwana ali ahâbwa oburhabale alagirireko. Cikone gurhigi erhi omwana mubatize orhaciyeneza myaka 18 akabula bwaciyunjuza anagendekere omu lugenzi lubi? Mw’ako kanga, ekomite y’abagula eshinganine erhimanane n’oyo mwana haguma n’ababusi bage Bakristu.
Erhi omwana orhaciyeneza myaka 18 akajira ecaha cizibu, bagula babirhi bashinganine barhimanane naye haguma n’ababusi bage Bakristu (Olole ecifungo ca 18)
“NYAKASANE [YEHOVA, NWT] ABA WA LUKOGO NA WA BWONJO BUNJI”
19. Gurhi abagula bacihanganamwo okuyiga olwiganyo lwa Yehova amango bali bashibirira omuntu wajijire ecaha cizibu?
19 Abagula bakola omu komite bajira omukolo embere za Yehova gw’okulanga ecigamba lyo cigendekera caba cicîre. (1 Kr. 5:7) Kandi banajire okwabo koshi lyo barhabala abajijire ecaha baciyunjuze amango bihashikine. N’amango bali barhabala omuntu, banagendekere balangalira oku ashanja. Bulya gurhi? Bulya baba balonzize bayige olwiganyo lwa Yehova oba “wa lukogo na wa bwonjo bunji.” (Yk. 5:11) Olole gurhi entumwa Yowane yal’ikola eshosihire yayerekinemwo ntyo. Ayandisire ntya: “Bana bâni, mmuyandikîre ebi nti lyo murhag’ijira ebyaha. Cikwone erhi hankajira owajira ecaha, rhugwerhe omubulanyi [erhi, murhabazi] oba ho Larha, oyo mubulanyi ye Yezu Kristu mushinganyanya.”—1 Yn. 2:1, Mashi Bible.
20. Bici rhwaganirira omu cigabi cizinda c’ogu mwanzi gugwerhe bigabi binji?
20 Eby’okugayisa, kuli kubona oku hali amango Omukristu wajijire ecaha alahira okuciyunjuza. Erhi byakaba ntyo, agwasirwe arhenzibwe omu cigamba. Gurhi abagula bashibiriramwo akanga kazibu ka ntyo? Rhwaganirira oko omu cigabi cizinda c’ogu mwanzi gugwerhe bigabi binji.
LWIMBO 103 Yehova Arhuhîre Balungere
a Embere ebyo bigusho byakag’ihamagalwa komite z’obuhane. Cikone bulya obuhane ciri cigabi ciguma cone c’omukolo gwabo, rhurhakacikolesa olo luderho. Ahali h’oko, rhukola rhwakahamagala eco cigusho komite y’abagula.
b Ebidesirwe lugenda ababusi kandi biyerekire nʼabalezi bʼabana bayemerirwe na leta erhi abandi bantu bashibirira abana barhaciyeneza myaka 18 ahali hʼababusi babo.
