ECIGABI C’OKUYIGA CA 33
LWIMBO 130 Rhukababalirana
Oku Ecigamba Ciyerekanamwo Entanya za Yehova Lugenda Abanya-Byaha
“Erhi hankajira owajira ecaha, rhugwerhe omubulanyi [murhabazi].”—1 YN. 2:1, Mashi Bible.
EBI ECI CIGABI CISEGIZE
Rhwayiga amasomo g’obulagirire kugerera oku akanga k’ecaha cizibu kashibiriragwamwo omu cigamba c’e Korinti c’omu myaka igana mirhanzi.
1. Bici Yehova aba alongize abantu boshi?
YEHOVA alemire bene-bantu n’oluhuma lw’okucishoga. Rhunakolese eyo ngalo ngasi mango erhi rhurhôla emihigo. Omuhigo gw’obulagirire bwenene ngasi muntu akarhôla guba gwa kucihâna emwa Yehova n’okuja omu mulala gw’abakozi bage. Yehova aba alonzize ngasi muntu ajire ntyo. Bulya gurhi? Bulya aba azigire abantu anaba abalongize aminja. Aba alonzize babe n’obwîra haguma naye banalame ensiku n’amango.—Lush. 30:19, 20; Gl. 6:7, 8.
2. Bici Yehova aba alonzize lugenda abantu bajijire ecaha barhaciciyunjuza? (1 Yowane 2:1, Mashi Bible)
2 Ciru akaba ntyo, nta muntu Yehova aseza amukolere. Analeke ngasi muntu ahige ebi ajira. Gurhigi byakaba erhi Omukristu mubatize akavuna irhegeko lya Mungu n’okujira ecaha cizibu? Erhi akaba arhaciyunjuzizi, agwasirwe arhenzibwe omu cigamba. (1 Kr. 5:13) Cikone, ciru omuntu akarhenzibwa omu cigamba, kobinali Yehova aba alonzize oyo muntu aciyunjuze n’okucib’iba n’obwîra bwa hofi-hofi haguma naye. Kobinali, eco co cirhumire c’obulagirire carhumaga ahâna engombôlo: ayihânyire ly’ahashisa okubabalira abanya-byaha baciyunjuzize. (Osome 1 Yowane 2:1, Mashi Bible.) Yehova aba Mungu w’obuzigire oyinginga abajijire ebyaha bizibu baciyunjuze.—Zak. 1:3; Rm. 2:4; Yk. 4:8.
3. Bici rhwaganirira mw’eci cigabi?
3 Yehova aba alonzize rhube n’entanya ziri nk’ezage lugenda ecaha n’abajijire ecaha. Eci cigabi caganirira oku rhwakajiramwo ntyo. Amango oli wasoma eci cigabi, olole (1) oku akanga k’ecaha cizibu kashibiriragwamwo omu cigamba c’e Korinti c’omu myaka igana mirhanzi, (2) bulongozi buhi entumwa Paolo yahânyire erhi omuntu wajiraga ecaha aciyunjuza, na (3) ebi ogo mwanzi gw’Ebibliya guyerekine lugenda entanya za Yehova kuyerekera Abakristu bajijire ecaha cizibu.
OKU AKANGA K’ECAHA CIZIBU KASHIBIRIRAGWAMWO OMU MYAKA IGANA MIRHANZI
4. Kanga kahi kali omu cigamba c’e Korinti c’omu myaka igana mirhanzi? (1 Abakorinti 5:1, 2)
4 Osome 1 Abakorinti 5:1, 2. Erhi Paolo ali omu mubalamo gwage gwa kasharhu gw’obumisiyonere, ayumva omwanzi lugenda akantu kabi bwenene kakag’ijirikana omu cigamba cihyahya c’e Korinti. Mwene wirhu muguma wa mw’eco cigamba akag’ijira obuhushi haguma na muk’ishe. Olugenzi lwa ntyo lwali lwa kugayisa bwenene byanali bintu ciru “birhajirwa omu bapagani”! Ecigamba cal’ilekerire olo lugenzi na ciru nkaba cakag’icidinira okujira ntyo. Nkaba baguma na baguma bakag’irhanya oku oko kwal’iyerekine kunganaci Mungu aba wa bwonjo na kunganaci aba ahugûsirwe akanga ka bene-bantu barhali bimana. Cikone Yehova arhaba ayemire olugenzi lubi egarhi k’abantu bage. Enyanya z’olugenzi lwa bacikala-nshonyi oyo mulume agwerhe, akag’ishereza irenge linja ly’ecigamba. Kandi abandi Bakristu bakag’icilunga haguma naye nkaba bakag’iyahukirwa n’olo lugenzi lwage. Muli ntyo, bicigi Paolo arhegesire ecigamba cijire?
5. Bici Paolo abwizire ecigamba cijire, na bici oko kwal’ihugwîre? (1 Abakorinti 5:13) (Olole n’enfoto.)
5 Osome 1 Abakorinti 5:13. Omu kulongozibwa n’iroho litagatifu, Paolo ayandika amaruba garhegekaga oku oyo munya-byaha orhaciyunjuzizi arhenzibwe omu cigamba. Gurhi Abakristu bishwekerezi bal’ishinganine bamujirire? Paolo ababwira oku ‘bamanye bankakômera’ oyo muntu. Bici oko kwal’ihugwîre? Paolo ahugûla oku ery’irhegeko lyalihiziremwo ciru ‘okurhalîra haguma naye.’ (1 Kr. 5:11) Okushangira ebiryo haguma na muntu mulebe kwanarhuma kwaba kulembu okukomerana naye bwenene. Muli ntyo, bibonekine n’obwalagale oku Paolo ahugwîre oku ecigamba cirhal’ishinganine cikacilunga haguma n’oyo muntu. Oko kwakalanzire ecigamba lyo cirhag’iyahukirwa n’olo lugenzi lubi. (1 Kr. 5:5-7) Na kandi, okurhakomerana bwenene n’oyo muntu nkaba kwakarhumire ahugûkwa kunganaci agomire Yehova na kandi nkaba kwakarhumire ayumva enshonyi n’okushumibwa aciyunjuze.
Omu kulongozibwa n’iroho lya Mungu, Paolo ayandisire amaruba garhegekaga oku omunya-byaha orhal’iciyunjuzize arhenzibwe omu cigamba (Olole ecifungo ca 5)
6. Gurhi ecigamba cajijire enyuma z’okuyankirira amaruba ga Paolo, na gurhi omulume wakag’ijira ecaha ajijire?
6 Enyuma z’okurhumira Abakristu b’e Korinti amaruba gage, Paolo arhondera acidosa gurhi ecigamba cakajijire lugenda ago maruba. Enyuma z’aho, Tito alerha omwanzi gwashagalusagya Paolo. Ecigamba cayankirire bwinja amaruba ga Paolo. (2 Kr. 7:6, 7) Barhumikire obulongozi abahâga. Na kandi, kasanzi kasungunu enyuma za Paolo okurhuma ago maruba, oyo munya-byaha aciyunjuza olo lugenzi lwage lubi! Ali amashanja olugenzi lwage n’entanya zage anarhondera akulikira amakanuni mashinganyanya ga Yehova. (2 Kr. 7:8-11) Bicigi Paolo abwizire ecigamba cijire?
OKU ECIGAMBA CAL’IGWASIRWE CIJIRIRE OYO MUNYA-BYAHA WACIYUNJUZAGYA
7. Okurhenza omunya-byaha omu cigamba, malehe gahi minja kwadwirhe? (2 Abakorinti 2:5-8)
7 Osome 2 Abakorinti 2:5-8. Paolo aderha oku “burhali bahane bunyi obwo kuli oyo muntu wahanyirwe na banji.” Kuli kuderha oku obo buhane bwahikirizize omuhigo gwabo kuli oyo muntu. Muhigo guhi? Kumurhabala aciyunjuze.—Hb. 12:11.
8. Bindi bici Paolo abwizire ecigamba cijire?
8 Muli ntyo, Paolo arhegeka ecigamba ntya: “Mumubabalirage erhikwo munamuhire omurhima omu nda,” “muyerekane obuzigire kuli ye.” Obwine oku Paolo al’ilonzize ecigamba cijire binji ahanyuma n’okuyemera kone oyo mulume agaluke egarhi k’abantu ba Yehova. Paolo al’ilonzize bayemeze oyo mulume waciyunjuzagya kugerera enderho zabo n’ebijiro byabo oku kobinali bamubabalire n’oku kobinali bal’imuzigire. Omu kujira ntyo, bakayerekine n’obwalagale oku bashagalukire okugaluka kwage omu cigamba.
9. Bulya gurhi nkaba bantu baguma na baguma barhindiraga okubabalira oyo munya-byaha waciyunjuzagya?
9 Ka bantu baguma na baguma ba mw’eco cigamba barhindire okuyegereza oyo munya-byaha waciyunjuzagya egarhi kabo? Ogo mwanzi gurharhubwiziri, cikone byanahashikana. Kobinali, ebijiro byage byadwirhire ecigamba coshi amazibu na kandi nkaba hali abakag’iyumva enshonyi enyanya z’ebyo bijiro. Abantu b’omu cigamba bakag’ijira okwabo koshi lyo barhumikira amarhegeko ga Yehova. Co cirhumire, nkaba baguma na baguma bakag’iciyumva oku kurhashinganini omuntu wajijire ecaha cizibu ntyo ayemererwe okugaluka omu cigamba. (Oshushanye na Luka 15:28-30.) Bulya gurhigi kwali kwa bulagirire oku cigamba okuyeresa oyo mwene wabo wagalukaga obuzigire bw’okunali?
10-11. Gurhi byakabire erhi abagula bakalahire okubabalira oyo munya-byaha waciyunjuzagya?
10 Orhanye ebyakabire erhi abagula bakalahire okuyemerera oyo mulume wal’iciyunjuzize okunali okugaluka omu cigamba, kandi erhi ecigamba cakalahire okumuyeresa obuzigire enyuma z’okugaluka kwage. Akagogomirwe n’‘oburhe bulushire olugero.’ Kwakabire kulembu kuli ye okuciyumva oku nta bulangalire acigwerhe omu kanga kage. Nkaba ciru akalesire okujira obushiru ly’acib’iba n’obwîra bwinja haguma na Mungu.
11 N’akantu kabi ciru bwenene, erhi bene wirhu na bali birhu b’omu cigamba bakalahire okubabalira oyo munya-byaha wal’iciyunjuzize, nabo bakahizire obwîra bwabo haguma na Yehova omu mazibu. Bulya gurhi? Bulya barhakabire bali bayerekana entanya za Yehova lugenda abanya-byaha baciyunjuzize, cikone bakabire bali bayiga olwiganyo lwa Shetani, oba mukali orhanajira bwonjo. Muli ntyo, bakabire bikolanwa Shetani akakolesize ly’ashereza ehali y’ekiroho y’oyo mulume.—2 Kr. 2:10, 11; Ef. 4:27.
12. Gurhi ecigamba cakayiziremwo olwiganyo lwa Yehova?
12 Gurhigi ecigamba c’omu Korinti cakayiziremwo olwiganyo lwa Yehova, ahali h’okuyiga olwa Shetani? Omu kujirira abanya-byaha baciyunjuzize nk’oku Yehova abajirira. Olole ebi bandisi b’Ebibliya baguma na baguma badesire lugenda Yehova. Daudi adesire ntya: ‘Oba mwinja Muhanyi, oba mubidu w’okubabalira.’ (Enna. 86:5, Mashi Bible) Mikeyo ayandisire ntya: “Ndi wundi Nyamuzinda akâwe, obabalira amabî, ozaza ecaha?” (Mik. 7:18) Na Izaya adesire ntya: “Omubi aleke okwage, na nyakola-maligo akabulire enkengêro zage, agaluke emwa Nyakasane [Yehova, NWT], naye amubabalira, agaluke emwa Nyamuzinda wirhu, bulya aba wa bwonjo bunji.”—Iz. 55:7.
13. Bulya gurhi kwal’ishinganine okugalula omu cigamba oyo munya-byaha waciyunjuzagya? (Olole ecisanduku cidesire “ Kasanzi Kanganaci Kagezire Embere Omulume w’omu Korinti Agalulwe omu Cigamba?”)
13 Lyo bene wirhu na bali birhi b’omu cigamba c’e Korinti bayiga olwiganyo lwa Yehova, bal’igwasirwe bayegereze oyo mulume waciyunjuzagya wagalukaga omu cigamba n’okumuyemeza n’obwalagale oku bamuzigire. Omu kurhumikira obulongozi bwa Paolo bw’okuyegereza oyo munya-byaha waciyunjuzagya, bene wirhu na bali birhu omu cigamba bayerekine oku ‘obumvi bwabo burhali bwa bihimbi.’ (2 Kr. 2:9) Kobinali, myezi yone yagezire kurhenga arhenzibagwa omu cigamba, cikone obo buhane bwamurhabire aciyunjuze. Muli ntyo, abagula barhal’igwerhe ecirhumire c’okulinda kasanzi kanji kagere embere bamugalule omu cigamba.
OKU RHWAKAYIGAMWO OBUSHINGANYANYA BWA YEHOVA N’OBWONJO BWAGE
14-15. Bici oku akanga k’ecaha cizibu omu cigamba c’e Korinti ya mîra kashibiriragwamwo kurhuyigirizize? (2 Petro 3:9) (Olole n’enfoto.)
14 Omwanzi lugenda oku akanga k’ecaha cizibu omu cigamba c’omu Korinti ya mîra kashibiriragwamwo gwayandisirwe n’okulangwa lyo guba “nyigirizo zirhu.” (Rm. 15:4) Ogo mwanzi gurhuyigirizize oku Yehova arhalekerera ecaha cizibu egarhi k’abantu bage. Baguma na baguma banarhanya oku bulya Yehova aba wa bwonjo, analeka omuntu orhaciyunjuzizi abêre omu cigamba, cikone arhali ntyo ko Yehova ayerekanamwo obwonjo bwage. Yehova aba wa bwonjo, cikone arhalekerera olugenzi lubi; amakanuni gage lugenda aminja n’amabi garhashanja. (Yd. 4) Kobinali, okulekerera olugenzi lubi kurhakaba kuyerekana obwonjo ciru n’ehitya, bulya kwanalerhera ecigamba coshi amazibu.—Mig. 13:20; 1 Kr. 15:33.
15 Ciru akaba ntyo, rhuyizire oku Yehova arhalonza omuntu ciru n’omuguma asherezibwe. Aba alonzize acungule abantu amango bihashikine. Abantu bahindula omurhima gwabo banalonza okushub’iba n’obwîra bwinja haguma naye, Yehova anabayerese obwonjo. (Eze. 33:11; osome 2 Petro 3:9.) Co cirhumire, erhi oyo mulume w’omu Korinti aciyunjuza n’okuleka olugenzi lwage lubi, Yehova akolesa Paolo ly’ahugûlira ecigamba oku oyo mulume al’ishinganine ababalirwe n’okuyegerezibwa.
Omu kuyerekana obuzigire n’obwonjo bwa Yehova, ecigamba cinayegereze n’obushagaluke abagalwirwemwo (Olole ecifungo ca 14-15)
16. Gurhi ociyumvirhe lugenda oku akanga k’ecaha omu Korinti kashibiriragwamwo?
16 Okuganirira oku akanga k’ecaha kashibiriragwamwo omu Korinti kwarhurhabire rhubone oku Yehova aba wa buzigire anaba mushinganyanya. (Enna. 33:5) K’oko kurhakushumizi okuze Mungu wirhu ciru bwenene? Rhuvuzire omunkwa bwenene okubona aba wa bwonjo bulya rhweshi rhuba banya-byaha rhunaba rhulagirire oku kubabalirwa. Ngasi muguma wirhu agwerhe ecirhumire c’okuvuga Yehova omunkwa oku ngombôlo, erhuma byahashikana rhubabalirwe. Biri bya kurhuliriza bwenene okumanya oku Yehova aba azigire abantu bage kobinali n’oku anabalongeze aminja!
17. Bici rhwaganirira omu bigabi bikulikire?
17 Gurhigi lugenda oku ebyaha bishibirirwamwo ene? Gurhi abagula bayerekanamwo irala Yehova ajira ly’okurhabala omunya-byaha aciyunjuze? Gurhi abantu b’omu cigamba bashinganine bajire erhi abagula bakahiga okurhenza muntu mulebe omu cigamba erhi okumugalulamwo? Ago madoso gaganirirwa omu bigabi bikulikire.
LWIMBO 109 Rhuzigirane Kurhenga oku Murhima
