Entumwa Paolo yayandikire Abakristu b’e Tesalonika ntya: “Akaba hali orhalonziyumva enyigirizo zirimwo agala maruba, mumumanyirire [mumuhireko ecimanyiso, NWT].” (2 Ts. 3:14) Embere, rhwadesire oku abagula bo barhegesirwe okujira ntyo. Erhi muntu mulebe akagendekire alahira okurhumikira amakanuni g’Ebibliya ciru akaba amahanûlwa kanji-kanji, abagula bakajijire ehotuba y’okurhonda abantu omu cigamba. Enyuma z’aho, abahubiri barhal’ishinganine bagendekere bakomerana n’omuntu wahiragwa kw’ecimanyiso.

Cikone, hali obulagirire bw’okujira empindûlo. Bibonekine oku ihano lya Paolo liyerekire ebi Abakristu muguma-muguma bashinganine bajire omu kanga kalebe. Co cirhumire kurhali kwa bulagirire abagula bajire ehotuba y’okurhonda abantu omu cigamba. Bulya gurhi rhujijire eyo mpindûlo? Orhanye kw’ebi Paolo akag’iganirira erhi ahâna ery’ihano.

Paolo ayerekine oku baguma na baguma mw’eco cigamba bali “bwolo [b’ishababe, NWT].” Ali abahîre amahano gal’iyimangire oku Kanwa ka Mungu, cikone bakalahira okugarhumikira. Erhi abalambagirire embere z’aho, abahîre er’irhegeko: “Akaba omuntu arhalonza okukola, aleke n’okulya.” Ciru akaba ntyo, baguma na baguma bacir’igendekire balahira okukola lyo bacihikirigiza amalagirire gabo, n’obo bal’igwerhe obuhashe bw’okujira ntyo. Kandi bakag’icihira omu birhabayerekiri. Gurhi Abakristu bal’ishinganine bakajirira abo bantu b’ishababe?​—2 Ts. 3:6, 10-12.

Paolo aderha ntya: “Mumumanyirire [mumuhireko ecimanyiso, NWT.]” Oluderho lw’Ecigiriki lukolesibwe mw’olo lwandiko, luganirire okumanya oyo muntu omu njira yago-yago, n’okuba masu ly’arhag’irhushumya kubi. Cigamba coshi Paolo ahîre obo bulongozi, cikone arhali bagula bone. (2 Ts. 1:1; 3:6) Co cirhumire, Abakristu muguma-muguma bakabwine owabo Mukristu oli walahira okurhumikira amahano g’Akanwa ka Mungu, bakacishozire ‘okurhakomerana’ n’oyo muntu w’ishababe.

K’oko kuli kuderha oku oyo muntu akag’ijirirwa nka muntu warhenzibwe omu cigamba? Nanga, bulya Paolo ayushwîre ntya: ‘[Mugendekere] mwamuhanula kulyala omuntu ahanula mwene wabo.’ Co cirhumire, Abakristu muguma-muguma bakagendekire bacilunga oku ntimanano n’omu mukolo gw’amahubiri haguma n’oyo muntu ohizirweko ecimanyiso, cikone bakacishozire okurhacilunga haguma naye oku madinye erhi omu by’okucishagalusa. Bulya gurhi? Paolo adesire oku “ly’enshonyi zimugumya.” Okuhirwako ecimanyiso kwakarhumire oyo Mukristu w’ishababe nkaba akayumva enshonyi enyanya z’olugenzi lwage, n’okushanja.​—2 Ts. 3:14, 15.

Gurhi Abakristu bakakolesamwo ery’ihano ene? Burhangiriza, rhushinganine rhumanye bwinja erhi olo lugenzi kobinali liri “ishababe,” nk’oku Paolo aderhaga. Paolo arhakag’iganirira ababa lubero na nirhu lugenda ebintu biyerekire ezamiri erhi abasima ebintu biri lubero n’ebi rhusima. Kandi arhakag’iganirira abantu bakaba barhugayisize kone. Lubero n’oko, Paolo akag’iganirira abantu bacishoga n’obulonza bwabo okurharhumikira amahano ga Mungu g’obwalagale.

Ene, erhi rhwakabona owirhu Mukristu oyerekana iroho ly’okurharhumikira, a rhwakarhôla omuhigo rhwenene gw’okurhacilunga haguma naye oku madinye erhi omu by’okucishagalusa. Bulya ogo guli muhigo omuntu ashinganine arhôle yenene, rhurhankaguganirira abandi ahanyuma n’abali b’omu mulala gwirhu gwa hofi-hofi. Cikone rhwanagendekera rhwacilunga haguma n’oyo muntu oku ntimanano zirhu n’omu mukolo gwirhu gw’amahubiri. Erhi akashanja entanya zage n’olugenzi lwage, rhwanacib’igalukira okukomerana naye nk’oku byali embere.