ECIGABI C’OKUYIGA CA 32
LWIMBO 44 Isala ly’Ovunisire Omurhima
Yehova Alonzize Abantu Boshi Baciyunjuze
“Nyakasane [Yehova, NWT] . . . arhalonza hajire owahera, ci alonza boshi baciyunjuze.”—2 PT. 3:9.
EBI ECI CIGABI CISEGIZE
Carhurhabala rhuhugûkwe okuciyunjuza ko kuderha gurhi, bulya gurhi kuli kwa bulagirire, na gurhi Yehova arhabiremwo abantu ba ngasi lubero lyo baciyunjuza.
1. Bici okuciyunjuza kuhiziremwo?
ERHI rhujira kantu kalebe kabi, kuba kwa bulagirire bwenene rhuciyunjuze. Ebibliya eyerekine oku omuntu ociyunjuzize anashanje entanya zage lugenda lugenzi lulebe, analeke okucigendesa omu njira ya ntyo, ananahige okurhacigalukira olo lugenzi.—Mt. 3:8; Ebj. 3:19; 2 Pt. 3:9.
2. Bulya gurhi rhweshi rhushinganine rhuyige lugenda okuciyunjuza? (Nehemiya 8:9-11)
2 Ngasi muntu ozine ashinganine ayige lugenda okuciyunjuza. Bulya gurhi? Bulya rhweshi rhunajire ecaha ngasi lusiku. Bulya rhweshi rhuba bana ba Adamu na Eva, ngasi muguma wirhu ayimire omu caha n’omu lufû. (Rm. 3:23; 5:12) Nta muntu ciru n’omuguma orhabiyimagamwo. Ciru n’abalume b’obuyemere bwago-bwago, ak’entumwa Paolo, bakag’ilwisa ecaha. (Rm. 7:21-24) K’oko kuli kuderha oku rhushinganine rhubabale ensiku zoshi enyanya z’ebyaha birhu? Nanga, Yehova aba wa bwonjo, anaba alonzize rhube n’omwishingo. Orhanye lugenda ebyahikiraga Abayahudi omu mango ga Nehemiya. (Osome Nehemiya 8:9-11.) Yehova arhal’ilonzize bababale bwenene enyanya z’ebyaha byabo bajiraga mîra, cikone al’ilonzize bamuharamye n’omwishingo. Yehova aba amanyire oku okuciyunjuza kunalerhe omwishingo. Co cirhumire arhuyigirizize lugenda okuciyunjuza. Erhi rhwakaciyunjuza ebyaha birhu, rhwanayemera n’obwalagale oku Larha wirhu w’obwonjo arhubabalira.
3. Bici rhwaganirira mw’eci cigabi?
3 Lekagi rhuyige binji lugenda okuciyunjuza. Mw’eci cigabi, rhwaganirira bintu bisharhu lugenda okuciyunjuza. Burhangiriza, rhwayiga ebi Yehova ayigirizize Abaisraheli lugenda okuciyunjuza. Enyuma z’aho, rhwayiga lugenda oku Yehova arhabalamwo abanya-byaha lyo baciyunjuza. Buzinda, rhwaganirira ebi abanafunzi ba Yezu bayizire lugenda okuciyunjuza.
EBI YEHOVA AYIGIRIZIZE ABAISRAHELI LUGENDA OKUCIYUNJUZA
4. Bici Yehova ayigirizize ishanja ly’Abaisraheli lugenda okuciyunjuza?
4 Erhi Yehova apanga Abaisraheli lyo baba ishanja, ajira endagano haguma nabo banayiyemera. Bacigendekerage bakenga amarhegeko gage, akabalanzire n’okubagisha. Lugenda ago marhegeko, abayemeza ntya: “Okukenga aga marhegeko, kurhankamuyabira, bulya garhamuli kuli.” (Lush. 30:11, 16, Mashi Bible) Cikone bacimugomerage, kwa lwiganyo omu kucishoga okuharamya abandi bamungu, akabayimire emigisho yage, na ntyo bakalibusire. Cikone oko kurhali kuderha oku Yehova akabakabulire loshi-loshi. ‘Bakagalusire bashubîrire Nyamubaho, Nyamuzinda wabo, n’okuyumvirhiza izu lyage.’ (Lush. 30:1-3, 17-20) Kuli kuderha oku bakaciyunjuzize. Erhi bakajijire ntyo, Yehova akabayegerire n’okucib’ibagisha.
5. Gurhi Yehova ayerekinemwo oku arhalekaga abantu bage? (2 Abami 17:13, 14)
5 Abantu bishogwa ba Yehova bamugomire kanji-kanji. Ahanyuma n’okuharamya ensalamu, bajijire n’ebindi bintu bibi bwenene. Enyanya z’oko, balibuka. Cikone Yehova arhalekaga abantu bage bamugomeraga. Arhuma abalebi kanji-kanji lyo bayinginga abantu bage baciyunjuze banamugalukire.—Osome 2 Abami 17:13, 14.
6. Gurhi Yehova akolesizemwo abalebi bage ly’ayigiriza abantu bage lugenda obulagirire bw’okuciyunjuza? (Olole n’enfoto.)
6 Yehova akolesize kanji-kanji abalebi lyo barhonda n’okuhanûla abantu bage bakag’imugomera. Kwa lwiganyo, kugerera Yeremiya, Mungu aderha ntya: “Galuka wani Israheli w’omugoma, . . . Ntakacikulola n’obusu bukali, bulya ndi wa lukogo, . . . Ntabîka mungo gwa nsiku n’amango. Oyemêre kwone obubi bwawe: wagomîre Nyakasane Nyamuzinda wawe.” (Yer. 3:12, 13) Kugerera Yoweli, Yehova aderha ntya: “Ngalukiri n’omurhima gwinyu gwoshi.” (Yow. 2:12, 13, Mashi Bible) Adesire ntya kugerera Izaya: “Mucicêse! Murhenze obubi bw’ebijiro binyu omu masu gani! Muleke okukâkola amabi.” (Iz. 1:16-19) Na kugerera Ezekiyeli, Yehova aderha ntya: “Ka nakasima omubi afe, . . . kali nsima aleke olugendo lwage lubi, alame. Ntakwirirwa olufu lw’omuntu, . . . Mugomoke, mwalama.” (Eze. 18:23, 32) Yehova anashagaluke erhi abona abantu baciyunjuza bulya aba alonzize balame ensiku n’amango! Co cirhumire, Yehova arhalinda kone buzira kujira kantu koshi-koshi oku abanya-byaha bashanja embere abahe oburhabale. Lekagi rhubone nyiganyo ndebe ziyerekine ntyo.
Yehova akolesize kanji-kanji abalebi ly’ayinginga abantu bage bakag’imugomera baciyunjuze (Olole ecifungo ca 6-7)
7. Bici Yehova ayigirizize abantu bage kugerera omwanzi guganirire Hozeya na mukage?
7 Olole ebi Yehova ayigirizize abantu bage kugerera olwiganyo lw’omuntu wal’ilamire kobinali, kuli kuderha olwiganyo lwa Gomeri, muka omulebi Hozeya. Enyuma z’okujira obuhushi, aleka Hozeya ashimba abandi balume. Ka birhankacihashikine ashanje? Yehova ojira obuhashe bw’okusoma emirhima, abwira Hozeya ntya: “Genda kandi, ozigire omukazi ozigirwa n’iba n’obwo eri mbaraga, nka kula niono Nyakasane [Yehova, NWT] nzigira bene Israheli n’obwo bàshizire abandi bandi banyamuzinda.” (Hoz. 3:1; Mig. 16:2) Obwine oku muka Hozeya acikag’ijira ecaha cizibu. Cikone, Yehova abwira Hozeya ajimulonza, amubabalire anashub’iyumvikana naye. a Ko n’oko, Yehova arhalekaga abantu bage bali ba cikanyi cirhagomba. Ciru akaba bakag’ijira ebyaha bizibu bwenene, agendekire abazigira anagendekera acihangana okubarhabala lyo baciyunjuza n’okushanja enjira zabo. K’olo lwiganyo luyerekine oku, bulya “emirhima yohe Nyakasane [Yehova, NWT] oyirhangula” agendekera acihangana okurhabala omuntu ocigendekire ajira ecaha cizibu ly’aciyunjuza? (Mig. 17:3) Leki rhulole.
OKU YEHOVA ARHABALAMWO ABANYA-BYAHA LYO BACIYUNJUZA
8. Gurhi Yehova arhabiremwo Kayini ly’aciyunjuza? (Omurhondêro 4:3-7) (Olole n’enfoto.)
8 Kayini yo yali nfula ya Adamu na Eva. Ayimire omw’irala ly’okujira ecaha kurhenga oku babusi bage. Kandi, Ebibliya edesire ntya okubimuyerekire: “Ebijiro byage byâli bibi.” (1 Yn. 3:12) Nkaba oko ko kwarhumire Yehova ‘arhasîma Kayini n’enterekêro yage.’ Ahali h’okujira empindûlo, “Kayini agaya bwenene, obusu bwage bwazinzibala.” Bici Yehova ajijire enyuma z’aho? Aganiza Kayini. (Osome Omurhondêro 4:3-7.) Obwine oku Yehova arhanyize omu njira y’olukogo haguma na Kayini, amuha obulangalire anamurhonda lugenda omurhego alimwo gw’okujira ecaha. Eby’okugayisa, Kayini arhayemeraga ebi Yehova amubwiraga. Arhalekaga Yehova amurhabale ly’aciyunjuza. Enyuma za Kayini okulahira okujira ebi Yehova amubwiraga, ka Yehova alesire okugendekera arhabala abandi banya-byaha lyo baciyunjuza? Nanga ciru n’ehitya!
Yehova arhanya haguma na Kayini omu njira y’olukogo, amuha obulangalire, anamurhonda lugenda amazibu g’ecaha akahikire okujira (Olole ecifungo ca 8)
9. Gurhi Yehova arhabiremwo Daudi ly’aciyunjuza?
9 Yehova al’izigire Mwami Daudi bwenene. Ciru amuhamagire “muntu w’omurhima gwani.” (Ebj. 13:22) Cikone Daudi ahikire aha ajira ebyaha bizibu, bihiziremwo obuhushi n’obunizi. Kushimbana n’Irhegeko lya Musa, Daudi al’ishinganine anigwe. (Lev. 20:10; Mib. 35:31) Cikone, Yehova al’ilonzize arhabale Daudi ly’aciyunjuza. b Ciru akaba Mwami Daudi arhal’icihungama ecaha cage n’okuciyunjuza, Yehova arhuma omulebi Natani amulambagirire. Natani okolesa olwiganyo lwanahuma Daudi oku murhima. Daudi ahugûkwa oku anagokize Yehova bwenene anaciyunjuza. (2 Sam. 12:1-14) Ayandisire olulanga lw’okuhuma oku murhima bwenene luyerekine okuciyunjuza kwage. (Enna. 51, enshokolezi) Olo lulanga lwarhulirizize banya-byaha banji lwanabashumize baciyunjuze. Ka rhurhashagalusiri okubona Yehova arhabire omu njira y’obuzigire omukozi wage muzigirwa Daudi ly’aciyunjuza?
10. Gurhi ociyumvirhe lugenda obulembedu bwa Yehova n’okubabalira kwage bene bantu banya-byaha?
10 Yehova aba ashombire ecaha, na nta caha coshi-coshi alekerera. (Enna. 5:4, 5) Cikone amanyire oku rhweshi rhuba banya-byaha, n’enyanya z’obuzigire bwage kuli rhwe, anacishoge okurhurhabala lyo rhulwisa ecaha. Ensiku zoshi, anacihangane okurhabala ciru n’abantu bashayire omu byaha bwenene lyo baciyunjuza n’okumuyegera. Kobinali okumanya ntyo kurhurhulirizize bwenene! Erhi rhurhanya oku bulembedu bwa Yehova n’okubabalira kwage, rhunahige okubêra bishwekerezi kuli ye n’okuba babidu okuciyunjuza erhi rhwakajira ecaha. Lekagi rhulole ebi Yezu ayigirizize abanafunzi bage lugenda okuciyunjuza.
EBI ABANAFUNZI BA YEZU BAYIZIRE LUGENDA OKUCIYUNJUZA
11-12. Bici Yezu ayigirizize abumvirhiza bage lugenda obulonza bw’Ishe bw’okubabalira? (Olole enfoto .)
11 Omu kagana karhanzi Kano Kasanzi Kirhu (K.K.K.), akasanzi k’okuyisha kwa Masiya kahika. Nk’oku rhwabonaga omu cigabi c’embere, Yehova akolesa Yowane Mubatiza na Yezu Kristu ly’ayigiriza abantu lugenda obulagirire bw’okuciyunjuza.—Mt. 3:1, 2; 4:17.
12 Omu mukolo gwage gw’amahubiri, Yezu ayigirizize abumvirhiza bage lugenda obulonza bw’Ishe bw’okubabalira. Yezu ajijire ntyo erhi aganirira olwiganyo lw’omwana mulalahi. Ogo musole gwacishoga okulama akalamo k’okujira ebyaha omu mango malebe g’akalamo kago. Cikone enyuma za kasanzi kalebe, oyo murhabana “acijamwo [agalukirwa n’obukengere, NWT]” anagaluka emwabo. Gurhi ishe ajijire? Yezu adesire oku erhi oyo murhabana “aba aciri kuli, ishe amulangira, ayumva obwonjo bwamugwarha; anaciyisha ali bulibirha, amuyababira, amuhobera.” Oyo murhabana al’ilonzize okuhûna ishe amujire muguma w’omu bakozi bage, cikone ishe amuhamagala “oyu mwana wani” anashub’imugalula omu mulala. Ishe aderha erhi: “Âli ahezire, lero anabonesire!” (Lk. 15:11-32) Amango Yezu al’ilamire empingu embere ayishe hano igulu, kobinali acibwinire Ishe ali ayereka bantu banji baciyunjuzagya obwonjo bwa ntyo. Ogu mwanzi Yezu arhuganirire, kobinali guli gwa kurhuliriza gunayerekine kunganaci Larha wirhu, Yehova, aba wa bwonjo!
Omu lwiganyo Yezu ahânaga lw’omwana mulalahi, ishe w’oyo mwana alibirhire emunda omugala wamugomeraga ali ly’amuhobera erhi agaluka aha kâ (Olole ecifungo ca 11-12)
13-14. Bici entumwa Petro yayizire lugenda okuciyunjuza, na bici yayigirizize abandi lugenda oko? (Olole n’enfoto.)
13 Kugerera Yezu, entumwa Petro yayizire amasomo g’obulagirire bwenene lugenda okuciyunjuza n’okubabalira. Petro al’ilagirire kanji-kanji oku kubabalirwa, na Yezu akag’imubabalira bwenene. Kwa lwiganyo, enyuma za Petro okuhakana Nnawabo kasharhu koshi, aciyumva kubi bwenene lugenda amagosa ajiraga. (Mt. 26:34, 35, 69-75) Cikone erhi Yezu afûka, abonekera Petro, bibonekine oku Petro ali yene mw’ako kasanzi. (Lk. 24:33, 34; 1 Kr. 15:3-5) Buzira karhinda, Yezu ababalire Petro, na mw’ako kasanzi amuyemeza n’obwalagale oku amubabalire.—Olole Marko 16:7.
14 Petro ahugûsirwe gurhi omuntu aciyumva erhi aciyunjuza n’okubabalirwa. Co carhumire aba n’obuhashe bw’okuyigiriza abandi lugenda ebi ayigaga. Kasanzi kalebe enyuma z’olusiku lukulu lwa Pentekoste, Petro ajirira Abayahudi barhali bemezi ehotuba anabahugûlira oku bayisire Masiya. Ciru akaba ntyo, omu njira y’obuzigire abayinginga omu kuderha ntya: “Lero muciyunjuzagye munahinduke, lyo ebyaha binyu bizazibwa, lyo analerha amango g’omurhûla.” (Ebj. 3:14, 15, 17, 19, 20) Muli ntyo, Petro ayerekine oku okuciyunjuza kunashumye omunya-byaha ahinduke, ko kuderha, ashanje enjira yage mbi y’okurhanya n’okujira ebintu, n’okushimbulira enjira mpyahya, erya esîmisize Mungu. Kandi entumwa Petro yayerekana oku Yehova akazazize ebyaha byabo, erhi kujira bihere. Na myaka minji enyuma z’aho, Petro ayemezize Abakristu n’obwalagale ntya: “Nyakasane [Yehova, NWT] . . . lukogo olwo ammubêra, kulya kuba arhalonza hajire owahera, ci alonza boshi baciyunjuze.” (2 Pt. 3:9) Obo buli bulangalire bwinja bwenene oku Bakristu amango bamajira ebyaha, ciru n’ebyaha bizibu!
Omu njira y’obuzigire, Yezu ababalira anayemeza n’obwalagale entumwa yage oku ayibabalire (Olole ecifungo ca 13-14)
15-16. (a) Gurhi entumwa Paolo yayiziremwo lugenda okubabalira? (1 Timoteyo 1:12-15) (b) Bici rhwaganirira omu cigabi cikulikire?
15 Saulu w’e Tarso ajijire bintu binji bibi bwenene. Al’iminyîze abanafunzi ba Yezu anakag’ibalibuza bwenene. Nkaba Bakristu banji bwenene bakag’irhanya oku nta lusiku akaciyunjuzize n’okujira empindûlo. Cikone, entanya za Yezu zali lubero bwenene n’entanya za bene bantu. Ye n’Ishe bakag’ibona amorhere minja ga Saulu. Yezu aderha ntya okubimuyerekire: “Oyo muntu nacimwishozire nti mmukolese.” (Ebj. 9:15) Yezu ajira ciru n’ecisomerine ly’arhabala Saulu aciyunjuze. (Ebj. 7:58–8:3; 9:1-9, 17-20) Enyuma z’okuba Mukristu, Saulu, wayishir’imanyikana buzinda nka ntumwa Paolo, avuga omunkwa kanji-kanji lugenda oku Yehova na Yezu bamuyeresiremwo olukogo n’obwonjo. (Osome 1 Timoteyo 1:12-15.) Paolo abwizire bene wabo na bali babo ntya: “Obwo bwonjo bwa Nyamuzinda bukulalisire mpu ociyunjuze.”—Rm. 2:4.
16 Erhi Paolo ayumva lugenda amazibu madarhi gal’iyerekire ecaha c’obuhushi cakag’ijirwa omu cigamba c’Ecikristu c’e Korinti, gurhi ajijire? Kugerera ebi adesire, rhwanayiga gurhi Yehova ayerekanamwo obuzigire erhi ahana abakozi bage, na gurhi ayerekanamwo obwonjo erhi baciyunjuza. Rhwaganirira ogo mwanzi kwa bulîri omu cigabi cikulikire.
LWIMBO 33 Ohengulire Yehova Amazibu Gawe
a Ako kanga kali kago-kago. Ene, Yehova arhahûnyiri omuntu owabo anagokezize omu kujira obuhushi agendekere abêra omu buhya haguma n’owajiraga obuhushi. Kobinali, Yehova ahîre Omugala obulongozi omu njira y’obuzigire ly’ahugûla oku omulume n’omukazi banazaza obuhya amango muguma amajira obuhushi, erhi bakacishoga okujira ntyo.—Mt. 5:32; 19:9.
b Olole omwanzi gudesire “Namna Gani Unaweza Kufaidika na Musamaha wa Yehova?” omw’Ilabiro ly’Akalalizi ly’omu nsiku 15/11/2012, buk. 21-23, cif. 3-10 (omu Ciswahiri c’e Congo).
