1-2. (a) Nk’oku biyerekinwe omu Emigani 16:31, gurhi rhushinganine rhukabona bene wirhu na bali birhu bakola bashosi? (b) Madoso gahi rhwashuzakwo mw’eci cigabi?

 ABALAMBAGIRIRA omu parke y’e Arkansas, omu États-Unis, banarhologola e diament okw’idaho. Cikoki, ezo diaments zinabe zirhacikolwa omu industrie. N’oko kwanarhuma bantu banji babona ezo diaments n’okuzirhaluka bulya barhabwini obulagirire bwazo.

² Omu njira nguma erhi yindi, abo bene wirhu na bali birhu bishwekerezi bakola bashosihire banashushanyizibwa n’ezo diaments; babà ba ngulo ndarhi bwenene. Akanwa ka Nnâmahanga kashushanyize emvi zabo n’ecimanè erhi couronne. (Osome Emigani 16:31, Mashi Bible; 20:29) Cikone, agandi mango rhwanabula bubona obulagirire bw’abo bene wirhu na bali birhu. Emisole ebona obulagirire bw’abo bene wirhu na bali birhu bakola bashosi yanaba n’akantu k’obulagirire bwenene kulusha ciru ezo diaments. Mw’eci cigabi, rhwashuza kw’aga madoso asharhu: Bulya gurhi Yehova abona bene wirhu na bali birhu bishwekerezi bakola bashosi oku bali ba ngulo ndarhi? Nafasi nchi Yehova aba abahire omw’ikubuliro lyage? Bici rhwakajira lyo rhuyunguka bwenene n’olwiganyo lwabo?

3. Nk’oku biyerekinwe omu Ennanga 92:12-15, bulya gurhi Yehova abona bene wirhu na bali birhu bakola bashosi oku babà ba ngulo ndarhi?

³ Bene wirhu na bali birhu bakola bashosi babà ba ngulo ndarhi omu masu ga Yehova. Anababone gurhi bayosire omu kandalala, abamanyire, ananashagalukire amorhere  gabo minja. Yehova anashagaluke erhi abona abo bene wirhu na bali birhu bali bayigiriza emisole obumanye bapatire omu myaka yoshi bakolire Yehova n’obwishwekerezi. (Ayu. 12:12; Mig. 1:1-4) Kandi, Yehova anashagalukire okulembera kwabo. (Mal. 3:16) Barhabulaga mazibu omu kalamo kabo; ciru akaba ntyo, bagendekera babà n’obuyemere buzibu muli Yehova. Obulangalire bwabo okubiyerekire akasanzi kayisha bukola busêzire bwenene kulusha amango bamanyaga okuli. Na Yehova abazigire bulya bagendekire bayaliza izino lyage “ciru n’omu myaka y’obushosi.”​—Osome Ennanga 92:12-15, NWT.

4. Mandiko gahi gakaha bene wirhu na bali birhu bakola bashosi omurhima?

⁴ Akaba okola oli washosihala, oyemere n’obwalagale oku Yehova akengire omukolo wamujirire omu mango gageraga. (Hb. 6:10) Walunzire okuboko n’obushiru bunji omukolo gw’amahubiri, n’oko kunashagaluse Larha wirhu w’omu mpingu. Walembire amarhangulo, ciru n’amarhangulo g’okuvuna omurhima, wakulikira amakanuni g’obushinganyanya g’Ebibliya omu kalamo kawe, wahikiriza emikolo yago-yago mizibu bwenene, n’okukomereza abandi. Wajijire okwawe koshi ly’olambagira nk’oku ikubuliro lya Yehova linali lyahêka. Walunzire abandi okuboko wanabaha omurhima bagendekere omu mukolo gwabo gw’akasanzi koshi. Yehova akuzigire bwenene enyanya z’obwishwekerezi bwawe. Alaganyize oku ‘arhakalekêrera abacishwekera kuli ye.’ (Enna. 37:28, NWT) Akubwizire ntya n’obwalagale: “Kuhika mumere emvi kubagalira ncimmubagalira.” (Iz. 46:4) Co cirhumire, orharhanyagya mpu bulya okola oli washosihala, orhaciri wa bulagirire omw’ikubuliro lya Yehova. Oli wa bulagirire bwenene!

5. Bici abakola bashosi bakwanine bakakengera?

⁵ Abakola bashosi banarhabala omu njira nyinji. Ciru akaba banaba barhacigwerhi emisi baligwerhe embere, emyaka minji bagwerhe omu mukolo gwa Yehova yabarhabire babe na bumanye bunji. Yehova anacigendekera abakolesa omu njira ziri lubero, nk’oku rhwabona omu nyiganyo zikulikire, za mîra n’eza buno.

6-7. Ohâne enyiganyo z’Ebibliya z’abantu bashosi Yehova agishaga enyanya z’okumukolera n’obwishwekerezi.

⁶ Omu Bibliya rhwanabona nyiganyo nyinji  z’abakozi bishwekerezi ba Yehova bagendekire bamukolera banakola bashohire. Kwa lwiganyo, Musa aligwerhe myaka hofi 80 erhi arhondera akolera Yehova nka mulebi wage na mwimangizi w’olubaga lwa Israheli. Yehova acigendekire akolesa Daniyeli nka mulebi wage erhi anakola agwerhe myaka 90 na kulusha. N’entumwa Yowane yagwerhe nkaba myaka 90 na kulusha erhi Yehova amulongoza n’iroho lyage ayandike ecitabu c’Amafulûlo.

⁷ Haligi n’abandi bakozi ba Yehova bishwekerezi banji barhali manyikine bwenene, n’oko kwakarhumire abantu bakababona nka ba ntya-ntya. Cikone Yehova alibamanyire anabagisha enyanya z’obwishwekerezi bwabo. Kwa lwiganyo, Ebibliya erhaganiriri bwenene omulume ‘mushinganyanya wakagirhinya Nyamuzinda’ ohamagalwa Simeoni, cikone Yehova alimumanyire anamuha olukengwa lw’okubona omwana Yezu n’okuleba okubiyerekire oyo mwana na nnina. (Lk. 2:22, 25-35) Ocibigirhanya oku lwiganyo lwa Ana, mulebi-kazi mukana. Aligwerhe myaka 84 cikone “arharhengaga omu hekalu.” “Okukaja oku ntimanano” ngasi mango kwamulerhire obunguke erhi naye abona Yezu kanaciri kabonjo. Simeoni na Ana, bombi bali ba ngulo ndarhi omu masu ga Yehova.​—Lk. 2:36-38, NWT.

8-9. Burhabale buci bali birhu bakana bacigendekire bahâna?

⁸ Muli gano mango girhu, hali bashosi banji bishwekerezi bali lwiganyo lwinja oku baciri misole. Rhuganirire olwiganyo lwa mwali wirhu muguma ohamagalwa Lois Didur. Aligwerhe myaka 21 yone erhi arhondera omukolo gw’obupainiya bwa pekee omu Canada. Enyuma z’aho, ye haguma n’iba John, bakolera myaka minji omu mukolo gw’omuzunguko. Buzinda bakolera myaka kulusha 20 oku Beteli y’e Canada. Erhi Lois agwerhe myaka 58, ye n’iba John barhumwa baj’ikolera omu cihugo c’e Ukraine. Gurhi bajijire? Ka bakadesire mpu bakola bashosi bwenene barhakacihash’ikolera omu cindi cihugo? Bayemera okuja eyo munda, na John ahâbwa omukolo gw’okukolera omu Komite y’Etawi y’e Ukraine. Myaka nda enyuma z’aho, John afâ, cikone Lois ahiga oku agendekera akolera eyo munda. Ene, Lois agwerhe myaka 81 anacigendekire akola n’obushiru na bene wirhu na bali birhu b’oku Beteli babà bamuzigire bwenene.

⁹ Aka Lois, nkaba bakana banji barhamanyikana bwenene nk’oku byaliyosire amango b’iba bacihali; cikone baciri ba bulagirire ciru akaba bakola bakana. Yehova anashagalukire bwenene abo bali birhu balunzire b’iba okuboko myaka minji banacigendekire bamukolera n’obwishwekerezi. (1 Tm. 5:3) Na kandi bali lwiganyo lwinja oku baciri misole.

10. Lwiganyo luhi lwinja Tony arhulekire?

¹⁰ Bene wirhu na bali birhu banji bishwekerezi barhacirhenga omu nyumpa enyanya z’obushosi, nabo bali ba ngulo ndarhi bwenene. Kwa lwiganyo, mwene wirhu muguma  ohamagalwa Tony arhacirhenga omu nyumpa. Abatizibagwa omu Pennsylvanie, omu États-Unis, omu Mwezi gwa 8, 1942 erhi agwerhe myaka 20. Kasanzi kasungunu enyuma z’okubatizibwa bamubwira oku abe musoda, erhi alahira bamushweka myaka ibirhi n’enusu. Ye na mukage Hilda, balezire bana babo babirhi omu okuli. Omu myaka minji, Tony akozire omu bigamba bisharhu nka mugula mwimangizi (okola ohamagwalwa ene muratibu w’embaraza y’abagula) anakozire nka mwangalizi w’entimanano y’omuzunguko. Akagilongoza entimanano n’amafunzo g’Ebibliya omu prizo. Buno akola agwerhe myaka 98, cikone acigendekire n’obushiru omu mukolo gwa Yehova. Acigendekire okujira okwage koshi omu mukolo gwa Yehova n’okukola haguma n’ecigamba cage!

11. Gurhi rhwakayerekana oku rhushagalukire bene wirhu na bali birhu bakola bashosi barhacirhenga omu nyumpa?

¹¹ Gurhi rhwakayereka olukengwa obo bene wirhu na bali birhu barhacirhenga aha mwababwe? Abagula banabashangîza oku mikolo bakanahasha omu cigamba. Rhwanayerekana oku rhubashibirire omu kubalambagirira erhi kuganira nabo kugerera e video conférence. Rhwanajira okwirhu koshi lyo rhushibirira bwenene bene wirhu na bali birhu bakola bashosi bali balama kuli n’ecigamba cabo. Erhi akaba rhurhali masu, rhwanahikira aha rhwayibagira abo bene wirhu na bali birhu. Baguma ba muli bo, banabona nka kurhali kwinja okuganirira ebibayerekire. Cikone rhwanayunguka bwenene erhi rhwakaciha akasanzi k’okubadosa amadoso n’okuyumvirhiza amango bali barhuganirira omwishingo bacibwinîre omw’ikubuliro lya Yehova.

12. Bici rhwakasomerwa okubona omu cigamba cirhu?

¹² Nkaba rhwanasomerwa okubona oku rhugwerhe enyiganyo nyinja z’abo bene wirhu na bali birhu bishwekerezi omu cigamba cirhu. Mwali wirhu muguma ohamagalwa Harriette akolire Yehova n’obwishwekerezi myaka minji omu cigamba cage, omu New Jersey, omu États-Unis. Buzinda agend’ilama emw’omwali. Bene wirhu b’omu cigamba ahamiragamwo baciha akasanzi k’okumumanya, banabona oku ali wabulagirire bwenene. Akabaha omurhima omu kubaganirira ebi acibwinîre omu mukolo gw’amahubiri amango ayigaga okuli omu mwaka gwa 1925. Ago mango, erhi akajire omu mahubiri akagihêka e brosse à dent yage mpu ly’arhabulaga ebi acêsamw’amino gage erhi bakamushweka. Omu mwaka gwa 1933 ashwesirwe kabirhi akayusa omugobe omu prizo. Muli ako kasanzi, iba orhali Muhamirizi wa Yehova agendekire amulunga okuboko omu kushibirira abana babo basharhu. Kobinali, abakola bashosi bishwekerezi aka Harriette bashinganine okuhâbwa olukengwa!

13. Bici rhwayizire lugenda enafasi abakola bashosi bagwerhe omw’ikubuliro lya Yehova?

¹³ Bene wirhu na bali birhu bakola bashosi babà ba bulagirire omw’ikubuliro lya Yehova. Bacibwinîre omu njira ziri lubero gurhi Yehova agishire ikubuliro lyake n’oku abagishire bonene. Amagosa bajijire omu kalamo kabo gabayigirizize bintu binji. Okababona nka “nshoko ya bwenge,” onacihangane oyige binji kugerera kw’ebi bacibwinîre. (Mig. 18:4, NWT) Erhi wakaciha akasanzi k’okubamanya bwinja, obuyemere bwawe bwanazibuha na kandi wanaciyigiriza bintu binji!

14. Bici olwandiko lwa Olushika 32:7 luhîre emisole omurhima bajire?

¹⁴ Ocihirireho akasanzi k’okuganiza bene wirhu na bali birhu bakola bashosi. (Osome Olushika 32:7.) Kobinali, barhacibona  bwinja, barhanacilambagira duba-duba, banakola bagwerhe amazibu g’okuganira, cikone baciri misole omu kandalala, banacijirîre “izino [linja]” haguma na Yehova. (Muh. 7:1) Okengere bulya gurhi Yehova ababona oku babà ba ngulo ndarhi. Ogendekere wabayereka olukengwa. Obe aka Elisha. Onanîra ho Eliya olusiku luzinda bagezagya haguma. Kasharhu koshi abwira Eliya erhi: “Ntakuleke.”​—2 Bam. 2:2, 4, 6.

15. Madoso gahi rhwakadosa bene wirhu na bali birhu bakola bashosi?

¹⁵ Oyerekane oku oshagalukire bene wirhu na bali birhu bakola bashosi omu kukabadosa amadoso lyo baganira. (Mig. 1:5; 20:5; 1 Tm. 5:1, 2) Wanabadosa amadoso nk’aga: “Amango waciri murho, bici byakuyemezize n’obwalagale oku wabwîne okuli?” “Gurhi ebi wacibwinîre omu kalamo byakurhabire oyegere Yehova?” “Bici byakurhabire ogendekere okuba n’omwishingo omu mukolo gwa Yehova?” (1 Tm. 6:6-8) Buzinda oyumvirhize amango bali bakuganirira ebi bacibwinîre.

16. Erhi okola mushosi akaganira n’ociri musole, bunguke buci oko kwakabalerhera bombi?

¹⁶ Amango okola mushosi n’ociri musole bali baganira, bombi banayunguke. (Rm. 1:12) Mwe misole, mwanabona ebyakamuyemeza n’obwalagale oku Yehova anashibirire abakozi bage, n’abakola bashosi nabo banaciyumva oku obazigire. Banashagalukira okuganirira gurhi Yehova abagishire.

17. Bulya gurhi rhwakaderha oku, oku emyaka erhi yagera ko na bene wirhu na bali birhu bakola bashosi bagendekera babà binja?

¹⁷ Oku emyaka eri yagera, ko n’iranga ligendekera lyaharabika, cikone abali bishwekerezi kuli Yehova banagendekere babà binja ngasi mwaka. (1 Ts. 1:2, 3) Bulya gurhi bohe bagendekera babà binja? Bulya, oku emyaka eri yagera, ko banagendekire baleka iroho litagatifu lya Nnâmahanga libakomereze n’okubarhabala babe n’amorhere minja. Oku rhwagendekera rhwamanya bene wirhu na bali birhu bakola bashosi, okubaha olukengwa, n’okuciyigiriza binji kuli bo, ko rhwanagendekera rhwababona oku bali ba ngulo ndarhi!

18. Bici rhwaganirira omu cigabi cikulikire?

¹⁸ Ecigamba coshi canasêra amango abaciri misole bali bashagalukira abakola bashosi na kandi amango abakola bashosi nabo bali bashagalukira abaciri misole. Omu cigabi cikulikire, rhwaganirira gurhi abakola bashosi bakayerekana oku bashagalukire emisole omu cigamba.